Kùlofɔli wi nyafɛnigɛ gè sínmɛ kɔli mɛ́ gè
101
1 Dawuda ŋúnudanʔa gī gàa pe ŋú nɛ́ yakpuɔnrɔ ní dè.
Mi béri ŋú bànguɔ dɛ́nigɛ wuʔu nɛ̄ gè
nɛ́ kàyuʔujuusinmɛ wuʔu nɛ̄ gè.
Yewe, muɔ mɛ́ m'béri yakpuɔnrɔ kpúɔn dè.
2 M'bé mìɛ ŋàʔana bèri tari kozinge nɛ̄ gè nɛ́ funviige ní.
Lɛ̀lɛ líi nī muɔ bága pɛn bè pa mi sáʔa wè ?
Mi saʔa nī gè, m'béri tári nɛ́ funviige ní.
3 Miǐ fɔ̀li yapiʔi káà fáala yaʔa ki‑ puu mi yiʔɛ mɛ́ gèʔ.
Kakoligbiʔilide ti mi 'biɛn; tiǐ gbɛ̀ jáa bè mi còʔ.
4 Miǐ gbɛ̀ kolimɔ sɔ̀ngirɔ yaʔaʔ ti- jíin mi fungo nī gèʔ;
kapiʔi gè, mi wè nɛ caa bè ki cɛ́nʔ.
5 Siɛn ŋáà wi nyɛ́ni wi siɛnnyɛni míʔɛ córi làrimɛ nī bè,
m'bé wi nyuɔ tɔ́n gè.
Siɛn ŋáà wi yiʔɛ kiī taʔaga gè, a wiī nɛ wìi kpóri wè,
miǐ gbɛ̀ wi kpàri bè còʔ.
6 Kùlo ni siɛnnɛ bálì nɛ̄ m'bé gbɛ̀ tɛ́ngɛ wè, mi
sɔ̀ngirɔ ti bé puu pe nɛ̄, pe‑ kò mi táanni.
Ŋàa wi 'taʔa koligo nɛ̄ gè nɛ́ funviige ní wè, wire béri baara mi mɛ́.
7 Siɛnfaanniwɛ wiǐ gbɛ̀ kò mi saʔa nī gèʔ.
Káfinɛvinɛwɛ míɛni wiǐ gbɛ̀ kò nɛ́ mi níʔ.
8 Cɛngɛ ó cɛngɛ sínbinimɛ táanni bè,
m'bé kùlo ni siɛnpiile pe mìɛni nyuɔyɔ tɔ́n yè,
bé kapiigbiʔilile pe mìɛni yige Yewe kàʔaa nī gè.