Wuʔɔgɔfɔli náarigɛ gè
88
1 Ŋúnuŋuminɔ yiɛginiwɛ ŋúnugo gī. Kore jaalaa ŋúnudanʔa gī, gàa pe ŋú nɛ́ yakpuɔnrɔ ní dè, nɛ́ maana ní lè, fùrɔgɔ lɛ̀lɛ nī lèb. Emani wè, Ezirayé wuu wèc, wire sícilimɛ ŋúnugod gī.
2 Yewe yo, mi suɔfɔli Kulocɛliɛ yo,
mi nɛ yékpoli wáari lè muɔ kúrugu cɛngɛ ó cɛngɛ, ma mi suɔ;
pìlige ó pìlige nī, mi nɛ̂ yéri muɔ yiʔɛ mɛ́ gè.
3 ‑Ki yaʔa mi náarigɛ ki‑ kɛ́ fúɔ bè sa nɔ̀ muɔ nɛ̄ !
Ma líiye cáan ma mi kɔngɔ lúʔu gè !
4 Nɛ́ ki cɛ́n mi fungo ki 'tín wuʔɔgɔ nɛ̄ gè,
a mi sìi wi 'nɔ̀ kusiʔi kanyuɔ nɛ̄ gè.
5 Piyē nɛ mi tɔ́ri nɛ́ bàli ní pe tíri nyɛgɛ nī gè;
mi 'kò nàgalirige káà tíɛlɛ
gàa nī ŋɔri ní wè nɛ tíin gèʔ.
6 Mi yē kúbilo sunʔɔmɔ nī bè,
majo bàli pe cî kpúu níɛ̀ pe sínge kpɔ̀ngɔlilɔ nī gèle,
á muɔ 'fìʔɛ nɛ́ pe ní wè;
pe nɛ̂ cúʔɔ nɛ̀ yiri muɔ kɔli nī gè.
7 Muɔ 'mi nyɔ́gɔ kàwiʔi sícuugo nī gè,
kùu yebiliwuɔlɔ laamɛ nī bè.
8 Muɔ fundanʔanigɛ ki 'lúbugo nɛ̀ tóri mi nɛ̄,
muɔ 'mi wuʔɔ nɛ́ muɔ lakuruyo yi mìɛni ní yè
nyàa nī mi nɛ yíbiri yè. Ye‑ ŋɔ́ cɛ̀.
9 Muɔ 'pe líili mi nɛ̄, bàli pe 'mi cɛ́n bèle,
a muɔ 'mi kpíʔile a mi 'kò laabiri yɛgɛ pe mɛ́;
mi yē tɔ́nwɔ, mi sǐ ní gbɛ̀ yiriʔ !
10 Mi nyapile ni 'fùrɔ wuʔɔgɔ kɛnmɛ nɛ̄ bè.
Mi nɛ muɔ yeri cɛngɛ ó cɛngɛ, Yewe;
mi 'kiyɛ cɛ̀li yè nɛ yaʔa muɔ mɛ́ súuri.
11 Muɔ bága kakpuʔɔ kpíʔile lé kúbilo mɛ́ bèle ?
Bàli pe 'kɛ́ bèle o, pe bé ní ga yéri lé bè muɔ gbùʔɔrɔ ? Ye‑ ŋɔ́ cɛ̀.
12 Piyē nɛ muɔ bànguɔ dɛ́nigɛ wuʔu nyu gè lé cígini baa nyɛgɛ nī gè ?
Piyē nɛ muɔ kányiʔɛ kaala wuʔu nyu gè lé baa kúbilo tiʔɛ nī gè ?
13 Muɔ kakpoliyo yi bé ní gbɛ̀ cɛ́n lé yebilige nī gè ?
Muɔ kasinnɛ ni bé ní gbɛ̀ cɛ́n lé fìʔɛrɛ kùlo nī lè ?
14 ʔé, mi wè, mi nɛ muɔ yeri ma mi suɔ, Yewe !
Sínbinimɛ táanni bè, mi náarigɛ ki níɛ yɛ̀gí muɔ yiʔɛ mɛ́ gè.
15 Yewe yo, gáa nɛ̄ muɔ 'mi wáa ?
Gáa nɛ̄ muɔ 'yiʔɛ làrigɛ gè mi nɛ̄ ?
16 Nɛ̀ ki líɛ baa mi nàgapunmɔ lɛ̀lɛ nī lè,
mi yē nɛ wuʔɔ; ki yé kò cɛ̀ri dí mi kùu wī.
Mi nyɛ́nì muɔ sànviige wáa kele kpàri gèle nɛ̀ cò,
mi 'nɔ̀ mi láʔala nɛ̄ lè.
17 Muɔ fundanʔanigɛ kàsun kiī nɛ ŋu mi nɛ̄,
muɔ fíɛrɛ kele ke mi 'cúʔɔ.
18 Ke 'mi màʔa nɛ̀ suʔu bɛ̀ kàsakpiile luʔɔ tíɛlɛ,
kiyē nɛ mi mári nɛ mi cílele kayɔbiyɔ yi mìɛni nɛ̄.
19 Muɔ nyɛ́nì mi siɛndɛninɛ nɛ́ mi nàgorilo líili bèle mi nɛ̄,
yebiliwuɔlɔ lire yákuɔ ni 'kò mi gbuɔnyɛni wè.