Mi Kàfɔli, -muɔ baakuɔwɔ suɔ wè !
86
1 Dawuda náarigɛ gī.
Yewe yo, ‑líiye cáan m'mɛ́, ma siɛnnugoro kɛn m'mɛ́ !
Nɛ́ ki cɛ́n fuunmɔ nɛ́ fɔ̀ngɔ yē mi nɛ̄.
2 Ma mi wéli, nɛ́ ki cɛ́n mi 'mìɛ puɔ muɔ nɛ̄ !
Muɔ ŋáà wī mi Kulocɛliɛ wè, ma mi suɔ,
mi ŋáà wī muɔ baakuɔwɔ wè,
mi ŋáà wī mi 'mi sɔ̀ngirɔ taʔa dè muɔ nɛ̄ wè !
3 Mi Kàfɔli, ma kpuʔɔrɔ taʔa dè mi nɛ̄,
nɛ́ ki cɛ́n mi nɛ yékpoli wáari lè muɔ kúrugu cɛngɛ ó cɛngɛ.
4 ‑Fundaanra kɛn muɔ baakuɔwɔ mɛ́ wè,
nɛ́ ki cɛ́n mi 'mi fungo ki mìɛni yiʔɛ muɔ kɔli mɛ́, mi Kàfɔli.
5 Nɛ́ ki cɛ́n, mi Kàfɔli, muɔ nyɛ́nì nyuɔ, muɔ nɛ ki yɛri.
Bìli pe mìɛni bīɛlɛ pe muɔ fiɛn wè, muɔ bànguɔ dɛ́nigɛ kiī kpuʔɔ pe kɔli mɛ́ gèa.
6 Mi náarigɛ lúʔu gè cɛ̀ngɛ, Yewe;
ma líiye cáan mi mɛ́, mi nɛ muɔ fiɛn wī.
7 Mi nɛ muɔ yeri mi fùrɔgɔ lɛ̀lɛ nī lè,
nɛ́ ki cɛ́n muɔ bé mi náarigɛ cò gè.
8 Mi Kàfɔli, wàa ní wè baa muɔ tíɛlɛ kulocɛlɛlɛ sunʔɔmɔ nī bèʔ.
Yakaa wè baaʔ gàa ki bé gbɛ̀ tɔ́nminɔ nɛ́ muɔ kakpiʔiligele ní gèleʔb.
9 Kùlogolo gálì ke mìɛni muɔ 'faan gèle,
ke béri báan de tun de cúbulo muɔ yiʔɛ mɛ́ gè,
mi Kàfɔli, bé kpuʔɔrɔ taʔa muɔ míʔɛ nɛ̄ gèc.
10 Nɛ́ ki cɛ́n muɔ nyɛ́nì kpúʔɔ, muɔ yē nɛ kakpoliyo kpínʔini.
Muɔ nigbe wī Kulocɛliɛ wèd.
11 Yewe yo, ‑mi tɛnmɛ muɔ koligo nɛ̄ gè
kire ga buu mi de tári de síngi muɔ kányiʔɛ nī gè.
‑Mi fungo yaʔa gè ki‑ puu nigbe
kire ga buu mi de fìʔɛ́ muɔ míʔɛ nɛ̄ gè.
12 Mi Kàfɔli Kulocɛliɛ, je m'béri muɔ gbùʔɔrɔ́
nɛ́ mi fungo ki mìɛni ní !
M'béri kpuʔɔrɔ tari muɔ míʔɛ nɛ̄ gè súuri !
13 Nɛ́ ki cɛ́n muɔ bànguɔ dɛ́nigɛ ki 'kpúʔɔ mi kɔli mɛ́ gè,
a muɔ 'mi suɔ kusiʔi yebiliwuɔlɔ mɛ́ lè.
14 Kulocɛliɛ yo, nìɛnyiɛnigɛfɔlilɔ pe 'yɛ̀ mi kúrugu,
nɛ̀mɛfɔlilɔ gboli ni 'caa bè mi kpúu.
Tiʔɛ wè muɔ mɛ́ʔ pe sɔ̀ngirɔ nī dèʔ.
15 Nɛ̀ ki yaʔa muɔ wè, mi Kàfɔli wè,
muɔ yē nyinidaaguugo Kulocɛliɛ,
níɛ kpuʔɔrɔ kanʔa siɛnnɛ mɛ́ bèle.
Muɔ fungo kiì yɛ̀ madɛniʔ;
bànguɔ dɛ́nigɛfɔli wī muɔ wè, nɛ́ ní kányiʔɛfɔlie.
16 Yiʔɛ mi kɔli mɛ́, ma kpuʔɔrɔ taʔa dè mi nɛ̄,
‑muɔ ŋɔri kɛn dè mi mɛ́, muɔ baakuɔwɔ wè,
ma sí mi suɔ, mi ŋáà wī muɔ baakuɔcuɔ wi jaa wè !
17 ‑Fìɛ tìɛ mi nɛ̄ muɔ kacɛ̀ngɛ wuu wè,
dí mi leguulo pe‑ wi nyaa, fìɛrɛ sí tɔ́n pe nɛ̄ !
Nɛ́ ki cɛ́n muɔ wè, Yewe,
muɔ ma mi suu níɛ mi fìɛlɛ́.