Yewe yo, koli ma nyuɔ weli nɛ̄ !
85
1 Ŋúnuŋuminɔ yiɛginiwɛ wuʔu gī. Kore jaalaa ŋúnudanʔa gī gàa pe ŋú nɛ́ yakpuɔnrɔ ní dè.
2 Yewe yo, muɔ nyɛ́nì kacɛ̀ngɛ kpíʔile muɔ kùlo nɛ̄ lè
a muɔ 'koli nɛ̀ Yakuba siimɛ kɔ́ri bè nɛ̀ pɛn,
bàli pe 'puu sùkulolo bèle.
3 Muɔ nyɛ́nì muɔ siɛnnɛ kolimɔ láʔa bè,
muɔ 'pe kapiʔile ke mìɛni kàsulugo suɔ gè. Ye‑ ŋɔ́ cɛ̀.
4 Muɔ nyɛ́nì muɔ fundanʔanigɛ láʔa gè pe nɛ̄;
muɔ fungo ki cé yɛ̀ bɛ̀ kàsun tíɛlɛ, a muɔ 'koli nɛ̀ ki tìrige pe kúrugu.
5 Weli suɔfɔli Kulocɛliɛ yo, ‑weli yaʔa weli koli bè pɛn !
Koli ma muɔ funbiɛnrɛ láʔa dè weli nɛ̄ !
6 Muɔ bé ní kò lé muɔ fundanʔanigɛ nɛ̄ gè súuri weli kɔli mɛ́ gè ?
Muɔ bé ní muɔ funyɛrigɛ yaʔa gè weli nɛ̄ súuri lé
kɛ̀ngɛlɛ ke mìɛni nī lé ?
7 Muɔ sǐ ní koliʔ ŋɔri nyɔ́gɔ weli nī lé,
kire ga buu muɔ siɛnnɛ pe‑ kò fundaanra nɛ̄ muɔ nī ?
8 Yewe yo, ‑muɔ bànguɔ dɛ́nigɛ tìɛ gè weli nɛ̄ !
‑Muɔ suɔlɔ kɛn lè weli mɛ́ !
9 M'béri ki lúru gàa Kulocɛliɛ bé juu gèb:
Yewe nɛ nyu bè yanyige kpíʔile wi siɛnnɛ mɛ́ bèle,
peli bálì pe 'pìye puɔ wi nɛ̄ wèc.
Gìi sí gī baa gè, kiì yɛli pe‑ ní koli pe ledomɔ kúrugu bèʔd !
10 ʔaan, wi suɔlɔ ni nyɛ́nì kpɔni pe nɛ̄, bàli pe wi fìʔɛ́ bèle,
kire ga buu wi kpuɔmɔ pi‑ kò weli kùlo nī lè.
11 Wi bànguɔ dɛ́nigɛ gè nɛ́ kányiʔɛ ní gè, yi 'yìi kpàli,
wi sínmɛ bè nɛ́ wi yanyige ní gè, ti 'tìi wáa nɛ̀ mígi.
12 Kányiʔɛ ki nɛ̂ fìin dàala nɛ̄ lè, sínnɛ ni nɛ̂ tìgi nyìʔɛnɛ nī lè.
13 ʔaan, Yewe wi bé ki kɛn gàa ki 'nyuɔ gèe;
weli dàala ni bé yaliire kɛn dè.
14 Sínnɛ niī nɛ tári wi yiʔɛ mɛ́ gèf,
bè wi yedaʔala tóridiɛyɛ gbòbori yè.