Fundaanra tánʔagbuɔlɔ ŋúnuyɔ a piyē nɛ waa Gbùʔɔrɔsaʔa mɛ́ gè
84
1 Ŋúnuŋuminɔ yiɛginiwɛ wuʔu gī. Kore jaalaa ŋúnudanʔa gī gàa pe ŋú nɛ́ yakpuɔnrɔ ní dè, Gatiyé gɔrib ní wèc.
2 Muɔ Kòridiʔɛ ki 'mi sɔ́migɔ nɛ̀ dɛ́ni !
Muɔ wuʔu gī, Yewe ŋáà wī Nyìʔɛnɛ Kapiɛngbuɔnnɔ Kàfɔli wè !
3 Yewe yo, mi fungo ki wári nɛ̀ tóri bɛ̀ ki láa yē mi nɛ̄
bè jíin baa muɔ Gbùʔɔrɔsaʔa ki dàliyɛ nī yè,
mi fungo nɛ́ mi céri tiī nɛ fundaangbuɔrɔ kpínʔini
Kulocɛliɛ wowiiwe kúrugu wè.
4 Sínjapile tíimɛ ni nɛ̂ kòridiʔɛ taa gè,
gànlɛlɛ míɛni ni nɛ̂ ni saʔa faan gè níɛ ni pìile sii bèle,
baa muɔ gbùʔɔrɔdiɛyɛ táanni yè,
Yewe ŋáà wī Nyìʔɛnɛ Kapiɛngbuɔnnɔ Kàfɔli wè,
mi Kùlofɔli nɛ́ mi Kulocɛliɛ !
5 Bàli pe kòrí muɔ saʔa nī gè, peli wuʔu kiī tànʔa.
Piyē nɛ muɔ gbùʔɔrɔ́ lɛ̀lɛ ó lɛ̀lɛ nī lè. Ye‑ ŋɔ́ cɛ̀.
6 Siɛnnɛ bálì pe nɛ̂ pe ŋɔri taa dè muɔ nī wè, peli wuʔu kiī tànʔa;
pe funyɔ yiī gbòboriyaʔaya bè Siyɔn kàʔa koligo tánʔa gè.
7 A piyē nɛ tòrí Baka jùlɔgɔd tiʔɛ nī gè, ki tiʔɛ ki nɛ̂ kò lawiʔile;
kàsaaya nyáà yi tun mbeligele lɛ̀lɛ nī lè,
yire nɛ̂ jùlɔgɔ nyì gè a ki nɛ̂ kò kápaligɛe.
8 A pe tári nɛ sìʔɛrɛ cɛ̀cɛ wè, kàa níɛ fàri pe ŋɔri nɛ̄ dè
fúɔ pe sa nɔ̀ Kulocɛliɛ yiʔɛ mɛ́ gè Siyɔn kàʔa nī gè.
9 Yewe yo, Kulocɛliɛ ŋáà wī nyìʔɛnɛ kapiɛngbuɔnnɔ Kàfɔli yo,
‑mi náarigɛ lúʔu gè;
Yakuba Kulocɛliɛ yo, ma líiye cáan mi mɛ́. Ye‑ ŋɔ́ cɛ̀.
10 Kulocɛliɛ, ‑kùlofɔli wéli wè,
wire ŋáà wī weli timɔzigege gè nɛ̀ weli tɔ́n wè;
‑kùlofɔli wéli wè nɛ́ funjɛ̀ngɛ ní, wire ŋáà muɔ 'nyíɛnɛ nɛ̀ kɔ̀n wè.
11 ʔé, a mi 'cɛngɛ nigbe kúɔ muɔ Gbùʔɔrɔsaʔa dàliyɛ nī yè,
kire 'pɔ́ri nɛ̀ tóri cɛnyɛ sirakogunɔ nɛ̄ kayɔbigɔ káà mɛ́.
Ki 'mi dɛ́ni mi‑ yéri Kulocɛliɛ saʔa wìile nī lè
sɛ́ni mi sa tɛ́ni funbiiyefɔlilɔ fɛ̀ni saaya laara yè.
12 Nɛ́ ki cɛ́n Yewe Kulocɛliɛ wiī cɛngɛ weli mɛ́, nɛ́ ní timɔzigege.
Wiī nɛ kpuʔɔrɔ kanʔa níɛ kacɛ̀ngɛ kpínʔini,
wi wè nɛ cìʔí bè yacɛ̀nrɛ kɛnʔ
bàli mɛ́ pe tári wi koligo nī gè nɛ́ funviige ní gè.
13 Yewe ŋáà wī Nyìʔɛnɛ Kapiɛngbuɔnnɔ Kàfɔli wè,
ŋàa wi 'wi sɔ̀ngirɔ taʔa dè muɔ nɛ̄ wè, wi wuʔu kiī tànʔa !