Yeri Kulocɛliɛ kàʔa kpóri gè
48
1 Ŋúnugo. Kore jaalaa ŋúnudanʔa gī gàa pe ŋú nɛ́ yakpuɔnrɔ ní dèb.
2 Yewe wi 'kpúʔɔ, weli Kulocɛliɛ wi 'yɛli nɛ́ gbùʔɔrilɔ ní wi kàʔa nī gè,
gàa gī wi nyagurugo wàlidɛngɛgɛ nɛ̄ gè.
3 Kire nyagurucɛ̀ngɛ gè, kiī nɛ fundaanra kanʔa dàala ni mìɛni mɛ́,
Siyɔn nyagurugo gè, gàa gī Kulocɛliɛ kòridiʔɛ gèc,
gàa gī Kùlofɔgbuɔwɔ kàʔa gè.
4 Kulocɛliɛ wiī ki nàkpaanliriye nī yè,
wi nyɛ́nì ki tìɛ wire yē líʔirejodiʔɛ.
5 Kùlofɔlilɔ pe nyɛ́nì pìye pínɛ bè sa kapiɛnnɛ kpúɔn lè,
pe mìɛni 'pínɛ nɛ tári nɛ waa bàa tuu Siyɔn kàʔa nɛ̄ gè.
6 Bà pe kɛ́nì ki nyaa gè, a ki 'pe fungo wúɔ
a pe 'fíɛ, a pe mìɛni 'koli nɛ̀ fɛ̀ !
7 Piyē nɛ fún kpuʔɔ,
majo bɛ̀ liyɛyaara cî cesiiwe cò wè,
8 nɛ́ míɛni bɛ̀ káfaligbuʔɔ tíɛlɛ gàa ki cî kɔ́n cɛngɛnyɛnifoligɔli mɛ́ bè,
gàa ki cî nɛ wáari gè nɛ kɔ́rikpoliyo kabari yè kuʔɔjii luʔɔ nɛ̄ gè.
9 Gàa weli 'lúʔu gè, a weli 'ki nyaa míɛni weli Kulocɛliɛ kàʔa nī gè,
Yewe ŋáà wī Nyìʔɛnɛ Kapiɛngbuɔnnɔ Kàfɔli wè, wi kàʔa nī gè;
Kulocɛliɛ wi 'ki kpíʔile a ki 'kò lìrige súuri. Ye‑ ŋɔ́ cɛ̀.
10 Kulocɛliɛ yo, bè weli yaʔa muɔ Gbùʔɔrɔsaʔa nī gè,
weli nɛ sɔ̀ngí nɛ taʔa nɛ́ muɔ bànguɔ dɛ́nigɛ ní gè.
11 ʔé Kulocɛliɛ, bɛ̀ muɔ míʔɛ ki 'kpúʔɔ nɛ̀ sɛ́nì nɔ̀
dàala láʔagɛlɛ nɛ̄ gèle,
bɛ̀ míɛni ki yē muɔ gbùʔɔrilɔ ni 'kɛ́ fúɔ nɛ̀ sɛ́nì nɔ̀ baa
kire tiɛyɛ nī yè.
Sínnɛ niī muɔ kàliige kɔli nī gè.
12 Siyɔn nyagurugod kiī nɛ fundaanra kpínʔini,
Zuda kàaya tɛ́nimɛ piī nɛ muguri muɔ kàyuʔujuuro nɛ̄ dè.
13 Yeri tári yeri Siyɔn kàʔa mári gè, ye ki màʔa ye suʔu,
yeri ki saakpaʔaliyɛ lìriye tɔ́ri yè !
14 Yeri ki gunliriye wéli yè, yeri ki nàkpaanliriye wéli yè yeri ciʔigi,
kire ga buu yeli gbɛ̀ pari ti nyu yeli siimɛ wuulo mɛ́ bèle.
15 Nɛ́ ki cɛ́n ki Kulocɛliɛ ŋáà wè, wiī weli Kulocɛliɛ súuri lɛ̀lɛ ó lɛ̀lɛ nī;
wi bé puu weli yiɛginiwɛ lɛ̀lɛ ó lɛ̀lɛ nī.