Kulocɛliɛ wire wī duniya Kùlofɔli wè
47
1 Ŋúnuŋuminɔ yiɛginiwɛ wuʔu gī. Kore jaalaa ŋúnudanʔa gī gàa pe ŋú nɛ́ yakpuɔnrɔ ní dèb.
2 Yeli bálì bīɛlɛ kùlogolo siɛnnɛ bèle, ye mìɛni bèle,
yeri kadaʔala kóri gèle !
Yeri fundaanra kòkuʔulo wáari Kulocɛliɛ mɛ́ wè !
3 Nɛ́ ki cɛ́n Yewe ŋáà wī Duniya wi Mìɛni Nyùgo nɛ̄ gè,
siɛnnɛ pe mìɛni 'yɛli bèri fìʔɛ́ wi nɛ̄,
wire ŋáà wī duniya wi mìɛni Kùlofɔgbuɔwɔ wè.
4 Wi 'ki kpíʔile a weli 'fànʔa taa kùlogolo siɛnnɛ nɛ̄ bèle,
nɛ́ duniya kùlogolo tìrige gèle weli tɔliyɔ láara yè.
5 Wi nyɛ́nì kùlo nyíɛnɛ nɛ̀ kɔ̀n ni‑ puu kɔrigɔ weli mɛ́;
ni yē weli kpuɔmɔ, weli bálì we yē Yakuba siimɛ bè,
bàa pi 'Yewe dɛ́ni wè. Ye‑ ŋɔ́ cɛ̀.
6 Kulocɛliɛ wiī nɛ yɛ̀gí nɛ waa
á piyē nɛ fundaanra yékpuʔulo wáari gèle wi mɛ́.
Yewe wiī nɛ yɛ̀gí nɛ́ waa á piyē nɛ kàkpaanya wíi yè wi mɛ́.
7 Yeri ŋú yeri Kulocɛliɛ gbùʔɔrɔ́ wè, yeri ŋú !
Yeri yakpuɔnrɔ kpúɔn dè yeri weli Kùlofɔli gbùʔɔrɔ́ wè, yeri ŋú !
8 Nɛ́ ki cɛ́n Kulocɛliɛ wi yē duniya wi mìɛni Kùlofɔli.
Yeri sícilimɛ ŋúnugo ŋú, ye wi kpúʔɔ !
9 Kulocɛliɛ wi kùlofɔlimɔ piī kùlogolo ke mìɛni nyùgo nɛ̄.
Wiī tɛ́niwɛ wi kùlofɔlilɔ kácunʔɔ wàlidɛngɛgɛ nɛ̄ gè.
10 Kùlogolo ke fànʔafɔlilɔ pe 'pìye pínɛ
nɛ́ Birayima Kulocɛliɛ wi siɛnnɛ ní bèle,
nɛ́ ki cɛ́n peli bīɛlɛ fànʔafɔlilɔ bèle, duniya wélifɔlilɔ bèle,
peli yē Kulocɛliɛ wi kiyɛ nīc; wiī pe mìɛni nyùgo nɛ̄ !