Siɛn sǐ gbɛ̀ waliniʔɛgɛ taa bè wi sìi suɔ wèʔ
49
1 Ŋúnuŋuminɔ yiɛginiwɛ wuʔu gī. Kore jaalaa ŋúnudanʔa gī gàa pe ŋú nɛ́ yakpuɔnrɔ ní dèb.
2 Yeli bálì bīɛlɛ kùlogolo siɛnnɛ bèle, ye mìɛni yeri lúru !
Ye‑ líiye cáan ye mìɛni bèle, duniya siɛnnɛ,
3 lewiile yo, siɛn ó siɛn,
lɔrifɔlilɔ bèle nɛ́ fɔ̀ngɔfɔlilɔ ní bèle !
4 Mi nyuɔ ki bé laaduumɔ siɛnrɛ juu,
mi funzɔngirɔ ti bé puu nɛ́ sícilimɛ ní.
5 Mi bé líiye cáan bèri kàsiile ŋúnugo sɔ́migi gè de lúru,
m'bé yúgogbɛngɛ wáa bè ki kɔri juu wè nɛ́ gɔripile ní lè.
6 Gáa ki bé nyuɔ mi nɛ̄ mi de fìʔɛ́ wuʔɔgɔ cɛngɛ nī gè
bà káfinɛvinɛnɛ pe kolimɔ pi 'mi màʔa nɛ̀ suʔu bè ?
7 Pe nyɛ́nì pe sɔ̀ngirɔ taʔa dè pe lɔri nɛ̄ dè,
níɛ pìye nyíɛnɛ nɛ́ pe waliniʔɛgɛ ní gèc.
8 Kányiʔɛ nɛ̄, siɛn wáà fáala sǐ gbɛ̀ wi siɛnnyɛni sìi fùgu wè bè suɔ
Kulocɛliɛ yiʔɛ mɛ́ gèʔ,
siɛn wire tíimɛ míɛni sǐ gbɛ̀ wi sìi lɔri sàri dèʔd.
9 Pe sìi wi lɔri ti 'gbɛ̀n nɛ̀ cáanri,
siɛn sǐ gbɛ̀ waliniʔɛgɛ taa bè wi suɔʔ,
10 bè kò sìi nɛ̄ lɛ̀lɛ ó lɛ̀lɛ nīʔ,
kire ga buu wi fǎga jíin nyɛgɛ nī gè bè nyaaʔ.
11 Nɛ́ ki cɛ́n, wiyē nɛ ki nyaʔa kìɛ, siɛnsiciliwe wiī nɛ kúu,
nɛ́ míɛni ledogo ní gè nɛ́ lelabiligɛ ní gè,
níɛ pe lɔri yaʔa dè pàli mɛ́.
12 A ki cɛ́nì nyaa a pe 'pe míɛyɛ taʔa yè pe dàʔala nɛ̄ gèle,
nyɛgɛ kire gī pe mìɛni saasɛnyɛ yè
nɛ́ pe kòridiɛyɛ ní yè lɛ̀lɛ ó lɛ̀lɛ nīe.
13 Nɛ́ ki taa lewiiwe wè, ŋàa wī lɔri ní dè, wi wè nɛ mɔgiʔ;
wiī bɛ̀ nyàʔayɛrɛ tíɛlɛ dàa ti kúu dè.
14 Pe m'bɛlɛ siɛnnɛ bálì pe 'tɛ́ngɛ pìye nɛ̄ bèle,
pe kúɔgɛnmɛ pire bī bàa bèf,
nɛ́ míɛni bàli pe 'ki nyaa pe siɛnjuuro ti 'pe dɛ́ni dèg. Ye‑ ŋɔ́ cɛ̀.
15 Pe mìɛni nɛ waa baa kusiʔi mɛ́ gè, majo sìnbaara dī;
kùu wire wi pe nári nɛ waa baa.
A kpìɛnmɛ pi 'tuu bè, siɛnsinminɛ pe bé pe tánʔanah.
Pe cɛ̀nmɛ pi bé fúnʔɔ kusiʔi nī gè; kusiʔi kire bé kò pe súɔndiʔɛ.
16 Nɛ̀ ki yaʔa Kulocɛliɛ wi bé mi sìi fùgu wè bè suɔ
kusiʔi fànʔa mɛ́ gèi;
ʔaan, wi bé mi líɛ. Ye‑ ŋɔ́ cɛ̀.
17 Ma fǎga de fìʔɛ́ a siɛn wáà 'kò lɔrifɔli wèʔ,
a muɔ 'wi saʔa lɔri nyaa dè ti 'niʔɛgi dèʔ.
18 Nɛ́ ki cɛ́n, a wi kɛ́nì kùu wè, wi nɛ̌ kɛ́ nɛ́ yakaa níʔ;
wi lɔri ti nɛ̌ jíinʔ nɛ́ wi ní nyɛgɛ nī gèʔj.
19 Wi 'puu nɛ ki sɔ̀ngí nɛ́ jo wiī fundaanra nɛ̄ wi sìi cɛnyɛ nī yè.
Pe nìɛ muɔ kpóri bɛ̀ muɔ 'nyuɔ wè.
20 Kire nɛ́ ki míɛni lɔrifɔli míɛni wi 'yɛli bè kɛ́
baa wi tobilo kúrugu bèle,
bàli pe 'kùu bèle, peli bálì bīɛlɛ piyè ń'nɛ̀ je kpìɛnmɛ nyaa bèʔ.
21 Lewiiwe wè, ŋàa wī lɔri ní dè, nɛ̀ ki yaʔa sìnjilimɛ wè wi mɛ́ʔ,
wiī bɛ̀ nyàʔayɛrɛ tíɛlɛ dàa ti kúu dè.