Kulocɛliɛ bànguɔ dɛ́nigɛ kiī kpuʔɔ
36
1 Ŋúnuŋuminɔ yiɛginiwɛ wuʔu gī. Yewe baakuɔwɔ Dawuda wuʔu gī.
2 Siɛnrɛ dàa dī mi fungo nī gè siɛnpiile pe tuudiʔɛlɛ wuʔu nɛ̄ gèa:
pe nyaamɛ nɛ̄ bè, kiì yɛli siɛn de fún de yàʔará Kulocɛliɛ yiʔɛ mɛ́ gèʔb.
3 Pe fungboliyo yire kɛnmɛ nɛ̄
piyě gbɛ̀ pe kolimɔ nyaa bèʔ bè cɛ́n dí pi sí pe biɛnʔ.
4 Pe siɛnrɛ tiī kolimɔ wori nɛ́ káfinɛrɛ; pe nyɛ́nì cíi,
pe wè nɛ tári nɛ́ sícilige níʔ bèri kacɛ̀ngɛ kpínʔiniʔ.
5 Piyē nɛ sɔ̀ngibiire sɔ̀ngí pe yasinɛrɛ nɛ̄ dè níɛ̀ yɛ̀ nɛ̀ sɛ́ni yèrí kobiʔi nɛ̄ gè.
Piyè fɔ̀li nɛ̀ láʔa pe kapiʔile nɛ̄ gèleʔ.
6 Yewe yo, muɔ bànguɔ dɛ́nigɛ kiī nɛ yɛ̀gí nɛ̀ sɛ́ni nɔ̀gí nyìʔɛnɛ nɛ̄ lè,
muɔ kányiʔɛ kaala niī nɛ yɛ̀gí nɛ nɔ̀gí kàsadibarɛ nɛ̄ dè.
7 Muɔ sínmɛ piī bɛ̀ nyagurukpaʔaliyɛ tíɛlɛ,
muɔ kàyuʔujuuro ti 'cùugo bɛ̀ kuʔɔjii tíɛlɛ.
Yewe, muɔ nɛ siɛnnɛ suu bèle, nɛ́ yawiire ní dè.
8 Kulocɛliɛ, muɔ bànguɔ dɛ́nigɛ ki tɔ̀ni yē lagbɛnrɛ wuʔu,
á lewiile piyē nɛ líʔire jún muɔ fíkɛnyɛ nyúmɔ láara bè.
9 Piyē nɛ tíngi muɔ saʔa yaliicɛ̀nrɛ nɛ̄ dè;
muɔ nɛ pe kanʔa nɛ́ lakoligo luʔɔ ní gè gàa ki 'tɛ́ni gè.
10 Nɛ́ ki cɛ́n sìi lawiile niī baa muɔ mɛ́;
bɛ̀ muɔ kpìɛnmɛ piī weli nɛ̄ wè, kire nɛ̄ weli 'kò sìi nɛ̄ níɛ kpìɛnmɛ nyaʔa bèc.
11 ‑Muɔ bànguɔ dɛ́nigɛ yɛ́ligɛ gè ki‑ nɔ̀ bàli nɛ̄ pe 'muɔ cɛ́n wè,
nɛ́ muɔ sínmɛ ní bè ma pi yaʔa pi‑ nɔ̀ bìli nɛ̄ pe funyɔ yiī sínyɛ yè !
12 Fǎ ki yaʔa nìɛnyiɛnigɛfɔli tɔliyɔ yi‑ mi taa jòʔ !
Fǎ ki yaʔa siɛnpiiwe wi kiyɛ yi‑ mi cìraʔ !
13 Pe m'bɛlɛ kapiigbiʔilile piyē nɛ tungu;
pe ŋɔri ti 'kúɔ, piyě ní gbɛ̀ yɛ̀ bè yériʔ.