-Muɔ sɔ̀ngirɔ taʔa dè Yewe nɛ̄
37
1 Dawuda wuʔu gīa.
Fǎga muɔ fungo wárigɛ gè kapiigbiʔilile kúrugu bèleʔ;
fǎga ki yaʔa yejaʔa‑ puu muɔ nī pe kɔli mɛ́ gèʔ, bàli pe kacuʔɔgɔlɔ kpínʔini gèle !
2 Nɛ́ ki cɛ́n a cɛ̀ri 'sìʔɛrɛ wè, pe bé fɛ́ni fáari bɛ̀ nyàʔa tíɛlɛ;
bɛ̀ nyàpirige tíɛlɛ gàa nɛ̄ kàsaʔa sì tuu gèʔ, pe bé fɛ́ni.
3 ‑Muɔ sɔ̀ngirɔ taʔa dè Yewe nɛ̄, mari kacɛ̀ngɛ kpínʔini,
ma tɛ́ni kùlo nī lè, mari líi yanyige nɛ̄.
4 ‑Yewe kaala yaʔa lè ni‑ muɔ nyùgo cò gè,
kire ga buu wi bé muɔ funzɔngirɔ kele fori gèle.
5 ‑Muɔ mbànʔa kele le gèle Yewe kiyɛ nī,
ma muɔ sɔ̀ngirɔ taʔa dè wi nɛ̄; wi bé muɔ sáʔa.
6 Wi bé muɔ sínmɛ tìɛ bè bɛ̀ kpìɛnmɛ tíɛlɛ,
wi bé muɔ tànʔa yige gè bɛ̀ cɛnvunyiɛnɛ cɛngɛ tíɛlɛ.
7 ‑Ki kpàri ma cò Yewe yiʔɛ mɛ́ gè, má pìiri, ‑muɔ fungo nyígi gè, má wi sige nɛ́ tɛ́ngɛlɛ ní.
Fǎga muɔ fungo wárigɛ gè siɛn kúruguʔ ŋàa kele ke nyuʔɔ wi sìi nī wèʔ,
nɛ́ ŋìi kúrugu ŋàa wi kele nùʔɔrɔ́ gèle nɛ kpínʔini gèleʔ !
8 ‑Funyɛrigɛ yaʔa gè, ‑fundanʔanigɛ wáa gè;
fǎga muɔ fungo yɛ̀gɛ gèʔ, nɛ́ ki cɛ́n ki kúɔgɛnmɛ piǐ ga nyuɔʔ !
9 Nɛ̀ taʔa gíi nɛ̄, kapiigbiʔilile pe bága cúʔɔ bè yige baa,
nɛ̀ ki yaʔa bìli sí pe Yewe siri wè, pe bé kùlo taa lè kɔrigɔ.
10 Kire nɛ̄, a cɛ̀ri 'sìʔɛrɛ wè, siɛnpiiwe wiǐ ní nyaa bileʔ.
Muɔ bé wi caa bè màʔa, muɔ sǐ wi nyaa wi yéridiʔɛ nī gèʔ.
11 Nɛ̀ ki yaʔa siɛnnɛ bálì ní pe wè tɔ́ri bèleʔ, peli bé kùlo taa lè kɔrigɔb,
pe bé puu fundaanra nɛ̄ yanyige kpuʔɔ kire kɛnmɛ nɛ̄.
12 Siɛnpiile pe nɛ̂ nyuɔ le siɛnsinwɛ nɛ̄ wè,
pe nɛ̂ gànʔana káa gèle wi kɛnmɛ nɛ̄ bè.
13 Nɛ̀ ki yaʔa Kàfɔli wiī nɛ pe tíʔɛ,
nɛ́ ki cɛ́n wi 'ki nyaa pe cɛngɛ kiī nɛ nɔ̀gí.
14 Siɛnpiile pe nɛ̂ kapiɛngbuɔn ŋɔsii píle wè nɛ̀ yige
níɛ̀ pe sandaliyɛ píle yè nɛ̀ yaʔa bè fuunmɔfɔli nɛ́ fùrɔgɔfɔli cáan wè,
bè pe kpúu, bàli pe 'kozinge líɛ gè.
15 Nɛ̀ sí ki yaʔa peli tíimɛ kapiɛngbuɔn ŋɔsiile
pe bé pe nàzɔnnɔ fúrugi bèle; pe sandaliyɛ yi bé kabari.
16 Cɛ̀ri ŋáà wī siɛnsinwɛ mɛ́ wè, wi nyɛ́nì pɔ́ri nɛ̀ tóri
lɔniʔɛrɛ nɛ̄ dè, dàa dī siɛnpiiniʔɛnɛ wori dè.
17 Siɛnpiile kiyɛ yi bága kabari,
nɛ̀ ki yaʔa Yewe nɛ̂ siɛnsinminɛ tuʔɔ bèle nɛ̀ cò.
18 Yewe nyɛ́nì funviiyefɔlilɔ sìi kele cɛ́n gèle,
kire nɛ̄ pe kɔrigɔ ki bé puu pe mɛ́ súuri.
19 Fìɛrɛ sì ga pe taa wuʔɔgɔ lɛ̀lɛ nī lèʔ;
funduuro lɛ̀lɛ nī lè, pe bé lìi bè tín.
20 Siɛnpiile pe bága cúʔɔ bè núgo bile nɛ́ Yewe leguulo ní bèle;
bɛ̀ nyàfunro tiʔɛ tíɛlɛ gàa ki 'nyuɔ gè, náʔanɛ cɛ̀ri pe bé cɛrigɛ;
pe bé cɛrigɛ baa wírige nī gè a kàsun ki kɛ́nì tóri gè.
21 Siɛnpiile pe nɛ̂ fuʔɔ kún gè, pe nɛ̌ fɔ̀li bè ki tɔ́nʔ.
Nɛ̀ ki yaʔa siɛnsinminɛ peli nɛ nyinimɛ tari níɛ kanʔa.
22 Nɛ́ ki cɛ́n bìli nɛ̄ Yewe 'diba taʔa wè, peli bé kùlo taa lè kɔrigɔ,
nɛ̀ sí ki taa bìli nɛ̄ Yewe nyɛ́nì dɛ́ngɛ taʔa wè, peli bé cúʔɔ bè yiri baa.
23 A siɛn ŋíì tánʔagɛnmɛ pi 'Yewe dɛ́ni wè,
wi nìɛ wi yedaʔala lìrí gèle koligo nɛ̄ gè.
24 A wi 'kúrugo wè, wi nɛ̌ láʔa duuʔ,
nɛ́ ki cɛ́n Yewe nyɛ́nì wi cò kɔli nɛ̄ gè.
25 Bà mi 'puu nàgapunwɔ wè, a mi kɛ́nì pɛ́nì liɛ wè,
miì fìɛ siɛnsinwɛ nyaa wè a Yewe wi 'yaʔaʔ,
nɛ́ wi pìile ní bèle, bàli pe 'pe tíimɛ yaliire caa dèʔ.
26 Lɛ̀lɛ ó lɛ̀lɛ nī, siɛnsinwɛ wiī nɛ nyinimɛ taʔa níɛ fuʔɔ nii;
wi pìile pe nɛ̂ puu fundaanra taadiʔɛc.
27 Koli ma kàduʔu wáa kapiʔi mɛ́ gè, mari kacɛ̀ngɛ kpínʔini gè,
bà muɔ bé mɔgɔ kùlo nī lè lɛ̀lɛ ó lɛ̀lɛ.
28 Nɛ́ ki cɛ́n kàyuʔujuuro dáà ti 'sín dè, ti 'Yewe dɛ́ni wè.
Siɛnnɛ bálì pe 'pìye puɔ wi nɛ̄, wiǐ ga tíi pe yaʔaʔ.
Yewe béri pe wéli súuri,
nɛ̀ ki yaʔa, siɛnpiile pìile bèle, peli bé cúʔɔ bè yiri baa.
29 Siɛnsinminɛ peli bé kùlo líɛ lè kɔrigɔ,
bè mɔgɔ kùlo nī lè lɛ̀lɛ ó lɛ̀lɛ.
30 Siɛnsinwɛ nyuɔ kiī nɛ nyu nɛ́ sícilimɛ ní,
wi nyinɛ niī nɛ nyu nɛ́ sínnɛ ní.
31 Wi Kulocɛliɛ Fànʔa Siɛnrɛ tiī sɛbɛrɛ wi fungo nī gè,
kire nɛ̄ wiǐ ga pɔ̀li bè tuuʔ.
32 Siɛnpiiwe wi nìɛ làridiʔɛ caa bè siɛnsinwɛ sige wè,
níɛ nɛ wi caa nɛ́ kpúumɔ ní.
33 Nɛ̀ ki yaʔa Yewe sǐ je ga wi yaʔa pe kiyɛ nī yèʔ.
Wiǐ fɔ̀li pe‑ kàyuʔu juu wi nɛ̄ bè wi wuʔɔʔ.
34 ‑Yewe sige wè, ma wi koligo cò gè kpuʔɔ;
wi bé kpuʔɔrɔ taʔa muɔ nɛ̄ bè kùlo kɛn lè muɔ mɛ́ kɔrigɔ.
Muɔ bé ki nyaa, siɛnpiile pe bé cúʔɔ bè yiri baa.
35 Mi nyɛ́nì siɛnpiiwe nyaa wè, fungbɛngɛfɔli wè,
a wi 'ki líɛ nɛ̀ tórigo, a wi 'yɛ̀ nɛ̀ yéri bɛ̀ tiipirige tíɛlɛ gàa ki sɛngi gè.
36 Nɛ̀ ki yaʔa bà wi 'tóri nɛ̀ kɛ́ wè, a wi 'pùunni;
a mi 'wi caa nɛ̀ màʔa, wiì ní nɛ́ cɛ́nì nyaaʔ púlo wī !
37 Te siɛn wéli wè ŋàa wī nɛ́ funviige ní gè, te wi wéli ŋàa fungo ki síngi gè,
nɛ́ ki cɛ́n, mbànʔa kele ke béri nyuʔɔ yanyigefɔli mɛ́ wè.
38 Nɛ̀ ki yaʔa kacuʔɔrɔfɔlilɔ pe bé cúʔɔ péwu bè núgo baa !
Siɛnpiile pe mbànʔa kele ke bé cúʔɔ bè yiri baa !
39 Siɛnsinminɛ suɔlɔ lè ni 'kɔ́n Yewe mɛ́,
wiī pe làridiʔɛ bɛ̀ gunliriye tíɛlɛ fùrɔgɔ lɛ̀lɛ nī lè.
40 Yewe nɛ̂ pe sáʔa níɛ̀ pe píle nɛ̀ suɔ siɛnpiile mɛ́ bèle,
wi nɛ̂ pe píle nɛ̀ suɔ nɛ́ ki cɛ́n pe nyɛ́nì líʔire jó wi mɛ́.