Yewe yo, pa mi kàyuʔu juu gè !
35
1 Dawuda wuʔu gī.
Yewe yo, tún nɛ́ pe ní, bàli pe túngu nɛ́ mi ní bèle;
cáan nɛ́ pe ní, bàli pe cáanri nɛ́ mi ní wè.
2 ‑Muɔ kapiɛngbuɔn timɔzigepile nɛ́ muɔ timɔzigege cò gè
ma mìɛ tɔ́n, má yɛ̀ ma pa mi sáʔa !
3 ‑Muɔ tàbɛ píle wè ma yige, ma yiɛyɛ siin kágbaʔa líɛ gè, ma taʔa mi cìravɔlilɔ nɛ̄ bèle !
Ma ki juu m'mɛ́ dí muɔ wī mi suɔfɔli wè.
4 ‑Ki yaʔa fìɛrɛ‑ pe taa, pe míʔɛ ki‑ sí cúʔɔ, bàli pe caa bè mi kpúu bèle !
‑Ki yaʔa peri waa kàduʔu nī, dí fìɛrɛ‑ tɔ́n pe nɛ̄, bàli pe mi wuʔɔgɔ caa gè !
5 ‑Ki yaʔa pe‑ kò bɛ̀ sísumɔ tíɛlɛ bàa káfaligɛ nɛ líi gè
a Yewe tundunwɔ wi kɛ́ni pe ŋɔrigi wèa !
6 ‑Ki yaʔa pe koligo ki‑ puu yebilige ki de pɔ̀lí
a Yewe tundunwɔ wi kɛ́ni pe cìrá bè pe cò bèle !
7 Miì yakaa kpíʔile pe nɛ̄ʔ, á pe 'pe jùɔlɔ pari bèle bè mi cò;
miì yakaa kpíʔile pe nɛ̄ʔ, á pe 'kàtiʔɛ túgu kire ga buu mi‑ tuu.
8 ‑Ki yaʔa cúʔɔgbuɔmɔ‑ pe fuu bè taa !
‑Ki yaʔa jùɔ ŋáà pe 'pari wè, peli tíimɛ pe‑ cò wi nɛ̄ !
‑Ki yaʔa peli tíimɛ pe‑ tuu cúʔɔgbuɔmɔ nī bè !
9 Bà mi fungo ki bé puu fundaanra nɛ̄, Yewe,
mi fungo ki béri muguri bɛ̀ muɔ 'mi suɔ wè.
10 Mi laamɛ pi mìɛni bé ki juu bé jo: «Ŋáa wī bɛ̀ muɔ tíɛlɛ, Yewe ?
Muɔ ŋáà ma yē nɛ fuunmɔfɔli suu wè siɛn ŋáà mɛ́ wi ŋɔri ti 'niʔɛ wi nɛ̄ wè,
ʔaan, muɔ ŋáà ma yē nɛ fuunmɔfɔli yigi wè kàyuulo kiyɛ nī yè,
fuunmɔfɔli nɛ́ fùrɔgɔfɔli ní wè.»
11 Káfinɛgbɛngɛfɔlilɔ nɛ yɛ̀gí nɛ mi yúgo nɛ́ dàa ní mi sì cɛ́n dèʔ;
12 pe nìɛ mi sàrí nɛ́ kapiʔi ní gè kacɛ̀ngɛ sìndiʔɛ nī gè
gàa mi 'kpíʔile pe mɛ́ gè; mi 'kò mi nigbe, siɛn fùn.
13 Nɛ̀ ki yaʔa, mi wè, bà peli 'puu nɛ yáa bèle,
mi nɛ̂ cé gbànvaʔaga burugo le níɛ̀ mìɛ cɛ́rigɛ nɛ sún nii wè;
láʔala fùn, mi 'puu nɛ náari pe mɛ́b.
14 Mi 'puu nɛ tánʔana nɛ mári nɛ waa níɛ báan
majo bɛ̀ mi 'puu nɛ ki kpínʔini mi nàgori mɛ́ wè kire ga laa mi siinyɛni mɛ́ wè.
Ki yé laamɛ wúɔ mi nī a mi 'gbɔbi,
majo ŋàa wi 'puu nɛ wi yàa kùugo kayaʔa kpínʔini gè.
15 Nɛ̀ ki yaʔa bà mi 'kúrugo wè, a pe 'fali nɛ fundaanra kpínʔini nɛ̀ wúɔ mi nɛ̄;
nɛ̀mɛfɔlilɔc bálì miì yé cɛ́n bèleʔ,
a pe 'mi cɛnminɛd, piyè fɔ̀li nɛ̀ mi yaʔaʔ.
16 Bàli pe wè fìʔɛ́ Kulocɛliɛ nɛ̄ wèʔ, pe mi tíʔɛ níɛ mi teri wè;
piyē nɛ gànʔana káa gèle mi kɛnmɛ nɛ̄ bè.
17 Mi Kàfɔli, lɛ̀lɛ líi nī muɔ bága pe wéli ?
‑Mi suɔ bàli mɛ́ pe je mi cúʔɔ bèle;
‑mi sìi suɔ wè jàriyɛlilɛ bálì mɛ́ bèle !
18 M'bága de muɔ síɛri siɛnnɛ gboli nī lè,
siɛnniʔɛmɛ sunʔɔmɔ nī bè, bèri muɔ kpóri.
19 Fǎga ki yaʔa mi leguulo peri fundaanra kpínʔini mi kɛnmɛ nɛ̄ bèʔ,
bàli pe finɛnɛ nɛ tari mi nɛ̄ bèle,
siɛnnɛ bálì mi 'biɛn nyùgofun wè,
á piyē nɛ mi teri wè níɛ nyapigele yùbú gèle nɛ tɔ́ngi gèle.
20 Nɛ́ ki cɛ́n pe wè nɛ yanyige siɛnrɛ nyuʔ; pe nìɛ nyalere kpínʔini bìli nɛ̄ bèle;
bàli bīɛlɛ yanyige nɛ̄ gè kùlo nī lè,
pe nìɛ káfinɛrɛ kele gbòborí gèle peli nɛ̄.
21 Pe 'wúɔ nɛ̀ nyuɔ le mi nɛ̄, nɛ́ jo:
«ʔanhaa, ʔanhaa, we nyɛ́nì wi kele nyaa gèle nɛ́ weli nyapigele ní gèle !»
22 Yewe yo, muɔ̀ ki nyaa léʔ ? Fǎga pìiri pe nɛ̄ díɛʔ !
Mi Kàfɔli, fǎga kò liilige mi nɛ̄ díɛʔ !
23 Yɛ̀ ŋɔ́nimɔ nɛ̄ bè, ma tànʔa kɛn m'mɛ́ !
Mi Kàfɔli Kulocɛliɛ, ‑mi kàyuʔu juu gè !
24 ‑Mi kàyuʔu juu gè ma yɛli nɛ́ muɔ sínmɛ ní bè, Yewe mi Kulocɛliɛ !
Kiì yɛli peri fundaanra kpínʔini mi wori nɛ̄ dèʔ !
25 Kiì yɛliʔ pe‑ ki juu pe funyɔ nī yè, bé jo: «ʔanhaa, gàa kire weli 'puu nɛ caa !»
Kiì yɛliʔ pe‑ ki juu bé jo: «Weli nyɛ́nì wi júɔ !»
26 Bàli piyē nɛ fundaanra kpínʔini mi fùrɔgɔ wuʔu nɛ̄ gè, ‑ki yaʔa pe míɛyɛ‑ yi sí sɔ́migɔ cúʔɔ, fìɛrɛ‑ sí pe taa !
Bàli pe pìye kpóri mi nɛ̄ wè, ‑ki yaʔa fìɛrɛ‑ tɔ́n pe nɛ̄, peri pe faʔa !
27 Bàli sí pe caa bè mi tànʔa nyaa gè,
peli béri fundaanra kpínʔini, bèri yékpuʔulo wáari gèle
de ki nyu súuri bé jo: «Yewe wi 'kpúʔɔ,
wire ŋáà wi nɛ̂ wi baakuɔwɔ yanyige caa gè.»
28 Nɛ̀ taʔa ki nɛ̄, mi wè, mi nyuɔ ki béri muɔ kasingele nyu gèle
béri muɔ gbùʔɔrɔ cɛnyɛ yi mìɛni nī.