Yewe wire wī mi làridiʔɛ gè
11
1 Ŋúnuŋuminɔ yiɛginiwɛ wuʔu gī. Dawuda wuʔu gī.
Mi 'líʔire jó Yewe mɛ́. Gáa nɛ̄ yeli bé sí ní mi yɛ
mi de fini bɛ̀ sínjapile tíɛlɛ nyagurugo nɛ̄ gè ?
2 Nɛ́ ki cɛ́n ki n'gɛ, siɛnpiile pe nyɛ́nì sandali píle gè
nɛ́ ŋaʔa kɔ̀n gè nɛ̀ taʔa kpàtaan nɛ̄ wè
bè ki ŋɔ yebilige nī gè siɛnsinminɛ nɛ̄ bèle.
3 A kùlo ni kàkpuɔnnɔ pe 'cúʔɔ bèle o,
gáa siɛnsinwɛ wi bé ní gbɛ̀ kpíʔile ?
4 Yewe wiī baa wi nàkpaanjɛngɛ nī gè,
wiī tɛ́niwɛ wi kùlofɔlilɔ kácunʔɔ nɛ̄ gè nyìʔɛnɛ nī lè.
Wi nyapigele kiyē nɛ nyaʔa;
wiī nɛ lewiile ciʔige bèle nɛ wéli.
5 Yewe nɛ̂ siɛnsinminɛ ciʔige bèle nɛ̀ wéli nɛ́ míɛni siɛnpiile ní bèle.
Siɛn ŋáà wī fungbɛngɛ kele ke 'wi dɛ́ni gèle,
ki siɛn wi nyɛ́nì Yewe biɛn.
6 Wi bé kàsunsindaria nɛ́ tabiɛnmiige tìrige gè nyìʔɛnɛ nī lè
bè wo siɛnpiile nɛ̄ bèle; pe liɛlɛ ni bé puu káfalifuugo.
7 Nɛ́ ki cɛ́n Yewe nyɛ́nì sín, kasingele ke 'wi dɛ́ni;
siɛnsinminɛ pe bé wi yiʔɛ nyaa gè.