Yewe siɛnrɛ ti 'fílige; siɛnnɛ peli pe finɛnɛ
12
1 Ŋúnuŋuminɔ yiɛginiwɛ wuʔu gī. Dawuda ŋúnudanʔa gī gàa pe ŋú nɛ́ yakpuɔnrɔ ní dè, màʔagɛlɛ kataanri gɔria wè.
2 Yewe yo, pa mi suɔ ! Nɛ́ ki cɛ́n siɛn ní wè bileʔ ŋàa wi 'wìi puɔ muɔ nɛ̄ʔ.
Siɛnnɛ ní wè bileʔ bàli nɛ̄ m'bé gbɛ̀ mi sɔ̀ngirɔ taʔa dèʔ.
Pe ní cɛ wè nyaʔa púlo lewiile nī bèleʔ.
3 Siɛn ó siɛn 'kò nɛ finɛnɛ wi siinyɛni mɛ́ wè;
pe mìɛni 'kò nɛ nyatanʔa siɛnrɛ nyu nɛ̀ ki yaʔa pe wè funviire níʔ.
4 Ki 'yɛli Yewe wi‑ pe nyasɛnyɛ celile yè, nyàa yi siɛnnɛ fáanni bèle,
nɛ́ pe nyigele ní gèle gàli ní pe nyu nɛ pìye kpóri wè,
5 siɛnnɛ bálì pe 'ki juu nɛ́ jo: «Weli nyigele keli ní weli bé fànʔa taa !
Weli nyuɔsɛnyɛ yi 'juu macɛ́n; ŋáa wi bé ní gbɛ̀ puu weli kàfɔli ?»
6 A Yewe sí jo: «Píra ŋáà nī wè, m'bé yɛ̀
fuunmɔfɔlilɔ peli kɛnmɛ nɛ̄, bàli pe wuʔɔ bèle,
nɛ́ fùrɔgɔfɔlilɔ ní bèle, bàli pe cíɛn bèle.
M'bé suɔlɔ gbòbori lè bè yaʔa siɛnnɛ mɛ́ bèle
bàli pe 'wàli nɛ̀ wáa bèle.»
7 Yewe siɛnrɛ ti 'fílige bɛ̀ walifiiwe tíɛlɛ,
walifiiwe ŋáà pe 'le vúguruyo kàsunb nī gè tɔliyɔ kɔlisiin yè
nɛ̀ fuɔnrɔ yige dè wi nī dè.
8 Yewe yo, muɔ bé weli wéli bé weli màʔa bè suʔu
lɛ̀gɛlɛ ke mìɛni nī kɛ̀nnɛ náà siɛnnɛ nɛ̄ bèle.
9 Nɛ́ ki cɛ́n siɛnpiile piyē nɛ nyaari nɛ mári
tiɛyɛ yi mìɛni nī yè,
bà sìpiimɛ piī nɛ niʔɛgi lewiile sunʔɔmɔ nī bèc.