Yewe yo, muɔ yē sé ?
10
1 Yewe yo, gáa sí nɛ̄ muɔ 'kò baa liilige ?Gáa nɛ̄ muɔ 'làri fùrɔgɔ lɛ̀lɛ nī léa ?
2 Siɛnpiiwe wè, nɛ́ wi fungbuʔɔ ní gè,
wi nɛ̂ ŋàʔana nɛ̀ taʔa fuunmɔfɔlilɔ nɛ̄ bèle,
wi nɛ̂ sɛ́nì pe cò nɛ́ wi kpìlikpili ní wè.
3 Nɛ̀ pínɛ, siɛnpiiwe wè, wi nìɛ wìi nyíɛnɛ
nɛ́ wi fungbuʔɔ wori ní dè;
nyabiɛnnɛfɔli wire wi nìɛ dɛ́ngɛ siɛnrɛ nyu
Yewe kɔli mɛ́ gè nɛ wi tíʔɛ.
4 Siɛnpiiwe wè, wi yiʔɛ kiī taʔaga,
Kulocɛliɛ wè baa wi sɔ̀ngirɔ nī dèʔ,
dí gàa wire nɛ kpínʔini gè, Kulocɛliɛ wi wè ki nyaʔaʔb.
5 Gàa wi kpínʔini gè ki nìɛ nyuʔɔ súuri.
Muɔ kàyuʔujuuro ti 'líili wi nɛ̄; wi wè sɔ̀ngí nɛ́ ti níʔ.
Wiī nɛ tíɛnrɛ wáari níɛ nyuɔ mari gè wi leguulo nɛ̄ bèle.
6 Wiī nɛ ki sɔ̀ngí wi fungo nī gè nɛ́ jo:
«Miì je ga tuu bè nyaaʔ. Mi wè, wuʔɔgɔ sǐ ga tíi nɔ̀ mi nɛ̄ʔ.»
7 Wi nyuɔ ki nìɛ dɛ́ngɛ siɛnrɛ nyu;
wi nyasiɛnkanʔana ke mìɛni yē káfinɛrɛ níɛ yáa kpuʔɔc;
wi nyinɛ láara lè, siɛnpiire nɛ yigi baa níɛ lúʔu.
8 Wiī nɛ làrí nɛ yèrí vòyo táanni yè,
níɛ kanaasingbiʔilile kpúu bèle wi làridiʔɛ nī gè;
wi nyapigele kiyē nɛ wéli nɛ mári nɛ ŋɔrifunvɔli caa wè.
9 Wi nìɛ wi palilɛ nɛ mári majo jàri wī, làridiʔɛ nī gè;
wi nìɛ fuunmɔfɔli palilɛ wè bè wi cò;
wi nɛ̂ wi cò wi jùɔ nī wè níɛ̀ wi píle nɛ̀ pɛn wìi mɛ́.
10 Wi nɛ̂ gbɔbi nɛ̀ subulo, á ŋɔrifunvɔli wi nɛ̂ tuu wi kiyɛ nī yè.
11 Siɛnpiiwe wi nìɛ ki sɔ̀ngí níɛ jo:
«Kulocɛliɛ wiǐ je ga tɔ́ri nɛ́ ki níʔ.
Wi nyɛ́nì wi yiʔɛ làrigɛ gè; wi wè yakaa nyaʔaʔ.»
12 Yewe yo, yɛ̀! Kulocɛliɛ, -muɔ kɔli yɛ̀gɛ gè,
fǎga fìʔɛ nɛ́ fuunmɔfɔlilɔ ní bèleʔ !
13 Gáa nɛ̄ siɛnpiiwe wi nɛ̂ Kulocɛliɛ tíʔɛ wè ?
Gáa nɛ̄ wi ki nyu wi fungo nī gè nɛ́ jo:
«Kulocɛliɛ sǐ je ga mi yúgo nɛ́ ki níʔ» ?
14 Nɛ̀ ki yaʔa muɔ sí nɛ wuʔɔgɔ nɛ́ fùrɔgɔ ki mìɛni nyaʔa.
Muɔ nɛ kòrí nyɛwɛ bè ki mìɛni cò muɔ kɔli nī gè !
Ŋɔrifunvɔli wi nɛ̂ wìi yaʔa muɔ kiyɛ nī yè;
muɔ wī círiwe sáʔafɔli wè.
15 ‑Siɛnpiiwe wi kɔli kaa gè !
Ma wi yúgo nɛ́ wi kapiigbiʔiligele ní gèle;
wi kakpiʔiligele ke fǎga ní nyaaʔ !
16 Yewe yē Kùlofɔli súuri lɛ̀gɛlɛ ke mìɛni nī !
Wi 'kùlogolo kálì siɛnnɛ cúʔɔ bèle nɛ̀ yige péwu wi kùlo nī lè.
17 Yewe yo, gàa wuʔɔgɔfɔli wi caa gè, muɔ nyɛ́nì ki cɛ́n !
Muɔ nɛ lèbaanna nyɔ́gi wi nī, níɛ lúru wi mɛ́.
18 Muɔ nɛ tànʔa kanʔa círiwe mɛ́ wè nɛ́ wuʔɔgɔfɔli ní wè,
kire ga buu siɛnpiiwe fǎga ní de fíɛrɛ wáari
siɛnnɛ nɛ̄ bèle dàala nɛ̄ lèʔ.