Yewe nyɛ́nì kùlofɔli tɛ́ngɛ wè
2
1 Gáa kɛnmɛ nɛ̄ kùlogolo kiyē nɛ kìye gbunʔuni nɛ tùngú mmɛ gè ?Gáa nɛ̄ siɛnnɛ bálì piyē nɛ kúnʔɔri nɛ mári waʔanɛ ?
2 Gáa nɛ̄ dàala ni kùlofɔlilɔ pe 'yɛ̀ ?
Gáa nɛ̄ siɛnkpolilo pe pìye nyaʔa nɛ nyu nɛ́ nyuɔ le Yewe nɛ̄ wè,
nɛ́ wi siɛnnyiɛnɛgɔnwɔ ní wèʔa ?
3 Pe 'ki juu nɛ́ jo: «We‑ pe nyùʔɔdiriye celile yè !
We‑ pe màʔagɛlɛ wáa gèle liilige !»
4 Ŋàa wi 'tɛ́ni nyìʔɛnɛ nī lè wi kácunʔɔ nɛ̄ gè, wiī nɛ pe tíʔɛ.
Kàfɔli wiī nɛ wìi nyíɛnɛ pe nɛ̄.
5 A wi fungo ki 'yɛ̀ kpuʔɔ pe kúrugu, a wi 'juu nɛ́ pe ní,
a pe 'fíɛ kpuʔɔ bà wi fungo ki 'yɛ̀ bɛ̀ kàsun tíɛlɛ gè.
6 A wi sí ki juu pe mɛ́ nɛ́ jo: «Mi tíimɛ wè, mi nyɛ́nì mi kùlofɔli tɛ́ngɛ wè
Siyɔn nyagurugo nɛ̄ gè, mi nyagurugo wàlidɛngɛgɛ nɛ̄ gè.»
7 Mi wè, kùlofɔli wè, m'bé fànʔa kaala jáari lè:
«A Yewe 'mi yɛ: ‹Muɔ yē mi jaa; pàngɛ gè, mi wī mi nyɛ́nì muɔ siib.
8 Ma mi náari; m'bé kùlogolo kɛn gèle muɔ mɛ́ kɔrigɔ,
nɛ́ dàala láʔagɛlɛ ke mìɛni ní, muɔ bé ni taa.
9 Muɔ bé pe kabari nɛ́ fànʔafɔli timɔri kàgbiile ní lè,
muɔ bé pe muʔɔrɔ bɛ̀ cuuro kàjɔli tíɛlɛ.› »
10 Bɛ̀ sí ki yē gè, yeli kùlofɔlilɔ bèle, ye‑ yìye cò díɛʔ !
Ye‑ sícilige taa, yeli bálì bīɛlɛ kùlogolo yiɛgininɛ bèle dàala nɛ̄ lè.
11 Yeri baara Yewe mɛ́ wè; yeri wi fìʔɛ́ !
Yeri fundaanra kpínʔini, yeri fún !
12 Ye‑ káguro cáan Jaafɔli wi yiʔɛ mɛ́ gè,
kire ga buu wi fungo ki fǎga yɛ̀ yeli kúruguʔ
dí yeli sí kùu koligo nɛ̄ gèʔ.
Nɛ́ ki cɛ́n, lɛ̀lɛ ó lɛ̀lɛ nī wi funyɛrigɛ ki nɛ̂ cò
bɛ̀ kàsun tíɛlɛ yeli kúrugu.
Siɛnnɛ bálì pe sɛ́nì líʔire jó wi láara wè, peli mìɛni wuʔu kiī tànʔa !