Yewe wiī nɛ siɛn suu
3
1 Dawuda ŋúnudanʔa gī gàa pe ŋú nɛ́ yakpuɔnrɔ ní dè. Lɛ̀lɛ líì nī wi 'puu nɛ fé wi jaa Abisalɔmia nɛ̄ wè.
2 Yewe yo, mi piɛnnɛ pe tɔ̀ni yē nìʔɛbɛlɛ díɛʔ !
Piyē nìʔɛnɛ, bàli pe 'yɛ̀ mi kúrugu bèle !
3 Piyē nìʔɛnɛ, bàli pe ki nyu nɛ́ jo:
«Suɔdiʔɛ ní wè tíin wi mɛ́ Kulocɛliɛ táanni wèʔ !» Ye‑ ŋɔ́ cɛ̀.
4 Nɛ̀ ki yaʔa muɔ Yewe wè, muɔ yē mi timɔzigege
nɛ mi ciʔigi nɛ wéli lìʔɛgɛlɛ ke mìɛni nī;
muɔ yē mi kpuʔɔrɔ taadiʔɛ;
muɔ ma mi kɛn mi nɛ tári nyùgo ní gè yɛ̀rigɛ.
5 Mi 'kòkuugbuɔlɔ wáa Yewe kúrugu wè,
a wi 'lúʔu m'mɛ́ wi nyagurugo nɛ̄ gè gàa gī wàlidɛngɛgɛ gè !
Ye‑ ŋɔ́ cɛ̀.
6 Mi wè, mi 'sínɛ nɛ̀ ŋɔ́ni;
ba mi 'yɛ̀ wè, mi nɛ̂ ki nyaa Yewe nyɛ́nì mi tuʔɔ.
7 Kire nɛ̄ mi wè nɛ fìʔɛ́ siɛnniʔɛbobo báà nɛ̄ bèʔ,
bàli pe 'yéri nɛ̀ mi màʔa nɛ̀ suʔu bè tún nɛ́ mi ní wè.
8 Yɛ̀ yo, Yewe ! Ma mi suɔ, mi Kulocɛliɛ !
Nɛ́ ki cɛ́n muɔ nɛ kadaala kpúɔn mi leguulo pe mìɛni pe gbandeliye nɛ̄ yè,
muɔ nɛ siɛnpiile pe gànʔana kabari gèle.
9 Je Yewe mɛ́ suɔlɔ ni 'kɔ́n !
Yewe, muɔ diba wiī muɔ siɛnnɛ nɛ̄ bèle. Ye‑ ŋɔ́ cɛ̀.