Ŋúnuyɔ 1

Ŋúnuyɔ Sɛbɛ wè

Ŋúnuyɔ

SƐBƐ PELIWE

(1–41)

Siɛnsinwɛ wè, wi wuʔu kiī tànʔa

1 Siɛn ŋáà wi wè nɛ tári siɛnpiiwe siɛnjuuro nɛ̄ dèʔ,

ŋàa wi wè nɛ yèrí kapiigbiʔilile koligo nī gèʔ,

nɛ́ míɛni wi wè nɛ tɛ̀ní siɛntiʔɛlilɛ gboli nī lèʔ,

kire siɛn wi wuʔu kiī tànʔa.

2 Nɛ̀ sí ki yaʔa,

wiī nɛ fundaanra taʔa nī dè,

níɛ ti cògí níɛ ti nyu pìlige nɛ́ cɛnvugo.

3 Wiī bɛ̀ tiige tíɛlɛ gàa pe 'cɔ́ri lakoligo táanni gè.

Ki nìɛ sɛngi ki sɛn lɛ̀lɛ nī lè; ki wɛrɛ ti wè wùʔɔrɔ́ʔ.

Gàa wi kpínʔini gè, ki mìɛni nɛ̂ nyuɔ.

4 Bà sì bɛ̀ʔ ki yē nɛ́ siɛnpiiwe ní wèʔ:

wiī bɛ̀ sísumɔ tíɛlɛ bàa káfaligɛ kiī nɛ cɛrigi bè.

5 Kire kɛnmɛ nɛ̄ siɛnpiiwe wiǐ gbɛ̀ yéri kàyuʔujuudiʔɛ nī gèʔ,

nɛ́ kapiigbiʔiliwe ní wè, siɛnsinminɛ gboli nī lèʔ.

6 Yewe nyɛ́nì siɛnsinminɛ koligo cɛ́n gè.

Nɛ̀ ki yaʔa siɛnpiile koligo kire nɛ waa nɛ́ pe ní pùunnidiʔɛ nī.