MISA BAARA TI 'NƆ TI KUƆDIʔƐ NƐ GE
(31.1–34.12)
Yesuwe bága Misa baara kúɔ dè
31
1 A Misa 'kɛ́ nɛ̀ sɛ́nì siɛnrɛ dáà ti mìɛni juu Isirayɛli gboli mɛ́ lè, a wi 'pe yɛ: 2 «Píra ŋáà nī wè, mi nyɛ́nì yiʔɛlɛ tekɔlini (120) taa; mi sì ní gbɛ̀ jáa bèri yeli yiʔɛ kínigi gèʔ. Yewe nyɛ́nì ki juu mi mɛ́ nɛ́ jo, miǐ gbɛ̀ Zurudɛn cáʔa jeli gèʔa.3 «Yewe muɔ Kulocɛliɛ wè, wire wi béri muɔ yiʔɛ kínigi gè, wire wi bé Kanaa kùlo siɛnnɛ bálì cúʔɔ bèle bè yige muɔ yiʔɛ mɛ́ gè dí muɔ sí kùlo líɛ lè. Yesuwe míɛni wire wi béri muɔ yiʔɛ kínigi gè, bɛ̀ Yewe 'ki juu gè. 4 Yewe wire wi bé ki kpíʔile siɛnnɛ bálì nɛ̄ bèle majo bɛ̀ wi 'ki kpíʔile Amɔriyé kùlo nɛ̄ lè, nɛ́ pe kùlofɔlilɔ bálì ní bèle Sikɔn nɛ́ Ɔgi ní wè, bà wi yé pe kpúu wèb. 5 Yewe wi bé pe le yeli kiyɛ nī yè; yeli bé sí pe wuʔɔ nɛ̀ yɛli nɛ́ kajuudiʔɛlɛ ke mìɛni ní gàli mi 'juu nɛ̀ gbɛ̀ngɛ yeli mɛ́ wè.
6 «Ye- gbɛ̀nmɛ le, ye puu lèbaannafɔlilɔ ! Ye fǎri fìʔɛ́ bèri fún pe yiʔɛ mɛ́ gèʔ. Nɛ́ ki cɛ́n Yewe muɔ Kulocɛliɛ wiī nɛ tári nɛ́ muɔ ní; wiì je ka muɔ yaʔaʔ, wiì je kàduʔu wáa muɔ mɛ́ʔ.»
7 A Misa sí Yesuwe yeri wè, Isirayɛli siɛnnɛ pe mìɛni yiʔɛ mɛ́ gè, nɛ́ wi yɛ: «Ma gbɛ̀nmɛ le, ma puu lèbaannafɔli ! Nɛ́ ki cɛ́n muɔ wī, muɔ bé siɛnnɛ bálì nyɔ́gɔ bèle kùlo nī lè, nàa Yewe wi 'ni nyuɔ kún gè nɛ̀ kɛn pe tuuliɛyɛ mɛ́ yè, nɛ́ jo wire bé ni kɛn pe mɛ́ lè. Muɔ sí wī ma bé pe nyɔ́gɔ pe- kùlo líɛ lè kɔrigɔc. 8 Yewe wire tíimɛ wi béri tári muɔ yiʔɛ mɛ́ gè. Wiì je ka muɔ yaʔaʔ, wiì je kàduʔu wáa muɔ mɛ́ʔ. Fàri fìʔɛ́ yafiɛn nɛ̄ʔ, fǎga muɔ céri kpúu dèʔ.»
Fànʔa Kajuʔulo Sɛbɛ wélige wori dè
9 A Misa sí Fànʔa Kajuʔulo siɛnrɛ sɛbɛ dè nɛ̀ kɛn kacuɔnrilɔ mɛ́ bèle, Levii jaala bèle, bàli pe 'puu nɛ Yewe nyakungɛngɛ finʔɛgɛ turu gè, nɛ́ Isirayɛli liɛlɛ ní bèle.
10 A Misa sí ki juu nɛ̀ gbɛ̀ngɛ pe mɛ́ nɛ́ jo: «Yiʔɛlɛ kɔlisiin ó kɔlisiinwoli nɛ̄ lè, yiɛlɛ níì nī Fuɔrɔ Yaʔad yiɛlɛ niī nɛ séligi lè, Kpátaapigele Fundaanra tánʔagbuɔlɔe lɛ̀lɛ nī lè, 11 a Isirayɛli siɛnnɛ pe mìɛni kɛ́nì pɛn Yewe yeli Kulocɛliɛ yiʔɛ mɛ́ gè, tiʔɛ gáà mɛ́ wi bága tìɛ yeli nɛ̄ gè, yeli 'yɛli bè Fànʔa Kajuʔulo Sɛbɛ wéli wè bè juu Isirayɛli siɛnnɛ yiʔɛ mɛ́ gè, kire ga buu pe- ti lúʔu. 12 Muɔ bé siɛnniʔɛmɛ gbuʔulo bè pìi nɛ̄, nàguɔlɔ bèle, nɛ́ cɛlilɛ ní bèle, nɛ́ pìile ní bèle, nɛ́ nabɔnminɔ ní bèle bàli bīɛlɛ muɔ kàaya nī yè, kire ga buu pe- siɛnrɛ dáà lúʔu dè bèri ti tɛnmɛ, peri fìʔɛ́ Yewe yeli Kulocɛliɛ nɛ̄ wè, bè sí fànʔa kajuʔulo siɛnrɛ ti mìɛni sɔ́migɔ còf.
13 «Bà sí ki bé kpíʔile, kire bé ki yaʔa yeli pìile bálì piyè kire siɛnrɛ cɛ́n dèʔ, pe bé ti lúʔu bè ki cɛ́n kɛnmɛ bíì nɛ̄ pe 'yɛli bèri fìʔɛ́ Yewe yeli Kulocɛliɛ nɛ̄ wè, lɛ̀lɛ ó lɛ̀lɛ nī yeli yē tɛ́ninɛ kùlo náà nī lè, nàa yeli bé Zurudɛn cáʔa jeli gè bè ni líɛ lè.»
Yewe 'Yesuwe tɛ́ngɛ wè yiɛginiwɛ
14 A Yewe sí ki juu Misa mɛ́ nɛ́ jo: «Muɔ kùu lɛ̀lɛ ni 'nɔ̀; kire nɛ̄ ma Yesuwe yeri wè, yeri waa Kpàlidiʔɛ Kpátaʔa mɛ́ gè. Kire tiʔɛ nī gè m'bé mi tunduro juu dè yeli mɛ́.»
A Misa nɛ́ Yesuwe pe 'kɛ́ Kpàlidiʔɛ Kpátaʔa mɛ́ gè. 15 A Yewe 'wìi tìɛ pe nɛ̄ kàsadibagɛ gàa ki 'tɔni nɛ̀ cùungu gè nɛ́ ní yérige Kpàlidiʔɛ Kpátaʔa wìile nɛ̄ lè.
16 A Yewe 'ki juu Misa mɛ́ nɛ́ jo: «Ki n'gɛ, muɔ bé kùu wī, bè kɛ́ muɔ tuuliɛyɛ kúrugu yè. Siɛnnɛ bàli pe bé láʔa mi nɛ̄ bè sari yasunro sungu dè, dàa dī kulocɛlɛlɛ nabɔnminɔ bèle, bɛ̀ nàjaacɛlilɛ tíɛlɛ bàli pe pìye kanʔa pàli mɛ́ bèle, kùlo nī lè nàa nī pe bé jíin lè. Pe bága cíi mi nɛ̄, bè kàduʔu wáa mi nyakungɛngɛ mɛ́ gè gàa mi 'kpíʔile nɛ́ pe ní wè.
17 «Kire cɛngɛ gè, mi fungo ki bé yɛ̀ kpuʔɔ pe kúrugu; mi míɛni bé cíi pe nɛ̄. M'bé mi yiʔɛ làrigɛ gè pe nɛ̄; kùlogolo kálì siɛnnɛ bé pe jáa. Wuʔɔgboliyo nɛ́ fuunmɔ pi bé tuu pe nɛ̄ kire cɛngɛ gè. Bà pe bé jo: ‹Yeli 'jo lé, bɛ̀ Kulocɛliɛ wi ní wè tíin nɛ́ weli ní wèʔ, kire kɛnmɛ nɛ̄ bɛ̀ʔ lé, fuunmɔ báà pi 'tuu weli nɛ̄ bè ?›
18 «ʔaan, kire cɛngɛ gè, m'bé mi yiʔɛ làrigɛ gè pe nɛ̄ kapiʔile gálì keli kɛnmɛ nɛ̄, gàli pe 'kpíʔile gèle nɛ̀ pìye kɛn kulocɛlɛlɛ pálì piyeyɛ mɛ́ wè.
19 «Ki n'gɛ, píra ŋáà nī wè, ye- ŋúnugo gáà sɛbɛ gè, mari Isirayɛli siɛnnɛ tɛnmɛ bèle ki nɛ̄ peri ki ŋú, kire ga buu ki- puu sɔ̀ngidaadiʔɛ pe mɛ́, bèri ki tìí gàa gī mi nɛ́ peli sunʔɔmɔ ní bè. 20 Nɛ́ ki cɛ́n, m'bé tɔ̀ni pe nyɔ́gɔ kùlo nī lè, baa nɛ̀yirimɛ nɛ́ sárigɛ kiī nɛ fúu gèg, nàa nyuɔ mi 'kún nɛ̀ kɛn pe tuuliɛyɛ mɛ́ yè. Pe bé lìi bè tín, bè kpólilo, kire kàduʔumɛ gè pe bé láʔa mi nɛ̄ bè kɛ́ kulocɛlɛlɛ pálì kúrugu bè sari baara pe mɛ́, bé cíi mi nɛ̄, bà pe bé mi nyakungɛngɛ cúʔɔ gè.
21 «A wuʔɔgboliniʔɛyɛ nɛ́ fuunmɔ pi kɛ́nì tuu pe nɛ̄ wè, ŋúnugo gáà ki bé puu sɔ̀ngidaadiʔɛ pe mɛ́, nɛ́ ki cɛ́n pe pìile piyě ga fìʔɛ nɛ́ ŋúnugo gáà ní gèʔ; pe béri ki ŋú súuri. Nɛ́ ki cɛ́n mi nɛ ki nyaʔa nɛ kúu baa pe funyɔ nī yè pàngɛ gè gàa pe sɔ̀ngi bè kpíʔile gè, nɛ̀ ki yaʔa piyè fìɛ cɛ́nì jíin kùlo nī lèʔ nàa nyuɔ mi yé kún nɛ̀ kɛn pe tuuliɛyɛ mɛ́ yè.»
22 Kire cɛngɛ gè, a Misa 'ŋúnugo gáà sɛbɛ gè nɛ̀ Isirayɛli siɛnnɛ tɛnmɛ bèle ki nɛ̄.
23 A Yewe 'Nuni jaa Yesuwe tɛ́ngɛ wè nɛ́ tunduro kɛn wi mɛ́ nɛ́ jo: «Ma gbɛ̀nmɛ le, ma puu lèbaanna ní ! Nɛ́ ki cɛ́n muɔ wī, muɔ bé Isirayɛli siɛnnɛ nyɔ́gɔ bèle kùlo nī lè nàa nyuɔ mi 'kún nɛ̀ kɛn pe mɛ́ lè. Mi wè, m'bé puu nɛ́ muɔ níh.»
24 Bà Misa wi yé Fànʔa Kajuʔulo Sɛbɛ siɛnrɛ ti mìɛni sɛbɛ dè nɛ̀ kúɔ dè sɛbɛkuruwo nī wè, 25 a wi 'ki juu nɛ̀ gbɛ̀ngɛ Levii saʔa tùlugo wuulo mɛ́ bèle, peli bálì pe 'puu nɛ Yewe nyakungɛngɛ finʔɛgɛ turu gè, nɛ́ jo: 26 «Ye- sɛbɛkuruwo ŋáà líɛ wè, Fànʔa Kajuʔulo wuu wè, ye wi le Yewe yeli Kulocɛliɛ nyakungɛngɛ finʔɛgɛ nī gè; wi bé kò sɔ̀ngidaadiʔɛ yeli mɛ́. 27 Nɛ́ ki cɛ́n, mi nyɛ́nì ki cɛ́n muɔ yē lúʔubiɛnwɛ, muɔ fungo kiī gbɛ̀ngɛ. Pàngɛ gè o, bà mi nɛ tíin sìi nɛ̄ wè, yeli sunʔɔmɔ nī bè o, a yeli 'cíi Yewe nɛ̄ wè o, a mi sí kɛ́nì kùu nɛ̀ kúɔ wè, mɛni ki bé puu ?
28 «Ye- yeli saaya tùluyo liɛlɛ nɛ́ yeli yiɛgininɛ pe míɛni gbuʔulo mi táanni. M'bé siɛnrɛ ti mìɛni juu pe mìɛni nyaamɛ nɛ̄, bà mi bé nyìʔɛnɛ nɛ́ dàala líɛ lè kiluʔufɔlilɔ yeli nɛ̄. 29 Nɛ́ ki cɛ́n, mi nyɛ́nì ki cɛ́n a mi 'kùu nɛ̀ kúɔ wè, yeli bé yìye cúʔɔ péwu ! Yeli bé láʔa koligo nɛ̄ gè gàa mi 'juu nɛ̀ gbɛ̀ngɛ nɛ̀ jo yeri ki tári gè. Kire kɛnmɛ nɛ̄, cɛnyɛ nyáà yi báan yè, kapiʔi ki bé tuu yeli nɛ̄, bɛ̀ yeli 'kapiʔile kpíʔile gèle Yewe yiʔɛ mɛ́ gè nɛ́ wi fungo yɛ̀gɛ gè, yeli kakpiʔiligele ní gèle.»
Misa 'nyakungɛngɛ ŋúnugo ŋú gè
30 A Misa 'ŋúnugo gáà tìɛ gè Isirayɛli gboli siɛnnɛ pe mìɛni nɛ̄, fúɔ bè sa nɔ̀ ki kúɔmɔ nɛ̄ bè: