Fànʔa Kajuʔulo 32

Ŋúnugo ki sélidiʔɛ gè

1 Nyìʔɛnɛ, ma líiye cáan

dí mi de nyu,

dàala, te lúru gàa mi je juu gè.

2 Mi tɛnmɛnɛ ni de fúu bɛ̀

kàsaʔa tíɛlɛ,

mi nyasiɛnrɛ ti de tíri

bɛ̀ kámɛgɛ tíɛlɛ,

bɛ̀ kárifiɛn tíɛlɛ nyàʔa nɛ̄ gè,

bɛ̀ kàsaala tíɛlɛ yaliire nɛ̄ dè.

3 M'béri míʔɛ ŋú gè,

béri weli Kulocɛliɛ kpuɔmɔ

tìí bè !

Yewe wiī sínwɛ; Isirayɛli wire wi 'koli

4 Yewe, wiī kàdɛnigbaala,

wi yē weli nyúmɔ;

wi baara ti tìí yɛligɛ,

wi kakpiʔiligele

ke mìɛni 'sín.

Kulocɛliɛ wiī sìɛnwɛ,

kolimɔ fùn;

wire wi 'sín,

nɛ́ ní kányiʔɛfɔli wè.

5 Yeli bèle, wi nyaamɛ nɛ̄ bè,

yeli yē siɛncuʔɔlɔ wī,

bɛ̀ sí ki yē yeli ní wè

wi pìileʔ,

yeli kolimɔ pire kɛnmɛ nɛ̄.

Yeli yē kɛ̀nnɛ láà, nàa ni

'pii nɛ́ koli lè.

6 Bɛ̀ gī lé, yeli 'yɛli bèri tári wi

yiʔɛ mɛ́ gè ?

Yeli yē kàalafɔlilɔ, yeli sì

cìligeʔ !

wire bɛ̀ʔ lé yeli tuu wè,

ŋàa wi 'yeli faan nɛ̀

yige wè,

ŋàa wi 'yeli kpíʔile nɛ̀ yeli

sɔ́migɔ nɛ̀ yérige wè ?

Yewe nyɛ́nì kacɛ̀ngɛlɛ sáa kpíʔile Isirayɛliyé mɛ́ bèle

7 Sɔ̀ngi ma taa nɛ́ cɛnyɛ ní yè

nyàa yi 'tóri yè.

Ma yiʔɛlɛ wéli gèle,

nɛ́ kɛ̀ngɛlɛ ní gèle

gàli ke 'taʔala kìye nɛ̄ gèle.

Ma muɔ tuu yúgo wè, wi bé

muɔ tɛnmɛ ti nɛ̄,

muɔ nàgaliɛlɛ bèle, pe bé

ti juu muɔ mɛ́.

8 Kulocɛliɛ ŋáà wī ,

bà wi 'kɔrigɔ kɛn gè

kùlogolo mɛ́ gèle,

bà wi lewiile cɛrigɛ bèle

dàala nɛ̄ lè,

a wi 'siɛnfeliye yi mìɛni

láʔagɛlɛ tìɛ gèle,

nɛ̀ yɛli nɛ́ pìile

niʔɛgɛnmɛ ní bè.

9 Nɛ́ ki cɛ́n, liɛlɛ lè,

lire nī wi siɛnnɛ bèle;

wī, wi kɔrigɔ gè.

10 Yewe nyɛ́nì wi nyaa baa

waama kùlo nī lè,

kire tiɛwaʔa nī gè, baa

nyàʔayɛrɛ ti 'nyɛni dè.

A wi 'wi màʔa nɛ̀ suʔu lɛ̀gɛlɛ

ke mìɛni nī, níɛ wi wéli,

wi 'puu nɛ wi ciʔige súuri bɛ̀

wi nyapisiɛn tíɛlɛ wè.

11 Bɛ̀ dìfira tíɛlɛ ŋàa wi cî wi

pìile ŋɔrigɔ bèle

nɛ̀ yige wi sìɛrɛ nī dè,

ŋàa wi cî wi fíkɛnyɛ sáʔala yè

níɛ̀ fini wè,

wi pìile naamɛ gè,

bɛ̀ Yewe míɛni wi fíkɛnyɛ sáʔala yè

nɛ wi pìile líi bèle wi fíkɛnnyuyɔ nɛ̄ yè.

12 Yewe wire nigbe wī,

wi 'siɛnnɛ yiʔɛ kínigi gè,

kulocɛliɛ wáà sì puu nɛ́

wi níʔ.

13 Wi nyɛ́nì pe líɛ nɛ̀ tánʔa

nɛ́ pe ní kùlo ni

nyaguruyo nɛ̄ yè;

pe nyɛ́nì kùlo ni siiye

yafalidɛ káa dè.

Wi nyɛ́nì ki kpíʔile a pe

'sáluʔɔ mùgu gè

kàdɛniwiiye nī yè.

Wi sùnmɔ kɛn bè pe mɛ́

bàa pi 'puu nɛ yigi

kàdɛnigbaala nī lè,

14 nɛ́ nɛ̀yirimɛ ní bè bàa

pi 'tanʔana bè, nɛ́

sìnbayirimɛ ní bè;

nɛ́ sìnbayɛlilɛ sùnmɔ ní bè,

nɛ́ Basan kùlo sìnbapɛnyɛ ní yè

nɛ́ síkapɛngɛlɛ ní gèle,

nɛ́ yaliicɛ̀nrɛ ní dè.

Muɔ cɛ́nì luʔɔ gbuɔ

gè, diviɛn wuʔu gè !

Isirayɛliyé pe 'cíi Yewe nɛ̄ wè

15 Yesuruni wè, wire ŋáà wī

wè,

bà wi 'kpúʔɔ wè,

a wi 'yiʔɛ le nī wè;

wi 'kpúʔɔ nɛ̀ sùnmɔ le nɛ̀

lúbugo.

A wi 'cíi Kulocɛliɛ nɛ̄ wè,

ŋàa wi 'wi yige wè;

a wi 'kàduʔu wáa

kàdɛnigbaala mɛ́ lè

nàa ni 'wi suɔ lè.

16 Pe 'yejaʔa yɛ̀gɛ gè wi mɛ́,

nɛ́ ki cɛ́n pe nyɛ́nì

kulocɛlɛlɛ pálì sun.

Pe 'nàʔa cò wi nɛ̄, nɛ́ pe

kanabinʔɛnɛ ní gèle

gàli pe kpínʔini gèle.

17 Pe 'kò nɛ gbòdolilo sungu

bèle, bàli bīɛlɛ pe wè

Kulocɛliɛ wèʔ.

Peli tíimɛ sì yé kíni nɛ̀ pe

cɛ́nʔ,

kulocɛlɛlɛ bálì pe nyɛ́nì

péli nɛ̀ pɛn wī !

Pe tuuliɛyɛ tíimɛ yiì cé

pe wori lúʔu dèʔ.

18  yo, muɔ 'fìʔɛ nɛ́

kàdɛnigbaala ní lè

nàa ni 'sìi kɛn wè muɔ

mɛ́ lè;

muɔ 'láʔa Kulocɛliɛ nɛ̄ wè

ŋàa wi 'muɔ sii liyɛ yáara

nī dè.

Yewe fungo ki 'yɛ̀ kpuʔɔ pe cíimɛ kɛnmɛ nɛ̄ bè

19 Bà 'ki nyaa gè, a wi

fungo ki 'yɛ̀ kpuʔɔ,

ki yé wi biɛn gàa wi jaala

nɛ́ wi pórilo

pe yé kpíʔile gè.

20 A wi 'jo: «M'bé nìɛ làrigɛ

kire ga buu pe fǎga ní

ki cɛ́n mi yē bileʔ,

bà m'bé ki nyaa gàa ki bé

pe taa gè cɛnyɛ

nyáà yi báan yè.

Nɛ́ ki cɛ́n pe yē kɛ̀nnɛ láà nàa

ni kolimɔ kpínʔini bè,

pìile pálì bīɛlɛ bàli piyè

pìye puɔ mi nɛ̄ wèʔ.

21 Bɛ̀ pe 'mi yejaʔa yɛ̀gɛ gè nɛ́ gàa

ní ki wè Kulocɛliɛ wèʔ,

a pe 'mi fungo yɛ̀gɛ nɛ́ pe

fáalimɛ yasunro ní dè,

mi míɛni bé yejaʔa yɛ̀gɛ

pe mɛ́ nɛ́ kùlo

siɛnfelige káà ní,

gàa ní pe wè nɛ tɔ́ri gèʔ

kire kùlo siɛnnɛ bálì bīɛlɛ

ledobilo bèle.

22 ʔaan, mi funyɛrigɛ, ki bé cò kàsun !

Ki béri nyí fúɔ bè sa jíin

laamɛ nī bè,

bé dàala sórigo lè nɛ́

ni yafiinre ní dè,

ki bé cò bè nyaguruyo

sórigo bèle.

23 M'bé wuʔɔyɔ nìʔɛyɛ yige

bè taʔala pe nɛ̄,

m'bé mi ŋaaya yi mìɛni ŋɔ

bè yi kúɔ pe nɛ̄ !

24 Fungo ki bé pe fànʔa kúɔ gè,

nyumɔ nɛ́ káfaligɛ yaama

pi bé pe kpúu.

M'bé nyàʔayɛrɛ yige dè

pe kúrugu nɛ́

ti gànʔana ní gèle,

nɛ́ yafulolido ní dè suɔnrɔ

wori dè,

dàa dī tárigɛ nī gè.

25 Gunyɔ kàduʔu mɛ́ gè,

kapiɛngbuɔn ŋɔnɔ lire

ni bé pe pìile lìi bèle,

saaya laamɛ nī bè,

fíɛgbuɔrɔ ti bé puu

pe nɛ̄.

Kùu béri nàgapunminɔ

kpúu bèle,

nɛ́ sinborilo ní bèle,

nɛ́ pìfiɛnyɛ ní yè,

nɛ́ nàgaliɛlɛ ní bèle.»

Yewe 'Isirayɛli leguulo pe kúɔgɛnmɛ tìɛ bè

26 «Mi 'puu nɛ caa bè pe cùnʔɔ

cùnʔɔ,

siɛn fǎga ní sɔ̀ngi bè taa

nɛ́ pe níʔ.

27 Nɛ̀ sí ki yaʔa gàa mi 'puu nɛ

fìʔɛ́ gè, kire gī:

pe leguulo pe béri pìye

nyíɛnɛ mi nɛ̄.

Pe leguulo piyě cî gbɛ̀ ki cɛ́nʔ;

pe cî jo:

‹Je weli ŋɔri tire ní weli 'pe jáa !›

Pe sî ki juu bé jo: ‹

wire bɛ̀ʔ

wi nyɛ́nì ki kpíʔileʔ !› »

28 Nɛ̀ ki yaʔa pe leguulo

piyē kùlogolo kálì

gàli kiyè cìlige wèʔ;

kiyè kaala cɛ́nʔ.

29 A ki yē pe yē cìlige wè

nɛ nyaʔa wè,

pe cî ki sɔ́migɔ cɛ́n gàa gī

peli kúɔmɔ bè.

30 Mɛni ki bé gbɛ̀ kpíʔile

dí siɛn nigbe

sí gbɛ̀ taʔa siɛnnɛ

sirakogunɔ (1 000) nɛ̄,

kire ga laa siɛnnɛ siin

bé gbɛ̀ jáa bè siɛnnɛ

siramuʔɔyɔ siin sirakiɛ

(10 000) cìra wè ?

Kire 'kpíʔile nɛ́ ki cɛ́n,

pe kàdɛnigbaala

náà ni 'pe wéli lè,

lire ni 'pe pári;

nɛ́ ki cɛ́n Yewe cé

wi siɛnnɛ kɛn bèle

pàli piyeyɛ mɛ́ wī.

31 Weli leguulo kàdɛnigbaala lè,

ni wè bɛ̀ʔ weli

kàdɛnigbaala tíɛlɛ lèʔ.

Peli tíimɛ pe 'yɛli bè ki cɛ́n !

32 Nɛ̀ ki yaʔa peli fétire dè,

ti nyɛ́nì kɔ́n

mɛ́ wī,

nɛ́ míɛni ti kɔ́n

siiye nī yè.

Ti ɛrɛzɛn sɛnrɛ tiī

nɛ́ sùɔnmɔ ní,

ti kàtoyo yiī sìsoriyo.

33 Ti diviɛn wiī wɔ̀burɔ suɔnrɔ,

sékanʔarigɛ suɔnrɔ

dàa ti 'siɛnnɛ kpúu dè.

34 A 'jo: «Gàa mi nɛ caa

bè kpíʔile gè o,

ki wè gbòborigo

nɛ̀ yaʔa nɛ̀ kúɔ lé,

mi tɛ́ngɛdiɛyɛ nī yè ?

35 Mi mɛ́ ki yē bè mi fuʔɔ tɔ́n gè

pe mɛ́,

bè ki sàri pe mɛ́ gàa

pe 'kpíʔile gè,

lɛ̀lɛ líì nī pe tɔliyɔ

yi pɛ́nì kúrugo yè.

Nɛ̀ ki yaʔa pe fuunmɔ cɛngɛ

kiī nɛ nɔ̀gí,

kàyuʔu gáà mi je juu gè,

kiī nɛ ŋàʔana nɛ báan.»

36 Nɛ́ ki cɛ́n Yewe bé wi siɛnnɛ

pe tánʔa juu,

bé sí nyinimɛ taa pe nɛ̄,

wi baakuɔlɔ bèle,

a wi kɛ́nì ki nyaa pe ŋɔri

ti 'kúɔ dè,

siɛn sì ní wè bile cíginiʔ,

sùkulowo nɛ́ wɔ́ruwɔʔ.

37 Yewe bé sí ki juu bé jo:

«Sé pe káfinɛrɛ

kulocɛlɛlɛ pe yē ?

Sé pe kàdɛnigbaala ni yē,

nàa láara

pe yé sɛ́nì làri lè ?

38 Sé pe yasunyɔ yi yē, pe

‹kulocɛlɛlɛ› bálì

pe 'puu nɛ pe yakɔnrɔ

ti sùnmɔ káa bè,

níɛ diviɛn gbun wè

ŋàa pe 'puu nɛ ŋu

yi nɛ̄ yè ?

Yi- yɛ̀, yiri báan yi pa

ye sáʔa kìɛ !

Yi- puu ye làridiʔɛ

píra ŋáà nī wè !»

39 Yewe 'jo: «Yeri wéli

píra ŋàa nī wè:

Mi wī, ʔaan,

mi sí wī Kulocɛliɛ.

Kulocɛliɛ wáà ni wè baa

nɛ̀ fàri mi nɛ̄ʔ !

Mi nɛ kpúu níɛ sìi kanʔa wè,

mi nɛ siɛn kpúɔn nɛ̀ luɔ,

níɛ wi puʔɔ.

Siɛn sǐ gbɛ̀ siɛn píle zuɔ

mi kɔli nī gèʔ.

40 ʔaan, mi 'mi kɔli yɛ̀gɛ gè nyìʔɛnɛ

nī lè nɛ̀ nɛ́ jo:

‹Kányiʔɛ nɛ̄, bɛ̀ mi yē sìi nɛ̄

lɛ̀lɛ ó lɛ̀lɛ wè,

41 a mi 'mi ŋɔsii juɔ wè,

ŋàa wi nyíʔɛnɛ wè,

a mi kɔli ki 'kàyuʔujuu

yakpunʔɔ cò gè,

m'bé mi fuʔɔ tɔ́n gè

mi leguulo mɛ́ bèle;

m'bé ki sàri pe mɛ́

bàli pe 'mi biɛn bèle.

42 Mi ŋaaya yi bé mi leguulo

sìsiɛn gbuɔ gè bè tín,

mi ŋɔsii wi bé pe céri

káa dè kaara.

M'bé siɛnnɛ sìsiɛn wo gè,

bàli m'bé kpúu bèle,

nɛ́ bàli m'bé cò bèle,

nɛ́ mi leguulo pe kàfɔlilɔ

ní bèle.› »

Ŋúnugo ki kúɔdiʔɛ n'gɛ

43 Kùlogolo siɛnnɛ, yeri

fundaanra kpínʔini nɛ́

siɛnnɛ ní bèle,

nɛ́ ki cɛ́n wi bé wi baakuɔlɔ

sìsiɛn fuʔɔ tɔ́n gè.

Wi bé ní koli wi fuʔɔ tɔ́n gè

wi leguulo mɛ́ bèle.

Bɛ̀ ki bé kpíʔile wi bé

kapiʔile láʔa gèle

wi siɛnnɛ dàala nɛ̄ lè.

44 Bɛ̀ ki 'kpíʔile a pɛ́nì ŋúnugo gáà ki siɛnrɛ ti mìɛni juu Isirayɛli siɛnnɛ mɛ́ bèle, wire nɛ́ Yesuwe ní wè, Nuni jaa wè.

Pe 'yɛli bè siɛnrɛ dáà cò dè kpuʔɔ

45 Bà 'siɛnrɛ dáà ti mìɛni juu nɛ̀ kúɔ dè, siɛnnɛ mɛ́ bèle, 46 a wi 'pe yɛ: «Ye- siɛnrɛ dáà ti mìɛni cò kpuʔɔ yeli funyɔ nī yè dàa mi 'juu nɛ̀ yeli sɔ̀mi pàngɛ gè. Ye míɛni, ye- ti juu ye gbɛ̀ngɛ yeli pìile mɛ́ bèle peri ti kpínʔini, Fànʔa Kajuʔulo siɛnrɛ dáà ti mìɛni dè. 47 Nɛ́ ki cɛ́n, siɛnrɛ táà bɛ̀ʔ dàa nī tɔ̀ni wè yē wèʔ. Siɛnrɛ dáà tire dī yeli sìi wè; tire ti bé yeli sìi tɔnigɔ wè dàala nɛ̄ lè, a yeli kɛ́nì cáʔa jeli gè bè kùlo líɛ lè.»

Kulocɛliɛ 'jo Misa kùu lɛ̀lɛ ni 'nɔ̀

48 Kire cɛnnugo gè, a 'juu nɛ́ ní, nɛ́ wi yɛ: 49 «Sa tánʔa Nɛbo nyagurugo nɛ̄ gè, gàa gī baa Abarimi nyaguruyo nī yè. Kiī baa kùlo nī lè, Zeriko kàʔa táanni gè. Ma kùlo wéli lè baa, nàa m'bé kɛn kɔrigɔ gè siɛnnɛ mɛ́ bèle. 50 Nyagurugo gàa nɛ̄ muɔ 'tánʔa gè, baa muɔ bé kùu kire nyagurugo nɛ̄ gè bè kɛ́ muɔ tobilo kúrugu bèle, bɛ̀ muɔ luɔ tíɛlɛ wè, ŋàa wi 'kùu nɛ̄ gè a wi 'kɛ́ wi tobilo kúrugu bèle.

51 «Nɛ́ ki cɛ́n, yeli cé koli m'mɛ́ Isirayɛli siɛnnɛ nyaamɛ nɛ̄ bè, baa Mɛriba Kadesi luɔyɔ tiʔɛ nī gè, baa Zɛnɛ waama kùlo nī lè, bà yeli sì cé mi tiɛlɛfun kɛnmɛ kpúʔɔ bèʔ, Isirayɛli siɛnnɛ yiʔɛ mɛ́ gè. 52 Muɔ bé kùlo wéli lè liilige muɔ yiʔɛ mɛ́ gè, nɛ̀ ki yaʔa muɔ sǐ jíin baa kùlo náà nī lèʔ, nàa mi nɛ kanʔa Isirayɛli siɛnnɛ mɛ́ bèle.»