Fànʔa Kajuʔulo 30

A ki sí nyaa Isirayɛliyé pe 'koli nɛ̀ pɛn Yewe mɛ́ wè

1 A ń'nɛ̀ juu nɛ́ jo: «A kele gálì ke mìɛni kɛ́ni nɔ̀gí muɔ nɛ̄ wè, diba siɛnrɛ dè nɛ́ dɛ́ngɛ siɛnrɛ ní dè, dàa mi yé juu nɛ̀ yaʔa muɔ yiʔɛ mɛ́ gè, a muɔ 'koli nɛ̀ sɔ̀ngi, kùlogolo gálì ke mìɛni nī baa muɔ Kulocɛliɛ wi 'muɔ cìra nɛ̀ tórigo wè, 2 a muɔ 'koli nɛ̀ pɛn Yewe muɔ Kulocɛliɛ mɛ́ wè, nɛ́ muɔ pìile ní bèle, níɛ lúru wi mɛ́ dàa wi 'juu dè, dàa ti mìɛni mi 'juu nɛ̀ gbɛ̀ngɛ muɔ mɛ́ pàngɛ gè, nɛ ti kpínʔini dè nɛ́ muɔ fungo ki mìɛni ní nɛ́ muɔ pìle ní mìɛni ní lè, 3 bà Yewe muɔ Kulocɛliɛ wi bé koli muɔ wuʔɔgɔ yiʔɛ gè, bè muɔ siɛnnɛ gbuʔulo bèle baa kùlogolo siɛnfeliye yi mìɛni sunʔɔmɔ nī bè bàli mɛ́ wi yé muɔ cìra nɛ̀ tórigo wè, bè muɔ koli dórigo nɛ́ wi nyinidaaguugo ní gè.

4 «A ki sí cɛ́nì nyaa pe 'kɛ́ nɛ́ muɔ ní liʔi duniya láʔala nɛ̄ lè, Yewe muɔ Kulocɛliɛ bé kɛ́ bàa muɔ caa bè muɔ siɛnnɛ kɔ́ri bèle gbuʔulo pìye nɛ̄. 5 Yewe muɔ Kulocɛliɛ wi bé muɔ kɔ́ri bè pɛn kùlo nī lè nàa nī muɔ tobilo woli lè, bà muɔ bé ni líɛ muɔ woli. Wi bé kacɛ̀ngɛ kpíʔile muɔ nɛ̄ bè muɔ siimɛ- niʔɛ bè bè tóri muɔ tobilo nɛ̄ bèle.

6 «Yewe muɔ Kulocɛliɛ wi bé muɔ fungo yiʔɛ gè muɔ nī muɔ de lúru wi mɛ́, muɔ nɛ́ muɔ siimɛ ní bè, kire ga buu muɔ- Yewe muɔ Kulocɛliɛ woli yaʔa lè ni- muɔ dɛ́ni nɛ́ muɔ fungo ki mìɛni ní, nɛ́ muɔ pìle ni mìɛni ní, dí muɔ sí sìi taa. 7 Yewe muɔ Kulocɛliɛ wi bé dɛ́ngɛ siɛnrɛ dáà ti mìɛni juu bè wáa muɔ leguulo nɛ̄ bèle, bàli 'muɔ biɛn a pe nɛ muɔ wuʔɔ bèle. 8 Bà muɔ bé koli bɛn Yewe mɛ́ wè, bèri lúru wi siɛnrɛ mɛ́ dè, bèri wi kajuudiʔɛlɛ kpínʔini gèle gàli mi 'juu nɛ̀ gbɛ̀ngɛ pàngɛ gè.

9 «Yewe muɔ Kulocɛliɛ wi bé muɔ kɔli kakpiʔiligele ke mìɛni nyuɔ. Wi bé pìniʔɛrɛ kɛn muɔ mɛ́, wi bé muɔ yajuuro niʔɛ dè, wi bé yaliiniʔɛrɛ kɛn muɔ mɛ́. Nɛ́ ki cɛ́n ki bé ní koli Yewe dɛ́ni wè bè kacɛ̀ngɛ kpíʔile muɔ nɛ̄, majo bɛ̀ ki yé kíni nɛ̀ wi dɛ́ni á wi 'kacɛ̀ngɛ kpíʔile muɔ tobilo mɛ́ bèle, 10 a muɔ kɛ́ni lúru Yewe muɔ Kulocɛliɛ mɛ́ wè nɛ́ wi kajuudiʔɛlɛ nɛ́ wi fànʔa kele sɔ́migɔ gèle nɛ̀ cò wè, gàli gīɛlɛ sɛbɛgɛlɛ sɛbɛkuruwo nī wè, Fànʔa Kajuʔulo wuu wè, a muɔ 'koli nɛ̀ pɛn Yewe muɔ Kulocɛliɛ mɛ́ wè nɛ́ muɔ fungo ki mìɛni ní gè, nɛ́ muɔ pìle ni mìɛni ní lè.»

Kajuudiʔɛlɛ siɛnrɛ tiì líili pe nɛ̄ʔ

11 «Kányiʔɛ nɛ̄, kajuudiʔɛlɛ siɛnrɛ dáà mi nɛ nyu nɛ gbɛ̀ngí pàngɛ gè, tiì gbɛ̀li nɛ̀ cáanri muɔ mɛ́ʔ, ti míɛni sì líili muɔ nɛ̄ʔ. 12 Ti wè nyìʔɛnɛ nɛ̄ wīʔ, dí muɔ ga ki juu bé jo: ‹Ŋáa wi bé tánʔa baa nyìʔɛnɛ nī lè bè ti tìrige weli mɛ́, ŋáa wi bé ti juu dí weli sí ti lúʔu, dí weli sí de ti kpínʔini ?› 13 Ti wè kuʔɔjii kúrugu wèʔ, dí muɔ ga ki juu bé jo: ‹Ŋáa wi bé kuʔɔjii luʔɔ jeli gè, bè sa ti líɛ weli kɛn kire ga buu weli sí de ti tári dè ?› 14 Nɛ̀ sí ki yaʔa, siɛnrɛ tiī bile muɔ táanni; tiī baa muɔ nyuɔ nī gè nɛ́ muɔ fungo nī gè kire ga buu muɔ de tári de yɛligi nɛ́ ti ní.»

-Kàa nyíɛnɛ ma kɔ̀n

15 «Ki n'gɛ, pàngɛ gè mi nyɛ́nì sìi nɛ́ kacɛ̀ngɛ tɛ́ngɛ gè muɔ yiʔɛ mɛ́ kayɔbigɔ káà nɛ̄, nɛ́ kùu nɛ́ kapiʔi tɛ́ngɛ gè kayɔbigɔ káà nɛ̄. 16 Gàa mi bé juu gbɛ̀ngɛ muɔ mɛ́ pàngɛ gè, kire gī: ma muɔ Kulocɛliɛ yaʔa wè wi- muɔ dɛ́ni, mari tári wi koligo nī gè, mari lúru wi kajuudiʔɛlɛ mɛ́ gèle, nɛ́ wi fànʔa kele ní gèle, nɛ́ wi kàyuʔujuuro ní dè. A muɔ nɛ kire kpínʔini gè, muɔ bé sìi taa, muɔ bé sii bè niʔɛ, dí Yewe muɔ Kulocɛliɛ wi sí diba taʔa wè muɔ nɛ̄ kùlo nī lè nàa nī muɔ nɛ jiin ni- kò yeli woli lè.

17 «Gìi sí gī baa gè, a muɔ fungo ki sí láʔa wi nɛ̄, a muɔ wè nɛ lúru wi nɛ̄ wèʔ, a muɔ 'kò nɛ káguro cáanri kulocɛlɛlɛ pálì piyeyɛ táanni wè níɛ baara pe mɛ́ wè, 18 mi bé ki juu yeli mɛ́ kányiʔɛ nɛ̄ pàngɛ gè, yeli sìi wi bé weri fáarifaari; yeli bé cɛrigɛ kùlo náà nī yeli 'jíin bè ni líɛ lè, cáʔa kayɔbigɔ gíì nɛ̄ gè.

19 «Mi nyɛ́nì nyìʔɛnɛ nɛ́ dàala líɛ lè pàngɛ gè ni- puu kiluʔufɔlilɔ yeli nɛ̄: mi 'sìi tɛ́ngɛ wè muɔ yiʔɛ mɛ́ nɛ́ kùu ní wè, diba siɛnrɛ dè nɛ́ dɛ́ngɛ siɛnrɛ ní dè. Ma sìi líɛ wè, kire ga buu muɔ- kò sìi nɛ̄, muɔ nɛ́ muɔ siimɛ ní bè. 20 Ma ki nyíɛnɛ ma kɔ̀n ma Yewe muɔ Kulocɛliɛ yaʔa wè wi- muɔ dɛ́ni, mari lúru wi mɛ́; ma mìɛ sɔ́migɔ ma puɔ wire nigbe nɛ̄. Nɛ́ ki cɛ́n wire mɛ́ sìi wi yē, wire wī sìi cɛnyɛ tɔnigi yē, kùlo nī lè nàa nyuɔ wi cé kún nɛ̀ kɛn yeli tuuliɛyɛ mɛ́ yè, wè, nɛ́ ní wè, nɛ́ ní wè.»