MISA WI 'SIƐNSƐNRƐ JUU DE
(29.1–30.20)
Gàa Yewe 'kpíʔile Isirayɛliyé kɔli mɛ́ gè
29
1 A Misa 'Isirayɛliyé pe mìɛni yeri bèle nɛ̀ ki juu pe mɛ́ nɛ́ jo: «Yeli nyɛ́nì ki nyaa yeli tíimɛ bèle gàa Yewe 'kpíʔile yeli nyaamɛ nɛ̄ bè baa Ezipiti kùlo nī lè, Farawɔn nɛ̄ wè, nɛ́ wi baakuɔlɔ ní bèle, nɛ́ wi kùlo ni mìɛni ní lè. 2 Yeli nyapigele ke 'kagbɛngɛlɛ gálì nyaa gèle gàli ke yē kpoligolo gèle, nɛ́ fìɛlɛ bálì ní bèle, nɛ́ kakpoliyo nyáà ní yè. 3 Nɛ̀ sí ki yaʔa, fúɔ nɛ̀ pɛ́nì nɔ̀ pàngɛ nɛ̄, Yewe sì fìɛ yeli funyɔ múgu yèʔ kire ga buu yeli gbɛ̀ ki cɛ́nʔ, bé nyapigele múgu gèle bè ki nyaaʔ, bé ngbúʔulo múgu gèle bè ki lúʔuʔa.4 «Wi 'ki juu yeli mɛ́ nɛ́ jo: ‹Mi nyɛ́nì yeli yiʔɛ kíni gè waama kùlo nī lè nɛ̀ taa yiʔɛlɛ togosiin. Yeli buruyo yiì cɛnminɛ yeli nɛ̄ʔ, yeli tɔriyɔ míɛni yiì cúʔɔ yeli nɛ̄ʔ. 5 Suro dáà yeli yé dàli nɛ líi dè, tire bɛ̀ʔ wi yé kɛn yeli mɛ́ʔ; diviɛn nɛ́ sunmɔ míɛni bɛ̀ʔ yeli gbuɔʔ.› Wi 'puu nɛ caa yeli- ki cɛ́n dí wire wī Yewe wè, yeli Kulocɛliɛ wèb.
6 «Bà sí yeli pɛ́nì nɔ̀ tiʔɛ gáà nī gè, a Sikɔn, Kɛsibɔni kùlofɔli wè, nɛ́ Ɔgi, Basan kùlofɔli wè, a peli 'yiri nɛ̀ weli kpàli bè kapiɛnnɛ kpúɔn nɛ́ weli ní, a weli sí pe jáac. 7 A weli 'pe kùlo líɛ lè nɛ̀ ni kɛn kɔrigɔ Wurubɛniyé mɛ́ bèle, nɛ́ Gadiyé mɛ́ bèle, nɛ́ Manase saʔa tùlugo tílaga mɛ́ gèd. 8 Bɛ̀ ki yē gè, ye- nyakungɛngɛ siɛnrɛ dáà cò dè cɛ̀ngɛ yeri ti kpínʔini, kire ga buu yeli- nyuɔ yeli kakpiʔiligele ke mìɛni nī.»
Nyakungɛngɛ gáà gī Isirayɛliyé siimɛ wuʔu gè
9 «Yeli 'yéri náʔa gè pàngɛ gè, Yewe yeli Kulocɛliɛ yiʔɛ mɛ́ gè, yeli ye mìɛni bèle, yeli saaya tùluyo kàfɔlilɔ bèle, yeli liɛlɛ bèle, yeli yiɛgininɛ bèle, nɛ́ Isirayɛli nàguɔlɔ pe mìɛni ní bèle, 10 nɛ́ yeli pìile ní bèle, nɛ́ yeli cɛlilɛ ní bèle, nɛ́ nabɔnminɔ ní bèle bàli bīɛlɛ tɛ́ninɛ yeli bùguro nī dè, bàli pe yeli kásiin caa yè níɛ yeli luʔɔ kóri gè. 11 Muɔ yē náʔa yériwe, bà Yewe muɔ Kulocɛliɛ wi bé nyakungɛngɛ kpíʔile nɛ́ muɔ ní, nɛ́ kàlilɛ ní lè, pàngɛ gè, 12 bè muɔ tɛ́ngɛ pàngɛ gè muɔ- puu wire tíimɛ wuu, muɔ wè Isirayɛli siɛnfelige gèe, wi bé sí puu wire tíimɛ wè muɔ Kulocɛliɛ, bɛ̀ wi yé ki juu nɛ́ ki kàli muɔ tobilo mɛ́ bèle, Birayima, nɛ́ Siaga, nɛ́ Yakuba ní wè.
13 «Bà Yewe 'ki juu nɛ́ jof: ‹Nyakungɛngɛ gáà mi 'kpíʔile nɛ́ kàlilɛ ní lè, yeli yákuɔ ní bɛ̀ʔ mi 'ki kpíʔile pàngɛ gèʔ. 14 Mi 'ki kpíʔile nɛ́ yeli ní, yeli bálì bīɛlɛ náʔa pàngɛ gè Yewe weli Kulocɛliɛ yiʔɛ mɛ́ gè, nɛ́ míɛni nɛ́ bàli piyē fìɛ sii wèʔ, yeli siimɛ nī bè.› »
Yeli fǎga de kulocɛlɛlɛ pálì piyeyɛ sunguʔ
15 «Yeli tíimɛ nyɛ́nì ki cɛ́n kɛnmɛ bíì nɛ̄ weli yé puu tɛ́ninɛ Ezipiti kùlo nī lè, nɛ́ kɛnmɛ bíì nɛ̄ míɛni weli 'tóri kùlogolo kálì siɛnnɛ sunʔɔmɔ nī bè, 16 a yeli 'pe laabiri kele nyaa gèle nɛ́ pe yasunro ní dè, dàa pe kpínʔini nɛ́ tiire ní dè nɛ́ kàdari ní dè nɛ́ walifiiwe ní wè nɛ́ tiɛ ní wè. 17 Yeli funyɔ yiì yɛli bàga láʔa Yewe weli Kulocɛliɛ nɛ̄ wèʔ bè sari baara kùlogolo gálì kulocɛlɛlɛ pálì piyeyɛ mɛ́ʔ; kiǐ cɛ́nì yɛli wi- puu nàguɔʔ, kire ga laa cɛliwɛʔ, á kire bɛ̀ʔ narigɛ káàʔ, kire ga laa saʔa tùlugo káàʔ. Kiǐ cɛ́nì yɛli ki- nyaa yeli sunʔɔmɔ nī bèʔ tiige nìge káà gàa ki suɔnrɔ líi dè nɛ yɛ̀gí tiige yasɛnrɛ kúrugu dèʔ nɛ ti kpínʔini sìsorido dèʔg.
18 «A kire siɛn ŋáà felige wi 'nyakungɛngɛ gáà siɛnrɛ lúʔu dè, dàa ti 'juu nɛ́ kàlilɛ ní lè, dùʔɔ wi bé gbɛ̀ ki sɔ̀ngi bè jo wire yē nyùdanʔafɔli, bé ki juu bé jo: ‹Mi wè, mi bé puu yanyige nɛ̄, bè ki yaʔa mi nɛ mi nyɛ́ni kele kpínʔini gèle.› Kire bé sí pɛn nɛ́ cúʔɔmɔ ní dàala ni mìɛni mɛ́, dàala náà nī nyìnɛ lè nɛ́ nàa nī waʔala lèh. 19 Yewe sǐ ga tíi fɔ̀li bè ki yaʔa kire siɛn nɛ̄ wèʔ, nɛ́ ki cɛ́n Yewe funyɛrigbuʔɔ nɛ́ wi kayaʔa ní gè, ki bé cò kàsun kire siɛn kúrugu wè. Nyakungɛngɛ dɛ́ngɛ siɛnrɛ dáà ti mìɛni ti 'juu sɛbɛkuruwo ŋáà nī wè, ti mìɛni bé taʔa kire siɛn nɛ̄ wè, bà Yewe bé wi míʔɛ cúʔɔ gè bè yige dàala nɛ̄ lè péwu ! 20 Yewe bé kire siɛn yige wè Isirayɛliyé saaya tùluyo nī yè, bè wuʔɔgɔ taʔa wi nɛ̄ bè yɛli nɛ́ nyakungɛngɛ dɛ́ngɛ siɛnrɛ ti mìɛni ní dàa ti 'juu sɛbɛkuruwo ŋáà nī wè, Fànʔa Kajuʔulo Sɛbɛ wè.»
Yasunro sungo ki bé pɛn nɛ́ wuʔɔgbuʔɔ ní
21 «Yeli pìile kɛ̀ngɛlɛ gálì ke báan gèle, gàli ke bága yɛ̀ yeli kàduʔumɛ gè, nɛ́ nabɔnminɔ ní bèle bàli pe bága kɔ́n liilige bè pɛn bèle, peli bé ba wuʔɔgboliyo nɛ́ yaama nyaa bè, bàa ní Yewe bé kùlo kpúɔn lè. 22 Pe béri nyu nɛ́ pìye ní bé jo: ‹Kùlo ni mìɛni yē súʔulo, ni 'kò kàsunsindari nɛ́ ní yasuʔɔgɔ; yafiɛn sǐ ní gbɛ̀ tánʔaʔ, yafiɛn sǐ ní gbɛ̀ fìinʔ; ni 'kò tiʔɛ káà gàa nī nyàʔa ki wè yɛ̀gí gèʔ. Ni nyɛ́nì kò bɛ̀ Sodɔmi nɛ́ Gomɔri kàaya tíɛlɛ yè, nɛ́ Adima nɛ́ Seboyimi kàaya ní yè, yire nyáà Yewe yé cúʔɔ yè wi funyɛrigbuʔɔ nī gèi.›
23 «Bà duniya kùlogolo kálì siɛnnɛ pe mìɛni bé ki juu bé jo: ‹Gáa nɛ̄ Yewe 'kaala náà kpíʔile lè kùlo náà nɛ̄ lè ? Gáa nɛ̄ wi 'wi funyɛrigbuʔɔ gáà 'cò gè pe kúrugu mmɛ gè ?›
24 «Bà bìli pe bé ki juu bé jo: ‹Je pe nyɛ́nì cíi Yewe pe tobilo Kulocɛliɛ wi nyakungɛngɛ nɛ̄ gè, gàa wi yé kpíʔile nɛ́ pe ní wè lɛ̀lɛ líì nī wi 'pe yige Ezipiti kùlo nī lè. 25 Pe nyɛ́nì kɛ́ nɛ̀ sɛ́ni káguro cáanri kulocɛlɛlɛ pálì mɛ́ níɛ baara pe mɛ́, kulocɛlɛlɛ bálì piyè yé cɛ́n bèleʔ, Yewe míɛni sì pe kɛn pe mɛ́ bèleʔ. 26 Bà ki 'kpíʔile a Yewe fungo ki 'yɛ̀ pe kúrugu bɛ̀ kàsun tíɛlɛ, a wi sí dɛ́ngɛ siɛnrɛ dáà ti mìɛni taʔa dè pe nɛ̄, dàa ti 'sɛbɛ sɛbɛkuruwo ŋáà nī wè. 27 Wi funyɛrigɛ nī gè, a Yewe 'pe yɛ̀gɛ nɛ̀ yige pe dàala nɛ̄ lè nɛ́ wi fundanʔanigɛ ní gè nɛ́ funyɛrigbuʔɔ ní gè. A wi 'pe wáa kùlo láà liiyɛ nī, lire náà nī pe tíin baa pàngɛ gè.›
28 «Kalarigɛlɛ ke mìɛni yē Yewe weli Kulocɛliɛ wuʔulo. Gàli sí ke 'tìɛ weli nɛ̄ gèle, keli yē weli wuʔulo nɛ́ weli pìile ní bèle, lɛ̀lɛ ó lɛ̀lɛ nī, kire ga buu weli de Fànʔa Siɛnrɛ dáà ti mìɛni lúru bèri ti kpínʔini.»