Fànʔa Kajuʔulo 28

Diba siɛnrɛ dè

1 A sí ń'nɛ̀ ki juu nɛ́ jo: «Muɔ wè, a muɔ nɛ lúru kányiʔɛ ní muɔ Kulocɛliɛ mɛ́ wè, níɛ wi kajuudiʔɛlɛ ke mìɛni sɔ́migi gèle nɛ kpínʔini wè gàli mi 'juu nɛ̀ gbɛ̀ngɛ muɔ mɛ́ pàngɛ gè, Yewe muɔ Kulocɛliɛ wi bé muɔ yɛ̀gɛ naamɛ bè tóri kùlogolo sɛngɛlɛ nɛ̄ gèle dàala nɛ̄ lè. 2 Diba siɛnrɛ ti n'dɛ dàa ti bé taʔa muɔ nɛ̄ bè muɔ cò dè, nɛ́ ki cɛ́n muɔ nyɛ́nì lúʔu Yewe muɔ Kulocɛliɛ mɛ́ wè:

3 «Yewe wi bé diba taʔa wè muɔ nɛ̄ kàʔa nī gè, nɛ́ míɛni muɔ siʔi nī gè.

4 «Yewe wi bé diba 'taʔa wè muɔ nɛ̄, dí muɔ sii bè niʔɛ, bé wi taʔa míɛni muɔ siiye nɛ̄ yè kire ga buu muɔ- yaliiniʔɛrɛ taa, bé wi taʔa míɛni muɔ yajuuro nɛ̄ dè kire ga buu muɔ nɛ̀toyo nɛ́ muɔ sìnbatoyo nɛ́ muɔ síkatoyo yi mìɛni béri sii de nyuʔɔ.

5 «Yewe wi bé diba taʔa wè muɔ yaliire yalege nɛ̄ gè nɛ́ muɔ súgo ní gè kire ga buu yi- nyì. 6 Wi bé diba taʔa muɔ nɛ̄ a muɔ nɛ waa wè, bè diba taʔa muɔ nɛ̄ a muɔ nɛ báan wè.

7 «A muɔ leguulo pe kɛ́nì yiri bè tún nɛ́ muɔ ní wè, Yewe wi bé pe kpúɔn bè cáan muɔ yiʔɛ mɛ́ gè. A pe 'pɛn koligo nigbe nī gè, pe bága koli bè fɛ̀ gɛ́ koliyo kɔlisiin nī.

8 «Yewe muɔ Kulocɛliɛ bé diba taʔa wè muɔ nɛ̄ bè muɔ síkaanya nyì yè, bé sí ki kpíʔile muɔ- nyuɔ muɔ kɔli kakpiʔiligele ke mìɛni nī gèle. ʔaan, Yewe muɔ Kulocɛliɛ wi bé diba taʔa wè muɔ nɛ̄ kùlo nī lè nàa wi 'kɛn muɔ mɛ́ lè.

9 «Yewe bé yeli kpíʔile siɛnwalidɛngɛlɛ wìi mɛ́ majo bɛ̀ wi 'ki gè, nɛ́ ki cɛ́n muɔ nyɛ́nì lúʔu Yewe muɔ Kulocɛliɛ wi kajuudiʔɛlɛ mɛ́ gèle, nɛ́ míɛni muɔ nyɛ́nì tánʔa wi koligo nī gè.

10 «Kire tiʔɛ nī gè duniya siɛnnɛ pe mìɛni bé ki cɛ́n Yewe míʔɛ kiī muɔ nɛ̄, muɔ Isirayɛli wè; pe béri fìʔɛ́ muɔ nɛ̄.

11 «Yewe bé ki kpíʔile muɔ bé sɔ́migɔ bè nyuɔ, dí muɔ- sii bè niʔɛ, muɔ yajuuro ti mìɛni bé sii bè niʔɛ, muɔ siʔi yaliire ti bé sɔ́migɔ bè nyuɔ dàala nɛ̄ lè nàa Yewe muɔ Kulocɛliɛ wi 'kàli nɛ̀ kɛn muɔ tobilo mɛ́ bèle bè ni kɛn muɔ mɛ́ lè.

12 «Yewe muɔ Kulocɛliɛ wi bé wi kàliicɛnminɛ múgu bèle nyìʔɛnɛ nī lè bè kàsaʔa tìrige gè muɔ kùlo nɛ̄ lè ki lɛ̀lɛ nī lè, bè muɔ kɔli baara ti mìɛni yaʔa ti- nyuɔ. Muɔ béri fuʔɔ nii kùlogolo nìʔɛgɛlɛ nɛ̄, nɛ̀ ki yaʔa muɔ wè, muɔ sì je fuʔɔ kún wàa mɛ́ʔ.

13 «Yewe bé ki kpíʔile muɔ- puu kùlogolo ke nyùgo nɛ̄, muɔ sǐ ga tíi kàduʔu tɔ́nʔ. Muɔ bé puu súuri naamɛ, muɔ sǐ ga tíi kò táanmɛʔ, nɛ́ ki cɛ́n muɔ nyɛ́ni lúru Yewe muɔ Kulocɛliɛ wi kajuudiʔɛlɛ mɛ́ gèle gàli mi 'juu nɛ̀ gbɛ̀ngɛ muɔ mɛ́ pàngɛ gè, nɛ́ jo mari ke kpínʔini gèle, 14 bɛ̀ muɔ sì wàli kàliige mɛ́ʔ kire ga laa kàmɛgɛ mɛ́ koligo nɛ̄ gèʔ gàa mi 'juu nɛ̀ gbɛ̀ngɛ yeli mɛ́ gèʔ, nɛ́ míɛni muɔ sǐ kɛ́ kulocɛlɛlɛ pálì piyeyɛ kúrugu bè sari baara pe mɛ́ʔ.»

Dɛ́ngɛ siɛnrɛ dáà ti bé tuu pe nɛ̄ a pe 'cíi Yewe nɛ̄ wè

15 «Nɛ̀ ki yaʔa a muɔ 'cíi, muɔ wè nɛ lúru muɔ Kulocɛliɛ mɛ́ wèʔ bé wi kajuudiʔɛlɛ nɛ́ wi fànʔa kele sɔ́migɔ gèle bè còʔ gàli mi 'juu nɛ̀ gbɛ̀ngɛ muɔ mɛ́ pàngɛ gè, wi n'ŋɛ dɛ́ngɛ ŋáà wi bé taʔa muɔ kúrugu wè bè muɔ cò wè:

16 «Wi bé dɛ́ngɛ taʔa wè muɔ nɛ̄ kàʔa nī gè, nɛ́ míɛni muɔ siʔi nɛ̄ gè.

17 «Wi bé dɛ́ngɛ taʔa wè muɔ yaliire yalege nɛ̄ gè nɛ́ muɔ súgo nī gè kire ga buu yi fǎga nyìʔ.

18 «Wi bé dɛ́ngɛ taʔa wè muɔ cesiʔi nɛ̄ gè, bé wi taʔa míɛni muɔ siiye nɛ̄ yè kire ga buu muɔ fǎga yaliire taaʔ, bé wi taʔa míɛni muɔ yajuuro nɛ̄ dè kire ga buu muɔ nɛ̀toyo nɛ́ muɔ sìnbatoyo nɛ́ muɔ síkatoyo yi fǎga sii bè nyuɔʔ.

19 «Muɔ bé yawuʔɔ taa a muɔ nɛ báan wè, bé yawuʔɔ taa a muɔ nɛ waa wè, bɛ̀ Yewe wi bé dɛ́ngɛ taʔa wè muɔ nɛ̄.

20 «Yewe bé cúʔɔmɔ nyɔ́gɔ muɔ mɛ́, nɛ́ fíɛgbuɔrɔ nɛ́ càkarigɛ bé puu muɔ kɔli kakpiʔiligele ke mìɛni nɛ̄, fúɔ bè taa muɔ pa cúʔɔ bè yige baa péwu, nɛ́ ki cɛ́n yeli nyɛ́nì cíi Yewe nɛ̄ nɛ́ kapiʔile kpíʔile.

21 «Yewe bé káfaligɛ yaama nyɔ́gɔ bè, pi bé ba muɔ kpúu péwu kùlo nī lè nàa nī muɔ bè jíin bè ni líɛ lè.

22 «Yewe bé muɔ kpúɔn nɛ́ cériwaʔama yaama ní bè, nɛ́ nyumɔ ní bè, nɛ́ cefuuro ní dè, nɛ́ káfuniʔɛgɛ, nɛ́ waama, nɛ́ káfalifuugo, nɛ́ kùɔnnɔ ní nàa ni béri yaliire córi dè.

«Wuʔɔyɔ nyáà yi mìɛni bé taʔa muɔ nɛ̄ fúɔ bè muɔ cɛrigɛ bè núgo baa péwu. 23 Nyìʔɛnɛ náà nī muɔ nyùgo naamɛ gè ni bé kò kányiɛrɛ, dàala náà nī muɔ láara lè lire bé kò timɔri. 24 Yewe bé kàsaʔa yiʔɛ gè ki- kò cúbugo bèri tun muɔ kùlo nɛ̄ lè; cúbugo kire yákuɔ ki béri tíri nyìʔɛnɛ nī lè muɔ mɛ́ fúɔ bè taa muɔ pa cúʔɔ bè yige baa péwu.

25 «Yewe bé ki kpíʔile muɔ leguulo pe- muɔ jáa; muɔ bé yiri bàa tún nɛ́ pe ní koligo nigbe nī, muɔ bága koli bè fɛ̀ koliyo kɔlisiin nī. Muɔ bé kò bògaara yɛgɛ kùlogolo sɛngɛlɛ mɛ́ gèle dàala nɛ̄ lè. 26 Muɔ kúbilo pe bé tuu bè màʔa bè kò kaara dìbarɛ mɛ́ nɛ́ nyàʔayɛrɛ ní dè muɔ kùlo nī lè. Siɛn sǐ ga tíi taaʔ ŋàa wi bé ti cìra dèʔ.

27 «Yewe bé fìnide wáa dè muɔ nɛ̄ majo bɛ̀ wi cé ki kpíʔile siɛnnɛ nɛ̄ bèle, wi bé yeli wuʔɔ nɛ́ nákungo yaama ní bè, nɛ́ sàngbanʔa yaama ní bè, nɛ́ tùʔu yaama ní bè bàa pi wè kúu nɛ nyaʔa bèʔ. 28 Yewe bé kàala yɛ̀gɛ muɔ nī, bè fúɔnrɔ wáa muɔ nɛ̄, bè muɔ sícilige suɔ gè muɔ mɛ́. 29 Muɔ béri tali de mári cɛnvunyiɛnɛ nɛ̄ lè majo bɛ̀ fúɔn cî nɛ tali nɛ mári wè yebilige nī gè. Muɔ kaala láà sǐ ga tíi nyuɔʔ. Pe béri muɔ nùʔɔrɔ́ bèri muɔ wuʔɔ béri muɔ yúu muɔ kele ke mìɛni nī gèle; siɛn sǐ ga tíi taaʔ ŋàa wi bé muɔ suɔ wèʔ.

30 «Muɔ bé sinboriwo cò kɔnimɔ nɛ̄; nàguɔ wáà wiiyɛ bé ba sínɛ nɛ́ wi ní. Muɔ bé saafɔngɔ faan, bè ki yaʔa muɔ sǐ taa sínɛ ki nīʔ. Muɔ bé siʔi fáli gè, muɔ sǐ ga tíi ki yasɛnrɛ cuɔ dèʔ. 31 Pe bé muɔ nùɔ kpúu wè muɔ nyaamɛ nɛ̄, muɔ sǐ ga tíi wi kaara káa dèʔ. Pe bé muɔ sèfɛnnɛ píle lè bè suɔ muɔ mɛ́, piyě ni kɛn muɔ mɛ́ʔ. Muɔ sìnbatogo ki bé suɔ gɛn muɔ leguulo mɛ́ bèle; siɛn sǐ ga tíi taa bè muɔ sáʔaʔ.

32 «Muɔ jaala nɛ́ muɔ pórilo ní bèle, kùlo láà siɛnnɛ bé pa pe cò bè kɛ́ muɔ nyaamɛ nɛ̄. Muɔ bé kò de yìʔirí de wéli cɛngɛ ó cɛngɛ lɛ̀lɛ líì nī pe bé koli pɛn wè, bè ki yaʔa muɔ sǐ gbɛ̀ jáa bè yafiɛn kpíʔile bè pe suɔʔ.

33 «Muɔ siʔi yaliire dè nɛ́ muɔ baagbɛnrɛ tɔ̀ni ní wè, pàli piyeyɛ pe bé ti lìi, bàli muɔ sì cɛ́n bèleʔ. Muɔ bé kò siɛn wáà ŋàa pe 'nùʔɔrɔ níɛ wi wuʔɔ súuri wè. 34 Gàa muɔ nɛ nyaʔa muɔ nyapigele ní gèle, kàala bé yɛ̀ muɔ nī kire kɛnmɛ nɛ̄.

35 «Yewe bé muɔ kpúɔn nɛ́ fìnide ní dàa ti 'pii dè, muɔ kágunyɔ nɛ̄ yè nɛ́ muɔ cekpuʔɔlɔ nɛ̄ gèle, dàa tiǐ gbɛ̀ puʔɔ dèʔ. Ti bé puu muɔ nɛ̄ yedaʔala nɛ̄ gèle fúɔ bè ba nɔ̀ nyùdiile nɛ̄ lè.

36 «Yewe bé ki kpíʔile kùlo láà wuulo- muɔ cò bè kɛ́ pe kùlo nī lè, kùlo náà muɔ nɛ́ muɔ tobilo sì cɛ́n lèʔ; pe bé muɔ cò, muɔ nɛ́ muɔ kùlofɔli ní wè ŋàa muɔ 'tɛ́ngɛ muɔ nyùgo nɛ̄ gè. Kire tiʔɛ nī gè muɔ bé sari baara kulocɛlɛlɛ pálì mɛ́, bàli pe 'kpíʔile nɛ́ tiire ní dè nɛ́ kàdari ní dè. 37 Siɛnfeliye nyáà yi mìɛni kùlogolo mɛ́ Yewe 'ki yaʔa a pe 'muɔ cò nɛ̀ kɛ́ wè, muɔ bé kò pe mɛ́ bògaara yɛgɛ. Pe bé kàsiile kún muɔ wuʔu nɛ̄ gè, bèri pìye nyíɛnɛ muɔ nɛ̄.

38 «Muɔ bé yaliire tánʔa dè nìʔɛrɛ, nɛ̀ ki yaʔa muɔ bé ba cɛ̀ri yákuɔ líɛ, nɛ́ ki cɛ́n kàbaridɛ ti bé ti káa. 39 Muɔ bé ɛrɛzɛn siʔi cò gè bè tiire cɔ́ri dè nìʔɛrɛ, nɛ̀ ki yaʔa muɔ̌ ga tíi ɛrɛzɛn yasɛnrɛ luʔɔ gbuɔ gèʔ, nɛ́ ki cɛ́n muɔ̌ ga tíi ti cuɔʔ; fiɛnrɛ ti bé jíin ti nī bè ti cúʔɔ. 40  tiire ti bé puu muɔ kùlo ni mìɛni nī, nɛ̀ ki yaʔa sùnmɔ sǐ ga tíi taa muɔ nɛ̄ʔ bè muɔ céri tùugi dèʔ, nɛ́ ki cɛ́n ti yasɛnrɛ ti bé fɛ́ni bè tuu.

41 «Muɔ bé nàgabigele nɛ́ pìcapigele sii, nɛ̀ ki yaʔa piyě puu muɔ wuuloʔ, nɛ́ ki cɛ́n pe bé pe cò fànʔa bè kɛ́ nɛ́ pe ní.

42 «Muɔ siʔi ki bé kò kágorigo; ki tiire nɛ́ ki yaliire ti bé kò vìɛnrilɛ wori.

43 «Nabɔnwɔ ŋáà wī tɛ́niwɛ yeli sunʔɔmɔ nī bè, wire béri kòrí naamɛ bè tóri muɔ nɛ̄; muɔ wè, muɔ béri tíri de waa súuri táanmɛ. 44 Wire wi béri fuʔɔ nii muɔ nɛ̄; kiǐ ní nyaa muɔ béri fuʔɔ nii wi nɛ̄ cíginiʔ. Nabɔnwɔ wi bé puu muɔ nyùgo nɛ̄ gè; muɔ wè, muɔ bé kàduʔu tɔ́n.

45 «Dɛ́ngɛ siɛnrɛ dáà ti mìɛni bé tuu muɔ nɛ̄, ti bé taʔa muɔ kúrugu bè muɔ cò, fúɔ bè taa muɔ pa cúʔɔ péwu bè yiri baa, nɛ́ ki cɛ́n muɔ wè nɛ lúru Yewe muɔ Kulocɛliɛ nɛ̄ wèʔ, bè wi kajuudiʔɛlɛ nɛ́ wi fànʔa kele sɔ́migɔ gèle bè còʔ, gàli wi 'juu nɛ́ gbɛ̀ngɛ muɔ mɛ́ gèle. 46 Ti bé kò nɛ́ kakpuʔɔ yeli nɛ̄ nɛ́ yeli siimɛ ní bè, bè puu kasɔminɔ lɛ̀lɛ ó lɛ̀lɛ nī.

47 «Bɛ̀ ki 'nyaa muɔ wè nɛ baara Yewe muɔ Kulocɛliɛ mɛ́ wèʔ nɛ́ fundaanra ní nɛ́ funjɛ̀ngɛ ní gè lɛ̀lɛ líì nī muɔ kele ke yé nyuɔ gèleʔ, 48 muɔ bé kò de baara muɔ leguulo mɛ́ bèle, bàli Yewe bé líʔi wáa muɔ nɛ̄ bèle. Fungo ki bé puu muɔ nɛ̄ nɛ́ luʔɔwuʔɔ ní gè; muɔ bé kò nábori, muɔ bé kò yakaafunvɔli. Yewe bé timɔri taʔa muɔ yétiige nɛ̄ gè fúɔ bè taa wi 'muɔ cúʔɔ péwu.

49 «Yewe bé kùlo láà siɛnfelige káà yɛ̀gɛ muɔ kúrugu gáà ki 'kɔ́n tiɛliʔi nī gè duniya láʔala nɛ̄ lè, gàa ki fini nɛ tun ki yaliire nɛ̄ dè bɛ̀ kàgbɛni tíɛlɛ wè, siɛnfelige káà gàa muɔ sì jeri ki siɛnrɛ lúru dèʔ, 50 siɛnfelige gáà gī yiɛtanʔanigɛ ní gè; pe wè nɛ liɛwɛ tɔ́riʔ, pe míɛni wè nɛ nyinimɛ taʔa pùɔ nɛ̄ʔ. 51 Kire siɛnnɛ bálì pe bé pa muɔ yajuuro pìile káa bèle, bè muɔ siʔi yaliire ti mìɛni líɛ, fúɔ bè taa muɔ tíimɛ bé ba kùu fungo nɛ̄ gè. Piyě ga tíi yaliipile yaʔa muɔ mɛ́ʔ, nɛ́ ɛrɛzɛn luʔɔ ní gèʔ, nɛ́ wolivi sùnvɔnbɔ ní bèʔ, nɛ́ muɔ nɛ̀naaya ní yèʔ, nɛ́ muɔ sìnbaara nɛ́ muɔ síkaala pìile ní bèleʔ, fúɔ bè taa pe- muɔ cúʔɔ bè yige baa péwu.

52 «Pe bé muɔ kàaya yi mìɛni màʔa bè suʔu bè mɔgɔ yi táanni, fúɔ bè taa muɔ gunyɔ nyáà yī lìriye nɛ́ ní kpàʔaliyɛ yè, yi mìɛni ba tuu muɔ kùlo nī lè, yire nyáà nɛ̄ muɔ 'muɔ sɔ̀ngirɔ taʔa dè. Pe bé muɔ kàaya yi mìɛni màʔa bè suʔu muɔ kùlo nī lè nàa Yewe muɔ Kulocɛliɛ wi 'kɛn muɔ mɛ́ lè.

53 «Lɛ̀lɛ líì nī muɔ leguulo pe 'muɔ kàʔa màʔa gè nɛ̀ suʔu gè, bà kire fùrɔgɔ ki bága kpúʔɔ gè fúɔ ki bé ba nyaa muɔ béri muɔ tíimɛ pìile káa bèle. ʔaan, je muɔ bé pari muɔ jaala nɛ́ muɔ pórilo céri káa dè, bàli Yewe muɔ Kulocɛliɛ wi 'kɛn muɔ mɛ́ bèle. 54 Nàguɔ ŋáà wī yeli sunʔɔmɔ nī bè, ŋàa wi nyinimɛ taʔa fáari wè nɛ́ ní yakaafɔli wè, wire bé kò funbinʔɛfɔli wi siinyɛni kɔli mɛ́ gè, nɛ́ wi cuɔ kɔli mɛ́ gè ŋàa wi ŋɔ́ni wi sìndinge nɛ̄ gè, nɛ́ wi pìile kɔli mɛ́ gè bàli pe 'kò wiì 'pe káa wèʔ, 55 bɛ̀ wiī nɛ fìʔɛ́ bè wi jaa kaara táà kɛn pe mɛ́ wè, dàa wiī nɛ káa dè. Nɛ́ ki cɛ́n tire yákuɔ ti 'kò wi mɛ́ bè káa fùrɔgɔ lɛ̀lɛ nī lè, gàa nī muɔ leguulo pe 'muɔ nyɔ́gɔ bèle, bà pe pɛ́nì muɔ kàaya yi mìɛni màʔa nɛ̀ suʔu yè. 56 Cɛliwɛ ŋáà wī yeli sunʔɔmɔ nī bè, ŋàa wi nyinimɛ taʔa fáari wè nɛ́ ní yakaafɔli wè, ŋàa wi wè caa bága wi yedaala tɛ́ngɛ lè nyaa dàala nɛ̄ lèʔ, wire bé kò funbinʔɛfɔli wi pɔli kɔli mɛ́ gè ŋáà wi ŋɔ́ni wi sìndinge nɛ̄ gè, nɛ́ wi jaa nɛ́ wi póri kɔli mɛ́ gè, 57 nɛ́ ki cɛ́n wiī nɛ caa bè làri, bè pìfinʔɛ káa gè nɛ́ ki yìgire ní dè wìi nigbe, gàa wi péli nɛ̀ sii gè, fùrɔgɔ nī gè gàa nī muɔ leguulo pe 'muɔ nyɔ́gɔ gè, bɛ̀ pe pɛ́nì muɔ kàaya yi mìɛni màʔa nɛ̀ suʔu yè.»

Wuʔɔgboliyo wori dè

58 «A muɔ sì fànʔa kajuʔulo siɛnrɛ dáà ti mìɛni sɔ́migɔ nɛ̀ còʔ nɛ ti kpínʔini dèʔ, dàa ti 'sɛbɛ sɛbɛkuruwo ŋáà nī wè, a muɔ sí wè nɛ fìʔɛ́ muɔ Kulocɛliɛ wi míɛkpuʔɔ nɛ̄ gèʔ gàa ki 'sànviige wáari gèʔ, 59 a ki sí nyaa mmɛ gè, Yewe bé kakpoliyo yáà kpíʔile bè muɔ kpúɔn wuʔɔgboliyo ní yè, muɔ nɛ́ muɔ siimɛ ní bè, nɔmigboliyo bé kún muɔ nɛ̄ nyàa yi 'pii yè nɛ́ yi wè pori fáari yèʔ, nɛ́ yaabiimɛ feliye nyáà yi wè kúu fáari yèʔ. 60 Wi bé kùlo yaama pi mìɛni tórigo muɔ kúrugu, peli bálì nyaamɛ nɛ̄ muɔ yé fíɛ kpuʔɔ wè. Yaama pi bé mɔgɔ nɛ́ muɔ ní.

61 «Nɛ̀ taʔa ki nɛ̄, wuʔɔgboliyo nɛ́ yaama pi mìɛni feliye nyàa woyo pi sì juu náʔaʔ sɛbɛkuruwo nī wè, Fànʔa Kajuʔulo Sɛbɛ wuu wèʔ, Yewe bé pi kɔ́ri bè pɛn muɔ kúrugu fúɔ bè taa muɔ pa cúʔɔ bè yige baa péwu. 62 Muɔ ŋáà ma 'puu siɛnniʔɛbogo gè bɛ̀ nyìʔɛnɛ ŋɔgɔlɔ tíɛlɛ gèle, muɔ bé kò siɛnnɛ cɛ̀ri yákuɔ wī, nɛ́ ki cɛ́n muɔ sì fɔ̀li nɛ̀ lúʔu Yewe muɔ Kulocɛliɛ mɛ́ wèʔ.

63 «Bɛ̀ ki cé kíni nɛ̀ Yewe dɛ́ni wè á wi 'kacɛ̀ngɛ kpíʔile yeli nɛ̄ wè nɛ́ yeli kpíʔile yeli- niʔɛ bèle, bɛ̀ míɛni ki bé Yewe dɛ́ni wè wi bè yeli ye mìɛni cɛrigɛ péwu bè yige baa, bà wi bé yeli yɛ̀gɛ bè yige dàala nī lè nàa nī yeli bé jíin bè ni líɛ yeli woli.

64 «Yewe bé muɔ cɛrigɛ kùlogolo sunʔɔmɔ nī bè, bè ki líɛ duniya láʔala líì nɛ̄ lè bè sa nɔ̀ lìi nɛ̄ lè. Kire tiɛyɛ nī yè, muɔ béri baara kulocɛlɛlɛ pálì piyeyɛ mɛ́ bàli muɔ nɛ́ muɔ tobilo piyè yé cɛ́n bèleʔ, kulocɛlɛlɛ bálì pe 'kpíʔile nɛ́ tiire ní dè nɛ́ kàdari ní dè.

65 «Kire siɛnnɛ bálì sunʔɔmɔ nī bè, muɔ sì je ga ŋɔ́diɛlɛ taaʔ; tɔligɔ tɛ́ngɛdiʔɛ sǐ cɛ́nì je taa muɔ mɛ́ʔ. Nɛ́ ki cɛ́n Yewe bé fíɛrɛ nàzɔn kɛn muɔ mɛ́, muɔ nyapigele ke bé nyɛ́nigɛ, sɔ̀ngirɔ taʔadiʔɛ sǐ puu muɔ mɛ́ muɔ fungo nī gèʔ.

66 «Muɔ sìi wi bé kò dàʔada, muɔ béri fún de yàʔará pìlige nɛ́ cɛnvugo, muɔ béri káala muɔ sìi wuʔu nɛ̄ gè. 67 Muɔ bé ki juu sínbinimɛ táanni bè bé jo: ‹Cíʔ ! A ki yé cɛ́nì puu cɛnguʔɔ gè o, kire yē pɔ́rigɔ !› Cɛnguʔɔ táanni gè, muɔ bé ní ki juu bé jo: ‹Cíʔ ! A ki yé cɛ́nì puu sínbinimɛ táanni bè o, kire yē pɔ́rigɔ !› Muɔ béri tire nyu fíɛrɛ tire kɛnmɛ nɛ̄ muɔ fungo nī gè, nɛ́ kele gálì ní muɔ nɛ nyaʔa gèle muɔ nyapigele ní gèle.

68 «Bà Yewe bé ki kpíʔile muɔ bé ní koli bè kɔ́riyɔ líɛ bè kɛ́ Ezipiti kùlo mɛ́ lè, bà muɔ bé ní koligo gáà tánʔa gè gàa wuʔu mi yé juu nɛ́ jo: ‹Muɔ sǐ ní koli bè ki líɛ cígini gèʔ.› Kire tiʔɛ nī gè yeli tíimɛ bé sari yìye pari, nàguɔlɔ bèle nɛ́ cɛlilɛ ní bèle, bè kò sùkulolo yeli leguulo mɛ́ bèle. Nɛ̀ sí ki yaʔa siɛn sǐ taaʔ ŋàa wi bé yeli suɔ wèʔ.»

Nyakungɛngɛ siɛnrɛ ti kúɔdiʔɛ gè

69  siɛnrɛ tire dī dàa yé juu nɛ̀ gbɛ̀ngɛ mɛ́ wè, dàa wi 'puu nɛ caa bè juu fùgu siɛnnɛ mɛ́ bèle kùlo nī lè, bè ní koli fàri nyakungɛngɛ gáà nɛ̄ gè, gàa wi yé kún nɛ̀ kɛn pe mɛ́ gè mɛ́ gè.