Fànʔa Kajuʔulo 27

Yewe nyakungɛngɛ diba siɛnrɛ dè nɛ́ ki dɛ́ngɛ siɛnrɛ dè

(27.1–28.68)

Fànʔa siɛnrɛ dè kàdɛnitɛnyɛ nɛ̄ yè

1 Misa nɛ́ Isirayɛli liɛlɛ ní bèle, a pe 'ki juu nɛ̀ gbɛ̀ngɛ Isirayɛli siɛnnɛ mɛ́ bèle nɛ́ jo: «Yeri lúru fànʔa kajuudiʔɛlɛ siɛnrɛ ti mìɛni mɛ́ dàa mi 'juu nɛ̀ gbɛ̀ngɛ yeli mɛ́ pàngɛ gè.

2 «Muɔ Isirayɛli wè^a, a muɔ kɛ́nì Zurudɛn cáʔa jeli gè, nɛ́ jíin kùlo nī lè nàa Yewe muɔ Kulocɛliɛ wi 'kɛn muɔ mɛ́ lè, muɔ 'yɛli bè kàdɛnikpoliyo cɔ́ri bè yérige bè yi pùɔli bè yi fílige^b. 3 Muɔ bé fànʔa kajuʔulo gálì ke mìɛni sɛbɛ yi nɛ̄ lɛ̀lɛ líì nī muɔ kɛ́nì jíin kùlo nī lè nàa Yewe muɔ Kulocɛliɛ wi 'kɛn muɔ mɛ́ lè, kùlo náà nī nɛ̀yirimɛ nɛ́ sárigɛ kiī nɛ fúu gè^c, majo bɛ̀ Yewe muɔ tobilo Kulocɛliɛ wi 'ki juu muɔ mɛ́ gè.

4 «Gàa kire yeli bé kpíʔile a yeli kɛ́nì Zurudɛn cáʔa jeli gè: yeli bé kàdɛniyɛ nyáà cɔ́ri yè baa Ebali nyagurugo nɛ̄ gè^d bè yɛli nɛ́ dàa ní mi 'juu nɛ̀ gbɛ̀ngɛ yeli mɛ́ pàngɛ gè; yeli bé yi pùɔli yi de fíligi.

5 «Kire tiʔɛ nī gè muɔ bé gbùʔɔrɔdiʔɛ káà faan nɛ́ kàdɛniyɛ ní Yewe muɔ Kulocɛliɛ mɛ́ wè nyàa nɛ̄ timɔri sì nɔ̀ yèʔ. 6 Ki kàdɛniyɛ nyáà yi bé puu nyàa piyè tɛn yèʔ; yire muɔ bé líɛ bè gbùʔɔrɔdiʔɛ faan gè Yewe muɔ Kulocɛliɛ mɛ́ wè. Kire gbùʔɔrɔdiʔɛ gáà kire nɛ̄ muɔ béri kakuɔrɔ kaasuʔuro sórigi dè^e. 7 Muɔ béri yanyige yakɔnrɔ kaara kɔ̀ngí dè baa, kire tiʔɛ nī gè muɔ béri ti kaa Yewe muɔ Kulocɛliɛ yiʔɛ mɛ́ gè bè puu fundaanra nɛ̄.

8 «Muɔ bé fànʔa kajuʔulo siɛnrɛ dáà ti mìɛni sɛbɛ kàdɛnitɛnyɛ nɛ̄ yè; -ti sɔ́migɔ ma sɛbɛ díɛʔ !»

9 Kire kàduʔumɛ, a Leviiyé kacuɔnrilɔ pe 'pínɛ nɛ́ Misa ní wè, dí Misa sí ki juu siɛnnɛ mɛ́ bèle bè jo: «Isirayɛliyé yo ! Ye- pìiri yé líiye cáan yeri lúru ! Pàngɛ gè yeli 'kò Yewe yeli Kulocɛliɛ wuulo. 10 Yeli 'yɛli bèri lúru Yewe yeli Kulocɛliɛ mɛ́ bèri kajuudiʔɛlɛ nɛ́ fànʔa kele ke mìɛni kpínʔini gàli mi 'juu nɛ̀ gbɛ̀ngɛ yeli mɛ́ pàngɛ gè.»

11 Kire cɛnnugo gè, a Misa 'ki juu nɛ̀ gbɛ̀ngɛ Isirayɛli siɛnnɛ mɛ́ bèle nɛ́ jo: 12 «A yeli kɛ́nì Zurudɛn cáʔa jeli gè, pe m'bɛlɛ bàli pe bé yéri Garizimi nyagurugo nɛ̄ gè^f, bè diba kpíʔile wè siɛnnɛ mɛ́ bèle, keli gbuʔulo gīɛlɛ gàli gèle: Simɛyɔ wuulo bèle, nɛ́ Levii wuulo bèle, nɛ́ Zuda wuulo bèle, nɛ́ Izakari wuulo bèle, nɛ́ Yusufu wuulo bèle nɛ́ Bɛnzamɛ wuulo ní bèle. 13 Pe m'bɛlɛ bàli pe bé yéri Ebali nyagurugo nɛ̄ gè, bè dɛ́ngɛ taʔa wè siɛnnɛ nɛ̄ bèle: Wurubɛni wuulo bèle, nɛ́ Gadi wuulo bèle, nɛ́ Azɛri wuulo bèle, nɛ́ Zabulɔn wuulo bèle, nɛ́ Dan wuulo bèle nɛ́ Nafitali wuulo ní bèle.

Dɛ́ngɛ siɛnrɛ dè

14 «Leviiyé peli pe bé siɛnrɛ líɛ dè bè ti juu yékpogbuɔlɔ nī siɛnnɛ mɛ́ bèle bé jo:

15 « ‹Dɛ́ngɛ- puu siɛn nɛ̄ wè, ŋàa wi sɛ́nì yasungo tɛn kire ga laa yasungo kpíʔile gàa gī timɔri wuʔu gè, nɛ́ pɛ́ni ki sungu làrimɛ nī bè. Tire yasunro dáà siɛnnɛ pe kpínʔini nɛ́ pe kiyɛ ní yè, tire yē Yewe wi kanabiɛnnɛ^g.›

«Bà siɛnnɛ pe mìɛni bé ki suɔ bé jo: ‹Ki- taa ki puu bɛ̀^h !›

16 « ‹Dɛ́ngɛ- puu siɛn nɛ̄ wè, ŋàa wi 'wi tuu nɛ́ wi yàa faʔa wèⁱ.›