Yaliipelide kɔ̀nnɔ wori dè
26
1 A Misa ń'nɛ̀ ki juu nɛ́ joa: «A muɔ kɛ́nì jíin kùlo nī lè nàa Yewe muɔ Kulocɛliɛ wi 'kɛn muɔ mɛ́ kɔrigɔ gè, a ni kɛ́nì kò muɔ woli lè, a muɔ 'tɛ́ni ni nī lèb, 2 muɔ bé muɔ siʔi yaliipelide nɛ́ yasɛnrɛ pélide ti mìɛni líɛ, dàa muɔ 'taa kùlo nī lè nàa Yewe muɔ Kulocɛliɛ wi 'kɛn muɔ mɛ́ lè. Muɔ bé ti le juɔlɔ láà nī bè kɛ́ nɛ́ ti ní tiʔɛ gáà nī Yewe muɔ Kulocɛliɛ wire tíimɛ bága nyíɛnɛ bè kɔ̀n gè bè ki kpíʔile wi míʔɛ ki kòridiʔɛ gè. 3 Muɔ bé kɛ́ kacuɔnriwɔ kúrugu wè, ŋàa wi bé puu baara nɛ̄ dè kire cɛnyɛ nī yè, bè ki juu wi mɛ́ bé jo: ‹Mi bé ki juu pàngɛ gè, Yewe muɔ Kulocɛliɛ mɛ́ wè, dí mi nyɛ́nì jíin kùlo nī lè nàa wuʔu nɛ̄ Yewe 'kàli weli tobilo mɛ́ bèle nɛ́ jo wire bé ni kɛn weli mɛ́ lè.›4 «Bà kacuɔnriwɔ wi bé juɔlɔ líɛ lè wi kiyɛ nī yè, bè ni tɛ́ngɛ Yewe muɔ Kulocɛliɛ wi gbùʔɔrɔdiʔɛ yafanʔa yiʔɛ mɛ́ gè. 5 Kire tiʔɛ nī gè, Yewe muɔ Kulocɛliɛ yiʔɛ mɛ́ gè, muɔ bé ní ki juu bé jo: ‹Mi tuu wi yé puu Arami kùlo wuu níɛ nyaari nɛ máric. A wi sɛ́nì jíin Ezipiti kùlo nī lè nɛ̀ tɛ́ni baa nabɔnwɔ, siɛnnɛ cɛ̀ri 'puu nɛ́ wi ní, a wi pɛ́nì kò siɛnniʔɛbogo, nɛ́ ŋɔri ní nɛ́ kpuʔɔ. 6 Nɛ̀ ki yaʔa a Ezipiti siɛnnɛ pe 'weli wuʔɔ nɛ̀ weli máama nɛ̀ weli cò sùkulolo. 7 A weli 'kòkuʔulo wáa gèle weli tobilo pe Kulocɛliɛ mɛ́ wè, a Yewe 'weli kòkuʔulo lúʔu gèle. A wi 'weli fuunmɔ nyaa bè nɛ́ weli fùrɔgɔ ní gè nɛ́ weli wuʔɔgɔ ní gèd.
8 « ‹A Yewe 'weli yige Ezipiti kùlo nī lè nɛ́ wi ŋɔri kɔli ní gè gàa wi yé sáʔa gè, nɛ́ wi kakpiʔiligele ní gèle gàli ke fíɛrɛ wáari siɛn nɛ̄ wè, nɛ́ fìɛkpolilo nɛ́ kakpoliyo ní yè. 9 A wi 'pɛn nɛ́ weli ní náʔa gè nɛ̀ kùlo náà kɛn lè weli mɛ́, nàa nī nɛ̀yirimɛ nɛ́ sárigɛ kiī nɛ fúu gèe.
10 « ‹Píra ŋáà nī wè, ki n'gɛ, mi nyɛ́nì pɛn nɛ́ mi siʔi yaliipelide nɛ́ yasɛnrɛ pélide ní dè, dàa mi 'taa dàala nɛ̄ lè nàa muɔ Yewe 'kɛn m'mɛ́ lè.›
«Muɔ bé ti tɛ́ngɛ Yewe muɔ Kulocɛliɛ yiʔɛ mɛ́ gè, bé sínɛ bè cúbulo Yewe muɔ Kulocɛliɛ yiʔɛ mɛ́ gè. 11 Muɔ nɛ́ Levii siɛn ní wè, nɛ́ nabɔnwɔ ní wè ŋàa wī tɛ́niwɛ nɛ́ muɔ ní wè, muɔ bé puu fundaanra nɛ̄ yacɛ̀nrɛ ti wuʔu nɛ̄ gè dàa Yewe muɔ Kulocɛliɛ wi 'kɛn muɔ mɛ́ dè, muɔ nɛ́ muɔ saʔa wuulo ní bèlef.»
Yiʔɛlɛ taanri kiɛkiɛwuʔulo láʔagɛnnɛ wori dè
12 «A muɔ kɛ́nì kiɛkiɛwuʔulo láʔa gèle muɔ yaliire ti mìɛni nī dè, dàa muɔ 'líɛ dè yiʔɛlɛ taanriwoli nɛ̄ lè, lire náà nī kiɛkiɛwuʔulo yiɛlɛ lè, muɔ bé ti kɛn Levii siɛn mɛ́ wè, nɛ́ nabɔnwɔ nɛ́ círiwe nɛ́ lakicuɔ mɛ́ wè, kire ga buu pe- lìi bè tín muɔ kàaya nī yèg.
13 «Muɔ bága ki juu Yewe muɔ Kulocɛliɛ mɛ́ wè bé jo: ‹Mi nyɛ́nì yɛrɛ kɔ̀n dè mi saʔa nī gè dàa mi 'wàli nɛ̀ tɛ́ngɛ muɔ mɛ́ dè, nɛ̀ ti kɛn Levii siɛn mɛ́ wè, nɛ́ nabɔnwɔ nɛ́ círiwe nɛ́ lakicuɔ mɛ́ wè, nɛ̀ yɛli nɛ́ kajuudiʔɛlɛ ní gèle gàli muɔ 'juu nɛ̀ gbɛ̀ngɛ gèle nɛ́ jo mi- ke kpíʔile gèle. Mi sì làa nigbe yaʔaʔ, mi sì fìʔɛ láà nigbe nɛ̄ʔ.
14 « ‹Mi sì làa nigbe lìi bà kùugo 'mi taa wèʔ, mi sì làa nigbe yige míɛni bà mi yé puu núʔɔwɔ Yewe yiʔɛ mɛ́ gèʔ, mi sì làa nigbe kɛn míɛni kpúu mɛ́ʔ. Mi nyɛ́nì Yewe mi Kulocɛliɛ siɛnrɛ lúʔu dè nɛ̀ ki kpíʔile dàa ti mìɛni muɔ juu nɛ̀ gbɛ̀ngɛ mi mɛ́ dè.
15 « ‹Yewe yo, bè muɔ yaʔa baa muɔ kòridiʔɛ nī gè gàa ki sɔ́migɔ nɛ̀ nyuɔ gè baa nyìʔɛnɛ nī lè, nyùgo cùungu ma wéli, ma diba taʔa wè muɔ siɛnnɛ nɛ̄ bèle, Isirayɛliyé bèle, nɛ́ kùlo ní lè nàa muɔ 'kɛn weli mɛ́ lè, majo bɛ̀ muɔ cé ki kàli nɛ̀ kɛn weli tobilo mɛ́ bèle, kire kùlo náà nī nɛ̀yirimɛ nɛ́ sárigɛ kiī nɛ fúu gèh.› »
Mowabi nyakungɛngɛ wori dè
16 «Pàngɛ gè, muɔ Isirayɛli siimɛ bèi, Yewe muɔ Kulocɛliɛ wi 'ti juu nɛ̀ gbɛ̀ngɛ muɔ mɛ́: fànʔa kele gálì gèle nɛ́ kàyuʔujuuro dáà ní dè, ma ti cò cɛ̀ngɛ. Mari ti tári nɛ́ muɔ fungo ki mìɛni ní nɛ́ muɔ pìle ni mìɛni ní.
17 «Pàngɛ gè, muɔ nyɛ́nì nyuɔ kún nɛ̀ kɛn nɛ́ jo muɔ nyɛ́nì yéri Yewe siɛnrɛ nɛ̄ dè nɛ́ jo wi bé kò muɔ Kulocɛliɛ, nɛ́ jo muɔ béri tári wi koligo nī gè, bèri wi fànʔa kele cògí gèle, nɛ́ wi kajuudiʔɛlɛ ní gèle, nɛ́ wi kàyuʔujuuro ní dè, bèri wi siɛnrɛ lúru dè dàa wi 'juu dè.
18 «Pàngɛ míɛni gè, Yewe wi 'nyuɔ kún nɛ̀ kɛn muɔ mɛ́ nɛ́ jo yeli yē wire tíimɛ siɛnfelige káà gàa ki 'wi dɛ́ni kpuʔɔ gè, yeli yē wire wuuloj, majo bɛ̀ wi yé kíni nɛ̀ ki juu yeli mɛ́ gè, nɛ́ míɛni yeli 'yɛli bè puu siɛnnɛ pálì bàli pe lúru wi kajuudiʔɛlɛ ke mìɛni mɛ́ gèle.
19 «A ki sí nyaa mmɛ gè, wi bága yeli kpúʔɔ bè tóri kùlogolo ke mìɛni nɛ̄ gèle: yeli béri kpuʔɔrɔ tari dè, yeli míʔɛ ki sí yiri tiɛrɛ ti míɛni nī dè. Nɛ́ míɛni yeli bé puu siɛnwalidɛngɛlɛ Yewe yeli Kulocɛliɛ mɛ́ wè, majo bɛ̀ wi yé ki juu gè.»