Piyè yɛli bè kapiigbiʔiliwe wuʔɔ wè bè tóriʔ
25
1 A Misa ń'nɛ̀ ki juu nɛ́ joa: «A ki 'nyaa siɛnnɛ pálì nɛ túngu, a pe kɛ́nì pìye kɔ́ri nɛ̀ kɛ́ kàyuʔujuudiʔɛ nī gè, pe 'yɛli bè tànʔa kɛn gè tànʔafɔli mɛ́ wè bé sí káfinɛgɛ kɛn gè káfinɛgɛfɔli mɛ́ wè. 2 A ki sí nyaa pe 'yɛli bè káfinɛgɛfɔli kpúɔn wè, kàyuʔujuuwo wi bé wi sínge dàala nɛ̄ lè, pe- sí wi kpúɔn wi nyaamɛ nɛ̄ nɛ́ sápinyiɛyɛ ní nyàa yi bè yɛli nɛ́ wi kapiigbiʔilile ní lè. 3 Gìi sí gī baa gè, kiǐ gbɛ̀ tóri sápinyiɛyɛ togosiin nɛ̄ʔ. A kire 'laa wè, a kpuɔnrɔ ti ń'nɛ̀ kɛ́nì tóri dè, muɔ bé ní fìɛrɛ wáa muɔ siɛnnyɛni nɛ̄ wè bè tóri muɔ yiʔɛ mɛ́ gè.»Piyè yɛli bè yajuuro wuʔɔ dè bè tóriʔ
4 «Muɔ sì yɛli bè jùɔ puɔ nùɔ wi nyuɔ nɛ̄ gèʔ a wiī nɛ yaliire sɛ̀ngí dèʔb.»
Lakicuɔ líɛ wori dè
5 «A ki pɛ́nì nyaa jaafɔlilɔ yē tɛ́ninɛ tiɛnugo nī gè, a wàa 'kùu, wiì jaafɔli taa wèʔ, lakicuɔ wiǐ ga tíi sa kò wàa wiiyɛ mɛ́ kpànʔanɛʔ. Wi pɔli siinyɛni wáà bé wi líɛ wi cuɔ, wi bé ki kpíʔile wi mɛ́ gàa ki 'yɛli bèri kpínʔini lakicuɔ mɛ́ wè. 6 Nàgabipelile náà wi bé sii wè, kire pùɔ wè, wi bé puu wi siinyɛni ŋáà wi 'kùu wè wire jaa, kire ga buu wi míʔɛ- ki fǎga tɔ́nʔ Isirayɛli siɛnnɛ sunʔɔmɔ nī bèʔc.
7 «A kire nàguɔ ŋáà wi sí cíi nɛ́ jo wire wè cɛliwɛ caa wèʔ, lakicuɔ wi bé kɛ́ nàkpanʔa wìile mɛ́ lè liɛlɛ kúrugu bèle, bè sa ki juu bé jo: ‹Mi pɔli wi siinyɛni wi 'cíi nɛ́ jo wire sì je mi líɛ wi cuɔʔ, mi pɔli ŋáà wi 'kùu wè, bè wi míʔɛ yige gèʔ Isirayɛli siɛnnɛ sunʔɔmɔ nī bèʔ. Wi wè nɛ caa bèri mi nyɔ́gi saʔa nīʔ, majo bɛ̀ ki 'yɛli bèri kpínʔini lakicuɔ mɛ́ wèʔ.›
8 «Bà kàʔa ki liɛlɛ pe bé kire siɛn yeri wè bè juu nɛ́ wi ní. A wi sí cíi nɛ́ jo: ‹Mi wè nɛ caa bè wi líɛʔ› wè, 9 kire tiʔɛ nī gè lakicuɔ wi bé sìʔɛrɛ bè kpɔni wi nɛ̄ liɛlɛ pe nyaamɛ nɛ̄, bé sí wi tɔrigɔ fòri gè wi nɛ̄d, bé tíɛnrɛ sùlugu bè wáa nàguɔ wi yiʔɛ nī gè. Bà lakicuɔ wi bé ki juu bé jo: ‹Ki n'gɛ gàa nàguɔ ŋáà wi 'kpíʔile gè: wi nyɛ́nì cíi bè pìile sii bè wi siinyɛni míʔɛ yige gè.› 10 Bè líɛ kire cɛngɛ gè, pe bé kò de kire nàguɔ wi saʔa wuulo yeri bèle ‹tɔrivolilo narigɛ›.»
Gìi kiì yɛli bè kpíʔile kàsii lɛ̀lɛ nī lèʔ
11 «Dùʔɔ ki bé gbɛ̀ nyaa nàguɔlɔ siin nɛ túngu, dí ŋìi wi cuɔ wi sí pa jíin pe sunʔɔmɔ nī bè, bè wi pɔli suɔ wè ŋàa mɛ́ wiī nɛ wi kpúɔn wè. A cɛliwɛ wi sí wi kɔli sáʔa gè nɛ̀ nàguɔ ŋíì cò wè wi juʔɔlɔ nɛ̄ gèle, 12 muɔ 'yɛli bè cɛliwɛ wi kɔli ceri gè. Muɔ sì yɛli bè nyinimɛ taa wi nɛ̄ʔ.»
Culo nùʔɔrɔ wori dè
13 «Culo timɔnyigele siin sì yɛli bè puu muɔ mɛ́ʔ gàli lúbugogɛnnɛ ni wè nunɔ lèʔ, làa lúbugo bè tóri làa nɛ̄ʔe. 14 Yakirigele siin sì yɛli bè puu míɛni muɔ saʔa nī gèʔ gàli kpúʔɔgɛnnɛ ni wè nunɔ lèʔ, làa kpúʔɔ bè tóri làa nɛ̄ʔ. 15 Muɔ culo wi timɔnyinɛ ni lúbugogɛnnɛ ni 'yɛli bè sìɛn bè sín, muɔ yakirile ni 'yɛli bè sìɛn bè sín, kire ga buu muɔ sìi cɛnyɛ yi sí niʔɛ dàala nɛ̄ lè nyàa Yewe muɔ Kulocɛliɛ wi 'kɛn muɔ mɛ́ wè.
16 «Nɛ́ ki cɛ́n ŋàa wi kire kpínʔini gè, ŋàa wi kacuʔɔgɔlɔ kpínʔini gèle, wi yē Yewe muɔ Kulocɛliɛ wi kanabiɛnnɛ.»
Isirayɛliyé pe 'yɛli bè Amalɛkiyé cúʔɔ bèle
17 «Sɔ̀ngi ma taa nɛ́ ki ní gàa Amalɛkiyé pe yé kpíʔile muɔ nɛ̄ wè lɛ̀lɛ líì nī muɔ 'puu koligo nɛ̄ gè nɛ́ kɔ́n Ezipiti kùlo mɛ́ lef. 18 Pe 'yiri nɛ̀ taʔa muɔ nɛ̄ nɛ̀ pɛ́nì muɔ kàduʔumɛ wuulo kpúu bèle koligo nɛ̄ gè, bàli piyè puu nɛ gbɛ̀ni fìʔɛlɛ bèleʔ, nɛ̀ ki yaʔa muɔ cé tánʔa nɛ̀ fùrɔ á muɔ ŋɔri ti 'kúɔ. Piyè cɛ́nì fíɛ Kulocɛliɛ nɛ̄ʔ.
19 «Lɛ̀lɛ líì nī Yewe muɔ Kulocɛliɛ wi bé ki yaʔa muɔ- ŋɔ́ daa muɔ leguulo kɔli mɛ́ gè, bàli pe 'muɔ màʔa nɛ̀ suʔu bèle, kùlo nī lè nàa Yewe muɔ Kulocɛliɛ wi 'kɛn muɔ mɛ́ kɔrigɔ gè, kire ga buu muɔ- ni líɛ ni- kò muɔ woli lè, muɔ bé Amalɛkiyé pe woli cúʔɔ lè péwu bè ki kpíʔile siɛn fǎ ní sɔ̀ngi daa nɛ́ pe ní dàala nɛ̄ lèʔ. Fǎga fìʔɛ díɛʔ !»