Cepɔrigɔ nɛ́ ceyaʔara wori dè
24
1 A Misa ń'nɛ̀ ki juu nɛ́ joa: «Dùʔɔ ki bé gbɛ̀ nyaa nàguɔ wáà 'cɛliwɛ líɛ, a ki pɛ́nì nyaa kire kàduʔumɛ gè cɛliwɛ wiì ń'nɛ̀ wi dɛ́ni cíginiʔ, nɛ́ ki cɛ́n wi nyɛ́nì tiɛlɛ nyaa wi nɛ̄ nàa nī fìɛrɛ woli lè. A wi sí ceyaʔa sɛbɛ kpíʔile nɛ̀ kɛn wi mɛ́ nɛ́ wi yige wi saʔa nī gèb. 2 A wi sí kɛ́ nɛ̀ sɛ́nì kò nàguɔ wáà wiiyɛ cuɔ. 3 Kire nàguɔ míɛni wè, a cɛliwɛ wi pɛ́nì wi biɛn, a wi ń'nɛ̀ ceyaʔa sɛbɛ kpíʔile nɛ̀ wi kɛn, nɛ́ wi yige wi saʔa nī gè. Á kire bɛ̀ʔ gè, nàguɔ ŋáà wi 'cɛliwɛ ŋáà líɛ wè, a wi pɛ́nì kùu wè.4 «Kire tiʔɛ nī gè, nàgapeliwe ŋáà wi yé wi yaʔa wè, wire sǐ ní gbɛ̀ wi líɛ wi- kò wire cuɔ cíginiʔ, nɛ́ ki cɛ́n wi nyɛ́nì núʔɔ nɛ̀ kúɔ Yewe yiʔɛ mɛ́ gè. A wi 'kire kpíʔile gè, kire yē Yewe kanabiɛnnɛ.
«Muɔ sì yɛli bè kapiile nyɔ́gɔ lè kùlo nī lèʔ, kùlo náà Yewe muɔ Kulocɛliɛ wi 'kɛn muɔ mɛ́ kɔrigɔ gè.»
Pe 'yɛli bèri kacɛ̀ngɛlɛ kpínʔini pìye mɛ́
5 «A ki pɛ́nì nyaa nàguɔ wáà péli nɛ̀ cɛliwɛ líɛ wè, wiì yɛli bè kɛ́ kapiɛnnɛ mɛ́ʔ; piyě gbɛ̀ wi cò fànʔa wi- kaala kpíʔileʔ. Wi 'yɛli bè kò tiɛnugo nī nɛ́ wi cefɔnwɔ ní wè fúɔ yiɛlɛ nigbe bè fundaanra kɛn cɛliwɛ mɛ́ wè ŋàa wi péli nɛ̀ líɛ wè.
6 «A muɔ 'fuʔɔ le siɛn nɛ̄, muɔ sì yɛli bè wi tírɛ líɛ gè fuʔɔ sìndiʔɛ nī gèʔ, bé nɛ́ ga jo wi pínɛ lèʔ, nɛ́ ki cɛ́n a muɔ 'kire kpíʔile gè, muɔ nyɛ́nì wi sìi cúʔɔ wè wī.
7 «A siɛn wáà 'wi siinyɛni Isirayɛli siɛn yùu nɛ̀ cò wè, a wi 'wi kpíʔile sùkulowo kire ga laa nɛ̀ sɛ́nì wi pári wè, ki 'yɛli pe- wi kpúu wī. Kire ki bé kpíʔile muɔ bé kapiʔi yige gè yeli sunʔɔmɔ nī bèc.»
Cetinnɛ yaama wori dè
8 «Te mìɛ ciʔige cetinnɛ yaanyiɛmɛ wuʔu nɛ̄ gèd, mari ki sɔ́migi mari kpínʔini gàa nɛ̄ Leviiyé kacuɔnrilɔ pe béri yeli tɛnmɛ gè. Yeri ki sɔ́migi yeri kpínʔini bè yɛli nɛ́ gàa ní mi 'juu nɛ̀ gbɛ̀ngɛ pe mɛ́ gè. 9 Sɔ̀ngi ma taa gàa Yewe muɔ Kulocɛliɛ wi 'kpíʔile Miriyami nɛ̄ wè, lɛ̀lɛ líì nī yeli 'puu koligo nɛ̄ gè nɛ́ kɔ́n Ezipiti kùlo mɛ́ lèe.»
Fɔ̀ngɔfɔlilɔ nàʔagɛnmɛ bè
10 «A muɔ 'fuʔɔ le muɔ siɛnnyɛni nɛ̄ wè, muɔ sì yɛli bàga jíin wi saʔa nī gèʔ bè sa yakaa líɛ wi fuʔɔ sìndiʔɛ nī gèʔf. 11 Muɔ bé yéri kpànʔanɛ wī; ŋàa wi 'fuʔɔ kún gè muɔ mɛ́ wè, wire wi bé yiri nɛ́ yɛgɛ ní gè muɔ kúrugu kpànʔanɛ gè.
12 «A ki sí nyaa ki siɛn wiī fɔ̀ngɔfɔli wè, kiì yɛli ki siɛn wi dànguu wi 'súɔn muɔ mɛ́ʔ, ŋàa muɔ 'suɔ wi mɛ́ fuʔɔ sìndiʔɛ nī gèʔ. 13 Muɔ 'yɛli bè ŋàʔana bè wi kɛn wi mɛ́ sɛ́ni cɛngɛnyɛni ni 'jíin lè, kire ga buu wi fǎga súɔn wiire nīʔ. Bà fɔ̀ngɔfɔli wi bé diba kpíʔile wè muɔ mɛ́; Yewe muɔ Kulocɛliɛ wi bé ki tɔ́ri muɔ mɛ́ kasinnɛ.
14 «Muɔ sì yɛli bè fùrɔgɔ niʔɛ gè muɔ baakuɔwɔ nɛ̄ wèʔ, ŋàa wī fuunmɔfɔli wè nɛ́ ní fɔ̀ngɔfɔli wè, a wi yē muɔ siɛnnyɛni Isirayɛli wuu yo, kire ga laa nabɔnwɔ yo, bàli bīɛlɛ muɔ kùlo ni kàaya nī yè. 15 Muɔ 'yɛli bè wi cɛngɛ sàri kɛn wè wi mɛ́ sɛ́ni cɛngɛnyɛni ni 'jíin lè. Nɛ́ ki cɛ́n bɛ̀ wi yē fɔ̀ngɔfɔli wè, wiī yériyaʔawa nɛ wi sàri siri wè wī. A kire 'laa wè, wi bé Yewe yeri wè bè wáa muɔ nɛ̄; kire bé sí nyaa kapiile muɔ nɛ̄g.
16 «Yeli sì yɛli bè tuufɔli kpúu wè wi jaa kapiile kɛnmɛ nɛ̄ʔ, nɛ́ míɛni bè jaafɔli kpúu wè wi tuu kapiile kɛnmɛ nɛ̄ʔ. Siɛn wire tíimɛ kapiile kɛnmɛ nɛ̄ ki 'yɛli pe- wi kpúu.
17 «Muɔ sì yɛli bè tànʔa nùʔɔrɔ gè bè suɔ nabɔnwɔ mɛ́ wèʔ nɛ́ círiwe ní wèʔ. Fǎga lakicuɔ wi fɛ̀ni suɔ wè wi mɛ́ fuʔɔ sìndiʔɛ nīʔ. 18 Muɔ sí yɛli bè sɔ̀ngi daa nɛ́ Ezipiti kùlo ní lè nàa nī muɔ 'puu sùkulowo wè, á Yewe muɔ Kulocɛliɛ wi 'muɔ suɔ nɛ̀ yige baa. Kire kɛnmɛ nɛ̄ mi 'kele gálì juu gèle nɛ̀ gbɛ̀ngɛ muɔ mɛ́ pàngɛ gèh.
19 «A muɔ kɛ́ni muɔ siʔi yaliire nyɔ́gi dè nɛ́ fìʔɛ yaliipuɔlɔ láà nɛ̄ wè, fǎga koli bè sa ni líɛʔ; tire bé kò nabɔnwɔ nɛ́ círiwe nɛ́ lakicuɔ mɛ́ wè, kire ga buu Yewe muɔ Kulocɛliɛ wi sí diba taʔa wè muɔ nɛ̄ muɔ kɔli baara ti mìɛni nɛ̄ dè.
20 «Bɛ̀ ki bé puu míɛni a muɔ kɛ́nì wolivi yasɛnrɛ cuu dè, muɔ sì yɛli bè koli bè siʔi fùgu gè tɔliyɔ siinʔ bè yasɛnrɛ cuɔ dè dàa nɛ̄ muɔ 'fìʔɛ dèʔ. Muɔ 'yɛli bè ti yaʔa nabɔnwɔ nɛ́ círiwe nɛ́ lakicuɔ mɛ́ wè. 21 Bɛ̀ ki bé puu míɛni a muɔ kɛ́ni ɛrɛzɛn yasɛnrɛ cuu dè muɔ siʔi nī gè. Muɔ sì yɛli bè koli bè siʔi fùgu gè bè yasɛnrɛ cuɔ dè dàa nɛ̄ muɔ 'tóri dèʔ. Muɔ 'yɛli bè ti yaʔa nabɔnwɔ nɛ́ círiwe nɛ́ lakicuɔ mɛ́ wè.
22 «Muɔ sí yɛli bè sɔ̀ngi daa bà muɔ 'puu sùkulomɔ nɛ̄ Ezipiti kùlo nī lè. Kire kɛnmɛ nɛ̄ mi 'kele gálì juu gèle nɛ̀ gbɛ̀ngɛ muɔ mɛ́ pàngɛ gè.»