23
1 «Nàguɔ sì yɛli bè wi tuu cuɔ líɛʔ; a kire 'kpíʔile gè, wi nyɛ́nì wi tuu fìɛrɛ tiʔɛ nyaa gèa.»Siɛn ŋáà wiǐ gbɛ̀ jáa bè jíin Yewe gboli nī lèʔ
2 A Misa sí job: «Nàguɔ ŋáà nɛ̄ pe 'juʔɔlɔ muʔɔrɔ gèle á kire 'laa ŋàa nɛ̄ pe 'nàguɔmɔ ceri bè, wiǐ gbɛ̀ jíin Yewe gbùʔɔrɔ gboli nī lèʔ. 3 Pùɔ ŋáà míɛni pe 'sii kanuʔɔrɔ nī dèʔ, wiǐ gbɛ̀ jíin Yewe gbùʔɔrɔ gboli nī lèʔ, nɛ́ míɛni wi siimɛ wuulo piyě gbɛ̀ jíin baaʔ fúɔ bè sa nɔ̀ kɛ̀ngɛlɛ kiɛwoli nɛ̄ lèʔc.
4 «Amɔ siɛn wè nɛ́ Mowabi siɛn ní wè, pe wàa sǐ gbɛ̀ jíin baa Yewe gbùʔɔrɔ gboli nī lèʔ, nɛ́ míɛni wi siimɛ wuulo piyě gbɛ̀ jíin baaʔ fúɔ bè sa nɔ̀ kɛ̀ngɛlɛ kiɛwoli nɛ̄ lè. Bɛ̀ ki bé puu súuri, 5 nɛ́ ki cɛ́n ki siɛnnɛ bálì piyè yiri nɛ̀ yeli kpàli nɛ́ suro ní nɛ́ luʔɔ níʔ bà yeli 'puu koligo nɛ̄ gè nɛ́ kɔ́n Ezipiti kùlo mɛ́ lèʔ. Pe yé cɛ́nì ki serige wī nɛ̀ Balaami yeri, Beyɔri jaa wè, ŋàa wi 'puu Petɔri kàʔa nī gè Mɛsopotamii kùlo nī lè. A pe 'wi sàri wali nɛ̄ kire ga buu wi- dɛ́ngɛ siɛnrɛ juu daʔa dè yeli nɛ̄d. 6 Nɛ̀ sí ki yaʔa Yewe muɔ Kulocɛliɛ wiì fɔ̀li nɛ̀ Balaami siɛnrɛ lúʔu dèʔ, a wi cɛ́nì dɛ́ngɛ yiʔɛ wè a wi 'kò diba. Nɛ́ ki cɛ́n muɔ Isirayɛli wèe, muɔ nyɛ́nì Yewe muɔ Kulocɛliɛ dɛ́ni wè. 7 Kire nɛ̄ muɔ sì yɛli bàga yanyige caa púloʔ nɛ́ ki siɛnnɛ bálì ní bèleʔ nɛ́ sìɛnmɛ koligo ní pe mɛ́ʔ, bè muɔ yaʔa sìi nɛ̄ wè.
8 «Muɔ sì yɛli bè Edɔmi siɛn yaʔa wè wi- muɔ biɛnʔ, nɛ́ ki cɛ́n muɔ siinyɛni wīf. Nɛ́ míɛni muɔ sì yɛli bè Ezipiti siɛn yaʔa wè wi- muɔ biɛnʔ, nɛ́ ki cɛ́n muɔ 'puu nabɔnwɔ wī pe kùlo nī lè. 9 Peli bèle, pe siimɛ wuulo bèle, ki bé séli pe kɛ̀ngɛlɛ taanriwoli nɛ̄ lè pe nɛ́ gbɛ̀ri jiin Yewe gbùʔɔrɔ gboli nī lè.»
Bùguro tiʔɛ ki 'yɛli bè kò cìilige
10 «A muɔ kɛ́ni waa bàa kapiɛnnɛ kpúɔn nɛ́ muɔ leguulo ní bèle, muɔ béri mìɛ ciʔige kire ga buu muɔ bùguro ti fǎga núʔɔ Yewe yiʔɛ mɛ́ gèʔ. 11 A ki sí nyaa nàguɔ wáà yē yeli sunʔɔmɔ nī bè ŋàa wi 'núʔɔ a ki 'nyaa wi 'ŋɔ́ni nɛ̀ yɛ̀ kpìɛnduumɛ mɛ́ bè nɛ́ nàguɔmɔ luʔɔ nyaa a ki 'yiri wi mɛ́ wè, wi bé yiri bùguro nī dè; wiǐ ní jíin baa ti laamɛ nī bèʔ. 12 Cɛnguɔyɛligɛ lɛ̀lɛ nī lè, wi bé gbéli; cɛngɛnyɛnijiinmɛ mɛ́ bè, wi bé koli jíin bùguro laamɛ nī bè.
13 «Muɔ bé tiʔɛ káà nyíɛnɛ bè kɔ̀n bùguro kàduʔu mɛ́ gè, baa muɔ béri waa kàfugo mɛ́ gè. 14 Siɛn ó siɛn yeli nī bèle, yatugugo 'yɛli bè puu wi tugoro nī dè. A wi kɛ́nì kɛ́ kire tiʔɛ nī gè kàfugo mɛ́ gè, wi báa kàwiʔi káà túgu dàala nɛ̄ lè bè so bè le ki nī, kire kàduʔumɛ wi bé fire tɔ́n dè. 15 Nɛ́ ki cɛ́n Yewe muɔ Kulocɛliɛ wiī nɛ tári nɛ mári bùguro nī dè bèri muɔ wéli bè ki yaʔa muɔ- muɔ leguulo jáa bèle. Kire nɛ̄ muɔ bùguro ti 'yɛli bè puu wàlidɛngɛrɛ, kire ga buu wi fǎga fuɔnrɔ nyaa muɔ tiʔɛ nī gèʔ, dí wi ga cíi muɔ wélige nɛ̄ gèʔ.»
Sùkulowo wi fɛ̀zuɔlɔ wori dè
16 «A sùkulowo 'fɛ̀ nɛ̀ sɛ́nì líʔire jó muɔ mɛ́ wè, fǎga wi cò gɛn wi kàfɔli mɛ́ wèʔ. 17 Wi 'yɛli bè kò muɔ tiʔɛ nī gè, tiʔɛ gáà wi 'nyíɛnɛ nɛ̀ kɔ̀n gè, kàʔa gáà ki 'wi dɛ́ni gè. Muɔ sì yɛli bèri fùrɔgɔ tari wi nɛ̄ʔ.»
Cecaafaaligɛ nɛ́ nàjaafaaligɛ wori dè
18 «Isirayɛliyé cuɔ wáà fáala á 'kire laa nàguɔ wáà fáala sì yɛli bè 'nàjaara kpíʔile á 'kire laa cecaara kpíʔile yasunzunro tiʔɛ nī gèʔ wali kɛnmɛ nɛ̄g. 19 Bè nyakungɛngɛ fori gè, a ki yē kɛnmɛ ó kɛnmɛ nɛ̄ wè, muɔ sǐ ga tíi bé pɛn Yewe muɔ Kulocɛliɛ kòridiʔɛ nī gèʔ nɛ́ wali wáà ní ŋàa wi 'kɔ́n kire baara dáà felige nī dè, cɛliwɛ wuu wè yo, nàguɔ wuu wè yoh. Ti mìɛni siin yē Yewe muɔ Kulocɛliɛ wi kanabiɛnnɛ.»
Fuɔlere tɔ̀ni caa wori dè
20 «A muɔ 'fuʔɔ le muɔ siɛnnyɛni wáà nɛ̄ ŋàa wī Isirayɛliyé wuu wè, wali wī yo, yaliire dī yo, nɛ́ yɛgɛ ó yɛgɛ, muɔ sì yɛli bè tɔ̀ni taʔa wi fuʔɔ nɛ̄ gèʔ. 21 Muɔ bé gbɛ̀ri tɔ̀ni caa nabɔnwɔ wire mɛ́, nɛ̀ sí ki yaʔa muɔ sǐ gbɛ̀ ki kpíʔile muɔ siɛnnyɛni Isirayɛliyé siɛn nɛ̄ wèʔ, kire ga buu Yewe muɔ Kulocɛliɛ wi- sí diba taʔa wè muɔ nɛ̄ nɛ́ muɔ kɔli kakpiʔiligele ke mìɛni ní, kùlo nī lè nàa nī yeli bé jíin bè ni líɛ ni- kò yeli woli lèi.»
Nyakungɛnyɛ wori dè
22 «A muɔ 'nyuɔ kún nɛ̀ kɛn Yewe muɔ Kulocɛliɛ mɛ́ wè, -ki kpíʔile fáari gàa muɔ 'juu gè, fǎga mɔgɔʔ. Nɛ́ ki cɛ́n Yewe muɔ Kulocɛliɛ wi bé muɔ yúgo nɛ́ ki ní. A muɔ sì ki kpíʔile gèʔ, ki bé nyaa muɔ mɛ́ kapiilej. 23 A muɔ míɛni sì nyuɔ kún nɛ̀ kɛn wèʔ, kire wè kapiile muɔ mɛ́ʔ. 24 Dàa muɔ nyuɔ ki 'juu gè, muɔ 'yɛli bè ki fori wī. Nɛ́ ki cɛ́n muɔ tíimɛ muɔ 'ki nyíɛnɛ nɛ̀ kɔ̀n bè nyuɔ kún gè gɛn Yewe muɔ Kulocɛliɛ mɛ́ wè gàa muɔ 'juu nɛ́ muɔ nyuɔ ní gè.»
Ɛrɛzɛn yasɛnrɛ nɛ́ yaliire cuɔ bè káa wori dè
25 «A muɔ 'jíin muɔ siɛnnyɛni ɛrɛzɛn siʔi nī gè, muɔ bé gbɛ̀ yasɛnrɛ táà cuɔ bè káa bè tín, nɛ̀ sí ki yaʔa muɔ sǐ gbɛ̀ tàa le muɔ yalege nī gè bè kɛ́ nɛ́ ti níʔ. 26 A muɔ 'jíin muɔ siɛnnyɛni siʔi káà nī gè, muɔ bé gbɛ̀ yaliipiimɛ cuɔ muɔ kɔli nī gè bè káa, nɛ̀ sí ki yaʔa muɔ sǐ gbɛ̀ nyàkɔnigɔ tíʔɛ bè ti kɔni bè kɛ́ nɛ́ ti níʔk.»