Siɛnnyɛni sáʔa wori dè
22
1 A Misa sí joa: «A muɔ 'muɔ siɛnnyɛni Isirayɛli wuu wáà yajuʔu nyaa gè, nùɔ wè, kire ga laa sìnbuɔ wè, síkpuɔ yo, gàa ki 'pùunni gè, fǎga kàduʔu wáa ki mɛ́ʔ; muɔ 'yɛli bè ki kɔ́ri bè kɛn muɔ siɛnnyɛni mɛ́ wèb. 2 A muɔ siɛnnyɛni wi tɛ́nidiʔɛ ki 'líili muɔ nɛ̄ wè, á muɔ sì wi cɛ́n wèʔ, muɔ bé yajuʔu cò gè bè yaʔa muɔ kpáa nī gè, bà ki bé kò muɔ mɛ́ fúɔ bè taa muɔ siɛnnyɛni wi pa muɔ yúgo ki nī, dí muɔ sí ki kɛn wi mɛ́. 3 Bɛ̀ muɔ bé ki kpíʔile míɛni a ki yē wi sèfɛnnɛ lè, nɛ́ wi burugbuʔɔ ní gè, nɛ́ wi yɛrɛ ti mìɛni ní dàa ti 'pùunni muɔ siɛnnyɛni mɛ́ wè, a muɔ 'ki nyaa gè, muɔ sì yɛli bè kàduʔu wáa ki mɛ́ʔ.4 «A muɔ 'muɔ siɛnnyɛni sèfɛnnɛ nyaa kire ga laa wi nùɔ a wi 'tuu koligo nī gè, fǎga kàduʔu wáa ki mɛ́ʔ. Ma muɔ siɛnnyɛni sáʔa wè wi- yajuʔu yɛ̀gɛ gè wi yérige.»
Kajuʔulo kálì wori dè
5 «Cɛliwɛ sì yɛli bè nàguɔ burudo leʔ; nàguɔ míɛni sì yɛli bè cɛliwɛ burudo leʔ. A wàa 'kire kpíʔile gè, wire yē Yewe muɔ Kulocɛliɛ wi kanabiɛnnɛ.
6 «A muɔ 'koligo líɛ gè, nɛ́ sɛ́nì sínjasiɛrɛ nyaa dè tiige káà nī wè, kire ga laa dàala nɛ̄ lè, nɛ́ sínjanuu ní wè sínɛwɛ sínjapigele nɛ̄ gèle kire ga laa cɛngɛlɛ nɛ̄ gèle, muɔ sì yɛli bè nuufɔli cò wè nɛ́ pìile ní bèleʔ. 7 Muɔ 'yɛli bè sínjanuu yaʔa wè wi- fini bè kɛ́; muɔ bé gbɛ̀ pìile cò bèle. A muɔ nɛ kire kpínʔini gè muɔ bé yanyige taa bè sìitɔniwɔ taa.
8 «A muɔ kɛ́nì saafɔngɔ faan gè gàa gī binge gè, muɔ bé ki naamɛ nyuɔyɔ faan yè bè yi kpàʔala, kire ga buu a siɛn wáà 'kɔ́n ki naamɛ gè nɛ̀ tuu nɛ̀ kùu wè, ki siɛn sìsiɛn wolo kapiile fǎga puu muɔ nɛ̄ʔ.
9 «A muɔ 'ɛrɛzɛn siʔi fáli gè, muɔ sì yɛli bè yaliire táà felide tánʔa bè nyaʔami ki nīʔ. A kire 'kpíʔile gè, ti mìɛni bé kò Yewe woric, ɛrɛzɛn yasɛnrɛ dè nɛ́ yaliire díì ní dè; siɛn sǐ ní gbɛ̀ ti lìiʔd.
10 «Muɔ sì yɛli bè nùɔ nɛ́ sèfɛnnɛ puɔ lè zuu nuwɔ nɛ̄ bè fáli nɛ́ ti níʔ.
11 «Muɔ sì yɛli bè burugo le gàa pe 'tìin nɛ̀ nyaʔami nɛ́ sìnbasiire ní dè nɛ́ lɛn jèsii ní wèʔ.
12 «Muɔ 'yɛli bè mɛ́rɛ jɔli dè bè tárigɛ muɔ burudɔnigɔ nɛ̄ gè gàa muɔ 'le gè ki tiɛyɛ sicɛri nɛ̄ yè táanmɛ gèe.»
Cɛliwɛ míɛcuʔɔgɔ wori dè
13 «Dùʔɔ ki bé gbɛ̀ nyaa a nàguɔ wáà 'sinboriwo pɔri wè nɛ̀ wi cɛ́n cɛliwɛ wè, kire kàduʔumɛ a wi láa kɛ́nì kúɔ wi nī wè, 14 a wi 'míɛcuʔɔgɔ siɛnrɛ juu nɛ̀ taʔa wi nɛ̄ wè, nɛ́ fìɛrɛ wáa wi nɛ̄ dè, nɛ́ ki juu nɛ́ jo: ‹Mi nyɛ́nì sinboriwo ŋáà líɛ wè nɛ́ wi cɛ́n cɛliwɛ wè, a mi 'ki nyaa wi 'nàguɔ kaala cɛ́n.›
15 «A ki 'nyaa mmɛ gè, sinboriwo wi tuu wè nɛ́ wi yàa ní wè, pe bé sinboriwo wi nàguɔ sìnjɛ́n fìɛ líɛ wè bè sa wi tìɛ kàʔa ki liɛlɛ nɛ̄ bèle, nàkpanʔa wìile mɛ́ lè.
16 «Tuufɔli wi bé ki juu liɛlɛ mɛ́ bèle bé jo: ‹Mi nyɛ́nì mi póri kɛn wè nàguɔ ŋáà mɛ́ wè cɛliwɛ, a wi láa ki kɛ́nì kúɔ wi nī. 17 A wi 'nyùgofun siɛnrɛ juu nɛ̀ taʔa wi nɛ̄ nɛ́ jo: Muɔ póri n'ŋɛ, mi sɛ́nì wi nyaa a wi 'nàguɔ kaala cɛ́n.
« ‹Kire nɛ̄, fìɛ n'ŋɛ ŋàa wi yé ki tìɛ mi póri wiì nàguɔ kaala cɛ́n lèʔ.› »
«Bà siivɔlilɔ pe bé dànguu tìɛ wè kàʔa ki liɛlɛ nɛ̄ bèle, dànguu ŋáà nɛ̄ sìsiɛn ki yē gè, pìlipelige wuʔu gè. 18 Bà kàʔa ki liɛlɛ pe bé nàguɔ cò wè bè sápinyiɛyɛ kpúɔn wi nɛ̄. 19 Bà wi nyɛ́nì fìɛrɛ wáa Isirayɛli sinboriwo nɛ̄ wè, kàyuʔujuu lɔri wori ti bé puu wi- walifiiwe walikpegele dabataan (100) sàri sinboriwo wi tuu mɛ́ wè, dí wi sí kò wi cuɔ, wiǐ ní gbɛ̀ wi yaʔaʔ bè pa taa wi sìi cɛnyɛ yi mìɛni nī yèʔ.
20 «A ki sí pɛ́nì nyaa kányiʔɛ gī dàa nàguɔ wi 'juu dè, a fìɛ sì nyaaʔ bè ki tìɛ sinboriwo wiì cé fìɛ nàguɔ cɛ́n wèʔ, 21 pe bé sinboriwo cò wè bè kɛ́ nɛ́ wi ní wi tuu kpáa mɛ́ gè. Kire tiʔɛ nī gè kàʔa nàguɔlɔ pe bé wi wáa nɛ́ kàdari ní fúɔ wi kùu. Nɛ́ ki cɛ́n wi nyɛ́nì kapiigbuʔɔ kpíʔile Isirayɛli nɛ̄ wè, bà wi 'nàguɔ kaala cɛ́n lè nɛ́ fìɛrɛ kaala kpíʔile nɛ̀ sí ki yaʔa wi 'puu nɛ tíin wi tuu kpáa nī gè. Bɛ̀ ki bé kpíʔile dí muɔ sí kapiʔi yige gè Isirayɛli sunʔɔmɔ nī bè.»
Nàguɔ cuɔ yùu wori dè
22 «A pe 'nàguɔ wáà cò ŋàa wi 'sínɛ nɛ́ nàguɔ wáà cuɔ ní wè, pe mìɛni siin bèle pe bé pe kpúu wī, nàguɔ ŋáà wi 'sínɛ nɛ́ cɛliwɛ ní wè, nɛ́ cɛliwɛ míɛni ní wèf. Bɛ̀ ki bé kpíʔile dí muɔ sí pe kapiʔi yige gè Isirayɛli sunʔɔmɔ nī bè.»
Cecanʔa wori dè
23 «A sinboriwo yē kɔnimɔ nɛ̄ nàguɔ mɛ́, á nàguɔ wáà sɛ́nì wi kpàli nɛ̀ nyaa kàʔa nī gè, nɛ́ sínɛ nɛ́ wi ní wè, 24 yeli bé pe mìɛni siin kɔ́ri bèle bè kɛ́ kàʔa wìile mɛ́ lèg bè sa pe wáa nɛ́ kàdari ní fúɔ pe kùu, sinboriwo wè, bɛ̀ wire sì yékpoli wáa lè kàʔa nī gèʔ, nàguɔ wè, bɛ̀ wire 'tuu wi nàganyɛni kɔni nɛ̄ wè. Bɛ̀ ki bé kpíʔile dí muɔ bé kapiʔi yige gè Isirayɛli sunʔɔmɔ nī bèh.
25 «A ki sí nyaa nyàʔa nī nàguɔ wi sɛ́nì wi nàganyɛni kɔnifɔli nyaa wè, nɛ́ wi cáan nɛ̀ taa fànʔa wè, nàguɔ wire nigbe pe bé kpúu. 26 Sinboriwo wè, muɔ sǐ yakaa kpíʔile wi nɛ̄ʔ, nɛ́ ki cɛ́n wiì kapiile kpíʔileʔ nàa ni 'yɛli nɛ́ kùu ní wèʔ. Ki kapiile náà niī nunɔ nɛ́ nàa ní nàguɔ wáà 'tuu wi siɛnnyɛni nɛ̄ nɛ̀ wi kpúu wè. 27 Nɛ́ ki cɛ́n nyàʔa nī wi 'sinboriwo nyaa wè, ŋàa wī kɔnifɔli yē wi mɛ́ wè; dùʔɔ wi 'yékpoli wáa, siɛn sì taa nɛ̀ wi suɔʔ.
28 «A ki sí nyaa nàguɔ wáà nyɛ́nì sinboriwo nyaa ŋàa wī kɔnifɔli fùn wè, a wi sí wi cò nɛ̀ sínɛ nɛ́ wi ní wè, a pe sɛ́nì pe cò ki tiʔɛ nī gè, 29 a ki 'nyaa mmɛ gè, nàguɔ ŋáà wi 'wi cò fànʔa nɛ̀ sínɛ nɛ́ wi ní wè, wi bé walifiiwe walikpegele togosiin nɛ́ kpɔrigɔ sàri sinboriwo wi tuu mɛ́ wè, bé sí sinboriwo líɛ wè wi- kò wi cuɔ bɛ̀ wi 'wi cáan nɛ̀ taa wèi. Wi bé kò wi cuɔ wi sìi cɛnyɛ yi mìɛni nī, wiǐ ní gbɛ̀ wi yaʔaʔ.»