Siɛn ŋáà pe 'kpúu á siɛn sì cɛ́n wèʔ
21
1 A Misa ń'nɛ̀ ki juu nɛ́ joa: «A ki sí nyaa pe 'kpúu nyaa cáanwa nyàʔa nī gè, dàala nɛ̄ lè nàa Yewe muɔ Kulocɛliɛ wi 'kɛn muɔ mɛ́ lè, a siɛn sì cɛ́n ŋàa wi 'wi kpúu wèʔ, 2 yeli kàaya liɛlɛ bèle nɛ́ yi kàyuʔujuulo ní bèle, peli bé yiri bè sa tiʔɛ ki liiligɛnmɛ tɔ́nminɔ bè, nɛ́ kàaya ní yè nyàa yī ki táanni gè. 3 A kàʔa ki pɛ́nì cɛ́n gàa táanni kpúu wi 'puu wè, kire kàʔa liɛlɛ pe bé yiri bè nɛ̀pori wáà cò, ŋàa ní piyè fìɛ fáli wèʔ, pe míɛni sì fìɛ zuu puɔ wi nɛ̄ wèʔ. 4 Pe bé nɛ̀pori cò wè, bè cùungu lakoligo mɛ́ gè gàa ki fúu lɛ̀lɛ ó lɛ̀lɛ nī, vàʔa káà nī gàa piyè fìɛ fáli nɛ̀ nyaa gèʔ nɛ̀ pínɛ piyè yaliire tánʔa nɛ̀ nyaa ki nī gèʔ. Kire vàʔa tiʔɛ nī gè, pe bé nɛ̀pori wi yétiige ŋáʔana gè bè kaa.5 «Kacuɔnrilɔ bèle, Levii jaala bèle, peli Yewe yeli Kulocɛliɛ wi 'nyíɛnɛ nɛ̀ kɔ̀n peri baara wi mɛ́ bé sí de Yewe náari wè wi- diba taʔa wè wi siɛnnɛ nɛ̄ bèle, béri kàsii kele cuɔnri gèle nɛ́ a ki 'nyaa a siɛn wáà 'wàa kpúɔn nɛ̀ luɔ wè. Peli pe bé sìʔɛrɛ bè kpɔni kpúu nɛ̄ wè. 6 Kire kàʔa ki liɛlɛ bèle, gàa ki 'kpɔni kpúu nɛ̄ wè, pe bé pe kiyɛ jíge yè bè wo nɛ̀pori nɛ̄ wè ŋàa yétiige pe 'ŋáʔana nɛ̀ kaa gè, baa vàʔa nī gèb. 7 Pe bé ki juu nɛ́ yékpogbuɔlɔ ní bé jo: ‹Weli kiyɛ yire bɛ̀ʔ yi 'sìsiɛn wo gèʔ, weli nyapigele keli míɛni bɛ̀ʔ ke 'ki nyaaʔ gàa ki 'kpíʔile gèʔ. 8 Yewe yo, ma muɔ siɛnnɛ kàsulugo suɔ gè, Isirayɛliyé bèle, peli bálì muɔ 'fùgu nɛ̀ suɔ bèle; -leguʔu láʔa gè pe nɛ̄.› Bɛ̀ ki bé kpíʔile dí pe sìsiɛn wolo kàsulugo ki sí suɔ.
9 «Bɛ̀ ki bé kpíʔile dí muɔ sí kanaasingbiʔiliwe wi sìsiɛn wolo kapiile yige lè yeli sunʔɔmɔ nī bè, nɛ́ ki cɛ́n muɔ nyɛ́nì ki kpíʔile gàa ki 'sín gè Yewe yiʔɛ mɛ́ gè.»
Cɛliwɛ ŋáà pe 'cò kapiɛnnɛ nī lè wi cepɔrigɔ wori dè
10 «A muɔ kɛ́nì yiri bàa kapiɛnnɛ kpúɔn nɛ́ muɔ leguulo ní bèle, a Yewe muɔ Kulocɛliɛ wi 'ki yaʔa a muɔ 'pe jáa wè, a muɔ 'siɛnnɛ cò bèle, 11 a 'ki nyaa siɛnnɛ bálì pe 'cò bèle muɔ cɛliwɛ wáà nyaa cɛ̀nwɛ pe nī, a wi 'muɔ dɛ́ni á muɔ nɛ caa bè wi líɛ muɔ cuɔ wè, 12 muɔ bé wi kɔ́ri bè kɛ́ muɔ kpáa mɛ́ gè. Wi bé sa nyùgo kùnu gè, bé sí kamijinre celile dè, 13 bé wi burudo fòri dè dàa ti 'kíni nɛ̀ puu wi nɛ̄ dè lɛ̀lɛ líì nī wi 'puu kasuulewe wè. Wi bé kò baa muɔ kpáa nī gè, bè nyɛni yebogo wi tuu nɛ́ wi yàa kùu kayaʔa nɛ̄ gè. Kire kàduʔumɛ gè, muɔ bé wi nyɔ́gɔ saʔa nī, bè wi líɛ wi- kò muɔ cuɔ. 14 A ki sí pɛ́nì nyaa wiì ń'nɛ̀ muɔ dɛ́ni wèʔ, bà muɔ bé koligo kɛn wi mɛ́. Muɔ sì yɛli bè wi pári wali nɛ̄ʔ kire ga laa bè wi cò majo sùkulowo wīʔ, nɛ́ ki cɛ́n muɔ 'wi faʔa nɛ̀ kúɔ.»
Jaafɔliɛwɛ kɔrigɔ wori dè
15 «A ki sí nyaa cɛlilɛ siin yē nàguɔ wáà mɛ́ wè, a wàa 'wi dɛ́ni nɛ̀ tóri ŋìi nɛ̄ wè, a cɛlilɛ pe mìɛni siin sí nàgabigele sii gèle, a ki 'nyaa cɛliwɛ ŋáà wiì wi dɛ́ni wèʔ wire wuu wī jaafɔpeliwe wè, 16 cɛngɛ gíì tuufɔli wi je kɔrigɔ liɛ gè wi jaala nɛ̄ bèle, wiǐ gbɛ̀ jaafɔliɛwɛ wi kɔrigɔ kɛn gè cɛliwɛ ŋáà wi 'wi dɛ́ni wè wire jaa mɛ́ wèʔ. 17 Gìi sí gī baa gè, cɛliwɛ ŋáà wiì wi dɛ́ni wèʔ, nàguɔ wi 'yɛli bè wi jaafɔpeliwe cò wè bè yɛli nɛ́ wi liɛrɛ ní dè, bé sí wi yɛrɛ ti feliye tiɛyɛ siin kɛn yè wi mɛ́, nɛ́ ki cɛ́n kire jaa ŋáà wi yē wi nàgapunmɔ pùɔ. Kire kɛnmɛ nɛ̄ ki 'yɛli wi de tɔ́ri nɛ́ wi liɛrɛ ní dè.»
Sìnluʔumɔ pìile wori dè
18 «A ki sí nyaa jaafɔli yē nàguɔ wáà mɛ́ ŋàa wi 'nàʔa mabiɛn wè nɛ́ ní siɛnciiwe wè, wi wè nɛ lúru wi tuu nɛ́ wi yàa nɛ̄ wèʔ, a pe 'wi nàʔa nɛ̀ fùrɔ a wi 'cíi, wiì lúʔu wèʔ, 19 tuufɔli wè nɛ́ wi yàa ní wè, pe bé wi kɔ́ri bè kɛ́ nɛ́ wi ní wi kàʔa ki liɛlɛ kúrugu bèle baa nàkpanʔa wìile mɛ́ lè. 20 Pe bé sa ki juu wi kàʔa ki liɛlɛ mɛ́ bèle bé jo: ‹Weli jaa n'ŋɛ, ŋàa wi 'nàʔa mabiɛn wè, nɛ́ ní siɛnciiwe wè ! Wi wè nɛ lúru weli nɛ̄ʔ. Fungbuʔɔfɔli wī, nɛ́ sungbuɔwɔ wī.›
21 «A kire 'kpíʔile gè, kàʔa nàguɔlɔ pe mìɛni bé pìye pínɛ bè wi wáa nɛ́ kàdari ní fúɔ wi pa kùu. Kire ki bé kpíʔile muɔ bé kapiile yige lè yeli sunʔɔmɔ nī bè. Isirayɛli siɛnnɛ pe mìɛni bé ki siɛnrɛ lúʔu dè, bà pe bé fíɛ.»
Siɛn súunɔrigɔ wori dè tiige nɛ̄ gè
22 «A ki sí nyaa pe 'kàyuʔu juu siɛn wáà nɛ̄ a ki 'nyaa pe 'wi kpúu nɛ́ wi súu nɛ̀ nɔri tiige nɛ̄ gè, 23 ki kpúu wiì yɛli bè suɔn baa tiige nɛ̄ gèʔ; muɔ 'yɛli bè wi tɔ́n kire cɛnnugo gè. Nɛ́ ki cɛ́n, siɛn ŋáà pe 'nɔri nɛ̀ yaʔa tiige nɛ̄ gè, Kulocɛliɛ dɛ́ngɛ yē wi nɛ̄c. Muɔ sì yɛli bè dàala cúʔɔ lèʔ nàa Yewe muɔ Kulocɛliɛ wi 'kɛn muɔ mɛ́ kɔrigɔ gè.»