Kele gálì ke 'yɛli bè kpíʔile kapiɛnnɛ lɛ̀lɛ nī lè
20
1 A Misa ń'nɛ̀ ki juu nɛ́ joa: «A yeli kɛ́nì yiri bè sa kapiɛnnɛ kpúɔn lè nɛ́ yeli leguulo ní bèle, a yeli 'suɔnyɔ nyaa nɛ́ suɔnyɔ wotorilo ní bèle, nɛ́ kapiɛngbuɔnnɔ tògo ní gè, gàa ki 'niʔɛ nɛ̀ tóri yeli wuʔu nɛ̄ gè, kiì yɛli yeli de fìʔɛ́ pe nɛ̄ʔ. Nɛ́ ki cɛ́n Yewe yeli Kulocɛliɛ wiī nɛ́ yeli ní, wire ŋáà wi 'yeli yige Ezipiti kùlo nī lè.2 «Lɛ̀lɛ líì nī yeli nɛ yìye gbòborí bè sa kapiɛnnɛ kpúɔn lè, kacuɔnriwɔ wi bé yéri siɛnnɛ yiʔɛ mɛ́ gè bé juu. 3 Wi bé ki juu bé jo: ‹Yeri lúru, Isirayɛliyé ! Pàngɛ gè yeli bé kɛ́ kapiɛnnɛ mɛ́ lè bè sa tún nɛ́ yeli leguulo ní bèle. Ye fǎri fìʔɛ́ yeli funyɔ nī yèʔ ! Ye fǎga de fé de labilaʔ ! Ye fǎga de fún de yàʔaráʔ pe yiʔɛ mɛ́ gèʔ ! 4 Nɛ́ ki cɛ́n Yewe yeli Kulocɛliɛ wiī nɛ tári nɛ́ yeli ní, kire ga buu bè kapiɛnnɛ kpúɔn lè nɛ́ yeli leguulo ní bèle bè yeli suɔ pe mɛ́.›
5 «Siɛnnɛ yiɛgininɛ pe bé ki juu siɛnnɛ mɛ́ bèle bé jo: ‹Ŋáasiɛn wi 'saafɔngɔ faan nɛ̀ ki yaʔa wi fìɛ sínɛ ki nīʔ ? Ki siɛn wi- koli wi de waa wi kpáa mɛ́, kire ga buu wi fǎga sa kùu kapiɛnnɛ kpúɔndiʔɛ nī gèʔ dí siɛn wáà wiiyɛ sí jíin wi saʔa nī gèʔ. 6 Ŋáasiɛn wi 'ɛrɛzɛn siʔi cò fɔngɔ nɛ̀ ki yaʔa wiì fìɛ ki yasɛnrɛ káa dèʔ ? Ki siɛn wi- koli wi de waa wi kpáa mɛ́, kire ga buu wi fǎga sa kùu baa kapiɛnnɛ mɛ́ lèʔ dí siɛn wáà wiiyɛ sí ki líɛʔ. 7 Ŋáasiɛn wi 'péli nɛ̀ kɔnimɔ nyuɔ kún, nɛ̀ ki yaʔa wiì fìɛ wi pɔri ? Ki siɛn wi- koli wi de waa wi kpáa mɛ́, kire ga buu wi fǎga sa kùu baa kapiɛnnɛ mɛ́ lèʔ dí siɛn wáà wiiyɛ sǐ bɛ̀ʔ wi pɔriʔ.›
8 «Yiɛgininɛ pe bé ní de waa yiʔɛmɛ bè ki juu siɛnnɛ mɛ́ bèle bé jo: ‹Ŋáa wiī nɛ fìʔɛ́ wi fungo nī gè á wi céri ti 'kùu dè ? Ki siɛn wi- koli wi de waa wi kpáa mɛ́, kire ga buu wi fǎga fíɛrɛ wáa wi kapiɛngbuɔnnyɛninɛ nɛ̄ bèleʔ pe- kò fíɛrɛfɔlilɔ bɛ̀ wire tíɛlɛʔ.›
9 «A yiɛgininɛ pe kɛ́nì juu nɛ̀ kúɔ bèle, pe bé kàfɔlilɔ tɛ́ngɛ kapiɛngbuɔnnɔ nɛ̄ bèle.
10 «A yeli kɛ́nì sìʔɛrɛ nɛ̀ kpɔni kàʔa káà nɛ̄ bè tuu ki nɛ̄ gè, yeli bé yanyige siɛnrɛ juu pe mɛ́. 11 A pe 'fɔ̀li yanyige nyasiɛnrɛ nɛ̄ dè, nɛ́ pe kɔ̀riyɔ múgulo yè, siɛnnɛ bálì pe mìɛni bīɛlɛ baa kàʔa nī gè, peli bé kò bèri parituɔrɔ kúu yeli mɛ́. 12 A ki sí nyaa kàʔa ki siɛnnɛ pe 'cíi, piyè yanyige kpíʔile nɛ́ yeli ní wèʔ níɛ kapiɛnnɛ kpúɔn lè yeli ní wè, bà yeli bé ki kàʔa màʔa gè bè suʔu bè pe sige. 13 Bà Yewe yeli Kulocɛliɛ wi bé kàʔa siɛnnɛ pe mìɛni le yeli kiyɛ nī yè, bà yeli bé nàguɔlɔ pe mìɛni kpúu nɛ́ kapiɛngbuɔn ŋɔsii ní wè. 14 Yeli bé gbɛ̀ cɛlilɛ líɛ bèle, nɛ́ pìile ní bèle, nɛ́ yajuuro ní dè, nɛ́ yɛrɛ ti mìɛni ní dàa ti bé puu kàʔa nī gè, ti- puu yeli kapiɛngbuɔn tɔ̀ni wè. Bɛ̀ ki bé kpíʔile dí yeli sí yeli leguulo lɔri taa dè, dàa Yewe yeli Kulocɛliɛ wi 'kɛn yeli mɛ́ dè.
15 «Bɛ̀ sí yeli bé ki kpíʔile kàaya yi mìɛni mɛ́ nyàa yi 'líili nɛ́ yeli ní wè, nyàa yi wè kùlogolo gálì woyo yèʔ tiʔɛ gáà nī yeli bé tɛ́ni wèʔ. 16 Gàa ki sí kùlogolo ke kàaya kúɔ yè, nyàa Yewe yeli Kulocɛliɛ wi 'kɛn yeli mɛ́ kɔrigɔ gè, yeli sǐ ga tíi yakaa yaʔa sìi nɛ̄ʔ gàa ki ŋɔ́gi gè, siɛnnɛ nɛ́ yajuuro ní dè. 17 Yeli bé siɛnnɛ pe mìɛni cúʔɔ bè yige baa péwu, Etiyé bèle, Amɔriyé bèle, Kanaayé bèle, Pereziyé bèle, Eviyé bèle, nɛ́ Jebusiyé ní bèle, majo bɛ̀ Yewe yeli Kulocɛliɛ wi 'ki juu nɛ̀ gbɛ̀ngɛ gè, 18 kire ga buu pe fǎga yeli tɛnmɛ pe tètii kele ke mìɛni nɛ̄ʔ gàli pe kpínʔini pe kulocɛlɛlɛ mɛ́ bèle, dí yeli ga kapiile kpíʔile Yewe yeli Kulocɛliɛ nɛ̄ wè.
19 «A yeli sí kàʔa káà màʔa nɛ̀ suʔu nɛ̀ mɔgɔ ki táanni gè bè kapiɛnnɛ kpúɔn nɛ́ ki ní bè ki líɛ gè, yeli sì yɛli bàga tiige káà ceri nɛ́ kágbaʔa níʔ, yeli béri ki yasɛnrɛ cuu dè de káa, yeli sì yɛli bè ki ceriʔ. Tiige ki yé puu siɛn lé yeli sari túngu nɛ́ ki ní ? 20 Nɛ̀ sí ki taa, tiire dáà ti wè nɛ sɛngi dèʔ, yeli bé gbɛ̀ tire celile bè kpíʔile télile bèri tári gunyɔ nɛ̄ yè kire ga laa bè kàʔa sùlu gè bè yeli sáʔa kapiɛnnɛ nɛ̄ lè, fúɔ bè taa yeli pa jáa kàʔa nɛ̄ gè.»