Líʔirejodiɛyɛ wori dè
19
1 A Misa sí joa: «A Yewe muɔ Kulocɛliɛ wi kɛ́nì kùlogolo gálì siɛnnɛ cúʔɔ bèle nɛ̀ yige muɔ yiʔɛ mɛ́ gè kùlo nī lè nàa wi 'kɛn muɔ mɛ́ lè, a muɔ kɛ́nì pe kùlo líɛ lè nɛ́ tɛ́ni pe kàaya nī yè nɛ́ pe saaya nī yè, 2 muɔ bé kàaya taanri nyíɛnɛ gɔ̀n kùlo nī lè nàa Yewe muɔ Kulocɛliɛ wi 'kɛn muɔ mɛ́ lè ni- kò muɔ woli lèb. 3 Muɔ bé koliyo tɔ́nminɔ yè bè kɔ̀n nyàa yi béri waa líʔirejo kàaya mɛ́ yè bé sí kùlo tíla lè tiɛyɛ taanri kùlo náà Yewe muɔ Kulocɛliɛ wi 'kɛn muɔ mɛ́ lè ni- kò muɔ woli lè, kire ga buu ŋàa wi 'siɛn kpúu wè, wi gbɛ̀ fɛ̀ wi sa jíin baac.4 «Ki sí n'gɛ kɛnmɛ bíì nɛ̄ siɛnkpuuwo wi bé sa líʔire jó dè bè síɛ wè, kàaya nyáà taanri nī yè ki kàa nī bè wi sìi suɔ wè, a ki 'nyaa wi 'siɛn kpúu wè nɛ̀ ki yaʔa wiì ki kɔ̀rirɔ wèʔ; ki siɛn wiì cé kíni nɛ̀ wi biɛnʔ wi fungo nī gè wèʔ. 5 Ma ki wéli, dùʔɔ ki bé gbɛ̀ nyaa siɛn wáà 'kɛ́ sìnbirige nī, bè sa tiire kpúɔn nɛ́ wi siɛnnyɛni ní, bè ki yaʔa bà wiī nɛ tiige kpúɔn gè a wi kágbaʔa ki 'fòri nɛ̀ sɛ́nì wi siɛnnyɛni kpúɔn wè á ki siɛn wi 'kùu wè. Kire siɛn ŋáà wi 'wi kpúu wè, wi bé gbɛ̀ fɛ̀ bè kɛ́ líʔirejo kàʔa gáà ki kàa mɛ́, bè wi sìi suɔ wè.
6 «A kire sì kpíʔile gèʔ, bɛ̀ tiʔɛ ki 'líili nɛ̀ tóri gè, fuʔɔtɔnvɔli wi funyɛrigɛ nī gè wi bága taʔa siɛnkpuuwo nɛ̄ wè bè wi cìra jò bè wi kpúɔn bè kpúu. Nɛ̀ ki yaʔa kire siɛnkpuuwo wiì yɛli nɛ́ kùu níʔ, nɛ́ ki cɛ́n wi siɛnnyɛni wiì cé kíni nɛ̀ wi biɛn wīʔ. 7 Kire kɛnmɛ nɛ̄ mi 'ki juu nɛ̀ gbɛ̀ngɛ muɔ mɛ́, ma kàaya taanri nyíɛnɛ yè kɔ̀n líʔirejodiɛyɛ.
8 «A Yewe muɔ Kulocɛliɛ wi kɛ́nì muɔ kùlo píɛlɛ lè nɛ́ ni kɛn muɔ mɛ́ lè, majo bɛ̀ wi cé ki kàli nɛ̀ kɛn muɔ tobilo mɛ́ bèle nɛ́ jo wire bé kùlo náà ni mìɛni kɛn lè pe mɛ́ bèle, 9 nɛ́ míɛni a muɔ 'ki sɔ́migɔ nɛ̀ kpíʔile dàa ti mìɛni mi 'juu nɛ̀ gbɛ̀ngɛ muɔ mɛ́ pàngɛ gè, dàa ti 'jo: ‹Muɔ bé Yewe muɔ Kulocɛliɛ woli yaʔa lè ni- muɔ dɛ́ni, dí muɔ sí de tári cɛngɛ ó cɛngɛ wi koligo nī gèd,› a tire 'kpíʔile dè, kire lɛ̀lɛ nī muɔ bé ní koli kàaya yáà taanri fàri taanri nyíì nɛ̄ yè. 10 Bɛ̀ kire bé ki yaʔa kanaasingbiʔiliwe wè, pe fǎga wi kpúuʔ kùlo nī lè nàa Yewe muɔ Kulocɛliɛ wi 'kɛn muɔ mɛ́ ni- kò muɔ woli lèʔ. A pe 'kanaasingbiʔiliwe kpúu wè, pe bé kolimɔ taa wi sìsiɛn wolo lire kɛnmɛ nɛ̄.
11 «Nɛ̀ sí ki yaʔa, a siɛn wáà 'wi siɛnnyɛni biɛn wè, a wiī nɛ wi palilɛ nɛ̀ sɛ́nì tuu wi nɛ̄ nɛ́ wi kpúɔn nɛ̀ kpúu wè, nɛ́ sí fɛ̀ nɛ̀ kɛ́ líʔirejo kàʔa káà nī wè, 12 wi kàʔa ki liɛlɛ pe bé siɛnnɛ tun pe sa wi cò, bè koli bɛn nɛ́ wi ní bè ba wi kɛn siɛn ŋáà mɛ́ wi jo sìsiɛn ki fuʔɔ tɔ́n gè wi- wi kpúu. 13 Kiì yɛli muɔ nyinimɛ taa wi nɛ̄ʔ. Bɛ̀ ki bé kpíʔile dí muɔ 'kanaasingbiʔiliwe wi siɛnkpuʔu kapiilee yige lè Isirayɛli kùlo nī lè. Bɛ̀ muɔ bé puu yanyige nɛ̄.»
Dàala láʔagɛlɛ wori dè
14 «Fǎga tí bága muɔ siɛnnyɛni dàala láʔala nùʔɔrɔ lèʔ, dàala náà yeli tobilo pe yé kún lèʔ kɔrigɔ nī gè gàa yeli 'taa gè kùlo nī lè nàa Yewe muɔ Kulocɛliɛ wi 'kɛn muɔ mɛ́ ni- kò muɔ woli lè.»
Kaala nyaafɔli wori dè
15 «Siɛn nigbe ŋáà wi 'jo wire kaala nyaa lè, wire nigbe nyasiɛnrɛ tiǐ gbɛ̀ ki yaʔaʔ pe- kàyuʔu juu gè bè jo siɛn wi nyɛ́nì kolimɔ kaala kpíʔile kire ga laa kapiile láà fáala kpíʔileʔ. Dìgire siɛnrɛ tiǐ gbɛ̀ siɛn cò wèʔ fúɔ macɛn kinyaafɔlilɔ siin, a kire 'laa taanri siɛnjuuro nɛ̄f.
16 «A sɔ̀ngibiirefɔli wáà kɛ́nì finɛ nɛ̀ taʔa wàa nɛ̄ nɛ̀ jo wi nyɛ́nì kaala kpíʔile wè, 17 ki siɛnnɛ bálì siin bèle pe bé pìye pínɛ Yewe yiʔɛ mɛ́ gè bè kɛ́ kacuɔnrilɔ nɛ́ kàyuʔujuulo yiʔɛ mɛ́ gè, bàli pe bé puu baara nɛ̄ dè kire cɛnyɛ nī yè. 18 Kàyuʔujuulo pe bé sɔ́migɔ bè caa bè ki wéli. A ki kɛ́nì nyaa ŋàa wi 'siɛnrɛ juu dè, wi 'finɛ wī wè, nɛ́ finɛ nɛ̀ taʔa wi siɛnnyɛni nɛ̄ wè, 19 yeli bé wi cò bè yɛli nɛ́ kɛnmɛ bíì nɛ̄ wi 'puu nɛ caa bè wi siɛnnyɛni kpíʔile wè. Bɛ̀ ki bé kpíʔile dí muɔ bé kapiʔi yige gè Isirayɛli sunʔɔmɔ nī bè. 20 Bà siɛnsɛnminɛ pe bé ti lúʔu bé sí de fìʔɛ́, bà pe bé láʔa kapiigbiʔilige gáà felige nɛ̄ gè yeli sunʔɔmɔ nī bè.
21 «Kiì yɛli muɔ- nyinimɛ taa kakoligbiʔiliwe nɛ̄ wèʔ. A siɛn wáà 'siɛn kpúu, pe 'yɛli bè ki siɛn kpúu wè míɛni. A siɛn wáà 'siɛn nyapile cúʔɔ, pe 'yɛli bè ki siɛn nyapile cúʔɔ lè míɛni. A siɛn wáà 'siɛn gàanna kɔ́n, pe 'yɛli bè ki siɛn gàanna kɔ́n lè míɛni. A siɛn wáà 'siɛn kɔli kaa, pe 'yɛli bè ki siɛn kɔli kaa gè míɛni. A siɛn wáà 'siɛn tɔligɔ kaa, pe 'yɛli bè ki siɛn wi tɔligɔ kaa gè míɛnig.»