Leviiyé pe liile wori dè
18
1 A Misa sí joa: «Leviiyé kacuɔnrilɔ bèle, ki saʔa tùlugo ki mìɛni gè, dàala kɔrigɔ sǐ puu pe mɛ́ Isirayɛli nī wèʔ. Kakuɔrɔ yakɔnrɔ dáà siɛnnɛ pe kanʔa Yewe mɛ́ wè, kacuɔnrilɔ pe liɛlɛ lè, tire peli béri káa. 2 Levii saʔa tùlugo gáà gè, kɔrigɔ wè pe mɛ́ pe siinyɛninɛ sunʔɔmɔ nī bèʔ. Yewe wire wī pe kɔrigɔ gè, majo bɛ̀ wi 'ki juu pe mɛ́ wèb.3 «Ki n'gɛ gàa ki bé puu kacuɔnrilɔ pe liʔɛlɛ gèle siɛnnɛ nɛ̄ bèle: yajuʔu ó yajuʔu pe 'kɔ̀n kakuɔrɔ dè, a ki yē nùɔ yo, kire ga laa sìnbuɔ yo, á kire bɛ̀ʔ síkpuɔ yo, pe bé ki fíkɛnyɛ láʔala yè bè kɛn kacuɔnriwɔ mɛ́ wè, nɛ́ ki gbandeliye ní yè, nɛ́ ki fungo ní gè. 4 Muɔ siʔi yaliipelide dè, nɛ́ ɛrɛzɛn luʔɔ pélige nɛ́ wolivi sùnvɔnbɔ pélibe liɛlɛ ní lè, nɛ́ muɔ sìnbaala pe sìnbasiire pélide ní dè dàa muɔ 'kùnu dè, muɔ bé ti kɛn kacuɔnrilɔ mɛ́ bèle. 5 Nɛ́ ki cɛ́n Leviiyé peli Yewe muɔ Kulocɛliɛ wi 'nyíɛnɛ nɛ̀ kɔ̀n saaya tùluyo yi mìɛni nī yè, kire ga buu peri yéri Yewe yiʔɛ mɛ́ gè bèri baara wi míʔɛ nɛ̄ gè, peli nɛ́ pe siimɛ ní bè, lɛ̀lɛ ó lɛ̀lɛ nī.
6 «Dùʔɔ ki bé sí gbɛ̀ nyaa Leviiyé wuu wáà bé yiri kàʔa káà nī Isirayɛli kùlo nī lè gàa nī wi kíni nɛ̀ puu gè, nɛ́ ki cɛ́n ki laa tɔ̀ni yē wi nɛ̄ bè sa tɛ́ni tiʔɛ gíì nī Yewe 'nyíɛnɛ nɛ̀ kɔ̀n gè, 7 wi bé gbɛ̀ kò baa bèri baara kúu dè Yewe wi Kulocɛliɛ míʔɛ nɛ̄ gè, bɛ̀ wi siinyɛninɛ Leviiyé tíɛlɛ bèle, bàli pe yèrí Yewe yiʔɛ mɛ́ gè. 8 Wi béri wi yaliire liɛlɛ tari lè ni- puu nunɔ nɛ́ bìli pe woli ní lè. Nɛ̀ taʔa kire nɛ̄ gè, a wi 'yakaa pári gàa gī wi kɔrigɔ yɛgɛ gè, kire wali míɛni wi bé puu wi wuu.»
Sɔ̀nminɔ siɛnrɛ dè yasunro wori nɛ̄ dè
9 «A muɔ kɛ́nì sɛ́nì jíin kùlo nī lè nàa Yewe muɔ Kulocɛliɛ 'kɛn muɔ mɛ́ lè, muɔ sì yɛli bèri kanabinʔɛnɛ gálì kpínʔini gèle gàli kùlo náà siɛnnɛ piyē nɛ kpínʔini gèleʔ. 10 Siɛn sì yɛli bè nyaa yeli sunʔɔmɔ nī bè ŋàa wi 'wi jaa kire ga laa wi póri le wè kàsun nī bè sun nɛ́ wi ní wèʔc. Siɛn sì yɛli míɛni bè nyaa yeli sunʔɔmɔ nī bè ŋàa wi nyaʔa nɛ nyu bɛ̀ kanyaajuuwo tíɛlɛʔ, ŋàa míɛni wī dàrimiʔɛ cáanwa wèʔ, ŋàa míɛni wī kacɛ́nwɛ wèʔ, nɛ́ ŋàa wī dìɛwɛ wèʔ. 11 Siɛn sì yɛli bè nyaa míɛni ŋàa wi siɛn puu wèʔ, nɛ́ míɛni ŋàa wi nyu nɛ́ gbòdolilo ní nɛ́ ŋàa wi luʔɔ ŋu kúbilo mɛ́ bèleʔ, kire ga laa ŋàa wiī goriyiliwe wèʔd.
12 «Nɛ́ ki cɛ́n Yewe muɔ Kulocɛliɛ wè, a siɛn ó siɛn nɛ kele gàli kpínʔini gèle, kire siɛn wiī wi kanabiɛnnɛ. Kacuʔɔgɔlɔ gálì keli kɛnmɛ nɛ̄ wi 'jo wire bé Kanaa kùlo siɛnnɛ bàli cìra bèle bè yige kùlo nī lè yeli yiʔɛ mɛ́ gè.
13 «Muɔ 'yɛli bè puu tiɛlɛ fùn Yewe muɔ Kulocɛliɛ yiʔɛ mɛ́ gè. 14 Kùlogolo gálì siɛnnɛ yeli bé cìra bè yige wè, peli yē nɛ lúru dìɛlɛ mɛ́ bèle nɛ́ kanyaajuulo ní bèle. Gàa ki 'Yewe muɔ Kulocɛliɛ kúɔ wè, wiì yafiɛn kɛn yeli mɛ́ kire tíɛlɛʔ.»
Sɔ́nminɔ siɛnrɛ dè káfinɛvinɛnɛ siɛnjuulo wori nɛ̄ dè
15 «Gìi sí gī baa gè, siɛnjuuwo wáà Yewe muɔ Kulocɛliɛ bága yige bɛ̀ mi tíɛlɛ yeli siɛnnyɛninɛ sunʔɔmɔ nī bè, wire mɛ́ yeli 'yɛli bèri lúrue. 16 Kire gī gàa yeli cé náari Yewe yeli Kulocɛliɛ mɛ́ wè cɛngɛ gíì yeli 'puu baa gbuʔulo Worɛbi nyagurugo táanni gè, a yeli 'ki juu nɛ́ jo: ‹Weli wè nɛ caa bè ní de Yewe yékpoli lúru lè, Kulocɛliɛ wè, wi- de nyu weli ní mmɛ gèʔ. Weli míɛni wè caa bè ní de kàsunkpuʔɔ gáà nyaʔa gèʔ, nɛ́ ki cɛ́n weli wè nɛ caa bè kùu wīʔf !›
17 «A Yewe sí ki juu m'mɛ́ nɛ́ jo: ‹Gàa pe nyɛ́nì juu gè, kiī kányiʔɛ. 18 Siɛnjuuwo wáà m'bága yige yeli siɛnnyɛninɛ sunʔɔmɔ nī bè, bé sí mi siɛnrɛ le dè wi nyuɔ nī gè, wi béri ki nyu pe mɛ́ gàa ki mìɛni mi 'juu nɛ̀ gbɛ̀ngɛ gè.
19 « ‹A siɛn wáà sí cíi bè mi siɛnrɛ lúʔu dè, dàa siɛnjuuwo wi béri nyu mi míʔɛ nɛ̄ gè, m'bága pa ki siɛn yúgo wè, mi tíimɛ wèg. 20 A siɛnjuuwo wáà sí siɛnrɛ táà juu mi míʔɛ nɛ̄ gè, dàa miì juu nɛ̀ gbɛ̀ngɛ nɛ́ jo wi- ti juu dèʔ, kire ga laa a wàa 'koli nɛ nyu kulocɛliɛ wáà míʔɛ nɛ̄, kire siɛnjuuwo ŋáà wi bé kùu wī.›
21 «Yeli béri yìye yúgo bé jo: ‹Mɛni sí weli bé ki cɛ́n bè síɛ a ki yē siɛnrɛ táà bága yɛ̀ Yewe mɛ́ wè ?› 22 A ki 'nyaa a siɛnjuuwo wi 'siɛnrɛ táà juu nɛ́ jo ti 'kɔ́n Yewe mɛ́ wè, a tiì kɛ́nì kpíʔile dèʔ, ye- ki cɛ́n siɛnrɛ táà dī dàa Yewe sì juu dèʔ. Wiī nɛ kpuʔɔrɔ nyɔ́gi wìi nī wī; ye fǎri fìʔɛ́ wi nɛ̄ʔ !»