17
1 A Misa sí joa: «Muɔ sì yɛli bàga kakuɔrɔ yajuʔu káà kpúu Yewe muɔ Kulocɛliɛ mɛ́ wèʔ gàa ki 'nùɔ kúɔ wè, nɛ́ sìnbuɔ ní wè, nɛ́ síkpuɔ ní wè, gàa gī nɛ́ tiɛkpɔlilɔ láà ní lèʔ, nɛ́ ki cɛ́n kire yē Yewe muɔ Kulocɛliɛ wi kanabiɛnnɛ.2 «Dùʔɔ ki bé sí nyaa Isirayɛli siɛnnɛ sunʔɔmɔ nī bè, kàaya nī yè nyàa Yewe muɔ Kulocɛliɛ wi 'kɛn muɔ mɛ́ wè, nàguɔ wáà á kire bɛ̀ʔ cɛliwɛ wáà 'kaala láà kpíʔile nàa ni 'pii lè Yewe muɔ Kulocɛliɛ yiʔɛ mɛ́ gè, ŋàa wi 'cíi Yewe wi nyakungɛngɛ nɛ̄ gè.
3 «Dùʔɔ ki bé sí ga sa nyaa siɛn wáà nɛ waa nɛ baara kulocɛlɛlɛ pálì mɛ́ nɛ káguro cáanri pe yiʔɛ mɛ́ gè nɛ pe sungu, nɛ cɛngɛ nɛ́ yege nɛ́ ŋɔgɔlɔ sungu gèle dàa dī nyìʔɛnɛ nī lè, nɛ́ cíi mi siɛnrɛ nɛ̄ dè dàa mi 'juu nɛ̀ gbɛ̀ngɛ dè. 4 A pe kɛ́nì pɛ́nì ti juu muɔ mɛ́ dè, á muɔ 'ti lúʔu pe ti nyu dè, muɔ 'yɛli bè ki sɔ́migɔ caa bè ki siʔɛ wéli a ki yē kányiʔɛ gī gè, ki kaala ni 'kpíʔile lè, kanabiɛnnɛ náà ni nyɛ́nì kpíʔile Isirayɛli kùlo nī lè. 5 A ki 'nyaa mmɛ gè, muɔ bé siɛn kɔ́ri wè bè kɛ́ kàʔa wìile mɛ́ lè, nàguɔ wī yo, cɛliwɛ wī yo, wire ŋáà wi 'kapiile náà kpíʔile lèb. Kire nàguɔ wè, kire ga laa ki cɛliwɛ wè, pe bé ki siɛn wáa wè bè kpúu.
6 «Siɛn ŋáà nɛ̄ pe tíri wè, piyě gbɛ̀ wi kpúuʔ ka laa kinyaafɔlilɔ siin kire ga laa taanri sì tàa juu ti nīʔ. Siɛn nigbe siɛnjuuro sǐ gbɛ̀ ki nyuɔʔc. 7 Kinyaafɔlilɔ peli kiyɛ yire yi bé yɛ̀ siɛnpelile bèle wi kúrugu, dí siɛnsɛnminɛ pe kiyɛ yi nɛ́ fàri pe nɛ̄ bè wi kpúu. Bɛ̀ ki bé kpíʔile dí yeli bé kapiʔi yige gè Isirayɛli sunʔɔmɔ nī bèd.
8 «A kaala láà sí pɛ́nì kpíʔile nàa ni 'gbɛ̀n bè ni kàyuʔu juu gè nàa nī siɛnkpuuwoli lè, siɛn wi 'ki kɔ̀rirɔ wī yo á kire bɛ̀ʔ wiì ki kɔ̀rirɔ wī yoʔ, kire ga laa nàa nī kàyuugo woli lè á kire bɛ̀ʔ yakaa cúʔɔ woli lè, kire ga laa nàa nī siɛn kpúɔn nɛ̀ luɔ woli lè, kire ga laa yɛgɛ ó yɛgɛ gàa nɛ̄ kàyuʔu 'yɛli bè juu gè bè ki juu yeli kàʔa nàkpanʔa wìile nī lè, yeli bé kɛ́ tiʔɛ mɛ́ gè gàa Yewe muɔ Kulocɛliɛ 'nyíɛnɛ nɛ̀ kɔ̀n gè. 9 Muɔ bé sa ki juu kacuɔnrilɔ mɛ́ bèle, bàli bīɛlɛ Leviiyé bèle, nɛ́ kàyuʔujuuwo ní wè ŋàa wi bé puu de baara kire cɛnyɛ nī yè. Pe bé ki kàyuʔu juu gè.
10 «Muɔ bé tánʔa bè yɛli nɛ́ dàa ní pe 'juu nɛ̀ ceri dè, kire tiʔɛ nī gè gàa Yewe 'nyíɛnɛ nɛ̀ kɔ̀n gè. Muɔ bé ki sɔ́migɔ kpíʔile bè yɛli nɛ́ dàa ní pe 'juu dè. 11 Muɔ bé yéri ki nɛ̄ dàa pe 'juu nɛ̀ tìɛ muɔ nɛ̄ fànʔa kajuʔulo wori dè, nɛ́ pe kàyuʔujuuro ní dè. Muɔ̌ ga tíi wàli kàliige mɛ́ nɛ́ kàmɛgɛ mɛ́ʔ bè cíi pe siɛnrɛ nɛ̄ dèʔ dàa pe 'juu nɛ̀ tìɛ muɔ nɛ̄ dèʔ.
12 «A siɛn wáà 'cíi wi nìɛnyiɛnigɛ kire kɛnmɛ nɛ̄, wiì lúʔuʔ kacuɔnriwɔ mɛ́ wèʔ ŋàa wiī nɛ Yewe muɔ Kulocɛliɛ baara kúu dèʔ á kire bɛ̀ʔ kàyuʔujuuwo wèʔ, kire siɛn ŋáà wè muɔ bé wi kpúu wī. Bɛ̀ ki bé kpíʔile dí muɔ bé kapiʔi yige gè Isirayɛli sunʔɔmɔ nī bè. 13 Siɛnnɛ pe mìɛni bé ti lúʔu bé sí de fìʔɛ́; piyě ní de nìɛnyiɛnigɛ kele kpínʔini gèleʔ.»
Kùlofɔli tɛ́ngɛ kele gèle
14 «Muɔ Isirayɛli wèe, a muɔ kɛ́nì jíin kùlo nī lè nàa Yewe muɔ Kulocɛliɛ wi 'kɛn muɔ mɛ́ lè, a muɔ 'ni líɛ a ni 'kò muɔ woli lè nɛ́ tɛ́ni baa ni nī lè, a muɔ kɛ́nì ki juu nɛ́ jo: ‹Mi nɛ caa bè kùlofɔli tɛ́ngɛ nìɛ mɛ́, majo bɛ̀ kùlogolo sɛngɛlɛ tíɛlɛ gèle gàli ke 'mi màʔa gèlef,› 15 muɔ bé gbɛ̀ kùlofɔli tɛ́ngɛ wè ŋàa Yewe muɔ Kulocɛliɛ 'nyíɛnɛ nɛ̀ kɔ̀n wèg. Wi sí yɛli wi- puu ŋàa wi 'kɔ́n Isirayɛliyé sunʔɔmɔ nī bè. Muɔ sǐ gbɛ̀ wàa tɛ́ngɛ mìɛ nɛ̄ ŋàa wī nabɔnwɔ wèʔ, ŋàa wi wè Isirayɛli siɛn wèʔ.
16 «Gìi sí gī baa gè, wiì yɛli wi- puu suɔnyɔ ní nyàa yi 'niʔɛ yèʔ. Wi míɛni fǎga de caa bè siɛnnɛ kɔ́ri bèle bè kɛ́ Ezipiti kùlo mɛ́ lèʔ bè sa suɔnniʔɛrɛ caaʔ, nɛ́ ki cɛ́n Yewe nyɛ́nì ki juu yeli mɛ́ nɛ́ jo yeli sǐ ga tíi koli bè kɛ́ kire koligo nī gèʔ ! 17 Wi fǎga cɛlilɛ líɛ nìʔɛnɛʔ, kire ga buu wi fungo ki fǎga pùunniʔ. Wi fǎga de walifiiwe nìʔɛwɛ caa nɛ́ tiɛ nìʔɛwɛ níʔ wire tíimɛ wuuʔh.
18 «A wi kɛ́nì tɛ́ni wi kùlofɔlilɔ kácunʔɔ nɛ̄ gè, wi bé sa kire Fànʔa Kajuʔulo Sɛbɛ suɔ wè Leviiyé mɛ́ bèle, peli bálì bīɛlɛ kacuɔnrilɔ bèle. Wi bé ba wi siɛnrɛ wéli dè bé ti sɛbɛ sɛbɛkuruwo nī. 19 Wi bé sɛbɛ ŋáà tɛ́ngɛ wè wìi táanni, bèri wi wéli túɔntuɔn wi sìi cɛnyɛ yi mìɛni nī yè, bè tɛnmɛnɛ taa bèri Yewe wi Kulocɛliɛ fìʔɛ́ wè, bé míɛni de sɔ́migi de tári Fànʔa Siɛnrɛ dáà ti mìɛni nɛ̄ dè, nɛ́ ti fànʔa kele ke mìɛni ní gèle.
20 «Bà sí ki bé kpíʔile dí fungbuʔɔ fǎga jíin wi nīʔ wi- wìi kpúʔɔ bè tóri wi siɛnnyɛninɛ nɛ̄ bèleʔ. Wi fǎga sí wàli kàliige mɛ́ nɛ́ kàmɛgɛ mɛ́ kajuudiʔɛlɛ gálì nɛ̄ gèleʔ, kire ga buu wire tíimɛ sìi wi- tɔni, wire nɛ́ wi siimɛ ní bè, wi kùlofɔligɔ nɛ̄ gè Isirayɛli kùlo nī lè.»