Torimakiyaʔa Fundaanra kajuudiʔɛlɛ gèle
16
1 A Misa sí joa: «Yaliipurudo yege nī gèb, muɔ 'yɛli bè Torimakiyaʔa Fundaanra kpíʔile dè, bè Yewe muɔ Kulocɛliɛ gbùʔɔrɔ wè. Nɛ́ ki cɛ́n Yaliipurudo yege kire nī Yewe muɔ Kulocɛliɛ wi 'muɔ yige Ezipiti kùlo nī lè, pìlige nī gè.2 «Muɔ bé Torimakiyaʔa kakuɔrɔ yajuuro kpúu dè Yewe muɔ Kulocɛliɛ mɛ́ wè, dàa muɔ 'kɔ̀n muɔ nɛ̀togo nī gè nɛ́ sìnbatogo nī gè nɛ́ síkatogo ní gè. Muɔ bé fundaanra kpíʔile dè tiʔɛ gáà nī Yewe nyɛ́nì nyíɛnɛ nɛ̀ kɔ̀n gè bè ki kpíʔile wire míʔɛ ki kòridiʔɛ gè. 3 Muɔ sì yɛli bè ti káa nɛ́ sìnvari búru níʔ. Cɛnyɛ kɔlisiin sunʔɔmɔ nī bè, muɔ bé búru káa wè sìnvarifun wuu wè, wire ŋáà wī fuunmɔ búru wè, nɛ́ ki cɛ́n muɔ 'fìɛlɛ nɛ̀ yiri wī Ezipiti kùlo nī lè. Kire bé ki yaʔa muɔ 'yɛli bèri sɔ̀ngí de taʔa muɔ sìi cɛnyɛ yi mìɛni nī kɛnmɛ bíì nɛ̄ muɔ 'yiri Ezipiti kùlo nī lè. 4 Cɛnyɛ kɔlisiin nyáà nī yè, kiì yɛli pe- sìnvari nyaa muɔ kòridiʔɛ káà nī kùlo nī lèʔ. Cɛnbelige cɛnguʔɔ kakuɔrɔ kaara dè, tàa sì yɛli bè súɔnʔ.
5 «Muɔ sǐ gbɛ̀ Torimakiyaʔa kakuɔrɔ yajuʔu kpúu gèʔ kàʔa gáà ki kàa nī gàa Yewe muɔ Kulocɛliɛ wi nyɛ́nì kɛn muɔ mɛ́ gèʔ, 6 fúɔ tiʔɛ gáà nī Yewe nyɛ́nì nyíɛnɛ nɛ̀ kɔ̀n bè ki kpíʔile wire míʔɛ ki kòridiʔɛ gè. Kire tiʔɛ kire yákuɔ nī muɔ bé gbɛ̀ Torimakiyaʔa kakuɔrɔ yajuʔu kpúu gèc, cɛngɛnyɛnijiin lɛ̀lɛ nī lè. Kire lɛ̀lɛ lire nī muɔ 'yiri Ezipiti kùlo nī lè. 7 Muɔ bé ti suʔɔ bè ti káa tiʔɛ gáà nī Yewe muɔ Kulocɛliɛ nyɛ́nì nyíɛnɛ nɛ̀ kɔ̀n gè. Ki sínbinimɛ táanni bè, muɔ bé koli bè jíin muɔ bùguro nī dè.
8 «Cɛnyɛ kɔlini nī yè, muɔ béri sìnvarifun búru káa wè. Kɔlisiinwuʔu nɛ̄ gè, yeli bé pínɛ bè gbuʔulo bè Yewe yeli Kulocɛliɛ gbùʔɔrɔ wè. Muɔ sì yɛli bè baapile nigbe kúɔ kire cɛngɛ gèʔ.»
Cégbuʔulo Fundaanra tánʔagbuɔlɔ kajuudiʔɛlɛ gèle
9 «Muɔ bé cégbuʔulo kɔlisiin tɔ́ri bè ki líɛ cɛngɛ gíì pe 'séli nɛ yaliire nyɔ́gi dè. 10 Bà muɔ bé Cégbuʔulo Fundaanra tánʔagbuɔlɔd kpíʔile lè Yewe muɔ Kulocɛliɛ mɛ́ wèe. Kinɛdɛnigɛ yakɔnrɔ dáà muɔ bé kɛn dè, muɔ bé ti kɔ̀n bè yɛli nɛ́ muɔ taagɛnmɛ ní bè, nɛ̀ yɛli nɛ́ kɛnmɛ báà ní Yewe muɔ Kulocɛliɛ wi nyɛ́nì diba taʔa wè muɔ nɛ̄.
11 «Baa tiʔɛ gáà nī Yewe nyɛ́nì nyíɛnɛ nɛ̀ kɔ̀n bè ki kpíʔile wi míʔɛ ki kòridiʔɛ gè, muɔ bé puu fundaanra nɛ̄ dè Yewe muɔ Kulocɛliɛ yiʔɛ mɛ́ gè, nɛ́ muɔ jaa ní wè, nɛ́ muɔ póri ní wè, nɛ́ muɔ baakuɔwɔ ŋáà wī nàguɔ wè nɛ́ ŋàa wī cɛliwɛ wè, nɛ́ Leviiyé siɛn ŋáà wī tɛ́niwɛ muɔ kàʔa nī gè, nɛ́ nabɔnwɔ ní wè, nɛ́ círiwe ní wè, nɛ́ lakicuɔ ní wè, bàli bīɛlɛ tɛ́ninɛ yeli sunʔɔmɔ nī bè. 12 Sɔ̀ngi ma taa ma ki cɛ́n muɔ 'puu sùkulowo Ezipiti kùlo nī lè. Ma sí fànʔa kele gálì sɔ́migɔ gèle ma cò mari ke kpínʔini.»
Kpátaapigele Fundaanra tánʔagbuɔlɔ kajuudiʔɛlɛ gèle
13 «Lɛ̀lɛ líì nī muɔ kɛ́nì yaliire sɛ̀n dè nɛ̀ kúɔ nɛ́ ɛrɛzɛn fórigo wè nɛ̀ kúɔ wè, muɔ 'yɛli bè tánʔagbuɔlɔ tánʔa bè Kpátaapigele Fundaanra kpíʔile cɛnyɛ kɔlisiin sunʔɔmɔ nī bèf. 14 Muɔ 'yɛli bè puu fundaanra nɛ̄ kire lɛ̀lɛ nī lè, nɛ́ muɔ jaa ní wè, nɛ́ muɔ póri ní wè, nɛ́ muɔ baakuɔwɔ ŋáà wī nàguɔ wè nɛ́ ŋàa wī cɛliwɛ wè, nɛ́ Leviiyé siɛn, nɛ́ nabɔnwɔ ní wè, nɛ́ círiwe ní wè, nɛ́ lakicuɔ ní wè, bàli bīɛlɛ tɛ́ninɛ muɔ kàʔa nī gè.
15 «Tiʔɛ gáà nī Yewe muɔ Kulocɛliɛ nyɛ́nì nyíɛnɛ nɛ̀ kɔ̀n gè, muɔ bé ki fundaanra kpíʔile dè cɛnyɛ kɔlisiin Yewe muɔ Kulocɛliɛ mɛ́ wè, bɛ̀ wi bága diba taʔa wè muɔ siʔi nɛ̄ gè bè yaliire yaʔa dè ti- nyuɔ, nɛ́ muɔ kɔli baara ti mìɛni nɛ̄ dè, bà muɔ bé sɔ́migɔ bè puu fundaanra nɛ̄ dè.
16 «Tɔliyɔ taanri yiɛlɛ nī lè, nàguɔlɔ pe mìɛni bé kɛ́ Yewe yeli Kulocɛliɛ yiʔɛ mɛ́ gè, tiʔɛ gáà nī wi 'nyíɛnɛ nɛ̀ kɔ̀n gè: Sìnvarifun Búru Fundaanra tánʔagbuɔlɔ lɛ̀lɛ nī lè, nɛ́ Cégbuʔulo Fundaanra tánʔagbuɔlɔg lɛ̀lɛ nī lè, nɛ́ Kpátaapigele Fundaanra tánʔagbuɔlɔh lɛ̀lɛ nī lè.
«Siɛn sì yɛli bè kɛ́ Yewe yiʔɛ mɛ́ kiyɛ ní yè waayaʔ. 17 Siɛn ó siɛn bé kɛn bè yɛli nɛ́ wi taagɛnmɛ ní bè, nɛ̀ yɛli nɛ́ kɛnmɛ báà ní Yewe yeli Kulocɛliɛ wi nyɛ́nì diba taʔa wè wi nɛ̄ wè.»
Fànʔa kele gálì ke nyu sínmɛ wori nɛ̄ dè
18 «Kàaya nyáà Yewe muɔ Kulocɛliɛ wi 'kɛn muɔ mɛ́ yè, muɔ bé kàyuʔujuulo tɛ́ngɛ yi nī nɛ́ siɛnkpolilo ní bèle, saʔa tùlugo ó saʔa tùlugo nī, peri siɛnnɛ kàyuʔu nyu gè nɛ́ sínmɛ ní. 19 Muɔ sì yɛli bè kàyuʔu juu gè nɛ́ kolimɔ níʔ. Muɔ sì yɛli bè siɛn yiʔɛ wéliʔ, muɔ míɛni sì yɛli bè yakaa nùʔɔrɔ bè suɔ siɛn mɛ́ʔ, nɛ́ ki cɛ́n yanuʔɔzuɔrɔ dè tiī nɛ siɛnsiciliwe kpínʔini wè fúɔn, níɛ kanasingbiʔiliwe wi kele córi gèle. 20 Nɛ́ ki cɛ́n sínmɛ bè, sínmɛ pire yákuɔ nɛ̄ muɔ 'yɛli bè taʔa kire ga buu muɔ- kò sìi nɛ̄ bé sí kùlo líɛ lè nàa Yewe muɔ Kulocɛliɛ wi 'kɛn muɔ mɛ́ lè.