Fuɔrɔ Yaʔa yiɛlɛ kajuudiʔɛlɛ gèle
15
1 A Misa sí joa: «Yiʔɛlɛ kɔlisiin ó yiʔɛlɛ kɔlisiin kúɔmɔ mɛ́ bè, muɔ bé fuɔrɔ yaʔa dè. 2 Ki n'gɛ kɛnmɛ báà pire nɛ̄ muɔ bé ki kpíʔile: a pe kɛ́nì Yewe Fuɔrɔ Yaʔa yiɛlɛ wuʔu juu gè, siɛn ó siɛn wi 'wali fuʔɔ kún wi siɛnnyɛni mɛ́ wè, fuʔɔfɔli wi 'yɛli bè ki yaʔa wi nɛ̄, wi fǎga fuʔɔ sàri gèʔ. Wiì yɛli bè wi siɛnnyɛni wáà còʔ ŋàa wī Isirayɛli wuu wèʔ wi- wi fuʔɔ sàri gèʔ. 3 Nabɔnwɔ wire muɔ bé gbɛ̀ cò wi- wi fuʔɔ sàri gè. Fuʔɔ gáà muɔ 'le muɔ siɛnnyɛni nɛ̄ wè ŋàa wī Isirayɛli wuu wè, muɔ 'yɛli bè kire yaʔab.4 «Gìi sí gī baa gè, fɔ̀ngɔfɔli sì yɛli bè nyaa yeli sunʔɔmɔ nīʔ, nɛ́ ki cɛ́n kiī cɛ́nyaʔaga Yewe muɔ Kulocɛliɛ wi bága diba taʔa wè kùlo nɛ̄ lè nàa wi 'kɛn muɔ mɛ́ lè kɔrigɔ gè, kire ga buu muɔ- ni líɛ muɔ woli.
5 «Gìi ki 'kpúʔɔ gè, muɔ 'yɛli bèri lúru Yewe muɔ Kulocɛliɛ mɛ́ wè, ma sí fɔ̀li mari wi kajuudiʔɛlɛ kpínʔini gèle gàli mi 'juu nɛ̀ gbɛ̀ngɛ muɔ mɛ́ pàngɛ gè. 6 Nɛ́ ki cɛ́n Yewe muɔ Kulocɛliɛ wi bága diba taʔa wè muɔ nɛ̄ majo bɛ̀ wi 'ki juu gè. Muɔ béri fuɔrɔ nii kùlogolo sáamɛ nɛ̄, nɛ̀ ki yaʔa muɔ sǐ ga fuʔɔ kún wàa mɛ́ʔ; muɔ bé fànʔa taa kùlogolo sáamɛ nɛ̄, nɛ̀ ki yaʔa peli sǐ gbɛ̀ muɔ jáaʔ.
7 «A ki 'nyaa fɔ̀ngɔfɔli yē baa muɔ mɛ́ wè, ŋàa wī muɔ siɛnnyɛni muɔ kàʔa káà nī gè kùlo nī lè nàa Yewe muɔ Kulocɛliɛ wi 'kɛn muɔ mɛ́ lè, muɔ sì yɛli bè muɔ fungo gbɛ̀n gè wi kɔli mɛ́ gèʔ, muɔ sì yɛli míɛni bè muɔ kɔli pàanni gè muɔ siɛnnyɛni kɔli mɛ́ ŋàa wī fɔ̀ngɔfɔli wèʔ. 8 Nɛ̀ sí ki yaʔa muɔ 'yɛli bè muɔ kɔli sáʔa gè wi mɛ́ bè fuʔɔ le wi nɛ̄ gàa ki bé tí wi- wi kele cuɔnri gèlec. 9 Mìɛ sɔ́migɔ ma cò díɛʔ, ma fǎga ki yaʔa sɔ̀ngibiire jíin muɔ fungo nī gèʔ dí muɔ sí jo: ‹Ki 'kò cɛ̀ri dí yiʔɛlɛ kɔlisiinwoli ni sí nɔ̀, Fuɔrɔ Yaʔa lɛ̀lɛ lè,› bé sí muɔ fungo gbɛ̀n gè muɔ siɛnnyɛni kɔli mɛ́ gè ŋàa wī fɔ̀ngɔfɔli wè, bé cíi muɔ fǎga yakaa kɛn wi mɛ́ wèʔ. A ki sí nyaa bɛ̀ gè, wi bé kòkuulo wáa Yewe mɛ́ wè muɔ wuʔu nɛ̄ gè; kire bé puu kapiile náà muɔ 'kpíʔile lè. 10 Ki 'yɛli muɔ- wi kɛn nɛ́ funjɛ̀ngɛ ní; kiì yɛli muɔ- wi kɛn nɛ́ kitaalaʔanɛnɛ fungo ní. Muɔ funjɛ̀ngɛ kɛnmɛ nɛ̄ bè, Yewe muɔ Kulocɛliɛ wi bé diba taʔa wè muɔ nɛ̄, nɛ́ muɔ baara ti mìɛni ní nɛ́ muɔ kɔli kakpiʔiligele ke mìɛni ní.
11 «Bɛ̀ sí ki 'nyaa fɔ̀ngɔfɔlilɔ piyě je ga kúɔ muɔ kùlo nī lèʔ, kire nɛ̄ m'bé dàa juu dè gbɛ̀ngɛ muɔ mɛ́: muɔ bé muɔ kɔli sɔ́migɔ bè sáʔa muɔ siɛnnyɛni mɛ́ wè ŋàa wī Isirayɛli wuu wè, ŋàa wi wuʔɔ nɛ́ ní fɔ̀ngɔfɔli wè muɔ kùlo nī lèd.»
Isirayɛliyé sùkulolo yaʔa wori kajuudiʔɛlɛ gèle
12 «A ki sí nyaa muɔ siɛnnyɛni Eburu wáà pɛ́nì wìi pári muɔ mɛ́ wè, a wi yē nàguɔ kire ga laa cɛliwɛ, wi bé baara muɔ mɛ́ yiʔɛlɛ kɔlini; kɔlisiinwoli nɛ̄ lè ma sí wi yaʔa wìimɛ, wi- yiri muɔ tiʔɛ nī gèe. 13 A muɔ sí kɛ́nì wi yaʔa wìimɛ wè, muɔ sì yɛli bè wi yaʔa wi- kɛ́ nɛ́ kiyɛ ní yè waayaʔ. 14 Muɔ bé wi tugo nɛ́ yɛrɛ nìʔɛrɛ ní dè dàa Yewe muɔ Kulocɛliɛ wi 'kɛn muɔ mɛ́ dè bɛ̀ wi 'diba taʔa wè muɔ nɛ̄ wè: sìnbaara, síkaala, yaliire nɛ́ diviɛn ní wè. 15 Muɔ sí yɛli bè sɔ̀ngi daa bè ki cɛ́n muɔ 'puu sùkulowo Ezipiti kùlo nī lè, á Yewe muɔ Kulocɛliɛ wi 'muɔ suɔ nɛ̀ yige baa. Kire kɛnmɛ nɛ̄ mi 'kele gálì juu gèle nɛ̀ gbɛ̀ngɛ muɔ mɛ́ pàngɛ gè.
16 «A ki sí nyaa sùkulowo wire wi 'ki juu nɛ́ jo: ‹Miì je yiriʔ muɔ tiʔɛ nī gèʔ,› nɛ́ ki cɛ́n muɔ kaala ni 'wi dɛ́ni wè nɛ́ muɔ saʔa wuulo ní bèle, a ki yē wiī fundaanra nɛ̄ muɔ tiʔɛ nī gè, 17 kire nɛ̄ muɔ bé wi yérige muɔ saʔa wìile kpàteliye nɛ̄ yè, bé wi nyùgo télige gè wìile nɛ̄ lè, bé sí kóriwo líɛ wè bè wi ngbóli fùru lè. A kire 'kpíʔile gè, wi bé kò muɔ wuu súurif. A ki yē wiī cɛliwɛ wè, bɛ̀ muɔ bé ki kpíʔile míɛni wi nɛ̄.
18 «Fǎga ki nyaa gbɛ̀ligɛ bè wi yaʔa wi- yiri muɔ tiʔɛ nī gèʔ, nɛ́ ki cɛ́n bɛ̀ wi 'baara muɔ mɛ́ yiʔɛlɛ kɔlini gèle, wi nyɛ́nì tɔ̀ni feliye siin nyɔ́gɔ muɔ mɛ́ nɛ̀ tóri siɛn ŋáà nɛ̄ muɔ nɛ sàrí wè. Bà Yewe muɔ Kulocɛliɛ wi bé diba taʔa wè muɔ kakpiʔiligele ke mìɛni nɛ̄.»
Yajuuro pìpelile kajuudiʔɛlɛ gèle
19 «Yajuuro pìpelile bálì pe bé sii muɔ nɛ̀duuyo nɛ́ muɔ sìnbaduuyo nɛ́ muɔ síkaduuyo nī yè, muɔ bé ti mìɛni wàli dɛ́ngɛ Yewe muɔ Kulocɛliɛ mɛ́ wè. Muɔ sì yɛli bè baara nɛ́ nùɔ wi pìpeliwe ní wè muɔ siʔi nī gèʔ; muɔ míɛni sì yɛli bè sìnbuɔ nɛ́ síkpuɔ wi pìpeliwe síire kùnu dèʔg. 20 Yewe muɔ Kulocɛliɛ wire yiʔɛ mɛ́ muɔ 'yɛli bè ti kpúu bè káa yiɛlɛ ó yiɛlɛ, muɔ nɛ́ muɔ saʔa wuulo ní bèle, tiʔɛ gíì nī Yewe muɔ Kulocɛliɛ wi bé nyíɛnɛ gɔ̀n gèh.
21 «ʔún ! A ki sí nyaa yajuʔu káà yē kpɔligɔ gè, a ki tári nɛ sìʔi gè, á kire bɛ̀ʔ gè a ki 'fùn gè, a ki 'nyaa a kiī kpɔligɔ nɛ̀ pii gè, muɔ sǐ gbɛ̀ ki kpúu bè kakuɔrɔ kpíʔile Yewe muɔ Kulocɛliɛ mɛ́ wèʔ. 22 Muɔ bé gbɛ̀ jáa bè yajuuro dáà kpúu dè bè káa tiʔɛ gíì nī muɔ yē tɛ́niwɛ wè. Siɛn ó siɛn bé gbɛ̀ ti káa, a wi cɛni yē núʔɔwɔ Yewe yiʔɛ mɛ́ yo, a wi cɛni yē siɛnciiliwe yo, wi bé gbɛ̀ ti káa, majo bɛ̀ yeli 'dàli nɛ nyàʔayɛrɛ kaara káa dè, wóliwo kaara dè nɛ́ sùɔ kaara ní dè. 23 Gìi sí gī baa gè, muɔ sì yɛli bè ti sìsiɛn káa gèʔ; muɔ bé ki wo dàala nɛ̄ lè bɛ̀ luʔɔ tíɛlɛi.»