Misa wi 'Isirayɛliyé yafunro wori juu dè
14
1 A Misa 'ki juu siɛnnɛ mɛ́ bèle nɛ́ jo:a «Yeli yē pìile Yewe yeli Kulocɛliɛ mɛ́ wè. Kire nɛ̄, a wàa 'kùu wè, yeli sì yɛli bè jérigele kpúɔn yeli céri nɛ̄ dèʔ. Yeli míɛni sì yɛli bè yeli gbɛlɛ yiʔɛmɛ nzìire kùnu dèʔb. 2 Nɛ́ ki cɛ́n yeli yē siɛnfelige gáà Yewe yeli Kulocɛliɛ wi 'wàli nɛ̀ tɛ́ngɛ gè wire wuʔu. Yeli bīɛlɛ Yewe yeli Kulocɛliɛ wi 'nyíɛnɛ nɛ̀ kɔ̀n yeli- kò wire tíimɛ siɛnfelige gáà wuʔu ki 'kpúʔɔ wi mɛ́ gè, gàa gī wi wuʔu gè siɛnsɛnminɛ pe mìɛni sunʔɔmɔ nī bè dàala nɛ̄ lèc.3 «Yeli sǐ ga tíi yafiɛn káa gàa gī yafungo gèʔd. 4 Yajuuro ti n'dɛ dàa yeli bé gbɛ̀ káa dè: nùɔ wè, sìnbuɔ wè, nɛ́ síkpuɔ ní wè. 5 Nyàʔayɛrɛ ti n'dɛ dàa muɔ bé gbɛ̀ káa dè: sùɔ wè, wóliwo wè, daagbiɛ wè, nyàʔa síkpuɔ wè, sàcolo lè, kàfaaŋɔnigɔ gè, nɛ́ nyàʔa sìnbuɔ ní wèe. 6 Yajuʔu ó yajuʔu gáà gī nɛ́ fèriye ní yè wáliyɛ yè, níɛ yaliire núru dè nɛ káa dè, yeli bé gbɛ̀ tire káa.
7 «Tire dáà ti núru nɛ káa dè, nɛ̀ ki yaʔa ti fèriye yiì wàligí yèʔ, tire yē núʔɔrɔ yeli mɛ́ Yewe yiʔɛ mɛ́ gè. Bɛ̀ sí ki yē gè, yeli sǐ gbɛ̀ dàa káa dèʔ: nyuʔɔmɔ wè, pòli wè, nɛ́ kàgbelige ní gè. 8 Nɛ́ míɛni, tiɛligɛ kire yē yajuʔu káà gàa ki 'núʔɔ gè. Ki fèriye yī wàligí, nɛ̀ ki yaʔa ki wè núru nɛ káaʔ. Yeli sì yɛli bè ti kaara káa dèʔ, yeli míɛni sì yɛli bè cò daa ti wokuugo káà nɛ̄ʔ.
9 «Dàa dī luʔɔ nī gè, yeli bé gbɛ̀ri ti mìɛni káa dàa dī nɛ́ jìɛnyɛ ní yè nɛ́ koriyo ní yè. 10 Nɛ̀ ki yaʔa yeli sǐ ga tíi dàa káa dèʔ dàa nɛ̄ jìɛnyɛ nɛ́ koriyo wè ti nɛ̄ dèʔ. Tire yē dàa ti 'núʔɔ dè Yewe yiʔɛ mɛ́ gè.
11 «Sínjiɛnrɛ dáà dī cìilide dè, yeli bé gbɛ̀ri tire káa. 12 Sínjiɛnyɛ yáà sí yē baa nyàa yeli sǐ gbɛ̀ri káa yèʔ: kàgbɛni wè, dìbagɛ gè, nyùɔwɔ wèf, 13 dìfira wè, wɔ̀kɔngɔ gè nɛ́ ki feliye ní yè, 14 dìbawuɔlɔ lè nɛ́ ni feliye ní yè, 15 kànasuʔulo wè, gìdege gè, fúɔkɔlilɔ lè, gànviɛlɛ lè nɛ́ ni feliye ní yè, 16 gbòdofinige gè, sàtorigo gè, nɛ́ gìdefiige ní gè, 17 luʔɔ nyápɔrigɔ gè, dìbawuʔɔ gè, nɛ́ nyápɔrikpele ní lè, 18 fúɔkɔligɔ gè, gbìile nɛ́ wi feliye ní yè, gòtunɔpɔrɔ dè, nɛ́ dírige ní gè.
19 «Yafiniyirigele ke mìɛni gàli ke yē nìʔɛgɛlɛ níɛ fini nɛ mári gèle, keli yē núʔɔgɔlɔ yeli mɛ́ Yewe yiʔɛ mɛ́ gè. Yeli sǐ ga tíi ke káaʔ. 20 Nɛ̀ sí ki yaʔa yafinide dáà dī cìilide dè Yewe yiʔɛ mɛ́ gè, tire yeli béri káag.
21 «Yeli sǐ gbɛ̀ yawiʔi káa gàa ki 'kùu gèʔ. Muɔ bé ki kɛn nabɔnwɔ mɛ́ wè ŋàa wī yeli kàaya nī yè, á kire bɛ̀ʔ, muɔ bé ki pári nabɔnwɔ mɛ́ ŋàa wi tòrí wè. Nɛ́ ki cɛ́n muɔ yē siɛnfelige káà gàa Yewe yeli Kulocɛliɛ wi 'wàli nɛ̀ tɛ́ngɛ gè wire wuʔu gè.
«Muɔ sì yɛli bè síkapile ni yàa yírimɛ líɛ bè, bè ni suʔɔ nɛ́ pi níʔh.»
Mari kiɛkiɛwuʔulo kɔ̀ngí gèle
22 «Yiɛlɛ ó yiɛlɛ muɔ 'yɛli bè kiɛkiɛwuʔulo kɔ̀n gèle, Kulocɛliɛ liɛlɛ lè, muɔ siʔi yaliire ti mìɛni nī dè. 23 Muɔ bé kɛ́ tiʔɛ gáà nī Yewe muɔ Kulocɛliɛ wi 'nyíɛnɛ nɛ̀ kɔ̀n bè ki kpíʔile wire míʔɛ ki kòridiʔɛ gè. Baa muɔ bé lìigbuɔlɔ suro lìi dáà dī muɔ kiɛkiɛwuʔulo yakɔnrɔ dè: yaliire dè, nɛ́ ɛrɛzɛn luʔɔ ní gè, nɛ́ wolivi sùnmɔ ní bè bàa bī fɔnbɔ bè, nɛ́ yeli nìɛyɛ pìpelile ní bèle, nɛ́ sìnbaala nɛ́ síkaala pe pìpelile ní bèle. Bɛ̀ ki bé kpíʔile dí muɔ sí tɛnmɛnɛ taa bèri fìʔɛ́ Yewe muɔ Kulocɛliɛ nɛ̄ wè cɛngɛ ó cɛngɛi.
24 «Dùʔɔ ki bé gbɛ̀ nyaa tiʔɛ gáà Yewe muɔ Kulocɛliɛ wi 'nyíɛnɛ nɛ̀ kɔ̀n gè nɛ́ wi míʔɛ taʔa gè ki nɛ̄ wè, ki bé líili bè tóri muɔ nɛ̄ bè kiɛkiɛwuʔulo tugo gèle bè kɛ́ baa, nɛ́ ki cɛ́n Yewe muɔ Kulocɛliɛ wi nyɛ́nì diba taʔa wè muɔ nɛ̄ nɛ́ yaliiniʔɛrɛ kɛn muɔ mɛ́. 25 A ki sí nyaa bɛ̀ gè, muɔ bé kiɛkiɛwuʔulo yakɔnrɔ pári dè, bé sí wali cò wè muɔ kɔli nī gè bè kɛ́ tiʔɛ mɛ́ gè gàa Yewe muɔ Kulocɛliɛ wi 'nyíɛnɛ nɛ̀ kɔ̀n gè. 26 Baa kire tiʔɛ nī gè, muɔ bé yɛrɛ ti mìɛni suɔ dàa muɔ nɛ caa dè: nìɛyɛ yè, sìnbaara dè nɛ́ síkaala ní bèle, diviɛn ní wè nɛ́ sunmɔ ní bè. Muɔ bé ti mìɛni suɔ dàa ti 'muɔ dɛ́ni dè. Baa Yewe muɔ Kulocɛliɛ yiʔɛ mɛ́ gè muɔ bé lìi bè gbuɔ bè puu fundaanra nɛ̄ nɛ́ muɔ saʔa wuulo ní bèle.
27 «Gàa ki 'Leviiyé siɛnnɛ kúɔ bèle, peli bálì pe bé puu tɛ́ninɛ muɔ kàʔa nī gè, bàli mɛ́ dàala yafiɛn wè pe mɛ́ kɔrigɔʔ yeli sunʔɔmɔ nī bèʔ, muɔ sì yɛli bàga fìʔɛ nɛ́ pe ní díɛʔ.
28 «Yiʔɛlɛ taanriwoli ó taanriwoli nɛ̄ lè, muɔ 'yɛli bè kiɛkiɛwuʔulo ke mìɛni kɔ̀n muɔ siʔi yaliire nī dè kire yiɛlɛ lè, bè sa ti gbuʔulo muɔ kàʔa nī gè. 29 Bɛ̀ sí ki bé puu Leviiyé siɛnnɛ bèle, bàli mɛ́ dàala yafiɛn wè pe mɛ́ kɔrigɔ gèʔ yeli sunʔɔmɔ nī bèʔ, nɛ́ nabɔnwɔ ní wè, nɛ́ círiwe ní wè, nɛ́ lakicuɔ ní wè, bàli bīɛlɛ muɔ kàʔa nī gè, peli béri yaliire taʔa bèri líi de tíngi kire ga buu Yewe muɔ Kulocɛliɛ wi- sí diba taʔa wè muɔ nɛ̄ muɔ kɔli baara ti mìɛni nɛ̄ dè.»