Ye fǎga fɔ̀li yasunzunro nɛ̄ dè yeli sunʔɔmɔ nī bèʔ
13
1 A Misa sí joa: «Dàa ti mìɛni mi 'juu nɛ̀ gbɛ̀ngɛ yeli mɛ́ dè, yeli bé ti cò bèri ti kpínʔini. Yeli sǐ ga tíi tàa yige ti nīʔ; yeli míɛni sǐ taa fàri ti nɛ̄ʔb !2 «Dùʔɔ ki bé gbɛ̀ nyaa siɛnjuuwo wáà bé yɛ̀ yeli sunʔɔmɔ nī bè, bè jo Kulocɛliɛ 'wire tun wire pa juu wi míʔɛ nɛ̄ gè, kire ga laa siɛn ŋáà wi béri kele nyaʔa ŋɔ́nidɔ nī dè níɛ ke nyu, nɛ́ jo wi 'fìɛ wáà kire ga laa kanyuʔɔninɔ láà nyaa lèc. 3 A ki cɛ́nì nyaa fìɛ ŋáà nɛ́ kanyuʔɔninɔ náà ni 'kpíʔile kányiʔɛ nɛ̄ gè, á wi 'ki juu nɛ́ jo: ‹Yeri báan we- kɛ́ we sa taʔa kulocɛlɛlɛ pálì nɛ̄ weri baara pe mɛ́ bèri pe sungu wè,› kire 'jo kulocɛlɛlɛ bálì muɔ sì cɛ́n bèleʔ, 4 siɛnjuuwo ŋáà nɛ́ siɛn ŋáà wi kele nyaʔa ŋɔ́nidɔ nī níɛ ke nyu gèle, muɔ sì yɛli bè pe siɛnrɛ lúʔu dèʔ.
«Nɛ́ ki cɛ́n Yewe yeli Kulocɛliɛ wire wi yeli pun nɛ wéli, bè ki cɛ́n a ki yē yeli nɛ fɔ̀ligí bè Yewe yeli Kulocɛliɛ woli yaʔa lè ni- yeli dɛ́ni nɛ́ yeli fungo ki mìɛni ní, nɛ́ yeli pìle ni mìɛni ní lèd. 5 Yewe yeli Kulocɛliɛ wire yákuɔ nɛ̄ yeli bé taʔa wī, wire nigbe nɛ̄ yeli béri fìʔɛ́. Wire nigbe kajuudiʔɛlɛ keli yeli bé cò, wire nigbe míɛni juumɔ pire yeli béri lúru. Wire nigbe mɛ́ yeli béri baara, wire nigbe nɛ̄ yeli bé yìye puɔ.
6 «Gàa ki siɛnjuuwo ŋáà 'kúɔ wè, nɛ́ siɛn ŋáà wi kele nyaʔa ŋɔ́nidɔ nī níɛ ke nyu gèle, pe 'yɛli pe- pe kpúu wī. Nɛ́ ki cɛ́n piyē nɛ caa bè yeli fáanni yeli- cíi Yewe yeli Kulocɛliɛ nɛ̄ wè, wire ŋáà wi 'yeli suɔ nɛ̀ yige sùkulomɔ nī bè baa Ezipiti kùlo mɛ́ lè. Kire siɛnjuuwo ŋáà nɛ́ siɛn ŋáà wi kele nyaʔa ŋɔ́nidɔ nī níɛ ke nyu gèle, piyē nɛ caa bè yeli yige koligo nī gè gàa Yewe yeli Kulocɛliɛ wi 'juu nɛ̀ gbɛ̀ngɛ yeri ki tari gè. Kire ki bé kpíʔile muɔ bé kapiile yige lè yeli sunʔɔmɔ nī bè.
7 «Dùʔɔ ki bé gbɛ̀ nyaa muɔ siinyɛni ŋáà wī nuufɔnuwɔ nɛ̄ nɛ́ muɔ nī wè, dùʔɔ míɛni muɔ jaa kire ga laa muɔ póri, dùʔɔ muɔ cuɔ ŋáà wi ŋɔ́ni muɔ sìndinge nɛ̄ gè, dùʔɔ muɔ gbuɔnyɛni ŋáà wi kpɔni muɔ nɛ̄ wè, a pe wàa 'muɔ fáanni làrimɛ nī nɛ́ ki juu nɛ́ jo: ‹We- kɛ́ we sa baara kulocɛlɛlɛ pálì mɛ́ weri pe sungu,› kire 'jo kulocɛlɛlɛ pálì yeli sì cɛ́nʔ, yeli tobilo míɛni sì pe cɛ́n wèʔ, 8 siɛnfeliye yáà kulocɛlɛlɛ, bàli pe 'yeli màʔa nɛ̀ suʔu wè, bàli bīɛlɛ yeli táanni á kire bɛ̀ʔ bàli pe 'líili yeli nɛ̄ bèle, duniya tiɛrɛ ti mìɛni nī dè.
9 «Muɔ sì yɛli bè yéri ki nɛ̄ʔ, muɔ sì cɛ́nì yɛli bè lúʔu wi mɛ́ʔ, muɔ nyapile míɛni niì yɛli bè nyinimɛ taa wi nɛ̄ʔ. Muɔ sì yɛli bè wi suɔ bè làrigɛʔ. 10 Gìi sí gī baa gè, muɔ 'yɛli bè wi kpúu wī. Muɔ tíimɛ kɔli kire ki bé yɛ̀ wi kúrugu pélige gè bè kàdɛnigɛ líɛ gè bè wi wáa. Kire kàduʔumɛ gè dí siɛnsɛnminɛ kiyɛ yi nɛ́ yɛ̀ wi kúrugu bè wi wáa kpúu. 11 Yeli bé wi wáa nɛ́ kàdari ní fúɔ wi pa kùu. Nɛ́ ki cɛ́n wi nyɛ́nì ki caa bè muɔ fáanni bè láʔa Yewe muɔ Kulocɛliɛ nɛ̄ wè, wire ŋáà wi 'muɔ yige Ezipiti kùlo nī lè baa muɔ 'puu sùkulomɔ nī bè.
12 «Isirayɛli siɛnnɛ pe mìɛni bé ki siɛnrɛ lúʔu dè, bɛ̀ pe bé fíɛ; piyě ní fɔ̀li kire kapiʔi kpíʔile gèʔ.
13 «Dùʔɔ muɔ bé sí ga ki lúʔu pe 'jo yeli kàʔa káà nī nyàa Yewe muɔ Kulocɛliɛ wi 'kɛn muɔ mɛ́ muɔ- tɛ́ni baa yi nī yè, 14 dí siɛncuʔɔlɔ pálì nyɛ́nì yiri baa yeli sunʔɔmɔ nī bè nɛ̀ siɛnnɛ fáanni bèle pe kàʔa nī gè nɛ́ jo: ‹Weri báan we- kɛ́ we sa baara kulocɛlɛlɛ pálì mɛ́ béri pe sungu,› kulocɛlɛlɛ bálì yeli sì cɛ́n bèleʔ.
15 «A ki sí nyaa bɛ̀ gè, muɔ bé caala kpíʔile bè wéli, muɔ bé yúgo màʔa, muɔ bé ki sɔ́migɔ siʔɛ cɛ̀ngɛ bè wéli. A ki sí pɛ́nì nyaa kányiʔɛ gī wè, kire tètii kaala náà ni 'kpíʔile lè yeli sunʔɔmɔ nī bè, 16 kire kàʔa gáà ki siɛnnɛ pe mìɛni bèle, nɛ́ pe yajuuro ti mìɛni ní dè, muɔ bé sa pe kpúu nɛ́ kapiɛngbuɔn ŋuʔɔnɔ ní gèle, bé kàʔa nɛ́ ki yɛrɛ ti mìɛni cúʔɔ bè yige baa péwu nɛ̀ yɛli nɛ́ Yewe kàyuʔujuuro ní dè. 17 Muɔ bé kàʔa ki yɛrɛ nɛ́ ki lɔri ti mìɛni gbuʔulo kàʔa sunʔɔmɔ nī bè dàligɛ nɛ̄ gè, bé sí ti mìɛni sórigo nɛ́ kàʔa ní gè, bɛ̀ kakuɔrɔ kaasuʔuro tíɛlɛ Yewe muɔ Kulocɛliɛ mɛ́ wè. Kire kàʔa ki bé kò cúnʔɔ gboli, kiì ní ga tíi faan bè nyaaʔ.
18 «Yɛgɛ ó yɛgɛ pe 'yɛli bè cúʔɔ bè yige baa péwu wè, muɔ kɔli sì yɛli bè cò ki kàa nɛ̄ʔ, kire ga buu Yewe funyɛrigbuʔɔ ki- tìgi, dí wi sí wi nyinidaaguugo tìɛ gè muɔ nɛ̄ dí muɔ sí sii bè niʔɛ bɛ̀ wi 'ki kàli muɔ tobilo mɛ́ bèle. 19 Wi bé ki kpíʔile a muɔ nɛ lúru Yewe muɔ Kulocɛliɛ siɛnrɛ mɛ́ dè, níɛ wi kajuudiʔɛlɛ ke mìɛni cògí gàli mi 'juu nɛ̀ gbɛ̀ngɛ muɔ mɛ́ pàngɛ gè, níɛ ki kpínʔini gàa ki sín wi yiʔɛ mɛ́ gè.»