11
1 A Misa sí joa: «Muɔ 'yɛli bè Yewe muɔ Kulocɛliɛ yaʔa wè wi- muɔ dɛ́nib, béri wi kajuugbɛngɛlɛ lúru gèle lɛ̀lɛ ó lɛ̀lɛ, nɛ́ wi fànʔa kele ní gèle, nɛ́ wi kàyuʔujuuro ní dè, nɛ́ wi kajuudiʔɛlɛ ní gèle.2 «Pàngɛ gè, yeli 'yɛli bè Yewe yeli Kulocɛliɛ wi tɛnmɛgɛlɛ cɛ́n gèle. Yeli pìile peli mɛ́ bɛ̀ʔ mi nɛ nyu díɛʔ, peli bálì piyè kele gálì nyaa gèleʔ. Yeli bèle, yeli nyɛ́nì ki nyaa kɛnmɛ bíì nɛ̄ Yewe wi 'kpúʔɔ wè. Ye 'wi ŋɔri kɔli wéli gè nɛ́ kɛnmɛ bíì nɛ̄ wi yé ki sáʔa gè, 3 nɛ́ wi fìɛlɛ ní bèle, nɛ́ wi kakpiʔiligele ní gèle, gàli wi 'kpíʔile Ezipiti kùlo nī lè, kùlofɔli Farawɔn nɛ̄ wè nɛ́ wi kùlo ni mìɛni ní lè. 4 Ye 'ki wéli míɛni gàa wi 'kpíʔile Ezipiti kùlo kapiɛngbuɔnnɔ nɛ̄ bèle, nɛ́ pe suɔnyɔ ní yè, nɛ́ suɔnyɔ wotorilo ní bèle, bà wi yé ki kpíʔile a Nyàʔanivɛgɛ Tiire kuʔɔjii luʔɔ ki 'pe lìi wèc lɛ̀lɛ líì nī pe 'puu nɛ yeli cìrá bèle, nɛ́ míɛni kɛnmɛ bíì nɛ̄ wi yé pe kpúu péwu wè, fúɔ nɛ̀ pɛ́nì nɔ̀ pàngɛ nɛ̄ gè.
5 «Yeli nyɛ́nì ki cɛ́n gàa wi 'kpíʔile baa waama kùlo nī lè fúɔ nɛ̀ pɛ́nì nɔ̀ tiʔɛ gáà nī gè, 6 gàa wi 'kpíʔile Datan nɛ́ Abiramiyé nɛ̄ bèle, peli bálì pe 'puu Ɛliyabi jaala bèle, Wurubɛni saʔa tùlugo wuu wè, lɛ̀lɛ líì nī dàala 'ni nyuɔ múgu gè nɛ̀ pe júɔ wè, peli nɛ́ pe nariyɛ ní yè, nɛ́ pe fɛ̀ni saaya ní yè, nɛ́ bàli pe mìɛni pe yé wúɔ nɛ́ pe ní bèle, Isirayɛli siɛnnɛ pe mìɛni sunʔɔmɔ nī bèd. 7 ʔaan, yeli tíimɛ nyapigele ní, yeli nyɛ́nì ki nyaa kakpuʔɔ gáà Yewe kpíʔile gè.
8 «Kire nɛ̄ yeri kajuudiʔɛlɛ ke mìɛni lúru gàli mi 'juu nɛ̀ gbɛ̀ngɛ yeli mɛ́ pàngɛ gè. Bà yeli bé ŋɔri taa bè jíin bè sa kùlo líɛ lè, 9 kire ga buu yeli sìi taa kùlo nī lè nàa wuʔu Yewe kàli nɛ́ jo wire bé ni kɛn yeli tobilo mɛ́ bèle nɛ́ pe pìile ní bèle; kire kùlo lire nī nɛ̀yirimɛ nɛ́ sárigɛ kiī nɛ fúu gèe.
10 «Nɛ̀ ki yaʔa kùlo náà nī yeli bè jíin bè ni líɛ lè, ni wè bɛ̀ Ezipiti kùlo tíɛlɛ lèʔ baa yeli 'yiri wèʔ. Kire tiʔɛ nī gè, a yeli cé yaliire tánʔa dè nɛ̀ kúɔ dè, yeli cé yɛli bèri yeli siiye fuɔnri yè nɛ́ yeli kiyɛ ní yèf, majo bɛ̀ pe cî nɛ naaguɔ fuɔnri kɛnmɛ bíì nɛ̄ bè. 11 Nɛ̀ ki yaʔa kùlo náà nī yeli bé jíin lè bè ni líɛ lè, kàsaʔa kiī nɛ kɔ́ngi nyìʔɛnɛ nī lè nɛ tungu kire kùlo ni nyaguruyo nɛ̄ yè nɛ́ ni kpàanjalilɛ tiɛyɛ nɛ̄ yè; dàala niī nɛ ki luʔɔ gbun gè. 12 Kùlo láà nī nàa Yewe muɔ Kulocɛliɛ nɛ ciʔige lè; wiī nɛ ni wéli súuri, bè ki séli yiɛlɛ ni sélimɛ nɛ̄ bè, bè pa ni kúɔ lè.
13 «A Yewe 'jo: ‹A yeli nɛ lúru mi kajuudiʔɛlɛ mɛ́ gèle gàli mi 'kɛn yeli mɛ́ gèle pàngɛ gè, bè Yewe yeli Kulocɛliɛ yaʔa wè wi- yeli dɛ́ni wè, béri baara wi mɛ́ nɛ́ yeli funyɔ yi mìɛni ní yè, nɛ́ yeli pígele ke mìɛni ní gèleg. 14 Bà ki bé kpíʔile m'bé kàsaʔa kɛn gè ki- pɛn lɛ̀lɛ líì nī kàsapeliye yi tun yè, nɛ́ ŋùʔɔ kúɔmɔ woyo ní yèh. Bà yeli bè yaliiniʔɛrɛ taa, nɛ́ ɛrɛzɛn ní wè bèri ɛrɛzɛn sunvɔnbɔi kóri bè, nɛ́ wolivi yasɛnrɛ ní dè bèri sùnmɔ yigi bè. 15 M'béri nyàʔa kanʔa gè muɔ yajuuro mɛ́ dè siiye nī yè. Muɔ béri líi de tíngi.›
16 «Ye- yìye cò díɛʔ, ye fǎga yeli funyɔ fáanni yè bè pùunniʔ ! A kire 'kpíʔile gè, yeli bága láʔa bè sari káguro cáanri kulocɛlɛlɛ pálì yiʔɛ mɛ́ bèri baara pe mɛ́ bèri pe sungu. 17 A yeli sí kire kpíʔile gè, Yewe 'fungo ki bé yɛ̀ yeli kúrugu kányiʔɛ ní, bà wi bé nyìʔɛnɛ tɔ́n lè kàsaʔa kiǐ ní de báanʔ, dàala niǐ ń'de yaliire kanʔa dèʔ. Bà yeli bé cɛrigɛ fáari bè yiri kùtaanna náà nī lè nàa Yewe 'kɛn yeli mɛ́ lè.
18 «Bɛ̀ sí ki yē gè, siɛnrɛ dáà mi 'juu muɔ mɛ́ dè, ma ti cò muɔ nàzɔn nī wè nɛ́ muɔ fungo nī gè. Muɔ bé ti puɔ muɔ kɔli nɛ̄ gè bɛ̀ fìɛ tíɛlɛ, bé ti sɛbɛ bè ti puɔ muɔ gbɛlɛ nɛ̄ lè, kire ga buu muɔ fǎga fìʔɛ nɛ́ ti níʔj.
19 «Te muɔ pìile tɛnmɛ bèle ti nɛ̄. Mari ti nyu pe mɛ́ muɔ saʔa nī gè, a muɔ nɛ tári koligo nɛ̄ gè, a muɔ sínɛ, nɛ́ a muɔ yɛ̀. 20 Muɔ bé ti sɛbɛ muɔ saʔa wìile nɛ̄ lè, kàliige mɛ́, kàmɛgɛ mɛ́, nɛ́ naamɛ gè, nɛ́ muɔ kàʔa wìʔile jíindiɛyɛ nɛ̄ yèk. 21 Bà ki béri kpínʔini, a nyìʔɛnɛ niī dàala naamɛ gè, yeli nɛ́ yeli siimɛ ní bè, yeli bé mɔgɔ dàala nɛ̄ lè, kùlo nī lè nàa nɛ̄ Yewe 'kàli nɛ̀ jo wire bé ni kɛn yeli tuuliɛyɛ mɛ́ yè.
22 «Kányiʔɛ nɛ̄ a yeli 'fɔ̀li nɛ̀ kajuudiʔɛlɛ gálì ke mìɛni cò gèle, gàli mi 'juu nɛ̀ gbɛ̀ngɛ yeli mɛ́ gèle, níɛ ke kpínʔini gèle, a yeli 'Yewe yeli Kulocɛliɛ kaala yaʔa lè a ni 'yeli dɛ́ni lè, a yeli sí nɛ wi koligo tári gè nɛ́ yìye puɔ wi nɛ̄ wè, 23 Yewe bé yeli leguulo cìra bèle bè núgo yeli yiʔɛ mɛ́. Yeli bé siɛnnɛ bálì pe kùlogolo líɛ gèle, bàli pe 'kpúʔɔ á pe ŋɔri ti 'niʔɛ yeli nɛ̄ bèle.
24 «Tiʔɛ ó tiʔɛ nī yeli tɔliyɔ yi bé nɔ̀ yè, ki bé kò yeli wuʔu. Yeli kùlo ni bé líɛ waama kùlo nɛ̄ lè fúɔ bè sa nɔ̀ Liban kùlo nɛ̄ lè, bè màʔa bè sa yiri Efirati cáʔa mɛ́ gè, bè sa nɔ̀ Cɛngɛnyɛnijiinmɛ kuʔɔjii nɛ̄ wèl. 25 Kiǐ kún siɛn nī wi- yéri yeli yiʔɛ mɛ́ gèʔ. Yewe yeli Kulocɛliɛ bé funwuɔrɔ nɛ́ fíɛgbuɔrɔ wáa kùlo ó kùlo nɛ̄ nàa nī yeli bé tánʔa bè tóri lè, majo bɛ̀ wi 'ki juu yeli mɛ́ gè.»
Yewe diba wè nɛ́ wi dɛ́ngɛ ní wè
26 «Ki n'gɛ, ye- kàa nyíɛnɛ ye kɔ̀n pàngɛ gè, a muɔ nɛ Yewe wi diba caa wè á kire bɛ̀ʔ wi dɛ́ngɛ caa wè. 27 Yeli bé wi diba taa wè, a yeli nɛ lúru Yewe yeli Kulocɛliɛ wi kajuudiʔɛlɛ ke mìɛni mɛ́ gèle, gàli mi 'juu nɛ̀ gbɛ̀ngɛ yeli mɛ́ pàngɛ gèm. 28 Yeli bé wi dɛ́ngɛ taa wè a yeli wè nɛ lúru Yewe yeli Kulocɛliɛ kajuudiʔɛlɛ mɛ́ gèleʔ, nɛ́ míɛni a yeli 'wàli nɛ̀ koligo yaʔa gè gàa wori mi 'juu nɛ̀ gbɛ̀ngɛ yeli mɛ́ pàngɛ gè nɛ́ taʔa kulocɛlɛlɛ pálì nɛ̄, bàli yeli sì yé kíni nɛ̀ cɛ́n bèleʔn.
29 «A Yewe muɔ Kulocɛliɛ wi kɛ́nì muɔ nyɔ́gɔ kùlo náà nī muɔ bé jíin bè ni líɛ lè, muɔ bé tánʔa Garizimi nyagurugo nɛ̄ gè bè diba tɛ́ngɛ wè baa, bé dɛ́ngɛ tɛ́ngɛ wè baa Ebali nyagurugo nɛ̄ gèo. 30 Ki nyaguruyo nyáà yiī baa Zurudɛn cáʔa kúrugu gè cɛngɛnyɛnijiingɔli mɛ́ gè, baa Kanaa siɛnnɛ piyē tɛ́ninɛ bèle waama kùlo kpàanjali nɛ̄ wè, Giligali kàʔa yiʔɛ mɛ́ gè, Mɔre tiikpoliyo tiɛliʔɛ táanni gèp.