Fànʔa Kajuʔulo 9

Isirayɛliyé piyē cíimɛ siɛnnɛ

1 A ń'nɛ̀ kɛ́ yiʔɛmɛ nɛ́ pe yɛ: «Ma lúʔu,  ! Muɔ n'ŋɛ pàngɛ gè, muɔ 'gbòbori nɛ̀ yaʔa bè cáʔa jeli gè bè sa kùlogolo siɛnnɛ bálì cìra bèle bè yige, gàli siɛnnɛ pe 'niʔɛ nɛ̀ tóri muɔ nɛ̄ wè, nɛ́ ní ŋɔri ní dè. Pe kàaya ní yè kpoliyo, a pe 'yi sùlu nɛ́ gunyɔ ní yè nyàa yī kpàʔaliyɛ fúɔ nɛ̀ nɔ̀ nyìʔɛnɛ nī lè ! 2 Siɛnfelige káà yē baa pe sunʔɔmɔ nī, Anakiyé bèle, bàli piyē nɛ́ ŋɔri ní dè nɛ́ ní nàgakpaʔaliyɛ yè. Muɔ 'pe cɛ́n, a muɔ 'ki lúʔu míɛni a pe 'jo: ‹Ŋáa wi bé gbɛ̀ wìi suɔ Anaki siimɛ mɛ́ bè ?›

3 «Ma sí ki cɛ́n pàngɛ gè, muɔ Kulocɛliɛ wire wi tári muɔ yiʔɛ mɛ́ gè bɛ̀ kàsunkpuʔɔ tíɛlɛ gàa ki tiʔɛ sórigi gè mɛ́nɛmɛnɛ wè; Yewe wire tíimɛ wi bé pe cúʔɔ bè yige muɔ yiʔɛ mɛ́. Wire wi bé pe cɛ́rigɛ muɔ yiʔɛ mɛ́, dí muɔ sí pe cìra bè yige pe kùlo nī lè. Muɔ bé pe kpúu péwu fáarifaari majo bɛ̀ Yewe 'ki juu gè.

4 «A Yewe muɔ Kulocɛliɛ wi kɛ́nì pe cìra nɛ̀ yige muɔ yiʔɛ mɛ́ gè, kiì yɛli muɔ- ki sɔ̀ngi muɔ fungo nī gè bè joʔ: ‹Mi sínnɛ lire kɛnmɛ nɛ̄ Yewe 'ki kpíʔile mi mɛ́ nɛ̀ mi nyɔ́gɔ kùlo náà nī lè ni- kò mi woli.› ʔúnʔun! Kùlogolo gálì siɛnnɛ pe sìpiimɛ pire kɛnmɛ nɛ̄ Yewe 'pe cìra nɛ̀ yige muɔ yiʔɛ mɛ́ gè. 5 Kiì nyaa majo muɔ nyɛ́ni síngi nɛ cáanri wī muɔ fungo nī gèʔ, á kire bɛ̀ʔ muɔ fungo ki nyɛ́nì fílige wīʔ, kire kɛnmɛ nɛ̄ Yewe 'pe kùlo kɛn lè muɔ mɛ́ kɔrigɔʔ. Kányiʔɛ nɛ̄ gè, wi 'kire kpíʔile siɛnnɛ bálì pe tánʔagɛnbiimɛ pire kɛnmɛ nɛ̄, a Yewe muɔ Kulocɛliɛ wi 'pe cìra nɛ̀ núgo muɔ yiʔɛ mɛ́. Nɛ́ míɛni wi 'ki kpíʔile bè wi nyasiɛnrɛ fori dè dàa Yewe wi yé nɛ̀ kɛn yeli tobilo mɛ́ bèle, wè, nɛ́ , nɛ́ ní wè. 6 Ma ki cɛ́n muɔ sínnɛ lire kɛnmɛ nɛ̄ bɛ̀ʔ Yewe muɔ Kulocɛliɛ wi 'kùlo kɛn lè muɔ mɛ́ʔ kire ga buu muɔ- ni taa muɔ woliʔ, nɛ́ ki cɛ́n yeli Isirayɛliyé bèle yeli yē cíimɛ siɛnnɛ.»

Pe yé nɛ̀piɛyɛlilɛ yasungo faan gè

7 «Ma sɔ̀ngi ma taa, fǎga fìʔɛʔ kɛnmɛ bíì nɛ̄ muɔ nyɛ́nì muɔ Kulocɛliɛ fungo yɛ̀gɛ gè kpuʔɔ waama kùlo nī lèʔ. Nɛ̀ ki líɛ cɛngɛ gíì muɔ 'yiri kùlo nī lè, fúɔ nɛ̀ pɛ́nì nɔ̀ náʔa gè, yeli yé Yewe cíi wè.

8 «Baa mɛ́ gè, yeli yé Yewe fungo yɛ̀gɛ gè kpuʔɔ, a Yewe fungo ki 'yɛ̀ yeli kúrugu fúɔ wi caa bè yeli kpúu bè yige baa. 9 Bà mi yé tánʔa nyagurugo naamɛ gè bè sa kàdɛnitɛnyɛ suɔ Yewe mɛ́ wè, kàdɛnitɛnyɛ nyáà yī woyo yè gàa Yewe yé kpíʔile nɛ́ yeli ní wè, a mi 'kò baa nyagurugo naamɛ gè cɛnyɛ togosiin nɛ́ pìliye togosiin. Mi sì suro lìiʔ, mi míɛni sì luʔɔ gbuɔʔ. 10 A Yewe Kulocɛliɛ 'kàdɛnitɛnyɛ nyáà kɛn yè; Kulocɛliɛ wire tíimɛ kabiɛlɛ ni cé sɛbɛ yi nɛ̄. Yewe siɛnrɛ ti mìɛni yé puu yi nɛ̄, dàa wi 'juu nɛ̀ tìɛ yeli nɛ̄ a yeli 'kò gbuʔulo baa nyagurugo mɛ́ gè, kàsun sunʔɔmɔ nī bè.

11 «Cɛnyɛ togosiin nɛ́ pìliye togosiin kúɔmɔ nɛ̄ bè, a Yewe 'kàdɛnitɛnyɛ siin kɛn yè m'mɛ́, yè. 12 Nɛ́ sí ki juu m'mɛ́ nɛ́ jo: ‹Yɛ̀ ma tìgi fáari nyagurugo nɛ̄ gè, nɛ́ ki cɛ́n muɔ siɛnnɛ bèle, pe nyɛ́nì kapiigbuʔɔ kpíʔile, siɛnnɛ bálì muɔ 'yige Ezipiti kùlo nī lè. Pe nyɛ́nì koligo wáa gè fáari gàa wuʔu mi yé juu nɛ̀ gbɛ̀ngɛ pe mɛ́ gè. Pe nyɛ́nì tiɛ nyɛgɛ wè nɛ̀ yasungo faan.›

13 «A Yewe 'ki juu nɛ́ jo: ‹Mi nyɛ́nì siɛnnɛ bálì wéli bèle, a mi 'ki nyaa siɛnnɛ bálì pe yē cíimɛ siɛnnɛ. 14 -Mi yaʔa mi- ki kpíʔile ! M'bé pe cúʔɔ bè yige péwu bè pe míʔɛ kurugo gè bè láʔa dàala nɛ̄ lè ! M'bé ki kpíʔile muɔ siimɛ pi bé kò siɛnfelige gáà ki 'niʔɛ nɛ́ ní ŋɔri ní dè nɛ̀ tóri pe nɛ̄.›

15 «A mi 'koli nɛ̀ tìgi nyagurugo nɛ̄ gè, nyagurugo ní gè nɛ nyí kàsun, nɛ́ nyakungɛngɛ siɛnrɛ kàdɛnitɛnyɛ siin ní yè mi kiyɛ nī yè. 16 Cíʔ ! A mi pɛ́nì ki nyaa kɛnmɛ bíì nɛ̄ yeli 'kapiile kpíʔile lè Yewe yeli Kulocɛliɛ nɛ̄ wè: yeli yé tiɛ nyɛgɛ wè nɛ̀ nɛ̀piɛyɛlilɛ faan lè yasungo. Yeli nyɛ́nì koligo wáa gè fáari gàa wuʔu Yewe yeli Kulocɛliɛ yé juu nɛ̀ gbɛ̀ngɛ yeli mɛ́ gè. 17 Kire nɛ̄ a mi 'kàdɛnitɛnyɛ siin cò yè nɛ̀ yi wáa nɛ̀ jabari nɛ́ mi kiyɛ siin ní yè, yeli nyaamɛ nɛ̄.

18 «A mi 'fali nɛ̀ tuu nɛ̀ cúbulo Yewe yiʔɛ mɛ́ gè, nɛ̀ kò baa bɛ̀ tabelige tíɛlɛ gè. Miì suro lìiʔ, miì luʔɔ gbuɔʔ fúɔ cɛnyɛ togosiin nɛ́ pìliye togosiin, yeli kapiigbuʔɔ kire kɛnmɛ nɛ̄ gàa yeli 'kpíʔile gè gàa ki 'pii Yewe yiʔɛ mɛ́ gè, kire gáà yeli 'kpíʔile a ki 'wi fungo yɛ̀gɛ gè kpuʔɔ wè. 19 Nɛ́ ki cɛ́n mi yé tɔ̀ni nɛ̀ fíɛ kpuʔɔ Yewe funyɛrigɛ nɛ̄ gè, bà wi fungo ki 'yɛ̀ yeli kúrugu wè fúɔ wi caa bè yeli cúʔɔ bè yige baa péwu. A Yewe sí ń'nɛ̀ lúʔu m'mɛ́ cígini.

20 «Yewe fungo ki yé yɛ̀ kpuʔɔ kɛnmɛ bíì nɛ̄ bè kúrugu wè, fúɔ wi 'caa bè wire míɛni kpúu bè yige baa. A mi sí náari Arawɔn wuʔu nɛ̄ gè kire lɛ̀lɛ nī lè. 21 Gàa ki yé yeli kapiile wuʔu kúɔ gè, nɛ̀piɛyɛlilɛ náà yeli 'kpíʔile yasungo, a mi 'ni sórigo kàsun nī gè, nɛ́ ni kpúɔn nɛ̀ kabari, nɛ́ ni súu míige, nɛ̀ ki míige wáa gè kápaligɛ lakoligo nī gè gàa ki fuu nɛ tíri nyagurugo nɛ̄ gè.»

Misa yé náari Isirayɛliyé wori nɛ̄ dè

22 «Bɛ̀ míɛni yeli 'ki kpíʔile Tabɛra, nɛ́ Masa, nɛ́ Kibirɔti Taawa tiɛyɛ nī yè, a yeli 'kɛ́ yiʔɛ mɛ́ nɛ̀ fungo yɛ̀gɛ gè kpuʔɔ. 23 Nɛ́ baa Kadɛsi Barinɛya tiʔɛ nī gè, a Yewe 'yeli tun nɛ́ jo: ‹Ye- kɛ́ ye sa kùlo líɛ lè nàa mi 'kɛn yeli mɛ́ lè.› Nɛ̀ ki yaʔa a yeli 'cíi Yewe yeli Kulocɛliɛ siɛnjuuro nɛ̄ dè, dàa wi 'juu nɛ̀ gbɛ̀ngɛ dè. Yeli sì tɛ́ngɛ Yewe nɛ̄ wè nɛ̀ lúʔu wi mɛ́ʔ. 24 Nɛ́ ki líɛ mi 'yeli cɛ́n wè, yeli yē siɛnciile Yewe kɔli mɛ́ gè.

25 «A mi sí tuu nɛ̀ cúbulo Yewe yiʔɛ mɛ́ gè, nɛ̀ kò baa sínɛjubulowo cɛnyɛ togosiin nɛ́ pìliye togosiin, nɛ́ ki cɛ́n Yewe wi yé jo wi bé yeli cúʔɔ wī. 26 A mi 'Yewe náari wè nɛ́ jo: ‹ Yewe, fǎga muɔ tíimɛ siɛnnɛ cúʔɔ bèleʔ, bàli bīɛlɛ muɔ wuulo bèleʔ, bàli muɔ 'suɔ nɛ̀ yige kùlo nī lè nɛ́ muɔ fànʔa ní gè nɛ́ muɔ ŋɔri kɔli ní gè. 27 Sɔ̀ngi ma taa nɛ́ muɔ baakuɔlɔ ní bèle, wè, nɛ́ nɛ́ ní wè ! Fǎga siɛnnɛ bálì pe cíimɛ fungo wéli gèʔ, nɛ́ pe funbinʔɛ ní gèʔ, nɛ́ pe kapiile ní lèʔ ! 28 Á kire bɛ̀ʔ gè, kùlo náà nī muɔ 'weli yige wè, ni siɛnnɛ pe bé jo: Yewe sì yé je gbɛ̀ jáa bè pe nyɔ́gɔ kùlo nī lè nàa nyuɔ wi yé kún nɛ̀ kɛn gèʔ. Á kire bɛ̀ʔ pe yé wi biɛn wī. Kire kɛnmɛ nɛ̄ wi 'pe yige nɛ̀ sɛ́nì pe kpúu waama kùlo nī lè.

29 « ‹Nɛ̀ ki yaʔa piyē muɔ tíimɛ siɛnfelige gáà ní muɔ nɛ tɔ́ri kpuʔɔ gè, gàa gī muɔ wuʔu gè, a muɔ 'pe yige Ezipiti kùlo nī lè muɔ ŋɔri kɔli ní gè gàa muɔ 'sáʔa gè.› »