Yeli 'yɛli bèri síngi nyakungɛngɛ siɛnrɛ mɛ́ dè
8
1 A Misa ń'nɛ̀ ti juu nɛ́ joa: «Kajuudiʔɛlɛ siɛnrɛ ti mìɛni dàa mi 'juu nɛ̀ gbɛ̀ngɛ yeli mɛ́ dè pàngɛ gè, yeli 'yɛli bèri ti kpínʔini, kire ga buu yeli- kò sìi nɛ̄ dí yeli- sí niʔɛ, bé kùlo líɛ lè ni- kò yeli woli, kùlo náà nyuɔ Yewe 'kún nɛ̀ kɛn yeli tobilo mɛ́ bèle.2 «Ma sɔ̀ngi ma taa koligo ki tánʔadɔninɔ ni mìɛni ní lè gàa nī Yewe muɔ Kulocɛliɛ wi 'muɔ kɔ́ri nɛ̀ tóri gè, yiʔɛlɛ togosiin sunʔɔmɔ nī bè waama kùlo nī lè. Kire yé buu bè muɔ wuʔɔ puuweliye sunʔɔmɔ nī bè. Wi 'puu nɛ caa bè ki cɛ́n gàa gī baa muɔ fungo nī gè, a ki yē muɔ bé wire kajuudiʔɛlɛ cò gèle, á kire 'laa a ki yē muɔ̌ tɔ́ri nɛ́ ke ní wèʔ. 3 Kire sí nɛ̄ wi 'muɔ cɛ́rigɛ nɛ̀ fungo wuʔɔgɔ taʔa gè muɔ nɛ̄ nɛ́ sí mana yaliireb kɛn dè muɔ mɛ́, tire dáà muɔ sì yé cɛ́n dèʔ, nɛ́ míɛni dàa muɔ tobilo sì yé cɛ́n dèʔ. Wi 'kire kpíʔile kire ga buu muɔ- ki cɛ́n siɛn wè nɛ sìi taʔa suro tire yákuɔ nɛ̄ʔ. Wiī nɛ sìi taʔa wè siɛnrɛ ó siɛnrɛ dáà ti yigi Yewe nyuɔ nī gèc. 4 Yeli burudo tiì cɛnminɛʔ, yeli tɔliyɔ míɛni yiì fiɛʔ yiʔɛlɛ togosiin gálì sunʔɔmɔ nī bèʔ.
5 «Ma ki cɛ́n muɔ fungo nī gè dí Yewe muɔ Kulocɛliɛ wiī nɛ muɔ tɛnmɛ majo bɛ̀ tuufɔli cî nɛ̂ wi jaa tɛnmɛ wè. 6 Kire nɛ̄ muɔ 'yɛli bè taʔa Yewe koligo siɛnrɛ nɛ̄ dè béri wi fìʔɛ́ bèri Yewe muɔ Kulocɛliɛ wi kajuudiʔɛlɛ cògí gèle. 7 Nɛ́ ki cɛ́n Yewe muɔ Kulocɛliɛ wi bé muɔ nyɔ́gɔ kùtaanna nī lè, kùlo náà nī kápaliyɛ yiī baa yè, nɛ́ pìndiɛyɛ ní yè, nɛ́ lawiʔile ní gèle gàli ke kɛ́ngi nɛ yigi gèle jùlɔyɔ nī yè nɛ́ nyaguruyo nī yè. 8 Kire kùlo náà niī tàanna, yaliire ti nyuʔɔ baa: bíle wè, nɛ́ ɔrizi ní wè, nɛ́ ɛrɛzɛn fétire ní dè, nɛ́ sàanfiidiire ní dè, nɛ́ girenadi tiire ní dè, nɛ́ wolivi yasɛnrɛ sùnmɔ ní bè, nɛ́ sáluʔɔ ní gè. 9 Kire kùlo nī lè, yaliire sǐ je ga fɔ̀n muɔ nɛ̄ʔ; kire tiʔɛ nī gè yakaa sǐ muɔ laaʔ. Yeli béri timɔri yigi ni kàdɛnidɛ nī dè. Yeli béri kányiɛrɛ túru dè de yigi nyaguruyo nī yè. 10 Lɛ̀lɛ líì nī muɔ kɛ́nì lìi nɛ̀ tíin wè, muɔ 'yɛli bè kpuʔɔrɔ taʔa dè Yewe muɔ Kulocɛliɛ nɛ̄ wè, kùtaanna náà wuʔu nɛ̄ gè nàa wi 'kɛn muɔ mɛ́ lè.
11 «Mari mìɛ ciʔige díɛʔ, muɔ fǎga fìʔɛ nɛ́ Yewe muɔ Kulocɛliɛ ní wèʔ bè sàliyɛ le míɛni bè cíi wi kajuudiʔɛlɛ nɛ̄ gèleʔ, nɛ́ wi kàyuʔujuuro nɛ́ wi fànʔa kele ní gèleʔ, tire dáà mi 'juu nɛ̀ gbɛ̀ngɛ muɔ mɛ́ pàngɛ gè. 12 A muɔ kɛ́nì lìi nɛ̀ tíin wè, a muɔ kɛ́nì saacɛ̀nyɛ faan yè nɛ́ jíin yi nī yè, 13 a muɔ kɛ́nì muɔ yajuuro nyaa dè a ti 'niʔɛ dè, nɛ́ míɛni muɔ walifiiwe nɛ́ muɔ tiɛ nyaa wè a wi 'niʔɛ wè, nɛ́ muɔ kɔliyɛrɛ ti mìɛni dè a ti sɔ́migɔ nɛ̀ niʔɛ dè, 14 te mìɛ ciʔige díɛʔ kire ga buu nìɛnyiɛnigɛ ki fǎga jíin muɔ nīʔ. Muɔ fǎga fìʔɛ nɛ́ Yewe muɔ Kulocɛliɛ ní wèʔ, wire ŋáà wi 'muɔ yige Ezipiti kùlo nī lèʔ, baa muɔ yé puu sùkulomɔ nī bèʔ.
15 «Wire wi 'muɔ yiʔɛ kíni gè waama kùlo tiɛkpuʔɔ nɛ́ tiɛpiʔi nī gè; kire tiʔɛ kire nī wɔ̀burɔ ti 'puu suɔnrɔ wori dèd nɛ́ náana ní bèle, kire tiʔɛ míɛni ki 'puu luʔɔfundiʔɛ. A Yewe 'ki kpíʔile luʔɔ nɛ yigi baa kàdɛnigbaala fìile nī lè. 16 Kire waama kùlo náà nī lè, a wi 'mana yaliire kɛn dè muɔ mɛ́, tire dáà muɔ tobilo piyè yé cɛ́n dèʔ, bè muɔ cɛ́rigɛ bè muɔ puu wéli, bè sí kacɛ̀ngɛ kpíʔile muɔ nɛ̄ kire kàduʔumɛ gè. 17 Mìɛ cò díɛʔ, fǎga ki sɔ̀ngiʔ muɔ fungo nī gè bé jo muɔ ŋɔri nɛ́ muɔ kɔli, tire ti 'dàa ti mìɛni kɛn muɔ mɛ́ʔ ! 18 Ki 'yɛli muɔ- sɔ̀ngi daa nɛ́ ki ní bè ki cɛ́n Yewe muɔ Kulocɛliɛ wire wi 'ki ŋɔri nyɔ́gɔ dè muɔ nī kire ga buu muɔ lɔri caa dè bè taa, kire ga buu wi nyakungɛngɛ ki- fori pàngɛ gè gàa nyuɔ wi yé kún nɛ̀ kɛn yeli tobilo mɛ́ bèle.
19 «A ki sí kɛ́nì nyaa a muɔ sí fìʔɛ nɛ́ Yewe muɔ Kulocɛliɛ ní wè, nɛ́ taʔa kulocɛlɛlɛ pálì piyeyɛ nɛ̄ nɛ̀ sɛ́ni baara pe mɛ́ bèle níɛ káguro cáanri pe yiʔɛ mɛ́ gè, m'bé ki juu gbɛ̀ngɛ muɔ mɛ́ pàngɛ gè, yeli bé kùu bè kúɔ péwu. 20 Yeli bé kùu bè cɛrigɛ bɛ̀ kùlogolo siɛnfeliye tíɛlɛ yè nyàa Yewe 'kpúu yeli yiʔɛ mɛ́ gè, nɛ́ ki cɛ́n yeli sì fɔ̀li nɛ̀ lúʔu Yewe yeli Kulocɛliɛ mɛ́ wèʔ.»