Fànʔa Kajuʔulo 7

Ma fǎri Kanaa kùlo yasunro sungu dèʔ

1 A Misa ń'nɛ̀ ki juu nɛ́ jo: «Lɛ̀lɛ líì nī muɔ Kulocɛliɛ wi bé muɔ nyɔ́gɔ kùlo nī lè nàa nī muɔ bé jíin bè ni líɛ muɔ woli lè, a wi kɛ́nì kùlogolo siɛnfeliye cìra yè nɛ̀ yige muɔ yiʔɛ mɛ́ gè, , nɛ́ Girigasiyé bèle, nɛ́ bèle, nɛ́ bèle, nɛ́ Pereziyé bèle, nɛ́ bèle nɛ́ bèle, kùlogolo kɔlisiin gálì siɛnnɛ pe 'niʔɛ nɛ̀ tóri muɔ nɛ̄ wè, á pe ŋɔri ti 'kpúʔɔ muɔ ŋɔri nɛ̄ dè, 2 a Yewe muɔ Kulocɛliɛ wi kɛ́nì pe le muɔ kiyɛ nī yè, a muɔ 'pe jáa bèle, muɔ bé pe mìɛni cúʔɔ bè yige baa péwu nɛ̀ yɛli nɛ́ Yewe kàyuʔujuuro ní dè. Muɔ̌ kpíʔile nɛ́ pe níʔ, muɔ sì yɛli bè nyinimɛ taa pe nɛ̄ʔ. 3 Muɔ sì yɛli bàga cepɔrigɔ kpíʔile nɛ́ pe níʔ, muɔ sì yɛli bè muɔ póri kɛn pe jaa wáà mɛ́ʔ, muɔ sì yɛli míɛni bè pe póri wáà líɛ bè kɛn muɔ jaa mɛ́ʔ. 4 Nɛ́ ki cɛ́n pe bé yeli pìile fáanni bèle bè láʔa Yewe nɛ̄ wè, peri baara peli kulocɛlɛlɛ mɛ́ bèle bèri pe sungu. Bà Yewe fungo ki bé yɛ̀ yeli kúrugu kpuʔɔ, bà wi bé yeli kpúu bè yige baa péwu.

5 «Ki n'gɛ kɛnmɛ báà pire nɛ̄ yeli 'yɛli bè ki kpíʔile siɛnnɛ bálì kɔli mɛ́ gè: yeli bé pe sundiɛyɛ kpúɔn yè bè cúʔɔ; yeli bé pe kpúɔn yè bè muʔɔrɔ bé yasungo tiikoriyeriye kɔ́ligi yè bè cáan, nyàa pe 'kpíʔile pe sundiɛyɛ nī yè; pe yasundɛnyɛ yè, yeli 'yɛli bè yi sórigo wī. 6 Nɛ́ ki cɛ́n muɔ yē siɛnfelige gáà Yewe muɔ Kulocɛliɛ wi 'wàli nɛ̀ tɛ́ngɛ gè. Muɔ wī Yewe muɔ Kulocɛliɛ wi 'nyíɛnɛ nɛ̀ kɔ̀n muɔ- kò wire tíimɛ siɛnfelige gáà wuʔu ki 'kpúʔɔ wi mɛ́ gè, gàa gī wi wuʔu gè siɛnsɛnminɛ pe mìɛni sunʔɔmɔ nī bè dàala nɛ̄ lè.

7 «Bɛ̀ yeli woli ni 'kpúʔɔ Yewe mɛ́ á wi 'yeli nyíɛnɛ nɛ̀ kɔ̀n, kiì nyaa majo yeli ye 'niʔɛ nɛ̀ tóri siɛnsɛnminɛ nɛ̄ bèle wīʔ. Nɛ̀ ki yaʔa yeli cɛ́nì cɛ́ri nɛ̀ tóri siɛnsɛnminɛ nɛ̄ bèle. 8 ʔéʔe, gìi sí gī baa gè, yeli woli ni yé kpúʔɔ Yewe mɛ́ wè; wi míɛni 'puu nɛ caa bè wi nyasiɛnrɛ fori dè dàa wi yé nɛ̀ kɛn yeli tobilo mɛ́ bèle. Kire nɛ̄ Yewe wi 'yeli suɔ nɛ̀ yige sùkulomɔ mɛ́ bè nɛ́ míɛni kùlofɔli kiyɛ nī yè nɛ́ wi ŋɔri kɔli ní gè.

9 «Ma ki cɛ́n cɛ̀ngɛ, Yewe muɔ Kulocɛliɛ wè, wire nigbe wī Kulocɛliɛ wè, Kulocɛliɛ ŋáà nɛ̄ siɛn bé gbɛ̀ tɛ́ngɛ wè. Wire wiī nɛ síngi wi nyakungɛngɛ siɛnrɛ nī dè bìli mɛ́ wi woli ni 'kpúʔɔ lè, á piyē nɛ lúru wi kajuudiʔɛlɛ mɛ́ gèle, fúɔ bè sa nɔ̀ kɛ̀ngɛlɛ sirakogunɔwoli (1 000) nɛ̄ lè. 10 Nɛ̀ ki yaʔa wiī nɛ pe sàrí cúɔʔ bàli 'wire biɛn wè: wiī nɛ pe córi nɛ yigi baa; wi wè nɛ mɔgi níɛ ki kpínʔini wi nɛ̄ʔ ŋàa wire sì dɛ́ni wèʔ; wiī nɛ ki siɛn sàrí wè nɛ yɛligi nɛ́ wi parimɛ ní bè. 11 Kire nɛ̄ mari lúru wi kajuudiʔɛlɛ mɛ́ gèle, nɛ́ wi fànʔa kele ní gèle, nɛ́ wi kàyuʔujuuro ní dè dàa mi 'juu nɛ̀ gbɛ̀ngɛ muɔ mɛ́ pàngɛ gè; mari tári mari yɛligi nɛ́ ti ní.

12 «A yeli nɛ lúru wi kàyuʔujuuro mɛ́ dè, a yeli nɛ tári nɛ yɛligi nɛ́ ti ní nɛ ti kpínʔini dè, Yewe muɔ Kulocɛliɛ wi bé nyakungɛngɛ siɛnrɛ fori dè muɔ kɔli mɛ́ gè nɛ́ wi bànguɔ dɛ́nigɛ ní gè gàa wi 'kàli nɛ̀ kɛn yeli tobilo mɛ́ bèle.

13 «Yeli bé wi dɛ́ni; wi bé diba taʔa wè yeli nɛ̄, bè yeli kpíʔile nìʔɛnɛ, bé diba taʔa wè yeli pìile nɛ̄. Bà wi bé diba taʔa wè yeli siiye nɛ̄: yaliire nɛ̄ dè, nɛ́ luʔɔ ní gè, nɛ́ sùnmɔ báà bī fɔnbɔ bè. Wi bé ki yaʔa yeli nɛ̀toyo yè nɛ́ yeli sìnbatoyo ní yè nɛ́ yeli síkatoyo ní yè yi mìɛni béri sii de nyuʔɔ kùlo nī lè nàa wuʔu Yewe nyɛ́nì ni nyuɔ kún nɛ̀ kɛn yeli tobilo mɛ́ bèle. 14 Yewe bé diba taʔa wè yeli nɛ̄ bè tóri kùlogolo kálì siɛnnɛ nɛ̄ bèle. Nàguɔ nɛ́ cɛliwɛ sǐ ga tíi nyaa muɔ mɛ́ʔ ŋàa wī sìndigiwe wè, nɛ́ yajuuro ní dàa tiǐ gbɛ̀ sii dèʔ. 15 Yewe wi bé yaama pi mìɛni feliye líili bè muɔ nɛ̄; wiǐ ga tíi Ezipiti kùlo yaabiimɛ páà yaʔa pi- muɔ còʔ, bàa muɔ 'cɛ́n bèʔ. Nɛ̀ ki yaʔa bàli bīɛlɛ 'muɔ biɛn bèle, wi bé pe mìɛni kpúɔn nɛ́ ki yaabiimɛ báà ní bè. 16 Muɔ 'yɛli bè muɔ leguulo cúʔɔ bèle bè yige baa, bàli Yewe muɔ Kulocɛliɛ wi bé le yeli kiyɛ nī yè. Muɔ sǐ ga tíi nyinimɛ taa pe nɛ̄ʔ; muɔ sì yɛli míɛni bèri baara pe kulocɛlɛlɛ mɛ́ bèle bèri pe sunguʔ, nɛ́ ki cɛ́n pe bé kò gárigɛ muɔ mɛ́.

17 «Dùʔɔ muɔ bé sí ki juu bé jo: ‹Kùlogolo gálì ke ŋɔri ti nyɛ́nì niʔɛ nɛ̀ tóri mi nɛ̄ ! Mɛni sí m'bé jáa bè pe cìra ?›

18 «Fǎga de pe fìʔɛ́ ! Ma sɔ̀ngi ma taa nɛ́ gàa ní Yewe muɔ Kulocɛliɛ wi 'kpíʔile gè Farawɔn nɛ̄ wè nɛ́ Ezipiti kùlo ni mìɛni ní lè. 19 Sɔ̀ngi ma taa nɛ́ kagbɛngɛlɛ ní gèle gàli ke yé kpolilo gèle gàli muɔ nyapigele ke 'nyaa gèle, nɛ́ ní bèle, nɛ́ kakpoliyo ní yè, nɛ́ wi ŋɔri kɔli ní gè gàa wi 'sáʔa gè, kire gáà ní Yewe muɔ Kulocɛliɛ wi 'muɔ yige wè. Bɛ̀ sí Yewe muɔ Kulocɛliɛ wi bé ki kpíʔile kùlogolo siɛnfeliye nyáà nɛ̄ yè, nyàa nɛ̄ muɔ nɛ fìʔɛ́ yè. 20 Nɛ̀ taʔa ki nɛ̄, Yewe muɔ Kulocɛliɛ wire tíimɛ wi bé dàsowuɔyɔ tórigo yè pe kúrugu, fúɔ bè pe cìra bè kpúu, bàli pe 'fɛ̀ nɛ̀ suɔ muɔ yiʔɛ mɛ́ gè nɛ́ sɛ́nì làri wè.

21 «Kiì yɛli muɔ de fìʔɛ́ pe nɛ̄ʔ, nɛ́ ki cɛ́n Yewe muɔ Kulocɛliɛ wiī yeli sunʔɔmɔ nī, Kulocɛliɛ ŋáà wi 'kpúʔɔ wè, ŋàa nɛ̄ siɛn 'yɛli bèri fìʔɛ́ wè. 22 Yewe muɔ Kulocɛliɛ wi béri kùlogolo gálì siɛnnɛ cìrá bèle cɛ̀cɛ cɛ̀cɛ bè yige muɔ yiʔɛ mɛ́ gè, nɛ́ ki cɛ́n muɔ̌ gbɛ̀ pe mìɛni cìra tɔligɔ nigbe nɛ̄ʔ, á kire bɛ̀ʔ gè nyàʔayɛrɛ ti bé sii bè niʔɛ bè tóri bè muɔ màʔa. 23 Kire sí gī Yewe muɔ Kulocɛliɛ wire wi bé siɛnfeliye nyáà yi mìɛni yaʔa muɔ- fànʔa taa yi nɛ̄; wi bé fíɛgbuɔrɔ wáa pe nɛ̄ fúɔ pe ba cúʔɔ bè yige baa. 24 Wi bé ki yaʔa muɔ- fànʔa taa pe kùlofɔlilɔ nɛ̄ bèle, fúɔ siɛnnɛ sǐ ní de sɔ̀ngí de taʔa nɛ́ pe ní dàala nɛ̄ lèʔ. Siɛn sǐ gbɛ̀ yéri muɔ yiʔɛ mɛ́ʔ fúɔ bè taa muɔ ba pe mìɛni cúʔɔ.

25 «Yeli bé pe kulocɛlɛlɛ yasundɛnyɛ yi mìɛni sórigo. Muɔ fǎga ki yaʔa muɔ ga cò pe gárigɛ káà nɛ̄ʔ, ki láa ga muɔ taaʔ. Muɔ fǎga yasunro ti walifiiwe wáà líɛʔ kire ga laa tiɛ wèʔ, ŋàa pe 'nyɛgɛ nɛ̀ wo ti nɛ̄ dèʔ, nɛ́ ki cɛ́n Yewe muɔ Kulocɛliɛ wi kanabiɛnnɛ nī. 26 Muɔ sì yɛli bè wi yafungo yɛgɛ káà líɛʔ bè jíin nɛ́ ki ní muɔ saʔa nī gèʔ. A muɔ 'kire kpíʔile gè, muɔ míɛni bé kò yalaʔagɛngɛ pe- ki cúʔɔ. Kire yasungo yɛgɛ gáà ki 'yɛli bè muɔ biɛn; ki 'yɛli bè kò muɔ yafungo. Nɛ́ ki cɛ́n ki 'yɛli pe- ki yɛgɛ gáà cúʔɔ gè bè yige baa péwu nɛ̀ yɛli nɛ́ Yewe kàyuʔujuuro ní dè.»