6
1 «Kajuudiʔɛlɛ ke n'gɛlɛ, gàli m'bé juu yeli mɛ́ gèle, kire 'jo fànʔa kele gèle nɛ́ kàyuʔujuuro ní dè dàa Yewe yeli Kulocɛliɛ wi 'juu nɛ̀ gbɛ̀ngɛ mi- yeli tɛnmɛ ti nɛ̄ dè, kire ga buu yeli de ti kpínʔini kùlo nī lè nàa nī yeli bé jíin lè bè ni suɔ siɛnnɛ bálì mɛ́ bèle bè tɛ́ni ni nī lè. 2 Kire tunduro dáà mi bé kɛn yeli mɛ́ dè mi je ti juu kire ga buu muɔ de fìʔɛ́ Yewe muɔ Kulocɛliɛ nɛ̄ wè, bè wi fànʔa kele nɛ́ wi kajuudiʔɛlɛ cò gèle muɔ sìi cɛnyɛ yi mìɛni nī yè. Kiyē muɔ wuʔulo, nɛ́ ní muɔ pìile wuʔulo, nɛ́ peli pìile wuʔulo. Bɛ̀ ki bé kpíʔile yeli bé sìitɔniwɔ taa.3 «-Ti sɔ́migɔ ma lúʔu, Isirayɛli ! Ma siɛnrɛ dáà cò dè cɛ̀ngɛ bèri ti tári, kire ga buu yeli- puu fundaanra nɛ̄, yeli sí niʔɛ kùlo náà nī nɛ̀yirimɛ nɛ́ sárigɛ kiī nɛ fúu gèa, majo bɛ̀ Yewe yeli tobilo Kulocɛliɛ, wi 'ni nyuɔ kún nɛ̀ kɛn yeli mɛ́ gè.
4 «-Ti sɔ́migɔ ma lúʔu, Isirayɛli ! Yewe wiī weli Kulocɛliɛ, Yewe nigbe wīb. 5 Muɔ bé Yewe muɔ Kulocɛliɛ woli yaʔa lè ni- muɔ dɛ́ni nɛ́ muɔ fungo ki mìɛni ní, nɛ́ muɔ pìle ni mìɛni ní, nɛ́ muɔ ŋɔri ti mìɛni níc.»
Ma muɔ pìile tɛnmɛ bèle kele gálì nɛ̄ gèle
6 «Siɛnrɛ dáà mi nɛ nyu nɛ gbɛ̀ngí muɔ mɛ́ pàngɛ gè, ma ti sɛbɛ muɔ fungo nī gèd. 7 Te muɔ pìile tɛnmɛ bèle ti nɛ̄. Mari ti nyu pe mɛ́ muɔ saʔa nī gè, a muɔ nɛ tári koligo nɛ̄ gè, a muɔ 'sínɛ wè, nɛ́ a muɔ 'yɛ̀ wè. 8 Muɔ bé ti puɔ muɔ kɔli nɛ̄ gè bɛ̀ fìɛ tíɛlɛ, bé ti sɛbɛ bè ti puɔ muɔ gbɛlɛ nɛ̄ lè, kire ga buu muɔ fǎga fìʔɛ nɛ́ ti níe. 9 Muɔ bé ti sɛbɛ muɔ saʔa wìile nɛ̄ lè, kàliige mɛ́, kàmɛgɛ mɛ́, nɛ́ naamɛ mɛ́, nɛ́ muɔ kàʔa wìʔile jíindiɛyɛ nɛ̄ yè.»
Te Yewe nigbe gbùʔɔrɔ́ !
10 «A Yewe muɔ Kulocɛliɛ wi kɛ́nì muɔ nyɔ́gɔ kùlo nī lè nàa wori wi 'juu nɛ́ kàli nɛ̀ kɛn muɔ tuu Birayima mɛ́ wè, nɛ́ Siaga ní wè, nɛ́ Yakuba ní wè, nɛ́ jo wire bé ni kɛn muɔ mɛ́ lè, muɔ bé sa kàaya nyaa baa kpoliyo, yi ní cɛnyɛ, nyàa muɔ sì faan yèʔf; 11 nɛ́ saaya ní nyàa yiī nyìyɛ nɛ́ yacɛ̀nrɛ ní dè, dàa muɔ kɔli sì caa dèʔ, nɛ́ pìndiʔɛlɛ ní gàli yeli sì túgu gèleʔ, nɛ́ ɛrɛzɛn siiye ní nɛ́ wolivi tiire ní dàa yeli sì cɔ́ri dèʔ. A muɔ kɛ́nì káa nɛ̀ tín wè, 12 te mìɛ ciʔige díɛʔ muɔ fǎga fìʔɛ nɛ́ Yewe ní wèʔ, wire ŋáà wi 'muɔ yige Ezipiti kùlo nī lè, baa muɔ yé puu sùkulomɔ nɛ̄ bè.
13 «Yewe muɔ Kulocɛliɛ, wire nɛ̄ muɔ 'yɛli bèri fìʔɛ́, wire nigbe mɛ́ muɔ 'yɛli bèri baara, wire nigbe míʔɛ nɛ̄ muɔ 'yɛli bèri kàlíg. 14 Yeli sì yɛli bàga kulocɛliɛ wáà gbùʔɔrɔʔ, kire 'jo bè pe yasungo káà nigbe gbùʔɔrɔ siɛnnɛ bálì pe yasunro nī dèʔ, bàli pe 'yeli màʔa bèle. 15 Nɛ́ ki cɛ́n Kulocɛliɛ wiī yejaʔafɔli, Yewe muɔ Kulocɛliɛ wè, ŋàa wī yeli sunʔɔmɔ nī bè. Muɔ bága ki yaʔa wi fungo ki bé yɛ̀ muɔ kúrugu; wi bé muɔ cɛrigɛ bè yige dàala nɛ̄ lè. 16 Yeli sì yɛli bè Yewe yeli Kulocɛliɛ puu wè bè wéliʔ majo bɛ̀ yeli cé ki kpíʔile Masa tiʔɛ nī gèh.
17 «Yeli 'yɛli bè Yewe yeli Kulocɛliɛ kajuudiʔɛlɛ cò gèle cɛ̀ngɛ, nɛ́ wi fànʔa kele ní gèle, nɛ́ wi nyakungɛngɛ siɛnrɛ ní dè dàa wi 'juu nɛ̀ gbɛ̀ngɛ muɔ mɛ́ dè. 18 Yeri kasingele kpínʔini gàli ke 'nyuɔ Yewe yiʔɛ mɛ́ gè, kire ga buu yeli- puu fundaanra nɛ̄, dí yeli sí jáa bè kùlo líɛ lè nàa nī tàanna lè, nàa wuʔu nɛ̄ Yewe kàli nɛ́ jo wi bé ni kɛn yeli tuuliɛyɛ mɛ́ yè, 19 dí yeli sí gbɛ̀ jáa yeli leguulo pe mìɛni cìra majo bɛ̀ Yewe 'ki juu gè.
20 «Cɛnyɛ nyáà yi báan yè, a muɔ pìile kɛ́nì pɛ́nì muɔ yúgo wè nɛ́ jo: ‹Ki kɔri wire wī ŋíi, nyakungɛngɛ siɛnrɛ nɛ́ fànʔa kele ní gèle nɛ́ kàyuʔujuuro ní dè dàa Yewe weli Kulocɛliɛ 'juu nɛ̀ gbɛ̀ngɛ yeli mɛ́ dè ?›, 21 muɔ 'yɛli bè ki juu muɔ pìile mɛ́ bèle bé jo:
« ‹Weli cé puu sùkulomɔ nɛ̄ Farawɔn mɛ́ wè Ezipiti kùlo nī lè, a Yewe 'weli yige kire kùlo nī lè nɛ́ wi ŋɔri kɔli ní gè. 22 Yewe wi 'fìɛkpolilo nɛ́ kakpoliyo kpíʔile weli mɛ́ weli nyaamɛ nɛ̄, nɛ̀ wuʔɔgboliyo cáan Ezipiti kùlo nɛ̄ lè nɛ́ Farawɔn nɛ́ wi kpáa wuulo nɛ̄ bèle. 23 Nɛ̀ ki yaʔa weli bèle, a wi 'weli yige kire tiʔɛ nī gè nɛ̀ pɛn nɛ́ weli ní náʔa gè, nɛ̀ pɛ́nì kùlo náà kɛn lè weli mɛ́, nàa nyuɔ wi yé kún nɛ̀ kɛn weli tuuliɛyɛ mɛ́ yè. 24 A Yewe sí ki juu nɛ̀ gbɛ̀ngɛ weli mɛ́ nɛ́ jo weri tári bèri yɛligi nɛ́ fànʔa kele gálì ní gèle, weri Yewe weli Kulocɛliɛ fìʔɛ́ wè, kire ga buu weli- puu fundaanra nɛ̄ cɛnyɛ yi mìɛni nī, dí wire sí weli yaʔa sìi nɛ̄, majo bɛ̀ ki yē weli mɛ́ pàngɛ gè. 25 Weli bé puu siɛnsinminɛ a weli 'fɔ̀li ki nɛ̄ nɛ lúru wi kajuudiʔɛlɛ ke mìɛni mɛ́ gèle Yewe weli Kulocɛliɛ yiʔɛ mɛ́ gè majo bɛ̀ wi 'ki juu nɛ̀ gbɛ̀ngɛ gè.› »