Misa 'kajuudiʔɛlɛ kiɛ tìɛ gèle
5
1 A Misa 'Isirayɛliyé siɛnnɛ yeri bèle nɛ̀ gbuʔulo nɛ̀ ki juu pe mɛ́ nɛ́ jo: «-Ti sɔ́migɔ ma lúʔu, Isirayɛli ! M'bé fànʔa kele nɛ́ kàyuʔujuuro juu dè yeli mɛ́ pàngɛ gè. Yeri ti lúru yeri ti tɛnmɛ, ye- ti cò cɛ̀ngɛ, yeri ti tári. 2 Yewe weli Kulocɛliɛ wè, wi 'nyakungɛngɛ kpíʔile nɛ́ weli ní baa Worɛbi nyagurugo mɛ́ gèa. 3 Weli tobilo yákuɔ ní bɛ̀ʔ Yewe yé nyakungɛngɛ kpíʔile gèʔ. Weli míɛni ní wī, weli bálì bīɛlɛ pàngɛ gè sìi nɛ̄ wè. 4 Yewe 'juu nɛ́ yeli ní nyuɔ nɛ́ nyuɔ baa nyagurugo nɛ̄ gè, kàsun sunʔɔmɔ nī bè. 5 Mi 'puu yeli nɛ́ Yewe sunʔɔmɔ ní bè, bè Yewe siɛnrɛ juu dè yeli mɛ́. Nɛ́ ki cɛ́n kàsun yiʔɛ mɛ́ gè, yeli 'puu nɛ fìʔɛ́, yeli sì yé fɔ̀li nɛ̀ tánʔa nyagurugo nɛ̄ gèʔ. Ti n'dɛ Yewe wi siɛnrɛ dè:6 «Mi yē Yewe, muɔ Kulocɛliɛ wè. Mi wī muɔ 'yige Ezipiti kùlo nī lè, kire tiʔɛ nī muɔ 'puu sùkulomɔ nɛ̄ bèb.
7 «Ma fǎga kulocɛliɛ wáà caa bè fàri mi nɛ̄ʔ.
8 «Ma fǎga yatɛngɛ káà kpíʔile bèri ki gbùʔɔrɔ́ʔ, kàa tíɛlɛ gàa gī nyìʔɛnɛ nī lèʔ, nɛ́ kàa tíɛlɛ gàa gī dàala nɛ̄ lèʔ, nɛ́ kàa ní gàa gī luʔɔ nī gè dàala táanmɛ gèʔ.
9 «Ma fǎga káguro cáan kire yɛrɛ dáà ti felide yiʔɛ mɛ́ gèʔ, muɔ míɛni sì yɛli bèri baara ti mɛ́ bèri ti sunguʔ. Nɛ́ ki cɛ́n mi Yewe wè, muɔ Kulocɛliɛ wè, mi yē Kulocɛliɛ ŋáà wī yejaʔafɔli wè; mi nɛ̂ tuufɔlilɔ pe kolimɔ tɔ́ri bè pe pìile kúrugu bèle, fúɔ bè taa kɛ̀ngɛlɛ taanriwoli nɛ́ sicɛriwoli nɛ̄ lè bàli pe 'cíi mi nɛ̄ bèle. 10 Nɛ̀ sí ki yaʔa mi yē Kulocɛliɛ ŋáà wiī nɛ bànguɔ dɛ́nigɛ nii nɛ́ siɛnnɛ ní bèle, bìli mɛ́ mi woli ni 'kpúʔɔ pe mɛ́ lè, á pe nɛ lúru mi kajuudiʔɛlɛ mɛ́ gèle, fúɔ bè sa nɔ̀ kɛ̀ngɛlɛ sirakogunɔwoli (1 000) nɛ̄ lè.
11 «Ma fǎga Yewe muɔ Kulocɛliɛ míʔɛ yeri gè waʔanɛʔ, nɛ́ ki cɛ́n Yewe bága kàyuʔu juu siɛn ó siɛn nɛ̄ ŋàa wi 'wi míʔɛ yeri gè waʔanɛ gè.
12 «-Mìɛ cò díɛʔ, te tɔ́ri nɛ́ cɛndɛnigɛ cɛngɛ ní gè; ma ki kpíʔile cɛnwalidɛngɛgɛ Yewe mɛ́, majo bɛ̀ Yewe yeli Kulocɛliɛ 'ti juu nɛ̀ gbɛ̀ngɛ muɔ mɛ́ wè. 13 Muɔ bé muɔ baara ti mìɛni kúɔ dè cɛnyɛ kɔlini sunʔɔmɔ nī. 14 Gàa gī cɛnyɛ kɔlisiinwuʔu gè, kire cɛngɛ gè kiī cɛndɛnigɛ Yewe muɔ Kulocɛliɛ mɛ́. Ma fǎga baapile nigbe kúɔ kire cɛngɛ nī gèʔ, muɔ yo, muɔ jaa yo, muɔ póri yo, muɔ baakuɔwɔ nàguɔ nɛ́ ŋàa wī cɛliwɛ wè yo, muɔ nùɔ yo, muɔ sèfɛnnɛ yo, nɛ́ muɔ yajuʔu káà fáala, nɛ́ nabɔnwɔ wáà ní ŋàa wī yeli sunʔɔmɔ nī bè, kire ga buu muɔ baakuɔnaguɔ nɛ́ muɔ baakuɔcuɔ wi- ŋɔ́ daa bɛ̀ muɔ tíɛlɛ. 15 Muɔ 'yɛli bè sɔ̀ngi bè taa bè ki cɛ́n muɔ yé puu sùkulowo Ezipiti kùlo nī lè, a Yewe muɔ Kulocɛliɛ wi pɛ́nì muɔ yige nɛ́ wi ŋɔri kɔli ní gè gàa wi 'sáʔa gè. Kire kɛnmɛ nɛ̄ Yewe muɔ Kulocɛliɛ wi 'ki juu nɛ̀ gbɛ̀ngɛ nɛ́ jo ma cɛndɛnigɛ cò gè kpuʔɔ.
16 «Te muɔ tuu nɛ́ muɔ yàa kpóri wè, bɛ̀ Yewe muɔ Kulocɛliɛ wi 'ki juu nɛ̀ gbɛ̀ngɛ muɔ mɛ́ wè, kire ga buu muɔ sìi cɛnyɛ yi- niʔɛ dí kùlo ni- tɛ́ni muɔ nɛ̄, kùlo náà Yewe muɔ Kulocɛliɛ wi bé kɛn muɔ mɛ́ lèc.
17 «Ma fǎga siɛn kpúuʔd.
18 «Ma fǎga ceyuugo kpíʔileʔe.
19 «Ma fǎga kàyuugo kpíʔileʔ.
20 «Ma fǎga finɛ daʔa muɔ siɛnnyɛni nɛ̄ʔ.
21 «Ma fǎga ki yaʔa muɔ siɛnnyɛni cuɔ wi láa muɔ taaʔ; muɔ fǎga nyabiɛnnɛ kpíʔile muɔ siɛnnyɛni saʔa nɛ̄ʔ, nɛ́ wi siʔi nɛ̄ʔ, nɛ́ wi baakuɔwɔ nɛ̄ʔ ŋàa wī nàguɔ wèʔ, nɛ́ wi baakuɔwɔ nɛ̄ʔ ŋàa wī cɛliwɛ wèʔ, nɛ́ wi nùɔʔ, nɛ́ wi sèfɛnnɛʔ, nɛ́ yɛgɛ ó yɛgɛ gáà gī muɔ siɛnnyɛni wuʔu gèʔf.
22 «Siɛnrɛ dáà dè, Yewe 'ti juu nɛ̀ tìɛ yeli tògo siɛnmɛ pi mìɛni nɛ̄ baa nyagurugo mɛ́ gè, kàsun nɛ́ kàsadibarɛ nɛ́ yebiliwuɔlɔ dɛ́ndɛn sunʔɔmɔ nī bè, nɛ́ yékpogbuɔlɔ ní; wiì tàa fàri ti nɛ̄ʔ. Wi 'ti sɛbɛ kàdɛnitɛnyɛ siin nɛ̄ nɛ̀ kɛn m'mɛ́g.
23 «Bà yeli kɛ́nì yékpoli lúʔu lè yebiliwuɔlɔ sunʔɔmɔ nī bè, nyagurugo ki mìɛni ní kàsun gè, a yeli pɛ́nì yìye tìɛ mi nɛ̄, kire 'jo yeli saaya tùluyo kàfɔlilɔ bèle, nɛ́ yeli liɛlɛ ní bèle, 24 a pe 'ki juu mi mɛ́ yeli sìndiʔɛ nī nɛ́ jo: ‹Yewe weli Kulocɛliɛ wi 'ki yaʔa a weli 'wi kpuɔmɔ nɛ́ wi kpuʔɔrɔ nyaa dè, a weli 'wi yékpoli lúʔu lè baa kàsun sunʔɔmɔ nī bè. Kire cɛngɛ gè a weli 'ki nyaa Kulocɛliɛ bé gbɛ̀ juu nɛ́ siɛn ní, nɛ̀ ki yaʔa siɛn wiì kùuʔ. 25 Píra ŋáà nī wè, gáa nɛ̄ kàsunkpuʔɔ gáà ki bé weli sórigo bè kpúu ? Nɛ́ míɛni a weli 'kò nɛ Yewe weli Kulocɛliɛ yékpoli náà lúru lè, weli bé kùu wīh. 26 Siɛn yē bile bɛ̀ weli tíɛlɛ lé, ŋàa wi 'Kulocɛliɛ wewiiwe yékpoli lúʔu lè nɛ̀ nyaa kàsun sunʔɔmɔ nī bè nɛ́ kò sìi nɛ̄i ? 27 Muɔ Misa wè, sìʔɛrɛ ma kpɔni Yewe weli Kulocɛliɛ nɛ̄ wè, ma lúʔu wi mɛ́ gàa wi nyu gè, má pa wi siɛnrɛ juu dè weli mɛ́. Weli bé ti lúʔu bé sí ti kpíʔile.›
28 «A Yewe 'siɛnrɛ lúʔu dè dàa yeli yé juu m'mɛ́ dè, a wi 'mi yɛ: ‹Mi nyɛ́nì siɛnnɛ bálì siɛnrɛ lúʔu dè dàa pe 'puu nɛ nyu muɔ mɛ́ dè. Tànʔa yē pe mɛ́ gàa pe 'juu gè. 29 Cí ! A ki sí yé nyaa pe funyɔ yi yé gbòbori nɛ̀ yaʔa pe fìʔɛ́ mi nɛ̄ wè béri mi kajuudiʔɛlɛ kpínʔini gèle cɛngɛ ó cɛngɛ gè, kire ga buu ki- tɛ́ni pe nɛ̄, peli nɛ́ pe pìile ní bèle lɛ̀lɛ ó lɛ̀lɛ nī ! 30 Te waa ma sa ti juu pe mɛ́, pe- koli pe jíin fɛ̀ni saaya nī yè. 31 Muɔ wè, ma yéri mi yiʔɛ mɛ́ náʔa gè; mi bé kajuudiʔɛlɛ nɛ́ fànʔa kele nɛ́ kàyuʔujuuro ti mìɛni juu muɔ mɛ́, muɔ sa pe tɛnmɛ ti nɛ̄ peri ti kpínʔini kùlo nī lè nàa m'bé kɛn pe mɛ́ pe- ni líɛ peli woli lè.›
32 «Yeli bé ti sɔ́migɔ cò dàa Yewe yeli Kulocɛliɛ wi 'juu nɛ̀ gbɛ̀ngɛ dè. Yeli sǐ ga tíi wàli kàliige mɛ́ʔ kire ga laa kàmɛgɛ mɛ́ʔ. 33 Yeli bé sɔ́migɔ bè tánʔa koligo nɛ̄ gè gàa Yewe yeli Kulocɛliɛ wi 'juu nɛ̀ gbɛ̀ngɛ nɛ́ jo mari ki tari gè, kire ga buu yeli- kò sìi nɛ̄, dí ki sí tɛ́ni yeli nɛ̄ nɛ́ míɛni yeli sìi cɛnyɛ yi- sí niʔɛ kùlo nī lè nàa m'bé kɛn yeli mɛ́ lè.»