3
1 A Misa wi ń'nɛ̀ ki juu nɛ́ joa: «A weli 'koli nɛ̀ yiʔɛ nɛ waa Basan kùlob kɔli mɛ́ gè, cɛngɛnyɛnifolimɛ kàmɛgɛ kɔli mɛ́ gè. A Ɔgic, Basan kùlofɔli wè, a wire 'yiri nɛ̀ weli kpàli nɛ́ wi kapiɛngbuɔnnɔ pe mìɛni ní, bè kapiɛnnɛ kpúɔn nɛ́ weli ní Ɛdirɛyi kàʔa nī gè. 2 A Yewe 'ki juu m'mɛ́ nɛ́ jo: ‹Fǎga de fìʔɛ́ wi nɛ̄ʔ, nɛ́ ki cɛ́n mi nyɛ́nì wi le muɔ kiyɛ nī yè, nɛ́ wi kapiɛngbuɔnnɔ pe mìɛni ní, nɛ́ kùlo ní lè. Muɔ bé wi kpíʔile kɛnmɛ bíì nɛ̄ muɔ cé Sikɔn cò wè, Amɔriyé kùlofɔli wè, wire ŋáà wi 'puu tɛ́niwɛ Kɛsibɔni kàʔa nī gè.›3 «A Yewe weli Kulocɛliɛ wi 'Basan kùlofɔli Ɔgi le wè weli kiyɛ nī míɛni nɛ́ wi kapiɛngbuɔnnɔ pe mìɛni ní bèle, a weli 'pe jáa; siɛn nigbe sì cɛ́nì suɔ pe nīʔ. 4 Kire lɛ̀lɛ nī lè, a weli 'ki kàaya nyáà yi mìɛni líɛ; kàa nigbe sì kòʔ. A yi 'kúɔ kàaya togotaanri, Arigobi tɛ́nimɛ pi mìɛni nī bè, baa Basan kùlo nī lè. Kire tiʔɛ nī gè Ɔgi wire wi yé puu ki kùlofɔli wè. 5 Kàaya yi mìɛni 'yi puu gunzuluyo ní yè, lìriye nɛ́ ní kpàʔaliyɛ, nɛ́ ki kɔ̀riyɔ ní yè sùʔɔyɔ nɛ́ timɔri kpèliye ní. Vòniʔɛrɛ 'puu baa míɛni nyàa piyè yé sùlu yèʔ. 6 Kàaya nɛ́ vòyo nyáà yè nɛ́ yi nàguɔlɔ ní bèle, nɛ́ yi cɛlilɛ ní bèle, nɛ́ yi pìile ní bèle, a weli 'yi mìɛni láʔa yè nɛ̀ kɛn Yewe mɛ́ nɛ̀ yi cúʔɔ nɛ̀ yige baa péwu, majo bɛ̀ weli cé ki kpíʔile Kɛsibɔni kàʔa tɛ́nimɛ nī bè, gàa nī Sikɔn yé puu kùlofɔli wè. 7 A weli 'kàaya fùʔuro yè péwu nɛ́ yajuuro líɛ dè kapiɛngbuɔn tɔ̀ni.
8 «Amɔriyé tɛ́nimɛ nī bè, Zurudɛn cáʔa lìʔɛlɛ nī lè cɛngɛnyɛnifoligɔli mɛ́ bè, baa kùlofɔlilɔ bálì pe siin pe 'puu bèle, Sikɔn nɛ́ Ɔgi ní wè. Kire tiʔɛ tɛ́nimɛ pi yé séli Arinɔni kápaligɛ tiʔɛ nī gè cɛngɛnyɛnifolimɛ kàliige kɔli mɛ́ gè, fúɔ nɛ̀ sɛ́nì nɔ̀ Ɛrimɔ nyagurugo nɛ̄ gè cɛngɛnyɛnifolimɛ kàmɛgɛ kɔli mɛ́ gè. Kire lɛ̀lɛ lire nī, weli 'Amɔriyé kùlo tɛ́nimɛ pi mìɛni líɛ.»
9 Siidɔnyé, peli 'puu nɛ Ɛrimɔ nyagurugod yeri gè Siriyɔn nyagurugo, á Amɔriyé peli 'puu nɛ ki yeri Seniiri nyagurugo.
10 «A weli 'kàaya nyáà yi mìɛni líɛ nyàa yi 'puu nyagurugo sédali nɛ̄ wè, fúɔ nɛ́ sɛ́nì nɔ̀ Galaadi kùlo nɛ̄ lè nɛ́ Basan kùlo ní lè, nɛ̀ màʔa nɛ́ sɛ́nì nɔ̀ Salika kàʔa nɛ̄ gè nɛ́ Ɛdirɛyi kàʔa ní gè; kire kàaya yi 'puu Basan kùlofɔli Ɔgi wi kùlofɔligɔ nī gè. 11 Basan kùlofɔli Ɔgi wè, wire nigbe wi yé kò sìi nɛ̄ Erefa siɛnkpaʔajɛ̀nminɛ nī bèle. Wi yasinɛgɛe ki 'puu timɔri wuʔu; ki yé puu baa Arabati kàʔa nī gè, Amɔyé wuʔu gè. Yasinɛgɛ ki tɔnigɛnmɛ pi yé puu kabuunyiʔɛnɛ kacɛri; ki píɛlɛgɛnmɛ ní bè kabuunyiʔɛnɛ sicɛri, nàguɔ kabuunyɛni tɔnigɛnmɛ.»
Misa yé kùlo náà liɛlɛ lè saaya tùluyo taanri nɛ̄ yè
12 «Kire lɛ̀lɛ nī lè, a weli 'kùlo náà ni mìɛni líɛ lè weli woli. Nɛ̀ líɛ Aroweri kàʔa láʔala nɛ̄ lè, gàa ki 'puu Arinɔni kápaligɛ táanni gè, nɛ́ Galaadi nyaguruyo kùlo tílaga ní gè nɛ́ ki kàaya ní yè, mi 'tiɛrɛ dáà kɛn dè Wurubɛniyé nɛ́ Gadiyé mɛ́ bèle.
13 «A mi 'Galaadi kùlo sɛnnɛ kɛn lè Manase saʔa tùlugo tílaga mɛ́ gè, nɛ́ míɛni Basan kùlo ni mìɛni kɛn pe mɛ́, nàa nī Arigobi tɛ́nimɛ bè; pi mìɛni yé puu kùlofɔli Ɔgi fànʔa láara gè. Kire tiʔɛ kire pe ye Erefayé kùlo lè. 14 Yayiiri wè, Manase wuu wè, a wire 'Arigobi tɛ́nimɛ pi mìɛni líɛ fúɔ nɛ̀ sɛ́ni nɔ̀ Gesuriyé nɛ́ Maʔakayé láʔala nɛ̄ lè. A wi 'wi míʔɛ le gè Basan kùlo ni vòyo nɛ̄ yè, a pe 'kò nɛ yi yeri Yayiiri vòyo fúɔ nɛ̀ pɛ́nì nɔ̀ pàngɛ nɛ̄ gè. 15 Manase jaa Makiiri siimɛ mɛ́ mi 'Galaadi kùlo kɛn lè.
16 «Tɛ́nimɛ báà pi 'puu Galaadi kùlo nɛ́ Arinɔni kápaligɛ sunʔɔmɔ ní bè, a mi 'pi kɛn Wurubɛni siimɛ mɛ́ bè nɛ́ Gadi siimɛ ní bè. Arinɔni kápaligɛ lakoligo ki 'puu tɛ́nimɛ pi láʔala lè cɛngɛnyɛnifolimɛ kàliige mɛ́ gè, a tɛ́nimɛ pi sɛ́nì nɔ̀ Yabɔki lakolibile kápaligɛ nɛ̄ gè, gàa ki 'puu Amɔyé kùlo láʔala lè.
17 «Saaya tùluyo nyáà taanri láʔagɛlɛ keli gīɛlɛ gàli gèle: cɛngɛnyɛnijiingɔli mɛ́ láʔala nɛ̄ lè nàa niī Zurudɛn cáʔa nɛ̄ gè waama kùlo kpàanjali nī wè, gàa ki yē Kinɛrɛti kuʔɔjiif nɛ́ Yasuʔɔniʔɛgɛ kuʔɔjii sunʔɔmɔ nī bè; cɛngɛnyɛnifoligɔli mɛ́ gè, láʔala ni 'puu Pisiga nyagurugo táanmɛ gè.
18 «Kire lɛ̀lɛ nī lè, a mi 'tunduro kɛn yeli mɛ́, yeli bálì bīɛlɛ kapiɛngbuɔnnɔ bèle, Wurubɛni wuulo bèle nɛ́ Gadi wuulo bèle nɛ́ Manase tílaga wuulo bèle, nɛ́ jo: ‹Yewe yeli Kulocɛliɛ wi nyɛ́nì kùlo náà kɛn lè yeli mɛ́, kire ga buu yeli- ni líɛ ni- kò yeli woli. Yeli bé kapiɛngbuɔn yɛrɛ líɛ dè bè kíni yeli siinyɛninɛ Isirayɛli siɛnnɛ yiʔɛ mɛ́ gèg. 19 Yeli cɛlilɛ nɛ́ yeli pìile peli yákuɔ, nɛ́ yeli yajuuniʔɛrɛ ní dè dàa mi 'cɛ́n yeli wori dè, tire ti bé kò bile kàaya nī yè nyàa mi 'kɛn yeli mɛ́ yè. 20 Yeli 'yɛli bè cáan fúɔ bè taa Yewe ba ŋɔ́daala kɛn yeli siinyɛninɛ mɛ́ bèle majo bɛ̀ wi 'ki kpíʔile yeli mɛ́ gè; peli míɛni sí ba pe kùlo taa lè nàa Yewe yeli Kulocɛliɛ bé kɛn pe mɛ́ lè, Zurudɛn cáʔa kayɔbigɔ gíì mɛ́ gè. Kire kàduʔumɛ yeli bé nɛ́ koli bè sa tɛ́ni yeli kɔrigɔ nī gè gàa mi cé kɛn yeli mɛ́ gè.›
21 «Kire lɛ̀lɛ nī lè, a mi 'ki juu nɛ̀ gbɛ̀ngɛ Yesuwe mɛ́, nɛ́ wi yɛ: ‹Muɔ nyapigele ke nyɛ́nì ki nyaa gàa Yewe yeli Kulocɛliɛ wi 'kpíʔile Amɔriyé kùlofɔlilɔ bálì siin nɛ̄ bèle. Bɛ̀ sí Yewe bé kùlofɔliyɔ nyáà yi mìɛni kpíʔile, nyàa yeli bé nyaa yè Zurudɛn cáʔa lìʔɛlɛ nī lè cɛngɛnyɛnijiingɔli mɛ́ gè. 22 Ye fǎga de fìʔɛ́ pe nɛ̄ʔ ! Nɛ́ ki cɛ́n Yewe yeli Kulocɛliɛ wire wi bé kapiɛnnɛ kpúɔn lè yeli mɛ́.› »
Yewe sì yé yéri ki nɛ̄ʔ Misa wi- jiin kùlo nī lèʔ
23 «Kire lɛ̀lɛ náà nī lè, a mi 'Yewe fiɛn wè kpuʔɔ nɛ́ joh: 24 ‹Kàfɔli Yewe, muɔ nyɛ́nì séli nɛ̀ ki tìɛ mi nɛ̄, mi ŋáà wī muɔ baakuɔwɔ wè, muɔ kpuɔmɔ nɛ́ muɔ ŋɔri kɔli gè. Kulocɛliɛ wáà ní yē baa lé, nyìʔɛnɛ nɛ́ dàala nī lè, ŋàa wi bé ní gbɛ̀ muɔ baara nɛ́ muɔ kakpoliyo kpíʔile yè ? 25 Mi nɛ muɔ fiɛn wī, -mi yaʔa mi- sa kùtaanna náà nyaa lè, Zurudɛn cáʔa kayɔbigɔ gíì nɛ̄ gè, kire kùlo náà niī baa nyagurucɛ̀nyɛ nī yè, nɛ́ Liban nyaguruyo ní yè.›
26 «Nɛ̀ ki yaʔa Yewe fungo ki yé yɛ̀ mi kúrugu yeli kɛnmɛ nɛ̄ bè; wiì fɔ̀li nɛ̀ lúʔu mi mɛ́ʔ ! A Yewe 'mi yɛ: ‹-Nyuɔ tɔ́n gè ! Fǎga ní siɛnrɛ dáà juu dè m'mɛ́ʔ ! 27 Tánʔa Pisiga nyagurugo naamɛ gè ma nɔ̀ ki mijuulo nɛ̄ lè, ma yiʔɛ yɛ̀gɛ gè ma wéli cɛngɛnyɛnifolimɛ kɔli mɛ́ gè, nɛ́ ni kàmɛgɛ kɔli mɛ́ gè, nɛ́ ni kàliige kɔli mɛ́ gè, nɛ́ cɛngɛnyɛnijiinmɛ kɔli mɛ́ gè, nɛ́ ki yaʔa muɔ sǐ ga tíi Zurudɛn cáʔa jeli gèʔ. 28 Ma tunduro kɛn dè Yesuwe mɛ́ wè, ma lèbaanna nɛ́ ŋɔri nyɔ́gɔ wi nī, nɛ́ ki cɛ́n wire wi bé siɛnnɛ bálì yiʔɛ kíni gè bè Zurudɛn cáʔa jeli gè. Wire wi bé kùlo náà kɛn lè pe mɛ́ kɔrigɔ, nàa muɔ nɛ nyaʔa lè.›
29 «Kire nɛ̄ a weli 'kò kpàanjali nɛ̄ wè ŋàa wi 'puu Beti Peyɔri tiʔɛ yiʔɛ mɛ́ gè.»