Nyakungɛngɛ nɛ́ kàlilɛ wori dè
30
1 A Misa 'fali nɛ̀ ki juu Isirayɛli siɛnnɛ mɛ́ bèle dàa ti mìɛni Yewe yé juu nɛ̀ gbɛ̀ngɛ wi mɛ́ dè.2 A Misa sí ki juu Isirayɛliyé saaya tùluyo kàfɔlilɔ mɛ́ bèle nɛ́ jo: «Ti n'dɛ dàa Yewe juu nɛ̀ gbɛ̀ngɛ dè:
3 «A ki yē nàguɔ wáà 'nyuɔ kún nɛ̀ kɛn Yewe mɛ́ wè, kire ga laa a wi 'kàli nɛ̀ wìi puɔ kaala láà nī lè, wiì yɛli bàga kire kàlilɛ cúʔɔ lèʔ; dìi ti mìɛni ti 'yiri wi nyuɔ nī gè, wi 'yɛli bè ti kpíʔilea.
4 «A ki sí nyaa cɛliwɛ wáà 'nyuɔ kún nɛ̀ kɛn Yewe mɛ́ wè, kire ga laa a wi nyasiɛnrɛ ti 'wi puɔ kaala láà nī, á ki sí nyaa wiī nɛ tíin sinboriwo nɛ́ sí ní wi tuu kpáa nī gè, 5 a ki yē wi tuu wi 'ti lúʔu dí wi nyɛ́nì nyuɔ kún nɛ̀ kɛn wè, kire ga laa a wi 'wìi puɔ wi nyasiɛnrɛ nī dè nɛ́ kaala láà ní lè, a tuufɔli wiì yakaa juu wèʔ, sinboriwo wi nyakungɛngɛ kiǐ gbɛ̀ yaʔaʔ; nyasiɛnrɛ dáà ti mìɛni ní wire tíimɛ wi 'wìi puɔ dè, wi bé ti kpíʔile wī. 6 A ki sí nyaa tuufɔli wi 'jo ʔúnʔun cɛngɛ gíì wi 'ti lúʔu dè, nyakungɛngɛ gáà nɛ́ nyasiɛnrɛ dáà ní wi 'wìi puɔ kaala láà nī lè, tiǐ ga tíi còʔ. Yewe bé ki yaʔa wi nɛ̄, nɛ́ ki cɛ́n wi tuu wiì yéri ki nɛ̄ʔ.
7 «A ki sí nyaa sinboriwo wi 'kò nàguɔ cuɔ wè, nɛ̀ ki yaʔa wi yé nyuɔ kún nɛ̀ kɛn nɛ̀ kúɔ wè, á kire ga laa wi yé siɛnrɛ táà juu nɛ̀ wìi puɔ kaala láà nī lè, 8 a wi pɔli wi 'ti lúʔu dè, nɛ̀ ki yaʔa wiì yafiɛn juu wèʔ, wi nyakungɛngɛ nɛ́ wi nyasiɛnrɛ dáà ní wire tíimɛ 'wìi puɔ kaala láà nī lè, wi 'yɛli bè ti fori wī.
9 «Nɛ̀ sí ki yaʔa a ki yē cɛngɛ gíì wi pɔli wi 'ti lúʔu dè, a wi 'jo ʔúnʔun kire cɛnnugo gè, labɔli wi bé nyakungɛngɛ siɛnrɛ dáà kúɔ dè dàa cɛliwɛ wire tíimɛ 'juu nɛ̀ wìi puɔ nɛ́ ti ní dè, dàa ti 'suɔ wi nyuɔ nī gè, bà Yewe bé ki yaʔa wi nɛ̄.
10 «A ki sí nyaa lakicuɔ wáà wī, kire ga laa cɛliwɛ ŋáà pe 'cìra wè, a ki 'nyaa peli wáà 'nyakungɛngɛ kpíʔile nɛ̀ wìi puɔ kaala láà nī lè, wi 'yɛli bè ki fori.
11 «A ki sí nyaa nàguɔ cuɔ wi 'nyakungɛngɛ kpíʔile gè, nɛ̀ ki yaʔa wi yē wi pɔli kpáa nī gè, kire ga laa a wi 'kàli nɛ̀ kɛn nɛ́ wìi puɔ ki ní, 12 a ki sí nyaa wi pɔli wi 'ti lúʔu dè nɛ́ pìiri, wiì jo ʔúnʔun wèʔ, nyakungɛngɛ ki 'yɛli bè fori, nɛ́ nyasiɛnrɛ dáà ní cɛliwɛ wire tíimɛ 'wìi puɔ dè kaala láà nī lè, wi bé ti fori. 13 A ki sí nyaa cɛngɛ gíì nàguɔ wi 'ti lúʔu dè a wi 'cíi wi nyakungɛngɛ nɛ̄ gè, nɛ́ wi nyasiɛnrɛ dáà ní wire tíimɛ 'wìi puɔ dè kaala láà nī lè, wi pɔli wi nyɛ́nì ki siɛnrɛ kúɔ dè, bà Yewe bé ki yaʔa cɛliwɛ nɛ̄ wè.
14 «Bà ki bé puu, nyakungɛngɛ nɛ́ kàlilɛ náà ní cɛliwɛ wire tíimɛ 'wìi puɔ kaala láà nī lè, bè cíi yakaa nɛ̄ʔ, wi pɔli wi bé gbɛ̀ ti yaʔa ti- fori kire ga laa wi bé gbɛ̀ kàlilɛ kpúu lè. 15 Nɛ̀ ki yaʔa a labɔli wi 'pìiri á cɛnyɛ yiī nɛ tóri yè, wiì yakaa juu wi cuɔ mɛ́ wèʔ, kire ki 'tìɛ wi 'yéri cɛliwɛ wi nyakungɛngɛ nɛ̄ gè nɛ́ nyasiɛnrɛ dáà ní cɛliwɛ wire tíimɛ 'wìi puɔ dè nɛ́ kaala láà ní. Wi yé yéri ki nɛ̄ nɛ́ ki cɛ́n cɛngɛ gíì wi 'ti lúʔu dè, wiì yakaa juuʔ. 16 A ki 'nyaa labɔli wi 'ti lúʔu dè, a wi 'ki yaʔa kire cɛngɛ ki tóri gè, nɛ́ nɛ́ péli nɛ́ wi nyasiɛnrɛ kpúu dè, cɛliwɛ wi kolimɔ pi bé tuu wi pɔli nɛ̄ wè.»
17 Tire yē fànʔa kele gálì Yewe 'juu nɛ̀ gbɛ̀ngɛ Misa mɛ́ wè, cɛliwɛ nɛ́ wi pɔli kɔli mɛ́ gè, nɛ́ sinboriwo nɛ́ wi tuu kɔli mɛ́ gè a sinboriwo wiī nɛ tíin wi tuu kpáa nī gè.