Madiyanyé kapiɛnnɛ wori dè
(31.1-54)
Isirayɛliyé pe 'kapiɛnnɛ cáan Madiyanyé nɛ̄ bèle
31
1 A Yewe 'ki juu Misa mɛ́ nɛ́ jo: 2 «Te waa ma sa fuʔɔ tɔ́n gè Madiyanyé mɛ́ bèle, kapiile náà pe yé kpíʔile Isirayɛli siɛnnɛ nɛ̄ bèle. Kire kàduʔumɛ muɔ bé nɛ́ kùu bè kɛ́ muɔ tuuliɛyɛ kúrugu yè.»3 A Misa 'ki juu Isirayɛli siɛnnɛ mɛ́ bèle nɛ́ pe yɛ: «Yeri waa ye sa nàguɔlɔ pálì nyíɛnɛ ye kɔ̀n, pe- kapiɛngbuɔn yɛrɛ líɛ dè peri waa pe sa tuu Madiyan siɛnnɛ nɛ̄ bèle, bè Yewe fuʔɔ tɔ́n gè Madiyan kùlo mɛ́ lè. 4 Yeli bé siɛnnɛ sirakogunɔ (1 000) nyíɛnɛ bè kɔ̀n Isirayɛli saʔa tùlugo ó tùlugo nī, bè pe tun.»
5 A pe sí pe nyíɛnɛ nɛ̀ kɔ̀n Isirayɛliyé siɛnniʔɛbobo nī bè, siɛnnɛ sirakogunɔ, saʔa tùlugo ó tùlugo nī, a pe mìɛni bìnɛ wi pɛ́nì nyaa siɛnnɛ siramuʔɔyɔ taanri (12 000), bàli pe yé gbòbori nɛ̀ yaʔa wè bè kɛ́ kapiɛnnɛ mɛ́ lè. 6 A Misa 'pe tun pe- sa tuu pe nɛ̄, siɛnnɛ sirakogunɔ (1 000) nɛ̂ yiri saʔa tùlugo ó tùlugo nī. Kacuɔnriwɔ Eleyazari jaa Finɛyasi wèa, wi 'puu nɛ́ pe ní. Wire wi yé Yewe Kòridiʔɛ yɛrɛb tugo dè pe kúrugu, nɛ́ kàkpaanyac ní yè nyàa pe béri wíi bèri fìɛlɛ tìí bèle.
7 A pe 'kɛ́ nɛ̀ sɛ́nì tuu Madiyan kùlo nɛ̄ lè, majo bɛ̀ Yewe cé ki juu nɛ̀ gbɛ̀ngɛ Misa mɛ́ wè. A pe 'nàguɔlɔ pe mìɛni kpúu bàli pe yé puu kapiɛnnɛ tiʔɛ nī gè. 8 Nɛ̀ fàri bàli nɛ̄ pe yé kpúu bèle kapiɛnnɛ nī lè, a pe 'Madiyan kùlo kàfɔlilɔ bálì kogunɔ kpúu bèle míɛni: peli pe 'puu Evi, Erekɛmi, Zurid, Kuri, nɛ́ Ereba. A pe 'Beyɔri jaa Balaami kpúu wè míɛni nɛ́ kapiɛngbuɔn ŋɔsii ní wèe.
9 A Isirayɛli siɛnnɛ pe 'Madiyan kùlo cɛlilɛ cò bèle nɛ́ pe pìile ní bèle, nɛ́ míɛni yajuuro tòyo yi mìɛni cò, nɛ́ pe kɔliyɛrɛ ti mìɛni koli. 10 A pe 'kàaya yi mìɛni sórigo nɛ́ vòyo ní yè nyàa nī siɛnnɛ pe 'puu bèle, 11 a pe 'kɛ́ nɛ́ yɛrɛ ní dè, nɛ́ yajuuro ní dè, nɛ́ siɛnnɛ ní bèle bàli pe yé cò bèle. 12 Siɛnnɛ bálì pe 'cò kapiɛnnɛ tiʔɛ nī gè, nɛ́ yajuuro ní dè, nɛ́ yɛrɛ ní dè, a pe 'ti líɛ nɛ̀ kɛ́ bè sa ti kɛn Misa nɛ́ kacuɔnriwɔ Eleyazari nɛ́ Isirayɛli tògo siɛnnɛ mɛ́ bèle, baa bùguro mɛ́ dè. Pe yé ti kpúɔn Mowabi waama kùlo kpàanjali nɛ̄ wè, baa Zurudɛn cáʔa táanni gè, Zeriko kàʔa yiʔɛ mɛ́ gè.
Jígemununɔ kakuɔrɔ dè kapiɛnnɛ kàduʔumɛ gè
13 Misa wè, nɛ́ kacuɔnriwɔ Eleyazari ní wè, nɛ́ Isirayɛli tògo kàfɔlilɔ ní bèle, a pe 'yiri bùguro nī dè nɛ̀ sɛ́nì pe kpàli. 14 A Misa fungo ki 'yɛ̀ kpuʔɔ kapiɛngbuɔnnɔ kàfɔlilɔ kúrugu bèle, bàli pe 'puu siɛnnɛ sirakogunɔgunɔ (1 000) kàfɔlilɔ bèle, nɛ́ siɛnnɛ dabataan (100) kàfɔlilɔ bèle, bà pe yé kɔ́n kapiɛnnɛ kpúɔndiʔɛ nī gè.
15 A Misa 'ki juu pe mɛ́ nɛ́ jo: «Cí ! Yeli 'fɔ̀li nɛ̀ cɛlilɛ bálì pe mìɛni yaʔa sìi nɛ̄ lé ? 16 Ye- ki wéli, peli bɛ̀ʔ lé pe 'taʔa Balaami siɛnrɛ nɛ̄ dè nɛ̀ Isirayɛli siɛnnɛ fáanni bèle nɛ̀ nyɔ́gɔ á pe 'kolimɔ baara dáà kúɔ dè Yewe nɛ̄ wè, Peyɔri kele wuʔu nɛ̄ gè, fúɔ a wuʔɔgbuʔɔ pɛ́nì tuu Yewe gboli nɛ̄ lèʔf ? 17 Píra ŋáà nī wè, ye- nàgabigele ke mìɛni kpúu pìile nī bèle. Ye- cɛlilɛ pe mìɛni kpúu bàli pe 'nàguɔlɔ kaala cɛ́n nɛ̀ kúɔ wè. 18 Kire nɛ̄, ye- sí pìcapigele yaʔa gèle sìi nɛ̄ yeli mɛ́, gàli kiyè fìɛ nàguɔlɔ kaala cɛ́n wèʔ.
19 «Yeli bálì sí bīɛlɛ, ye 'siɛn wáà kpúu nɛ̀ nyaa wè, kire ga laa nɛ̀ cò nɛ̀ taa kpúu wáà nɛ̄ wè, yeli 'yɛli bè kò cɛnyɛ kɔlisiin bùguro kàduʔu mɛ́ gè. Ye- yìye jíge yè cìile cɛnyɛ taanriwuʔu nɛ̄ gè nɛ́ cɛnyɛ kɔlisiinwuʔu ní gè, yeli nɛ́ siɛnnɛ bálì ní yeli yé cò bèle. 20 Yeli 'yɛli bè yeli burudo jíge dè ti cìile, nɛ́ yɛrɛ ní dè dàa dī sɛ̀ngɛ wori dè, nɛ́ fɛ̀ninɛ ní bèle bàli pe 'kpíʔile nɛ́ síkasiire ní dè, nɛ́ yakpiʔilide dáà pe 'tɛn dè.»
21 A kacuɔnriwɔ Eleyazari wi 'ti juu kapiɛngbuɔnnɔ mɛ́ bèle bàli pe yé kɔ́n kapiɛnnɛ kpúɔndiʔɛ nī gè, nɛ́ jo: «Ti n'dɛ fànʔa kele gálì kiyē Fànʔa Siɛnrɛ nī dè, dàa Yewe 'juu nɛ̀ gbɛ̀ngɛ Misa mɛ́ wè. 22 Dàa ti mìɛni dī tiɛ wè, nɛ́ walifiiwe, nɛ́ kányiɛrɛ, nɛ́ timɔri, nɛ́ káfiire, nɛ́ pilɔn, 23 dàa ti mìɛni ti bé gbɛ̀ jíin kàsun nī gè, yeli 'yɛli bè ti mìɛni le kàsun nī kire ga buu ti- cìile. Kire kàduʔumɛ gè yeli bé ní ti le jígemununɔ kakuɔrɔ luʔɔg nī gè bè ti cìile. Dìi sí ti wè kàsun sorigi wèʔ, yeli 'yɛli bè ti fuɔn jígemununɔ kakuɔrɔ luʔɔ nī gè. 24 Yeli bé yeli burudo jíge dè cɛnyɛ kɔlisiinwuʔu nɛ̄ gè, bà yeli bé cìile. Kire kàduʔumɛ gè yeli bé nɛ́ gbɛ̀ jíin bùguro nī dè.»
Pe 'kapiɛnnɛ tɔ̀ni yɛrɛ liɛlɛ dè
25 A Yewe 'ki juu Misa mɛ́ nɛ́ jo: 26 «Muɔ nɛ́ kacuɔnriwɔ Eleyazari ní wè, nɛ́ Isirayɛliyé tobilo kpáaya kàfɔlilɔ ní bèle, yeli bé yɛrɛ tɔ́ri dè dàa ní pe 'kɔ́n kapiɛnnɛ kpúɔndiʔɛ nī gè, siɛnnɛ bèle nɛ́ yajuuro ní dè. 27 Yeli bé yɛrɛ tíla dè kapiɛngbuɔnnɔ nɛ̄ bèle, bàli pe 'kɛ́ kapiɛnnɛ mɛ́ lè, nɛ́ míɛni Isirayɛli tògo siɛnnɛ ní bèle bàli pe 'kò bile wè.
28 «Muɔ bé Yewe liɛlɛ kɔ̀n lè kapiɛngbuɔnnɔ pe liʔɛlɛ nī gèle, bàli pe 'kɛ́ kapiɛnnɛ kpúɔndiʔɛ nī gè. Kasuulebile sirasiin dabataandaan (500) nī wè, muɔ bé siɛn nigbe kɔ̀n Yewe mɛ́. Yajuuro nī dè, nìɛyɛ yè nɛ́ sèfɛngɛlɛ ní gèle, nɛ́ sìnbaara ní dè, nɛ́ síkaala ní bèle, ti mìɛni sirasiin dabataandaan (500) nī wè, muɔ bé yajuʔu nigbe láʔa bè kɛn Yewe mɛ́. 29 Yeli bé ti kɔ̀n pe liʔɛlɛ nī gèle dàa dī pe wori dè, bè ti kɛn kacuɔnriwɔ Eleyazari mɛ́ wè; tire bé puu kpuʔɔrɔ dáà pe 'kɔ̀n nɛ̀ kɛn Yewe mɛ́ wè.
30 «Muɔ bé Yewe liɛlɛ kɔ̀n lè míɛni Isirayɛli tògo siɛnsɛnminɛ wori nī dè. Kasuulebile togosiin nɛ́ kpɔrigɔ ó kpɔrigɔ nī bèle, muɔ bé siɛn nigbe kɔ̀n Yewe mɛ́. Yajuuro nī dè, nìɛyɛ yè nɛ́ sèfɛngɛlɛ ní gèle nɛ́ sìnbaara ní dè nɛ́ síkaala ní bèle, ti mìɛni togosiin nɛ́ kpɔrigɔ ó kpɔrigɔ nī wè, muɔ bé yajuʔu nigbe láʔa bè kɛn Yewe mɛ́. Muɔ bé ti kɛn Leviiyé mɛ́ bèle, peli bálì pe Yewe Kòridiʔɛ baara kúu dè.»
31 A Misa nɛ́ kacuɔnriwɔ Eleyazari wè, a pe 'ti mìɛni kpíʔile dàa Yewe yé juu nɛ̀ gbɛ̀ngɛ Misa mɛ́ wè. 32 Dàa ti yé kɔ̀n kapiɛnnɛ tɔ̀ni yɛrɛ nī dè, dàa ní kapiɛngbuɔnnɔ pe yé pɛn bèle, tire yé puu sìnbaala nɛ́ síkaala siramuʔɔyɔ tekataanri nɛ́ kataanri nɛ́ sirakiɛ nɛ́ kogunɔ (675 000), 33 nìɛyɛ siramuʔɔyɔ kiɛ nɛ́ kataanri (72 000), 34 sèfɛngɛlɛ siramuʔɔyɔ kiɛ nɛ́ kogunɔ nɛ́ sirakogunɔ (61 000), 35 nɛ́ sinborilo bálì piyè cɛ fìɛ nàguɔ kaala cɛ́n lèʔ, peli siramuʔɔyɔ kataanri (32 000).
36 Sìnbaala nɛ̀ síkaala bèle, siramuʔɔyɔ togosicɛri nɛ́ sicɛri nɛ́ sirakɔlisiin dabataan (337 500), tire ti 'puu kapiɛngbuɔnnɔ liɛlɛ lè. 37 A pe 'Yewe liɛlɛ kɔ̀n lè ti nī: sìnbaala nɛ́ síkaala ní bèle, sirataanri nɛ́ togotaanri nɛ́ kpɔrigɔ nɛ́ kogunɔ (675).
38 Nìɛyɛ siramuʔɔyɔ kacɛri (36 000) 'puu baa, a pe 'Yewe liɛlɛ kɔ̀n lè tire nī: nìɛyɛ togotaanri nɛ́ kpɔrigɔ nɛ́ siin. 39 Sèfɛngɛlɛ siramuʔɔyɔ kɔlisiin nɛ́ sirakiɛ nɛ́ siin nɛ́ dabataan (30 500) 'puu baa, a pe 'Yewe liɛlɛ kɔ̀n lè tire nī: sèfɛngɛlɛ togotaanri nɛ́ nigbe.
40 Siɛnnɛ siramuʔɔyɔ sicɛri (16 000) 'puu baa, a pe 'Yewe liɛlɛ kɔ̀n lè peli nī: siɛnnɛ togo nɛ́ kpɔrigɔ nɛ́ siin. 41 A Misa 'Yewe liʔɛlɛ ke mìɛni kɔ̀n nɛ̀ kɛn gàli ke 'puu kpuʔɔrɔ Yewe mɛ́ wè, nɛ́ ke kɛn kacuɔnriwɔ Eleyazari mɛ́ wè, majo bɛ̀ Yewe yé ki juu nɛ̀ gbɛ̀ngɛ wi mɛ́ wè.
42 Isirayɛli tògo siɛnsɛnminɛ liɛlɛ lire ni 'puu nàa lè, dàa Misa yé kɔ̀n dè dàa ní kapiɛngbuɔnnɔ pe yé pɛn dè, 43 ti yé puu sìnbaara nɛ́ síkaala bèle, siramuʔɔyɔ togosicɛri nɛ́ sicɛri nɛ́ sirakɔlisiin dabataan (337 500), 44 nɛ́ nìɛyɛ siramuʔɔyɔ kacɛri (36 000), 45 nɛ́ sèfɛngɛlɛ siramuʔɔyɔ kɔlisiin nɛ́ sirakiɛ nɛ́ siin dabataan (30 500), 46 nɛ́ siɛnnɛ siramuʔɔyɔ sicɛri (16 000). 47 A Misa 'Yewe liɛlɛ kɔ̀n lè ti nī: siɛnnɛ togosiin nɛ́ kpɔrigɔ ó kpɔrigɔ nī bèle, a wi 'siɛn nigbe láʔa nɛ̀ kɛn Yewe mɛ́; yajuuro togosiin nɛ́ kpɔrigɔ ó kpɔrigɔ nī dè, a wi 'yajuʔu nigbe láʔa nɛ̀ kɛn Yewe mɛ́. A wi 'ti mìɛni pínɛ nɛ̀ kɛn Leviiyé mɛ́ bèle bàli pe 'puu nɛ baara kúu dè Yewe Kòridiʔɛ nī gè, majo bɛ̀ Yewe cé ki juu nɛ̀ gbɛ̀ngɛ wi mɛ́ gè.
Kapiɛngbuɔnnɔ pe kinɛdɛnigɛ yakɔnrɔ dè
48 Kapiɛngbuɔnnɔ kàfɔlilɔ bèle, bàli pe 'puu siɛnnɛ sirakogunɔ (1 000) kàfɔlilɔ bèle nɛ́ siɛnnɛ dabataan (100) kàfɔlilɔ bèle, a peli 'pɛn nɛ̀ pɛ́nì yéri Misa yiʔɛ mɛ́ gè 49 nɛ́ ti juu wi mɛ́ nɛ́ jo: «Weli nyɛ́nì kapiɛngbuɔnnɔ tɔ́ri bèle bàli pe 'puu weli fànʔa laara gè; siɛn nigbe sì cɛ́nì fɔ̀n pe nīʔ. 50 Kire nɛ̄ a weli we mìɛni nigbe nigbe 'pɛn nɛ́ tiɛ yɛrɛ dáà ní dè, dàa weli 'taa baa kapiɛngbuɔndiʔɛ nī gè, tire dī kɔli gòpiige kájingele gèle nɛ́ kajigemɛ kájingele gèle, nɛ́ fìʔile, nɛ́ ngbótogolo gèle, nɛ́ sɛmidingele gèle. Tire yē kpuʔɔrɔ dáà ní weli pɛn dè bè ki yaʔa Yewe- weli kàsulugo suɔ gè wi yiʔɛ mɛ́ gè.»
51 A Misa nɛ́ kacuɔnriwɔ Eleyazari pe 'yɛrɛ suɔ dè pe mɛ́, tire yē tiɛ yɛrɛ dáà pe yé kpúɔn dè. 52 Tiɛ ŋáà ní siɛnnɛ sirakogunɔ (1 000) kàfɔlilɔ nɛ́ siɛnnɛ dabataan (100) kàfɔlilɔ pe yé pɛn wè nɛ̀ pɛ́nì kɔ̀n nɛ̀ kɛn Yewe mɛ́ wè kpuʔɔrɔ dè, wi lúbugogɛnnɛ ni 'puu culolo tekacɛri nɛ́ sicɛri (184)h. 53 Gìi sí gī baa gè, kapiɛngbuɔnnɔ pe mìɛni nigbe nigbe yé siɛnnɛ fùʔuro bèle.
54 A Misa nɛ́ kacuɔnriwɔ Eleyazari ní wè a pe 'tiɛ yɛrɛ suɔ dè pe mɛ́ dàa ní pe kàfɔlilɔ pe yé pɛn dè, siɛnnɛ sirakogunɔ (1 000) kàfɔlilɔ bèle nɛ́ siɛnnɛ dabataan (100) kàfɔlilɔ bèle. A pe 'pɛn nɛ́ ti ní Kpàlidiʔɛ Kpátaʔa mɛ́ gè kire ga buu a Yewe ti nyaa wi de sɔ̀ngí de taʔa nɛ́ Isirayɛli siɛnnɛ ní bèle.