Jígemununɔ kakuɔrɔ kúɔgɛnmɛ bè
19
1 A Yewe 'juu nɛ́ Misa nɛ́ Arawɔn ní wè nɛ́ pe yɛ: 2 «Ki n'gɛ fànʔa kele gálì ke yē Fànʔa Siɛnrɛ nī dè, dàa mi Yewe 'juu nɛ̀ gbɛ̀ngɛ nɛ́ jo:«-Ki juu Isirayɛli siɛnnɛ mɛ́ bèle ma pe yɛ peri báan nɛ́ nɛ̀nuunyiɛwɛ ní, ŋàa wī cìiliwe nɛ́ ní kpɔlidiɛlɛ fùn, nɛ́ míɛni ŋàa nɛ̄ pe fìɛ zuu puɔ wèʔ. 3 Yeli bé wi kɛn kacuɔnriwɔ Eleyazari mɛ́ wè; wire bé wi cò bè yige bùguro kàduʔu mɛ́ gè dí pe sí wi kɔni wi nyaamɛ nɛ̄ bè.
4 «Bà kacuɔnriwɔ Eleyazari wi bé nɛ̀nuu sìsiɛn káà tàbi nɛ́ kabiɛlɛ ní, bè ki nyɛri nyɛri tɔliyɔ kɔlisiin Kpàlidiʔɛ Kpátaʔa wìile kɔli mɛ́ gè. 5 Pe bé sí nɛ̀nuu wi mìɛni sórigo wi nyaamɛ nɛ̄ bè: sɛ̀ngɛ gè yo, nɛ́ kaara ní dè, nɛ́ sìsiɛn ní gè, nɛ́ wi fire ní dè. 6 Bà kacuɔnriwɔ wi bé sɛdiri tiige lège líɛ, bé isɔpi wɛrɛ líɛ, nɛ́ jèsii ŋáà wī nyìɛwɛ kpólokpolo wè, bè ti mìɛni wáa kàsun sunʔɔmɔ nī bè gàa nī nɛ̀nuu wiī nɛ sóri wè.
7 «Kire kàduʔumɛ, kacuɔnriwɔ wi bé wi burudo jíge dè bé sí gbéli. Kire kàduʔumɛ wi bé jíin bùguro nī dè, kire nɛ́ ki mìɛni wi bé kò núʔɔwɔ Yewe yiʔɛ mɛ́ gè fúɔ bè taa bè nɔ̀ cɛngɛnyɛnijiin lɛ̀lɛ nī lè. 8 Ŋàa wi 'nɛ̀nuu sórigo wè, wire míɛni bé wi burudo jíge dè nɛ́ luʔɔ ní gè bé sí gbéli. Kire nɛ́ ki míɛni wi bé kò núʔɔwɔ Yewe yiʔɛ mɛ́ gè fúɔ bè pa nɔ̀ cɛngɛnyɛnijiin lɛ̀lɛ nī lè.
9 «Nàguɔ wáà ŋàa wi 'cìiliwe wè, wire bé nɛ̀nuu wi cúnʔɔ kɔ̀n gè bè sa ki tɛ́ngɛ bùguro kàduʔu mɛ́ gè, tiɛciilige káà nī. Kire pe béri líi bèri jígemununɔ kakuɔrɔ luʔɔa kpínʔini gè Isirayɛli tògo siɛnnɛ mɛ́ bèle. Kire gī kapiʔile kàsulugo wuʔu gè. 10 Siɛn ŋáà wi yé nɛ̀nuu cúnʔɔ koli gè, wire míɛni bé wi burudo jíge dè, kire nɛ́ ki mìɛni wi bé kò núʔɔwɔ Yewe yiʔɛ mɛ́ gè fúɔ bè taa bè nɔ̀ cɛngɛnyɛnijiin lɛ̀lɛ nī lè. Kire bé puu fànʔa kaala lɛ̀lɛ ó lɛ̀lɛ nī Isirayɛli siɛnnɛ mɛ́ bèle, nɛ́ míɛni nabɔnwɔ ŋáà wi yē tɛ́niwɛ pe sunʔɔmɔ nī bè.
11 «Siɛn ŋáà wi 'cò nɛ̀ taa kpúu nɛ̄ wè, a ki cɛ́nì nyaa kpúu ó kpúu yo ŋàa wī lewiiwe wè, kire siɛn wi bé kò núʔɔwɔ cɛnyɛ kɔlisiin. 12 Wi bé wìi cìile nɛ́ jígemununɔ kakuɔrɔ luʔɔ ní gè cɛnyɛ taanriwuʔu nɛ̄ gè nɛ́ cɛnyɛ kɔlisiinwuʔu nɛ̄ gè, bà wi bé kò cìiliwe. Nɛ̀ sí ki yaʔa, a wiì fɔ̀li nɛ̀ wìi cìileʔ cɛnyɛ taanriwuʔu nɛ̄ gè nɛ́ cɛnyɛ kɔlisiinwuʔu nɛ̄ gèʔ, wi bé kò núʔɔwɔ.
13 «A ŋìi sí cò nɛ̀ taa kpúu nɛ̄ wè, lewiiwe ŋáà wi 'kùu wè, a siɛn wiì fɔ̀li nɛ̀ wìi cìile wèʔ, wiī nɛ Yewe Kòridiʔɛ nɔ́ri gè wī; kire siɛn wi bé yige péwu Isirayɛli siɛnnɛ nī bèle. Nɛ́ ki cɛ́n wiì fɔ̀li nɛ̀ pe yaʔa pe- jígemununɔ kakuɔrɔ luʔɔ nyɛri nyɛri gè wi nɛ̄ʔ; wi bé kò núʔɔwɔ, wi fuɔnrɔ míɛni ti bé kò wi nɛ̄.
14 «Ni n'nɛ fànʔa kajuulo náà ni siɛnnɛ tánʔagɛnmɛ tìí bè, a wàa 'kùu baa fɛ̀ni saʔa laamɛ nī bè. Bàli pe mìɛni bīɛlɛ fɛ̀ni saʔa nī gè, nɛ́ bàli mìɛni pe jíin baa bèle, pe bé sí kò núʔɔnɔ cɛnyɛ kɔlisiin. 15 Yalege ó yalege gáà ki bé puu múguyaʔaga gè, gàa piyè tɔ́n gèʔ, kire míɛni bé kò núʔɔgɔ.
16 «A siɛn ó siɛn cò nɛ̀ taa kpúu nɛ̄ nyàʔa nī gè, ŋàa wī siɛn wáà wi 'wi kpúu wè, kire ga laa ŋàa wi 'kùu wìimɛ wè, a ki cɛ́nì nyaa siɛn kácege gī yo, kire ga laa nyɛgɛ gī yo, kire siɛn wi bé sí kò núʔɔwɔ Yewe yiʔɛ mɛ́ gè cɛnyɛ kɔlisiin.
17 «Bè siɛnnuʔɔwɔ cìile wè, yeli bé nɛ̀nuu wi cúnʔɔ líɛ gè, ŋàa pe 'sórigo kapiʔile kàsulugo kakuɔrɔ wuu wè, bè ki le yalege káà nī, bé pìndiɛlɛ laciilige le ki nī. 18 Siɛnciiliwe wáà bé isɔpi wɛrɛ líɛ dè bè ti le luʔɔ gáà nī gè bé ki nyɛri nyɛri fɛ̀ni saʔa nɛ̄ gè, nɛ́ ki yɛrɛ ní dè nɛ́ siɛnnɛ ní bèle bàli bīɛlɛ baa ki nī bèle.
«Siɛn ŋáà wi 'cò nɛ̀ taa siɛn kácege nɛ̄ gè, kire ga laa kpúu nɛ̄ wè ŋàa siɛn 'kpúu wè kire ga laa ŋàa wi 'kùu wìimɛ wè, á kire ga laa ŋàa wi 'cò nɛ̀ taa nyɛgɛ nɛ̄ gè, siɛnciiliwe wi bé wi nyɛri nyɛri míɛni nɛ́ luʔɔ gáà ní gè. 19 Siɛn ŋáà wī cìiliwe wè, wire wi bé luʔɔ gáà nyɛri nyɛri gè ŋàa nɛ̄ wi yē núʔɔwɔ wè Yewe yiʔɛ mɛ́ gè cɛnyɛ taanriwuʔu nɛ̄ gè nɛ́ cɛnyɛ kɔlisiinwuʔu nɛ̄ gè, bà ki bé kpíʔile dí wí kò cìiliwe cɛnyɛ kɔlisiinwuʔu nɛ̄ gè. Kire tiʔɛ nī gè, siɛn wi bé wi burudo jíge dè bé sí gbéli nɛ́ luʔɔ ní gè. Cɛngɛnyɛnijiin lɛ̀lɛ nī lè, wi bé yiʔɛ bè kò cìiliwe.
20 «Nɛ̀ sí ki yaʔa a siɛn wáà 'kò núʔɔwɔ Yewe yiʔɛ mɛ́ gè, nɛ́ sí cíi, wiì fɔ̀li nɛ̀ wìi cìile wèʔ, kire siɛn wi bé yige péwu Isirayɛli tògo siɛnnɛ nī bèle, nɛ́ ki cɛ́n wi nyɛ́nì saawalidɛngɛgɛ núʔɔ gè. Bà wiì fɔ̀li nɛ̀ pe yaʔa pe- jígemununɔ kakuɔrɔ luʔɔ nyɛri nyɛri gè wi nɛ̄ʔ, kire nɛ̄ wi 'kò núʔɔwɔ.
21 «Kire bé kò fànʔa kaala pe sunʔɔmɔ nī bè lɛ̀lɛ ó lɛ̀lɛ nī. Ŋàa sí wi nyɛ́nì jígemununɔ kakuɔrɔ luʔɔ nyɛri nyɛri gè, wi 'yɛli bè wi burudo jíge dè. Ŋàa míɛni sí wi cò nɛ̀ taa jígemununɔ kakuɔrɔ luʔɔ nɛ̄ gè, wire bé kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè. 22 Nɛ́ míɛni siɛn ŋáà wi 'wìi núʔɔ Yewe yiʔɛ mɛ́ gè, a wi 'cò nɛ̀ taa yɛgɛ káà nɛ̄, kire yɛgɛ ki bé kò núʔɔgɔ; a siɛn wáà pɛ́nì cò nɛ̀ taa kire yɛgɛ nɛ̄ gè, kire siɛn míɛni wi bé kò núʔɔwɔ fúɔ bè pa nɔ̀ cɛngɛnyɛnijiin lɛ̀lɛ nī lè.»