Miriyami wi 'kùu
20
1 Yiɛlɛ ni yebelige nī gèa, a Isirayɛli tògo siɛnnɛ pe mìɛni sɛ́nì nɔ̀ Zɛnɛ waama kùlo nɛ̄ lè, a pe 'tɛ́ni baa Kadɛsi kàʔa táanni gè.Kire tiʔɛ kire nī Miriyamib wi 'kùu, a pe 'wi tɔ́n baa.
Kàsii 'yɛ̀ baa Mɛriba tiʔɛ mɛ́ gè
2 A ki pɛ́nì nyaa luʔɔ sì yé ń'nɛ̀ pɛ́nì taʔa Isirayɛli siɛnniʔɛmɛ mɛ́ bèʔ. A pe 'pìye kɔ́ri nɛ̀ sɛ́nì gbuʔulo Misa nɛ́ Arawɔn yiʔɛ mɛ́ gè. 3 A pe 'yɛ̀ nɛ̀ kúnʔɔri Misa nɛ̄ wè, nɛ́ jo: «A ki yé cɛ́nì nyaa a weli 'kùu nɛ́ weli wuulo ní bèle o, lɛ̀lɛ líì nī Yewe 'weli kpúɔn nɛ́ wuʔɔgbuʔɔ ní gèc, kire sǐ cî pɔ́ri lé ! 4 Gáa nɛ̄ muɔ 'weli kɔ́ri nɛ̀ pɛn náʔa gè waama kùlo náà nī lè, weli bálì bīɛlɛ Yewe siɛnnɛ bèle ? Muɔ 'kire kpíʔile lé, kire ga buu weli ba kùu náʔa gè, weli nɛ́ weli yajuuro ní dè ? 5 Gáa nɛ̄ muɔ 'weli yige Ezipiti kùlo nī lè nɛ̀ pɛn nɛ́ weli ní náʔa tiɛpiʔi gáà nī gè ? Náʔa gè, wiyě gbɛ̀ yafiɛn tánʔaʔ ! Sàanfiidiige wè náʔa gèʔ, nɛ́ ɛrɛzɛn fétirige wè náʔa gèʔ, nɛ́ míɛni girenadi yasɛnrɛ wè náʔa gèʔ. Lapile nigbe cɛ wè bile bè gbuɔ náʔa gèʔ !»
6 A Misa nɛ́ Arawɔn 'yiri pe tògo sunʔɔmɔ nī bè nɛ̀ kɛ́ Kpàlidiʔɛ Kpátaʔa wìile mɛ́ lè. A pe sɛ́nì tuu nɛ̀ yiɛyɛ cúbulo yè dàala nɛ̄ lè. A Yewe cɛ̀nmɛ nɛ́ wi kpuɔmɔ pi 'fali nɛ̀ pìi tìɛ pe nɛ̄.
7 A Yewe 'juu nɛ́ Misa ní nɛ́ jo: 8 «-Muɔ kàgbiile líɛ lè, muɔ nɛ́ muɔ luɔ Arawɔn ní wè, ma siɛnnɛ yeri bèle ma gbuʔulo. Má sí juu nɛ́ kàdɛnigbaala ní lè siɛnnɛ nyaamɛ nɛ̄ bè, bà ki bé luʔɔ yige gè. Bà sí ki bé kpíʔile luʔɔ ki béri kɛ́ngi de yigi pe mɛ́ kàdɛnigbaala nī lè, bà muɔ bé Isirayɛli tògo siɛnnɛ kɛn bèle pe- gbuɔ, nɛ́ pe yajuuro ní dè.»
9 A Misa 'fali nɛ̀ kàgbiile líɛ lè, nàa ni 'puu Yewe yiʔɛ mɛ́ gè Kpàlidiʔɛ Kpátaʔa nī gè, nɛ̀ yɛli nɛ́ dàa ní Yewe cé juu nɛ̀ gbɛ̀ngɛ wi mɛ́ dè. 10 A Misa nɛ́ Arawɔn pe 'siɛnnɛ yeri bèle nɛ̀ gbuʔulo kàdɛnigbaala táanni lè, a Misa sí ki juu pe mɛ́ nɛ́ jo: «Yeri lúru mi mɛ́, yeli siɛnluʔubiɛnnɛ bálì bèle ! Weli 'yɛli lé bè luʔɔ yige kàdɛnigbaala náà nī lè bè kɛn yeli mɛ́ ?»
11 A Misa 'fali nɛ̀ wi kɔli yɛ̀gɛ gè nɛ̀ sɛ́nì kàdɛnigbaala kpúɔn lè tɔliyɔ siin nɛ́ wi kàgbiile ní lèd, a luʔɔ ki 'fali nɛ̀ yiri nìʔɛgɛ. A tògo siɛnnɛ pe 'gbuɔ, nɛ́ pe yajuuro ní dè.
12 A Yewe sí ki juu Misa nɛ́ Arawɔn mɛ́ nɛ́ jo: «ʔmʔm díɛʔ ! Yeli sì tɛ́ngɛ mi siɛnrɛ nɛ̄ dèʔ ! Yeli míɛni sì ki tìɛ Isirayɛli siɛnnɛ nɛ̄ bèle dí mi yē tiɛlɛ fùn ! Kire kɛnmɛ nɛ̄ yeli bɛ̀ʔ ye bé siɛnniʔɛmɛ báà nyɔ́gɔ bè kùlo nī lèʔ, nàa nyuɔ mi 'kún nɛ̀ kɛn pe mɛ́ lè.»
13 Tiʔɛ gáà kire gī Mɛribae luɔyɔ tiʔɛ gè (ki kɔri wire wī: kàsii). Kire tiʔɛ nī Isirayɛli siɛnnɛ pe 'puu nɛ kàsii caa Yewe mɛ́ wè, á wi 'ki tìɛ pe nɛ̄ dí wire 'nyuɔ nɛ́ ní tiɛlɛ fùn.
Edɔmi kùlofɔli wi 'cíi Isirayɛli siɛnnɛ nɛ̄ bèle
14 Bà pe 'puu baa Kadɛsi tiʔɛ nī gè, a Misa 'siɛnnɛ tun Edɔmi kùlofɔli mɛ́ wè, nɛ́ jo pe- sa wi yɛ: «Muɔ siinyɛni Isirayɛlif siɛnrɛ ti n'dɛ: muɔ nyɛ́nì ki cɛ́n fùrɔgɔ gáà 'weli taa gè. 15 Faʔa faʔa gè, weli tobilo pe yé kɛ́ Ezipiti kùlo mɛ́ lè, baa pe 'weli sii kire tiʔɛ nī gè yiɛniʔɛgɛlɛ gálì sunʔɔmɔ nī bè. Nɛ̀ ki yaʔa Ezipiti siɛnnɛ pe 'weli tobilo wuʔɔ bèle, nɛ̀ pɛ́nì weli wuʔɔ míɛni. 16 Bà weli sí kòkuʔulo wáa Yewe kúrugu wè, a wi 'ke lúʔu gèle, a wi 'tundunwɔ wáàg tun a wi pɛ́nì weli yige Ezipiti kùlo nī lè.
«Weli sí m'bɛlɛ náʔa Kadɛsi kàʔa nī gè, gàa gī muɔ kùlo láʔala nɛ̄ lè. 17 -Weli yaʔa weli- sùuri muɔ kùlo nī lè. Weli sì je tóri siiye nī yè nɛ́ ɛrɛzɛn siiye ní yèʔ. Weli sì je luʔɔ gbuɔ kɔ̀lɔlɔ nīʔ. Weli bé tóri yákuɔ wī kùlofɔli koligo nī gè. Weli sì je wàli kàliige mɛ́ʔ nɛ́ kàmɛgɛ mɛ́ʔ, fúɔ bè taa weli sa sùuri muɔ kùlo nī lèʔ.»
18 A Edɔmi kùlofɔli wi 'siɛnnugoro kɛn dè pe mɛ́ nɛ́ jo: «Yeli sǐ ga tíi tóri náʔa mi kùlo nī lèʔ ! A yeli 'kire kpíʔile, m'bé kapiɛnnɛ cáan yeli nɛ̄ wī !»
19 A Isirayɛli siɛnnɛ pe sí wi yɛ: «Fànʔafɔlilɔ koligo kire yákuɔ nī weli je tóri. A weli 'muɔ luʔɔ káà gbuɔ wè, kire ga laa weli yajuʔu gè, weli bé ki sàri muɔ mɛ́. Weli wè yafiɛn caa muɔ mɛ́ʔ, nɛ̀ yiri bè tánʔa sùuri yákuɔ wī muɔ kùlo nī lèʔ.»
20 A Edɔmi kùlofɔli wi 'jo: «Yeli sǐ ga tíi tóriʔ !»
A Edɔmi siɛnnɛ pe 'yiri nìʔɛnɛ nɛ́ kapiɛngbuɔn yɛrɛ ní dè Isirayɛli siɛnnɛ kúrugu bèle. 21 Bà Edɔmi kùlo wuulo pe 'cíi bèle nɛ́ jo Isirayɛli siɛnnɛ pe fǎga tóri peli kùlo nī lèʔ, a Isirayɛli siɛnnɛ pe 'màʔa nɛ̀ tóri kùlo ni kàduʔu mɛ́ gèh.
Arawɔn wi 'kùu
22 A Isirayɛli tògo siɛnnɛ pe mìɛni pe 'yiri Kadɛsi tiʔɛ nī gè nɛ̀ kɛ́ Wori nyagurugo mɛ́ gè.
23 A Yewe ń'nɛ̀ juu Misa nɛ́ Arawɔn ní wè baa Wori nyagurugo mɛ́ gè, Edɔmi kùlo láʔala nɛ̄ lè, nɛ́ jo: 24 «Arawɔn wiǐ mɔgɔ bé kùu bè kɛ́ wi tobilo kúrugu bèleʔ. Wiǐ ga tíi jíin kùlo nī lèʔ, nàa mi je kɛn Isirayɛli siɛnnɛ mɛ́ bèleʔ, nɛ́ ki cɛ́n yeli nyɛ́nì cíi, yeli sì lúʔu m'mɛ́ʔ, Mɛriba luɔyɔ wuʔu nɛ̄ gèʔ. 25 Kire nɛ̄ ma Arawɔn kɔ́ri wè nɛ́ wi jaa Eleyazari ní wè, ma tánʔa nɛ́ pe ní Wori nyagurugo nɛ̄ gè. 26 Muɔ bé kacuɔnrilɔ buruyo kɔ̀n yè Arawɔn nɛ̄ wè, bè ti le wi jaa Eleyazari nɛ̄ wè. Bà Arawɔn wire bé kùu baa bè kɛ́ wi tobilo kúrugu bèlei.»
27 A Misa 'fali nɛ̀ ki kpíʔile gàa Yewe yé juu nɛ̀ gbɛ̀ngɛ gè. A pe taanri pe 'tánʔa Wori nyagurugo nɛ̄ gè, Isirayɛli tògo siɛnnɛ pe mìɛni nyaamɛ nɛ̄. 28 A Misa wi 'Arawɔn burudo fòlilo dè nɛ̀ ti le Arawɔn jaa Eleyazari nɛ̄ wè. A Arawɔn wire 'kùu baa nyagurugo naamɛ gè. A Misa nɛ́ Eleyazari a peli 'koli nɛ̀ tìgi nyagurugo nɛ̄ gè. 29 Bà tògo siɛnnɛ pe mìɛni 'ki nyaa Arawɔn yé kùu wè, a Isirayɛli siɛnnɛ pe mìɛni pínɛ nɛ̀ kùugo kpíʔile gè fúɔ nɛ̀ taa cɛnyɛ togo nɛ́ kpɔrigɔ.