Tɔ́rilɔ 18

Kacuɔnrilɔ baara dè, saawalidɛngɛgɛ nī gè

1 A 'ki juu mɛ́ nɛ́ jo: «Muɔ nɛ́ muɔ jaala ní bèle, nɛ́ muɔ tuu kpáa wuulo ní bèle, yeli béri kolimɔ tugoro turu dè bàa pi bága de kpínʔini nɛ̄ gè. Muɔ nɛ́ muɔ jaala ní bèle, yeli béri kolimɔ tugoro turu dè bàa pi bága de kpínʔini baara nī dè.

2 «Muɔ bé muɔ siinyɛninɛ fàri bèle mìɛ nɛ̄, saʔa tùlugo wuulo bèle, pe- yeli sáʔa, muɔ nɛ́ muɔ jaala ní bèle, a yeli kɛ́ni yeli baara kúu dè Kpátaʔa yiʔɛ mɛ́ gè, tiʔɛ gáà gī yi tɛ́ngɛdiʔɛ gè. 3 Pe bé yeli sáʔa baara nɛ̄ dè bèri kpátaʔa baara ti mìɛni kúu, nɛ̀ ki yaʔa pe wàa sì yɛli bàga sìʔɛrɛ kpɔni saawalidɛngɛgɛ yakpiʔilide nɛ̄ dèʔ, nɛ́ ki ní gèʔ, kire ga buu pe wàa fǎga kùu pe nīʔ nɛ́ yeli míɛni ní bèleʔ. 4 Pe bé pínɛ vàri yeli nɛ̄ bèri baara ti mìɛni kúu dè baa nī gè. Siɛn wáà wiiyɛ sì yɛli bè sìʔɛrɛ kpɔni yeli nɛ̄ʔ.

5 «Yeli tíimɛ ye béri saawalidɛngɛgɛ baara kúu dè nɛ́ ki gbùʔɔrɔdiʔɛ yafanʔa wori ní dè, kire ga buu mi funyɛrigbuʔɔ ki fǎga tuu nɛ̄ bèleʔ.

6 «Ki sí n'gɛ, mi nyɛ́nì yeli siinyɛninɛ líɛ bèle sunʔɔmɔ nī bè. Pe yē wàlidɛngɛlɛ mi Yewe mɛ́; mi nyɛ́nì pe kɛn yeli mɛ́ peri Kpàlidiʔɛ Kpátaʔa baara kúu dè.

7 «Muɔ Arawɔn wè, muɔ nɛ́ muɔ jaala ní bèle, yeli béri kacuɔnrilɔ baara kúu dè dàa ti mìɛni dī gbùʔɔrɔdiʔɛ yafanʔa wori dè nɛ́ dàa dī baa gunbɔli fɛ̀ni kàduʔu mɛ́ gè. Mi nyɛ́nì kacuɔnrilɔ baara kɛn dè yeli mɛ́ yakɛngɛ; a siɛn wáà wiiyɛ sìʔɛrɛ nɛ̀ kpɔni saawalidɛngɛgɛ nɛ̄ gè, pe 'yɛli pe- kire siɛn kpúu wè.»

8 A Yewe 'ki juu Arawɔn mɛ́ wè nɛ́ jo: «Mi wè, kpuʔɔrɔ dáà piyē nɛ kɔ̀ngí nɛ kanʔa m'mɛ́ dè, m'bé muɔ tɛ́ngɛ muɔ de ti kàrigí. Dàa ti mìɛni Isirayɛliyé pe 'wàli nɛ̀ tɛ́ngɛ mi wori dè, m'bé tire kɛn muɔ mɛ́ nɛ́ muɔ jaala ní bèle yeli liɛlɛ. Tire bé puu fànʔa kaala lɛ̀lɛ ó lɛ̀lɛ nī.

9 «Ti n'dɛ dàa ti bé puu muɔ wori dè ti mìɛni nī dè, yacɛ̀njɛnrɛ wàlidɛngɛrɛ nī dè dàa kàsun wè nɛ sórigi dèʔ: yaliire yakɛnrɛ ti mìɛni dè, nɛ́ kaara ti mìɛni ní dè, nɛ́ kolimɔ kakuɔrɔ ti mìɛni ní dè dàa pe 'kɔ̀n m'mɛ́ dè. Tire yacɛ̀njɛnrɛ wàlidɛngɛrɛ dáà dè, ti bé puu muɔ nɛ́ muɔ jaala wori. 10 Yeli béri ti yacɛ̀njɛnrɛ wàlidɛngɛrɛ dáà káa dè; nàguɔ ó nàguɔ muɔ Arawɔn narigɛ nī gè wi bé gbɛ̀ri ti káa. Yeli béri tɔ́ri nɛ́ ti ní tiī wàlidɛngɛrɛ Yewe mɛ́ wè.

11 «Ki n'gɛ cígini dàa ti bé puu muɔ wori dè: kpuʔɔrɔ yɛrɛ dáà Isirayɛli siɛnnɛ piyē nɛ kɔ̀ngí nɛ kanʔa m'mɛ́ dè, m'bé muɔ liɛlɛ kɔ̀n lè ti nī, tire dáà dī dáà pe yɛ̀gí naamɛ Yewe yiʔɛ mɛ́ gè. Ti mìɛni dè m'bé ti kɛn muɔ mɛ́ nɛ́ muɔ jaala ní bèle, nɛ́ muɔ pórilo ní bèle. Ki bé puu fànʔa kaala lɛ̀lɛ ó lɛ̀lɛ nī. Muɔ saʔa wuulo pe mìɛni bèle, bàli pe bé puu cìilile bèle, pe mìɛni bé gbɛ̀ ti káa.

12 «Sùnmɔ báà bī fɔnbɔ nɛ́ ní cìilibe bè, nɛ́ ɛrɛzɛn luʔɔ cɛ̀ngɛ ní gè, nɛ́ yaliifɔnrɔ ní dè dàa dī cɛ̀nrɛ dè, ti pélide dáà pe kanʔa Yewe mɛ́ wè, m'bé ti kɛn yeli mɛ́. 13 Yaliipelide ti mìɛni dáà pe 'fáli dè níɛ̀ pɛ́nì Yewe liɛlɛ kɛn lè, ti mìɛni bé puu muɔ wori. Muɔ saʔa wuulo pe mìɛni bàli bīɛlɛ cìilile bèle, pe mìɛni bé gbɛ̀ ti káa.

14 «Yɛrɛ dáà ti mìɛni Isirayɛli siɛnnɛ pe bé láʔa bè kɛn Yewe mɛ́ péwu dè, tire bé puu muɔ wori. 15 Pìlaʔagɛnminɛ bálì ní Isirayɛli siɛnnɛ pe 'pɛn Yewe mɛ́ wè, a peli 'nyaa lewiiwe nàgabipeligele gèle kire ga laa yajuuro wuulo, pe mìɛni bé puu muɔ wuulo. Nɛ̀ ki yaʔa muɔ 'yɛli bè nàgabipeligele ke mìɛni fùgu bè suɔ, nɛ́ míɛni yajuuro dáà ti 'núʔɔ Yewe yiʔɛ mɛ́ gè, ti pìpelile bèle. 16 Nàgabipeligele ke mìɛni gálì ke 'yege nigbe taa gèle, muɔ bé ke fùgu bè suɔ wali nyuɔ gáà ní muɔ bé tìɛ gè, gàa gī walifiiwe walikpegele kogunɔ, bè yɛli nɛ́ Yewe saawalidɛngɛgɛ ki wali tɔ́rigɛnmɛ ní bè, ŋàa wi yē gera kpègele togo gèle.

17 «Nɛ̀ ki yaʔa muɔ sǐ ga tíi bé nɛ̀nuu pìpeliwe fùgu wè bè suɔʔ, a wi cɛ́nì yē sìnbacuɔ pìpeliwe yo, nɛ́ síkacuɔ pìpeliwe yo; peli yē wàlidɛngɛlɛ nɛ̀ kúɔ Yewe mɛ́ wè. Muɔ bé tire sìsiɛn wo gè gbùʔɔrɔdiʔɛ yafanʔa nɛ̄ gè, bé ti sùnmɔ tiɛyɛ sórigo yè baa. Yakɔnrɔ dī dàa kàsun ki sórigi dè, dàa nùdaanna ni nyɛ́ni Yewe fungo nyígi gè. 18 Kaara dè, tire bé puu muɔ wori, majo bɛ̀ dìribuu wori tíɛlɛ dè dàa muɔ 'tìɛ mi nɛ̄ nɛ́ ti yɛ̀gɛ naamɛ Yewe yiʔɛ mɛ́ gè, nɛ̀ fàri kàliige ciile wori nɛ̄ dè.

19 «Kpuʔɔrɔ wàlidɛngɛrɛ dáà ti mìɛni Isirayɛli siɛnnɛ piyē nɛ kɔ̀ngí nɛ kanʔa Yewe mɛ́ wè, m'bé ti kɛn muɔ mɛ́, muɔ nɛ́ muɔ jaala ní bèle nɛ́ muɔ pórilo ní bèle. Tire bé puu fànʔa kaala lɛ̀lɛ ó lɛ̀lɛ nī. Kire yē Yewe yiʔɛ mɛ́ gè, muɔ mɛ́ nɛ́ muɔ siimɛ ní bè, lɛ̀lɛ ó lɛ̀lɛ nī, gàa kiǐ gbɛ̀ yaʔa gèʔ.»

Kiɛkiɛwuʔulo ke bé puu Leviiyé kɔrigɔ

20 A 'ki juu mɛ́ nɛ́ jo: «Muɔ̌ ga tíi dàala taa kɔrigɔ kùlo nī lèʔ, kire ga laa bè liɛlɛ taa siɛnnɛ sunʔɔmɔ nī bèʔ kùlo nī lè nàa mi je kɛn Isirayɛli siɛnnɛ mɛ́ bèle. Mi wī mi bé puu yeli kɔrigɔ gè Isirayɛli siɛnnɛ sunʔɔmɔ nī bè. 21 Gìi gī baa gè, peli mɛ́ mi nyɛ́nì Isirayɛliyé kiɛkiɛwuʔulo kɛn gèle kɔrigɔ, ke- puu pe baara ti sàri dàa piyē nɛ kúu dè, baara ti mìɛni dè nī gè.

22 «Nɛ̀ líɛ píra ŋáà nī wè, Isirayɛli siɛnsɛnminɛ bèle, pe wàa sì yɛli bè sìʔɛrɛ kpɔni Kpàlidiʔɛ Kpátaʔa nɛ̄ gèʔ. A pe 'kire kpíʔile gè, peli pe bé pe kapiʔile tugoro tugo dè; pe bé sí kùu wī. 23  peli bīɛlɛ pe béri Kpàlidiʔɛ Kpátaʔa baara kúu dè, peli pe béri pe kolimɔ tugoro turu dè bàa pi kpínʔini kire tiʔɛ nī gè. Tire yè fànʔa kaala kɛ̀ngɛlɛ ke mìɛni mɛ́ lɛ̀lɛ ó lɛ̀lɛ nī. Leviiyé piyě dàala taa kɔrigɔ Isirayɛliyé sunʔɔmɔ nī bèʔ. 24 Nɛ́ ki cɛ́n Isirayɛli siɛnnɛ bèle, kiɛkiɛwuʔulo gàli piyē nɛ kɔ̀ngí pe yɛrɛ ti míɛni nɛ̄ dè níɛ ke kanʔa gèle Yewe mɛ́ wè, mi nyɛ́nì ke kɛn Leviiyé mɛ́ bèle kɔrigɔ. Kire kɛnmɛ nɛ̄ mi 'ki juu pe mɛ́ nɛ́ jo piyě kɔrigɔ yafiɛn taaʔ Isirayɛliyé sunʔɔmɔ nī bèʔ.»

Kiɛkiɛwuʔulo gálì Leviiyé pe bé kɛn Yewe mɛ́ wè

25 A 'ki juu mɛ́ nɛ́ jo: 26 «Ma kele gálì tìɛ gèle nɛ̄ bèle:

«A yeli kɛ́nì liʔɛlɛ taa gèle, kiɛkiɛwuʔulo gálì mi 'kɛn yeli mɛ́ kɔrigɔ gè, ye- ní koli ye kiɛkiɛwuʔulo kɔ̀n gèle tire nī, yè kɛn Yewe mɛ́ wè. Keli gīɛlɛ kiɛkiɛwuʔulo ke kiɛkiɛwuʔulo gèle. 27 Keli bé tɔ́ri yeli mɛ́ majo bɛ̀ kpuʔɔrɔ tíɛlɛ dàa yeli nyɛ́nì kɔ̀n nɛ̀ kɛn yaliipelide nɛ̄ dè dàa pe 'sɛ̀n kásuɔ tiʔɛ nī gè, nɛ́ míɛni ɛrɛzɛn luʔɔ nɛ̄ gè gàa ki 'yiri fórigodiʔɛ nī gè, majo bɛ̀ Isirayɛli siɛnsɛnminɛ pe ki kpínʔini gè.

28 «Bà ki bé kpíʔile dí yeli sí kpuʔɔrɔ kɔ̀n dè bè kɛn Yewe mɛ́ wè, dàa yeli 'kɔ̀n kiɛkiɛwuʔulo yɛrɛ nɛ̄ dè dàa yeli nɛ taʔa Isirayɛli siɛnnɛ mɛ́ bèle. Yeli bé kpuʔɔrɔ dáà kɛn dè mɛ́, tire dáà dī Yewe liɛlɛ lè. 29 Yakɛnrɛ dáà siɛnnɛ pe 'kɛn yeli mɛ́ dè, yeli bé yeli kpuʔɔrɔ 'kɔ̀n dè bè kɛn Yewe mɛ́ wè; yakɛnrɛ dáà ti 'sɔ́migɔ nɛ̀ nyuɔ dè, yeli bé tàa tiiyɛ kɔ̀n ti nɛ̄ ti- puu kpuʔɔrɔ wàlidɛngɛrɛ wori dè m'mɛ́.

30 «Muɔ bé ní kele gálì tìɛ gèle pe nɛ̄ cígini:

«A yeli kɛ́nì yaliicɛ̀nrɛ kɔ̀n dè dàa ti 'sɔ́migɔ nɛ̀ nyuɔ dè, sɛnrɛ ti bé kò yeli Leviiyé mɛ́ bèle majo yaliipelide yakɛnrɛ dī dàa yeli 'sɛ̀n kásuɔ tiʔɛ nī gè, nɛ́ míɛni luʔɔ gáà ki 'yiri fórigodiʔɛ nī gè. 31 Yeli bé gbɛ̀ ti káa nɛ́ yeli nariyɛ ní yè tiʔɛ ó tiʔɛ nī, nɛ́ ki cɛ́n tire dī yeli sàri wè, baara dáà yeli nɛ kúu nī gè. 32 Kire sǐ nyaa yeli mɛ́ kolimɔ tugoroʔ a yeli kɛ́nì ti wecɛ̀nrɛ táà kɔ̀n nɛ̀ kɛn Yewe mɛ́ wè; kire sǐ nyaa yeli nyɛ́nì Isirayɛli siɛnnɛ yakɔnrɔ wàlidɛngɛrɛ núʔɔ dè Yewe yiʔɛ mɛ́ gèʔ; yeli sǐ kùuʔ.»