Yewe wi 'Keyatiyé baara tìɛ dè
4
1 A Yewe 'juu nɛ́ Misa nɛ́ Arawɔn ní wè nɛ́ pe yɛ: 2 «Píra ŋáà nī wè, ye- Keyatiyé tɔ́ri bèle Leviiyé sunʔɔmɔ nī bè. Ye- pe tɔ́ri nɛ̀ yɛli nɛ́ pe nariyɛ ní yè nɛ́ pe tobilo kpáaya ní yè.3 «Ye- ki séli bàli nɛ̄ pe yiʔɛlɛ togo nɛ́ kpɔrigɔ taa wè bè sa nɔ̀ yiʔɛlɛ togosiin nɛ́ kpɔrigɔ nɛ̄ wè, bàli pe mìɛni bīɛlɛ pe bé gbɛ̀ baara kúɔ dè Kpàlidiʔɛ Kpátaʔa nī gè.
4 «Baara ti n'dɛ dàa Keyatiyé pe béri kúu Kpàlidiʔɛ Kpátaʔa nī gè: peli bīɛlɛ pe béri yacɛ̀njɛnrɛ wàlidɛngɛrɛ wéli dè. 5 Lɛ̀lɛ ó lɛ̀lɛ nī, a kári lɛ̀lɛ ni kɛ́nì nɔ̀ a pe je bùguro yɛ̀gɛ dè, Arawɔn nɛ́ wi jaala peli pe bé pa kíni tugoro suʔulo dè. Pe bé gunbɔli fɛ̀ni tìrige wè bè wi tíʔɛ bè nyakungɛngɛ finʔɛgɛ tɔ́n gè, 6 bé sí ki tɔ́n nɛ́ sɛ̀nguʔu káà ní, bé sí ní ki tɔ́n nɛ́ fɛ̀nikpuɔwɔ wáà ní ŋàa wī gàri céri dè, bé sí finʔɛgɛ ki kàgbiʔile le gèle ki nɛ̄ bèri ki turua.
7 «Pe bé ní gàri céri fɛ̀nikpuɔwɔ wáà tíʔɛ bè búrutaʔa tabali tɔ́n wèb, bé sí tasaala taʔa bèle tabali nɛ̄ wè, nɛ́ tàkuuwori ní dè, nɛ́ lakuucɛngɛlɛ ní gèle, nɛ́ kakuɔrɔ diviɛn kàjuʔɔlɔ ní gèle. Búru ŋáà pe tɛ́ngi mi yiʔɛ mɛ́ gè, wire bé kò baa súuri tabali nɛ̄ wè. 8 Pe bé ti mìɛni pínɛ dɔ́n nɛ́ fɛ̀nikpuɔwɔ nyìɛwɛ kpólokpolo wáà ní, bé sí ní ti tɔ́n nɛ́ sɛ̀nguʔu káà ní, bé sí tabali wi kàgbiʔile le gèle wi nɛ̄ bèri wi líi.
9 «Kire kàduʔumɛ pe bé ní gàri céri fɛ̀nikpuɔwɔ wáà tíʔɛ bè fètindaʔagɛlɛ tiige tɔ́n gè gàa ki kpìɛnmɛ cáanri bè, nɛ́ ki fètingele ní gèle, nɛ́ ke fígiyɛgɛlɛ ní gèle nɛ́ cúnʔɔ yalegele ní gèle, nɛ́ ki sùnmɔ yalegele ní gèle gàli pe tíʔi nɛ fètingele baara kúu dè. 10 Pe bé fètindaʔagɛlɛ tiige nɛ́ ki yakpiʔilide ti mìɛni pínɛ bè le sɛ̀nguʔu káà ní, bé sí ti mìɛni puɔ bè tùɔn tugodugo kàgbiile nɛ̄ lè.
11 «Pe bé ní gàri céri fɛ̀nikpuɔwɔ wáà tíʔɛ bè wusuna sórigodiʔɛ tɔ́n gè, gàa gī tiɛ cɛ̀nwɛ wuʔu gè, bé sí ní ki tɔ́n nɛ́ sɛ̀nguʔu káà ní, bé sí ki kàgbiʔile le gèle ki nɛ̄ bèri ki turu. 12 Pe bé yakpiʔilide ti mìɛni líɛ dàa ní pe baara kúu dè saawalidɛngɛgɛ nī gè, bé ti le gàri céri fɛ̀nikpuɔwɔ wáà nī, bé sí ní ti tɔ́n nɛ́ sɛ̀nguʔu káà ní, bé sí ti mìɛni puɔ bè tùɔn tugodugo kàgbiile nɛ̄ lè.
13 «Pe bé gbùʔɔrɔdiʔɛ yafanʔa cúnʔɔ kɔ̀n gè, bé sí kábebe céri fɛ̀nikpuɔwɔ yáligɛ wè gbùʔɔrɔdiʔɛ nɛ̄ gè. 14 Pe bé gbùʔɔrɔdiʔɛ ki yakpiʔilide ti mìɛni líɛ dàa ní pe ki baara kúu dè bè ti taʔa fɛ̀nikpuɔwɔ nɛ̄ wè: ki tingbopigele gèle, nɛ́ ki gànʔana dɛ̀ngɛlɛ ní gèle, kaara wuʔulo gèle, nɛ́ ki yakɔnyɔ ní yè, nɛ́ ki sìsiɛn nyɛri tasaadurulo ní bèle, kire 'jo nɛ́ ki yakpiʔilide ti mìɛni ní dè. Pe bé sí ti mìɛni tɔ́n nɛ́ sɛ̀nguʔu káà ní, bé sí gbùʔɔrɔdiʔɛ ki kàgbiʔile le gèle ki nɛ̄ bèri ki turu.
15 «A Arawɔn nɛ́ wi jaala pe kɛ́nì saawalidɛngɛgɛ yɛrɛ ti mìɛni suʔulo nɛ̀ ti puɔ nɛ̀ kúɔ dè nɛ́ saawalidɛngɛgɛ yakpiʔilide ní dè, kári lɛ̀lɛ nī lè bùguro yɛ̀gɛ lɛ̀lɛ nī lè, kire lɛ̀lɛ lire yákuɔ nī Keyatiyé pe bé pɛn bè pa yɛrɛ tugo dè. Piyè cɛ́nì yɛli wīʔ bága cò daa yawalidɛngɛgɛ káà nigbe nɛ̄ʔ, á kire 'laa pe bé kùu wī. Kpàlidiʔɛ Kpátaʔa yɛrɛ dáà tire ti bé puu Keyatiyé tugoro dè.
16 «Gàa ki 'Eleyazari kúɔ wè, kacuɔnriwɔ Arawɔn jaa wè, wire wi béri yɛrɛ dáà wéli dè: sùnmɔ báà pe béri nii fètingele nī gèle, nɛ́ nùdaanna wusuna ní wè, nɛ́ cɛngɛ ó cɛngɛ yaliire yakɛnrɛ ní dè nɛ́ siɛnnyiɛnɛgɔn sùnmɔ ní bè. Wi béri Kòridiʔɛ wéli gè nɛ́ yɛrɛ dáà ti mìɛni ní dè baa ki laamɛ nī bè, nɛ́ saawalidɛngɛgɛ ní gè nɛ́ ki yakpiʔilide ti mìɛni ní dè.»
17 A Yewe 'juu nɛ́ Misa nɛ́ Arawɔn ní wè nɛ́ pe yɛ: 18 «Yeri ki ciʔige kire ga buu Keyatiyé nariyɛ yi fǎga cúʔɔ bè yiri Leviiyé nī bèleʔ. 19 Ye- gàa kire kpíʔile pe mɛ́ kire ga buu pe- kò sìi nɛ̄ pe fǎga kùuʔ a pe kɛ́nì sìʔɛrɛ nɛ̀ kpɔni yacɛ̀njɛnrɛ wàlidɛngɛrɛ nɛ̄ dèʔ: Arawɔn nɛ́ wi jaala peli pe bé pa siɛn ó siɛn yérige wi yéridiʔɛ nī gè, bé sí ki tìɛ wi nɛ̄ gàa wi 'yɛli bè kpíʔile gè nɛ́ tugoro díì wi 'yɛli bè tugo dè. 20 Keyatiyé piyè yɛli bè jíin saawalidɛngɛgɛ nī gè bè sa yacɛ̀nrɛ wàlidɛngɛrɛ dáà nyaa dèʔ, piyè cɛ́nì yɛli bè ti nyaa púlo wīʔ, a kire 'laa gè, pe bé kùu wī !»
Yewe 'Gerisɔnyé baara tìɛ dè
21 A Yewe sí ń'nɛ̀ ki juu Misa mɛ́ nɛ́ jo: 22 «Ma koli ma Gerisɔnyé tɔ́ri bèle narigɛ ó narigɛ nī, nɛ́ pe tobilo kpáaya ní yè. 23 Ye- ki séli bàli nɛ̄ pe yiʔɛlɛ togo nɛ́ kpɔrigɔ taa wè bè sa nɔ̀ yiʔɛlɛ togosiin nɛ́ kpɔrigɔ nɛ̄ wè, bàli pe mìɛni bīɛlɛ pe bé gbɛ̀ baara kúɔ dè Kpàlidiʔɛ Kpátaʔa nī gè.
24 «Baara ti n'dɛ dàa Gerisɔnyé nariyɛ yi béri kúu dè nɛ́ tugoro dáà ní pe 'yɛli bèri turu dè: 25 Kòridiʔɛ ki fɛ̀niwɛyɛ yè nɛ́ Kpàlidiʔɛ Kpátaʔa ki yatɔngɔ ní gè, nɛ́ yatɔngɔ gáà pe 'kpíʔile nɛ́ sɛ̀nguʔu ní gè, kire gáà ki 'ki mìɛni tɔ́n gè, nɛ́ Kpàlidiʔɛ Kpátaʔa wìile ni fɛ̀ni ní wè. 26 Dàligɛ gáà nɛ̄ Kòridiʔɛ ki yē gè nɛ́ Yewe gbùʔɔrɔdiʔɛ yafanʔa ní gè, pe béri ki dàligɛ sùlufɛninɛ turu bèle, nɛ́ ki nàkpanʔa wìile tɔ́nfɛni ní wè, nɛ́ fɛ̀ninɛ pe màʔagɛlɛ ní gèle, nɛ́ Kòridiʔɛ ki yakpiʔilide ti mìɛni ní dè. Gerisɔnyé peli bīɛlɛ pe béri yɛrɛ dáà ti mìɛni wéli dè béri ti baara kúu dè. 27 Arawɔn nɛ́ wi jaala ní bèle, peli pe béri Gerisɔnyé baara dáà ti yiʔɛ kínigi gè, kire 'jo tugoro dáà pe 'yɛli bèri turu dè nɛ́ baara dáà pe 'yɛli bèri kúu dè. Tire baara dè, Arawɔn nɛ́ wi jaala peli pe 'yɛli bèri ti wéli.
28 «Dàa tire dī Gerisɔnyé nariyɛ baara dè Kpàlidiʔɛ Kpátaʔa nī gè. Itamari wè, kacuɔnriwɔ Arawɔn jaa wè, wire wi béri Gerisɔnyé baara dáà ti yiʔɛ kínigi gè.»
Yewe 'Mɛrariiyé baara tìɛ dè
29 «Ma koli ma Mɛrariiyé tɔ́ri bèle narigɛ ó narigɛ nī, nɛ́ pe tobilo kpáaya ní yè. 30 Ye- ki séli bàli nɛ̄ pe yiʔɛlɛ togo nɛ́ kpɔrigɔ taa wè bè sa nɔ̀ yiʔɛlɛ togosiin nɛ́ kpɔrigɔ nɛ̄ wè, bàli pe mìɛni bīɛlɛ pe bé gbɛ̀ baara kúɔ dè Kpàlidiʔɛ Kpátaʔa nī gè.
31 «Ti n'dɛ tugoro dáà pe 'yɛli bèri turu dè pe baara nī dè Kpàlidiʔɛ Kpátaʔa nī gè: Kòridiʔɛ ki tingele gèle, nɛ́ ki kàgbiiparigɛlɛ ní gèle, nɛ́ ki tiindugugolo ní gèle, nɛ́ ki táanmɛ nyùyɔ ní yè, 32 nɛ́ tiindugugolo gálì ke 'Kòridiʔɛ dàligɛ sùlu gè nɛ́ ke táanmɛ nyùyɔ ní yè, ke tínganʔana gèle nɛ́ ke màʔagɛlɛ ní gèle, nɛ́ ki baakuɔyɛrɛ ní dè. Yeli bé ki tìɛ siɛn ó siɛn nɛ̄ yɛrɛ dáà wi 'yɛli bèri turu dè. 33 Dàa tire dī Mɛrariiyé nariyɛ baara dè Kpàlidiʔɛ Kpátaʔa nī gè. Itamari wè, kacuɔnriwɔ Arawɔn jaa wè, wi béri pe wéli pe sí de baara dáà kúu dè.»
Leviiyé pe mìɛni nyuɔ gè
34 A Misa nɛ́ Arawɔn nɛ́ Isirayɛli tògo siɛnnɛ pe kàfɔlilɔ ní bèle, a pe 'Keyatiyé tɔ́ri bèle narigɛ ó narigɛ nī, nɛ́ pe tobilo kpáaya ní yè, 35 nɛ̀ ki séli bàli nɛ̄ pe 'yiʔɛlɛ togo nɛ́ kpɔrigɔ taa wè bè sa nɔ̀ yiʔɛlɛ togosiin nɛ́ kpɔrigɔ nɛ̄, bàli pe mìɛni bīɛlɛ pe bé gbɛ̀ baara kúɔ dè Kpàlidiʔɛ Kpátaʔa nī gè. 36 Pe mìɛni bìnɛ wi 'puu pe nariyɛ nī yè nàguɔlɔ sirakiɛ nɛ́ taanri nɛ́ tekɔlisiin nɛ́ kpɔrigɔ (2 750). 37 Keyatiyé pe nyuɔ kire ki 'puu gàa gè, pe nariyɛ nī yè, bìli pe 'puu nɛ baara Kpàlidiʔɛ Kpátaʔa nī gè. Misa nɛ́ Arawɔn yé pe tɔ́ri, nɛ̀ yɛli nɛ́ dàa ní Yewe yé tóri Misa mɛ́ wè nɛ́ ti juu nɛ̀ gbɛ̀ngɛ dè.
38-41 A Misa nɛ́ Arawɔn pe 'Gerisɔnyé tɔ́ri bèle kanumɔ nɛ̄ bè, bìli pe 'puu nɛ baara Kpàlidiʔɛ Kpátaʔa nī gè; pe nyuɔ ki 'puu nàguɔlɔ sirakiɛ nɛ́ taanri nɛ́ togo nɛ́ kpɔrigɔ (2 630). 42-45 A pe 'Mɛrariiyé tɔ́ri bèle kanumɔ nɛ̄ bè; pe nyuɔ ki 'puu nàguɔlɔ sirakiɛ nɛ́ kɔlini (3 200). Misa nɛ́ Arawɔn yé pe tɔ́ri, nɛ̀ yɛli nɛ́ dàa ní Yewe yé tóri Misa mɛ́ wè nɛ́ ti juu nɛ̀ gbɛ̀ngɛ dè.
46 A Misa nɛ́ Arawɔn nɛ́ Isirayɛli siɛnnɛ pe kàfɔlilɔ ní bèle, a pe 'Leviiyé tɔ́ri bèle narigɛ ó narigɛ nī, nɛ́ pe tobilo kpáaya ní yè, 47 nɛ̀ ki séli bàli nɛ̄ pe 'yiʔɛlɛ togo nɛ́ kpɔrigɔ taa wè bè sa nɔ̀ yiʔɛlɛ togosiin nɛ́ kpɔrigɔ nɛ̄ wè, bàli pe mìɛni bīɛlɛ pe bé gbɛ̀ baara kúɔ dè Kpàlidiʔɛ Kpátaʔa nī gè, béri ki tugoro turu dè. 48 Pe nyuɔ ki 'puu nàguɔlɔ siramuʔɔyɔ siin, sirasiin nɛ́ tekacɛri (8 580).
49 A pe 'siɛnnɛ tɔ́ri bèle nɛ̀ yɛli nɛ́ dàa ní Yewe yé tóri Misa mɛ́ wè nɛ́ ti juu nɛ̀ gbɛ̀ngɛ dè, nɛ́ siɛn ó siɛn baara tìɛ dè wi nɛ̄ nɛ́ tugoro dáà wi 'yɛli bèri turu dè, nɛ̀ yɛli nɛ́ dàa ní Yewe yé juu nɛ̀ gbɛ̀ngɛ Misa mɛ́ wè.